നിയമസഭ തിരഞ്ഞെടുപ്പുമായി ബന്ധപ്പെട്ട് പത്തനംതിട്ട ജില്ലയിലെ വിവിധ നിയോജക മണ്ഡലങ്ങളിലെ സ്ഥാനാര്‍ഥികളോ അവരുടെ ഏജന്റമാരോ രാഷ്ട്രീയ പാര്‍ട്ടികളോ ഓഡിറ്റോറിയം, കമ്മ്യൂണിറ്റി ഹാള്‍ എന്നിവ പരിപാടികള്‍ക്കായി ബുക്ക് ചെയ്യുന്ന പക്ഷം പരിപാടിയുടെ തീയതി, സമയം എന്നിവ സ്ഥാപനം സ്ഥിതിചെയ്യുന്ന പ്രദേശം ഉള്‍പ്പെടുന്ന നിയോജക മണ്ഡലത്തിന്റെ ചുതലയുള്ള അസ്സിസ്റ്റന്റ്‌റ് എക്‌സ്‌പെന്‍ഡിച്ചര്‍ ഒബ്സര്‍വറെ രേഖാമൂലം അറിയിക്കണം. expmcpta@gmail.com എന്ന ഇ-മെയില്‍ വിലാസത്തിലും അറിയിക്കാം. കൂടാതെ ഇലക്ഷന്‍ കാലയളവിലുള്ള മറ്റ് ബുക്കിംഗ് വിവരങ്ങളും അറിയിക്കണം.

കേരള സ്റ്റേറ്റ് റൂട്രോണിക്സ് സര്‍ട്ടിഫിക്കറ്റോടെ തിരുവനന്തപുരം ആറ്റിങ്ങല്‍ അംഗീകൃത പഠനകേന്ദ്രങ്ങളിലേക്ക് ഒരുവര്‍ഷം ദൈര്‍ഘ്യമുള്ള പ്രൊഫഷണല്‍ ഡിപ്ലോമ ഇന്‍ ഹോസ്പിറ്റല്‍ അഡ്മിനിസ്‌ട്രേഷന്‍ കോഴ്‌സിലേക്ക് അപേക്ഷ ക്ഷണിച്ചു. യോഗ്യത : പ്ലസ് ടു.ഫോണ്‍ :  7994926081

കുന്നന്താനം കമ്യൂണിറ്റി സ്‌കില്‍ പാര്‍ക്കില്‍ 100 ശതമാനം പ്ലേസ്‌മെന്റോടെ ഇലക്ട്രിക്ക് വെഹിക്കിള്‍ സര്‍വീസിങ് പരിശീലനം നടത്തുന്നു. 18-40 വയസുവരെ പ്രായമുള്ള പ്ലസ് ടു യോഗ്യതയുള്ള ഉദ്യോഗാര്‍ഥികള്‍ക്ക് അപേക്ഷിക്കാം. അവസാന തീയതി ഏപ്രില്‍ 6. ഫോണ്‍ : 9495999688.
 

കുടുംബശ്രീ ജില്ലാ മിഷന്റെ നേതൃത്വത്തില്‍ തിരുവല്ല ബുക്ക് ഡിപ്പോയില്‍ നിന്ന് 2026-27 വര്‍ഷത്തെ  സ്‌കൂള്‍ പാഠപുസ്തകം വിവിധ സ്‌കൂള്‍ സൊസൈറ്റികളിലേക്ക് വിതരണം ചെയ്യുന്നതിന് വാഹന ഉടമകളില്‍ നിന്ന് കരാര്‍ അടിസ്ഥാനത്തില്‍ ഡ്രൈവര്‍, ഡീസല്‍ സഹിതം  വാഹനം ലഭ്യമാക്കുന്നതിന് ക്വട്ടേഷന്‍ ക്ഷണിച്ചു. അവസാന തീയതി മാര്‍ച്ച് 30 വൈകിട്ട് മൂന്ന്. ഫോണ്‍ : 0468 2221807.
 

നിയമസഭ  തിരഞ്ഞെടുപ്പ് പൂര്‍ണമായും ഹരിതചട്ടം പാലിച്ച്  നടത്തുന്നതിന്റെ ഭാഗമായി 'ഹരിതനിയമസഭാതിരഞ്ഞെടുപ്പ്: സംശയങ്ങളും മറുപടികളും'എന്ന കൈപുസ്തകം ജില്ലാകലക്ടര്‍ എസ്. പ്രേംകൃഷ്ണന്‍ ചേംബറില്‍ പ്രകാശനം ചെയ്തു. തിരഞ്ഞെടുപ്പ് പ്രക്രിയയില്‍ മാലിന്യങ്ങള്‍ പരമാവധി കുറയ്ക്കാനും പരിസ്ഥിതി സൗഹൃദ സാമഗ്രികള്‍ മാത്രം ഉപയോഗിക്കാനും ഉദ്യോഗസ്ഥരെയും പൊതുജനങ്ങളെയും സജ്ജരാക്കുകയാണ് ലക്ഷ്യം. തിരുവല്ല, ആറന്മുള, റാന്നി, കോന്നി, അടൂര്‍ എന്നീ അഞ്ച് മണ്ഡലങ്ങളിലെയും പ്രിസൈഡിംഗ് ഓഫീസര്‍മാര്‍ക്കും ഫസ്റ്റ് പോളിംഗ് ഓഫീസര്‍മാര്‍ക്കും ഹരിതചട്ടപാലനത്തെക്കുറിച്ച് പ്രത്യേക പരിശീലന ക്ലാസ് നല്‍കി.

നിയമസഭാ തിരഞ്ഞെടുപ്പുമായി ബന്ധപ്പെട്ട പെരുമാറ്റച്ചട്ടലംഘനം ശ്രദ്ധയില്‍പെട്ടാല്‍ പൊതുജനങ്ങള്‍ക്ക് പരാതിപ്പെടാനുള്ള സി-വിജില്‍  മൊബൈല്‍ ആപ്പ് വഴി പത്തനംതിട്ട ജില്ലയില്‍ (വ്യാഴം) ഇതുവരെ ലഭിച്ചത് 3173 പരാതി. 3149 പരാതിക്ക് നടപടി സ്വീകരിച്ചു. ജില്ലാ കണ്‍ട്രോള്‍ റൂമില്‍ സി വിജില്‍ ആപ്പ് മുഖേന ലഭ്യമാകുന്ന പരാതി  ബന്ധപ്പെട്ട ഫീല്‍ഡ് യൂണിറ്റിലേയ്ക്ക് കൈമാറി 100 മിനിറ്റിനുള്ളില്‍ പരിഹാരം കാണുന്ന വിധത്തിലാണ് ആപ്പ് ക്രമീകരിച്ചിട്ടുള്ളത്.

നിയമസഭ തിരഞ്ഞെടുപ്പുമായി ബന്ധപ്പെട്ട് പത്തനംതിട്ട ജില്ലയില്‍ ആന്റി ഡീഫേയ്‌സ്‌മെന്റ് സ്‌ക്വാഡിന്റെ നേതൃത്വത്തില്‍ ഇതുവരെ (മാര്‍ച്ച് 25) നീക്കം ചെയ്തത് 9074 പ്രചാരണ സാമഗ്രികള്‍. 8130 പോസ്റ്റര്‍,  371 ബാനര്‍, 573 മറ്റ് പ്രചരണ ബോര്‍ഡ് എന്നിവയാണ് നീക്കം ചെയ്തത്. മാതൃക പെരുമാറ്റച്ചട്ടം നോഡല്‍ ഓഫീസര്‍ ഡി എം ഡെപ്യൂട്ടി കലക്ടര്‍ ജി സുരേഷ് ബാബു, അസിസ്റ്റന്റ് നോഡല്‍ ഓഫീസര്‍ കിഫ്ബി സ്‌പെഷ്യല്‍ തഹസില്‍ദാര്‍ ജി ആനന്ദ് എന്നിവരുടെ മേല്‍നോട്ടത്തിലാണ് സ്‌ക്വാഡിന്റെ പ്രവര്‍ത്തനം.

നിയമസഭ തിരഞ്ഞെടുപ്പിനോടനുബന്ധിച്ച്് സമ്മതിദായകര്‍ക്ക് വോട്ടര്‍പ്പട്ടികയില്‍ പേരുണ്ടോയെന്നും ഏതാണ് പോളിങ് ബൂത്തെന്നും ഓണ്‍ലൈനായി സ്വയം കണ്ടെത്താം. വിവരങ്ങള്‍ മൂന്ന് രീതിയില്‍ പരിശോധിക്കാനാകും. ആദ്യമായി https://electoralsearch.eci.gov.in/ എന്ന പേജില്‍ പ്രവേശിച്ച് സെര്‍ച്ച് ബൈ എപിക് (search by epic) ഓപ്ഷന്‍ തിരഞ്ഞെടുത്ത് എപിക് നമ്പര്‍ നല്‍കി സംസ്ഥാനം തിരഞ്ഞെടുത്താല്‍ മണ്ഡലം, ബൂത്ത് എന്നിവയുടെ വിവരം ലഭിക്കും. രണ്ടാമത്തെ രീതി ഇതേ പേജില്‍ സെര്‍ച്ച് ബൈ ഡീറ്റെയില്‍സ് തിരഞ്ഞെടുക്കണം. ശേഷം സംസ്ഥാനം, ഭാഷ, വോട്ടറുടെ പേര്, വയസ്/ ജനന തീയതി നല്‍കണം.

നിയമസഭ തിരഞ്ഞെടുപ്പുമായി  ബന്ധപ്പെട്ട് ജില്ലയിലെ അച്ചടിശാല ഉടമസ്ഥര്‍ പ്രചരണ സാമഗ്രികള്‍ പ്രിന്റ് ചെയ്യാന്‍ സത്യവാങ്മൂലം വാങ്ങി സ്ഥാപനത്തില്‍ സൂക്ഷിക്കണം. നിയോജക മണ്ഡലങ്ങളിലെ ഏതെങ്കിലും സ്ഥാനാര്‍ഥിയോ ഏജന്റോ പൊളിറ്റിക്കല്‍ പാര്‍ട്ടിയോ പോസ്റ്റര്‍, ബാനര്‍, മറ്റ് പ്രചരണ സാമഗ്രി എന്നിവ പ്രിന്റ് ചെയ്യാന്‍ സമീപിക്കുന്ന പക്ഷം പ്രിന്റിംഗ് ജോലി ഏല്‍പ്പിക്കുന്ന പരിചിതരായ രണ്ട് വ്യക്തികള്‍ സാക്ഷ്യപ്പെടുത്തിയ ഒരു സത്യവാങ്മൂലം സ്ഥാപനത്തില്‍ സൂക്ഷിക്കണം.

നിയമസഭ തിരഞ്ഞെടുപ്പിന്റെ ഭാഗമായി സ്വീപ് - വോട്ടേഴ്‌സ് ബോധവല്‍ക്കരണ പരിപാടി 'ജനാധിപത്യത്തിന്റെ പെണ്‍കരുത്ത്' പത്തനംതിട്ട അഴൂര്‍ സര്‍ക്കാര്‍ മെഡിക്കല്‍ ഓഫീസേഴ്സ് ഹാളില്‍ കുടുംബശ്രീ ജില്ലാ മിഷന്‍ കോ ഓഡിനേറ്റര്‍ എസ് ആദില ഉദ്ഘാടനം ചെയ്തു. സ്വീപ് ജില്ല നോഡല്‍ ഓഫീസര്‍ ടി. ബിനുരാജ് അധ്യക്ഷനായി. ജില്ലാ ഭരണകൂടം, സ്വീപ്പ്, കുടുംബശ്രീ പത്തനംതിട്ട ജില്ലാ മിഷന്‍ എന്നിവ സംയുക്തമായാണ് ബോധവല്‍ക്കരണം സംഘടിപ്പിച്ചത്. തിരഞ്ഞെടുപ്പ് പ്രക്രിയയില്‍ സ്ത്രീ വോട്ടര്‍മാരുടെ പങ്കാളിത്തം വര്‍ധിപ്പിച്ച് ജനാധിപത്യ സംവിധാനം കൂടുതല്‍ ശക്തിപ്പെടുത്തുക എന്നതാണ് പരിപാടിയുടെ ലക്ഷ്യം.