വെള്ളമുണ്ട ഇലക്ട്രിക്കല്‍ സെക്ഷനു കീഴില്‍ നാലാം മൈല്‍ ട്രാന്‍സ്‌ഫോര്‍മര്‍ പരിധിയിലും, പുലിക്കാട് -കുന്നുമ്മലങ്ങാടി റോഡ്, കല്ലോടി - കമ്മോം റോഡ് ഭാഗത്തും ജൂണ്‍ രണ്ടിന് 8.30 മുതല്‍ 5.30വരെ വൈദ്യുതി വിതരണം മുടങ്ങും. 

മെയ് മാസത്തെ പച്ചത്തേയിലയുടെ വില 14.87 രൂപയായി നിശ്ചയിച്ചതായി അസിസ്റ്റന്റ് ഡയറക്ടര്‍ അറിയിച്ചു. പച്ച തേയിലയുടെ വില തീര്‍പാക്കുമ്പോള്‍ ഫാക്ടറികള്‍ ശരാശരി വില പാലിച്ച് വിതരണക്കാര്‍ക്ക് നല്‍കണം

മാനന്തവാടി ഗവ. കോളേജ് ക്യാമ്പസില്‍ പ്രവര്‍ത്തിക്കുന്ന ഗവ. മോഡല്‍ ഡിഗ്രി കോളേജ് റൂസയില്‍ സൈക്കോളജി, ജോഗ്രഫി വിഷയങ്ങളില്‍ അതിഥി അധ്യാപകരെ നിയമിക്കുന്നു. കോളേജ് വിദ്യാഭ്യാസ വകുപ്പിന്റെ ഔദ്യോഗിക പോര്‍ട്ടലില്‍ രജിസ്റ്റര്‍ ചെയ്തിട്ടുള്ള നിര്‍ദിഷ്ട യോഗ്യതയുള്ള ഉദ്യോഗാര്‍ത്ഥികള്‍ ഒറിജിനല്‍ സര്‍ട്ടിഫിക്കറ്റുകളും പകര്‍പ്പും സഹിതം കോളേജില്‍ അഭിമുഖത്തിനെത്തണം. ജൂണ്‍ അഞ്ചിന് രാവിലെ 10.30ന് ജോഗ്രഫി വിഷയത്തിന്റേതും ജൂണ്‍ എട്ടിന് രാവിലെ 10.30ന് സൈക്കോളജിയുടെയും അഭിമുഖം നടക്കും. 

മീനങ്ങാടി ഗവ പോളിടെക്‌നിക് കോളേജിലെ തുടര്‍ വിദ്യാഭ്യാസ കേന്ദ്രത്തില്‍ ജൂണില്‍ ആരംഭിക്കുന്ന റഫ്രിജറേഷന്‍ ആന്റ് എയര്‍ കണ്ടീഷനിംഗ്, ഇലക്ട്രിക്കല്‍ വയറിങ് ആന്റ് സര്‍വ്വീസിങ് എന്നീ ഹ്രസ്വകാല തൊഴിലധിഷ്ഠിത കോഴ്‌സുകളിലേക്ക് അപേക്ഷ ക്ഷണിച്ചു. പത്താം ക്ലാസ് യോഗ്യതയുളളവര്‍ക്ക് അപേക്ഷിക്കാം. കോഴ്‌സ് പൂര്‍ത്തിയാക്കുന്നവര്‍ക്ക് പ്ലേസ്‌മെന്റ് ലഭിക്കും.ഫോണ്‍- 9744134901, 9847699720

വിധവകള്‍ക്ക് സംരക്ഷണം നല്‍കുന്ന ബന്ധുവിനു പ്രതിമാസം ആയിരം രൂപ ധനസഹായം നല്‍കുന്ന അഭയകിരണം പദ്ധതിക്ക് വനിതാ ശിശുവികസന വകുപ്പ് അപേക്ഷ ക്ഷണിച്ചു. 50 വയസ്സ് പിന്നിട്ട മുന്‍ഗണനാ വിഭാഗത്തില്‍ ഉള്‍പ്പെടുന്ന, വാര്‍ഷിക വരുമാനം ഒരു ലക്ഷം രൂപ കവിയാത്ത, പ്രായപൂര്‍ത്തിയായ മക്കളില്ലാത്ത വിധവകള്‍ക്ക് അഭയം നല്‍കുന്ന ബന്ധുവിനാണ് ധനസഹായം നല്‍കുന്നത്. www.schemes.wed.kerala.gov.in എന്ന വെബ്‌സൈറ്റിലൂടെ ഡിസംബര്‍ 15നകം അപേക്ഷ സമര്‍പ്പിക്കണം. മുന്‍വര്‍ഷം ധനസഹായം ലഭിച്ചവരും അപേക്ഷിക്കണമെന്നു ജില്ലാ വനിതാ ശിശുവികസന ഓഫീസര്‍ അറിയിച്ചു. ഫോണ്‍:04936-296362

കാലവര്‍ഷക്കെടുതിയില്‍ മരങ്ങള്‍ വീണുള്ള അപകടങ്ങള്‍ ഒഴിവാക്കാന്‍ സ്വകാര്യ വ്യക്തികളുടെ സ്ഥലങ്ങളിലെ അപകടകരമായ മരങ്ങള്‍ സ്വന്തം ചെലവില്‍ മുറിച്ചു മാറ്റണമെന്ന് പനമരം ഗ്രാമപഞ്ചായത്ത് സെക്രട്ടറി അറിയിച്ചു. വീഴ്ച വരുത്തിയാല്‍ ഉണ്ടാകുന്ന സാമ്പത്തിക കഷ്ട നഷ്ടങ്ങള്‍ക്ക് ഉടമസ്ഥര്‍ക്കായിരിക്കും ഉത്തരവാദിത്തം. 2005-ലെ ദുരന്ത നിവാരണ നിയമപ്രകാരം നടപടി സ്വീകരിക്കും. ഫോണ്‍ 04935220772

കളിചിരികളുടെ ആരവത്തോടെ ജില്ലയിലെ സ്‌കൂളുകള്‍ ഒന്നാം തരത്തിലേക്കുള്ള പ്രവേശനം ആഘോഷമാക്കി. പെരിക്കല്ലൂര്‍ ഗവ ഹയര്‍ സെക്കന്ററി സ്‌കൂളില്‍ കൃഷി വകുപ്പ് മന്ത്രി ടി. സിദ്ദിഖ് ജില്ലാതല പ്രവേശനോല്‍സവം ഉദ്ഘാടനം ചെയ്തു. കുട്ടികള്‍ക്ക് സ്‌നേഹത്തോടെയുള്ള പരിപാലനവും ചേര്‍ത്തുപിടിക്കലും നല്‍കി, ആധുനിക ലോകത്തിന്റെ വൈജ്ഞാനിക ഭൂപടത്തിലേക്ക് അവരെ ഉയര്‍ത്തിക്കൊണ്ടുവരാനുള്ള ഇടമായി വിദ്യാഭ്യാസ കാലഘട്ടത്തെ മാറ്റണമെന്ന് മന്ത്രി പറഞ്ഞു. വിദ്യാലയങ്ങള്‍ സന്തോഷം പരത്തുന്ന ഇടങ്ങളായി മാറണം. നാളെയുടെ പ്രകാശമായ കുട്ടികള്‍ ചിരിച്ചു കൊണ്ട് പഠിക്കണം. കുട്ടികള്‍ വളര്‍ന്നു വരുമ്പോള്‍ ചില സന്ദര്‍ഭങ്ങളില്‍ 'നോ' പറയേണ്ടി വരും.

മലപ്പുറം ജില്ലയിലെ 27 സബ് രജിസ്ട്രാര്‍ ഓഫീസുകള്‍, രണ്ടു ജില്ലാ രജിസ്ട്രാര്‍ ഓഫീസുകള്‍ എന്നിവിടങ്ങളില്‍ 2026-27 സാമ്പത്തിക വര്‍ഷത്തേക്ക് ആവശ്യമായ വിവിധ മോഡലിലുള്ള ലൈസര്‍ പ്രിന്ററുകളുടെ ടോണര്‍ കാട്രിഡ്ജുകള്‍ റീഫില്‍ ചെയ്യുന്നതിന് ക്വട്ടേഷന്‍ ക്ഷണിച്ചു. ക്വട്ടേഷനുകള്‍ ജൂണ്‍ 23നകം ജില്ലാ രജിസ്ട്രാര്‍ (ജനറല്‍), ജില്ലാ രജിസ്ട്രാര്‍ (ജനറല്‍) ഓഫീസ്, ബി 2 ബ്ലോക്ക്, സിവില്‍ സ്‌റ്റേഷന്‍, മലപ്പുറം എന്ന വിലാസത്തില്‍ ജൂണ്‍ 23 വൈകുന്നേരം അഞ്ചിനകം ലഭിക്കണം. ഫോണ്‍- 0483- 2734883.

ജില്ലാതല പൊലീസ് കംപ്ലൈന്റ് അതോറിറ്റിയുടെ നിലവിലെ ചെയര്‍പേഴ്‌സന്റെ നിയമന കാലാവധി അവസാനിച്ചിച്ചതിനാല്‍ ജൂണ്‍ 11, 12 തിയതികളില്‍ രാവിലെ 10.30 മുതല്‍ മലപ്പുറം കളക്ടറേറ്റില്‍ നടത്തുവാന്‍ നിശ്ചയിച്ചിരുന്ന സിറ്റിങ് മാറ്റി. പുതുക്കിയ തിയതി പിന്നീട് അറിയിക്കും.

ന്യൂനപക്ഷ ക്ഷേമ വകുപ്പിന് കീഴില്‍ കാവുംപുറം മമ്പ ഉല്‍ ഹുദാ സെക്കന്റഡറി മദ്രസയില്‍  പ്രവര്‍ത്തിക്കുന്ന ന്യൂനപക്ഷ യുവജനതക്കുള്ള  പരിശീലന കേന്ദ്രത്തില്‍ ജൂലൈ ഒന്നിന് ആരംഭിക്കുന്ന ആറു മാസം ദൈര്‍ഘ്യമുള്ള സൗജന്യ പി.എസ്.സി പരിശീലന ബാച്ചുകളിലേക്ക് ജൂണ്‍ മൂന്നു മുതല്‍ അപേക്ഷിക്കാം. പി.എസ്.സി, യു.പി.എസ്.സി, എസ്.എസ്.സി, ബാങ്കിങ് തുടങ്ങി മത്സര പരീക്ഷകള്‍ക്ക് തയ്യാറെടുക്കുന്ന 18 മുതല്‍ 43 വയസ്സ് വരെയുള്ളവര്‍ക്ക് അപേക്ഷിക്കാം. ഉദ്യോഗാര്‍ഥികളുടെ സൗകര്യമനുസരിച്ച് റെഗുലര്‍, ഹോളിഡേ ബാച്ചുകള്‍ ലഭ്യമാണ്.