നിയമസഭ തിരഞ്ഞെടുപ്പുമായി ബന്ധപ്പെട്ട് രാഷ്ട്രീയ പാര്‍ട്ടികളും സ്ഥാനാര്‍ഥികളും നല്‍കുന്ന പരസ്യങ്ങളുടെ പ്രീ-സര്‍ട്ടിഫിക്കേഷനു വേണ്ടിയുള്ള മീഡിയ സര്‍ട്ടിഫിക്കേഷന്‍ ആന്‍ഡ് മോണിറ്ററിങ് കമ്മിറ്റി (എം.സി.എം.സി) സെല്ലിന്റെയും മാധ്യമ നിരീക്ഷണത്തിനുള്ള മീഡിയ സെല്ലിന്റെയും ഉദ്ഘാടനം ജില്ലാ കലക്ടര്‍ എസ് പ്രേം കൃഷ്ണന്‍ നിര്‍വഹിച്ചു. ജില്ലാ ഇന്‍ഫര്‍മേഷന്‍ ഓഫീസിലാണ്  സെല്ലിന്റെ പ്രവര്‍ത്തനം.  

അസാപ് കേരളയുടെ കുന്നന്താനം കമ്യൂണിറ്റി സ്‌കില്‍ പാര്‍ക്കില്‍ ഇലക്ട്രിക്ക് വാഹന സര്‍വീസിങ് പരിശീലനത്തിന് അപേക്ഷ ക്ഷണിച്ചു. 15 ദിവസത്തെ പരിശീലന പരിപാടിയില്‍ 20 പേര്‍ക്കാണ് അവസരം. പ്രായപരിധി ബാധകമല്ല. അവസാന തീയതി മാര്‍ച്ച് 25.  ഫോണ്‍ :  9495999688.
 

ജില്ലയിലെ എല്‍പിജി  വിതരണം സുഗമമായി നടത്തണമെന്ന് ജില്ല കലക്ടര്‍ എസ് പ്രേം ക്യഷ്ണന്‍  അറിയിച്ചു.  ജില്ലയിലെ എല്‍.പി.ജി വിതരണ ഏജന്‍സികളുടെയും ഓയില്‍  കമ്പനി  പ്രതിനിധികളുടെയും സിവില്‍ സപ്ലൈസ്  ഉദ്യോഗസ്ഥരുടെയും കലക്ടറേറ്റ് ചേംബറില്‍ നടന്ന സംയുക്ത യോഗത്തില്‍ സംസാരിക്കുകയായിരുന്നു കലക്ടര്‍.  ഗ്യാസ് ഏജന്‍സികളുടെ ഗോഡൗണില്‍ നിന്ന് നേരിട്ട് സപ്ലൈ നടത്താന്‍ പാടില്ലെന്നും ഗാര്‍ഹിക സിലിണ്ടര്‍ ബുക്കിങ്ങിന്റെ മുന്‍ഗണന  അനുസരിച്ച് ഉപഭോക്താക്കളുടെ വീടുകളിലേക്ക് നേരിട്ട്  സിലിണ്ടറുകള്‍ ഡെലിവറി ചെയ്യുന്നതിന് ജില്ല കലക്ടര്‍ നിര്‍ദ്ദേശിച്ചു.

നിയമസഭ തിരഞ്ഞെടുപ്പ് പെരുമാറ്റച്ചട്ട ലംഘനങ്ങള്‍ക്കെതിരെ ജില്ലയിലെ നിയോജക മണ്ഡലങ്ങളില്‍
സ്‌ക്വാഡ് പ്രവര്‍ത്തനം ഊര്‍ജിതപ്പെടുത്തി. ജില്ലയില്‍ ആറ് വീഡിയോ സര്‍വെയലന്‍സ് ടീം അഞ്ച് വീഡിയോ വ്യൂവിംഗ് ടീം എന്നിവയാണുള്ളത്. മാതൃക പെരുമാറ്റച്ചട്ടം നോഡല്‍ ഓഫീസര്‍ കിഫ്ബി സ്‌പെഷ്യല്‍ തഹസില്‍ദാര്‍ ജി ആനന്ദിന്റെ മേല്‍നോട്ടത്തിലാണ് സ്‌ക്വാഡിന്റെ പ്രവര്‍ത്തനം.

മണ്ഡലതല വീഡിയോ സര്‍വെയലന്‍സ് ടീം ചാര്‍ജ് ഓഫീസര്‍മാര്‍, ഫോണ്‍ നമ്പര്‍ എന്ന ക്രമത്തില്‍

നിയമസഭാ തിരഞ്ഞെടുപ്പുമായി ബന്ധപ്പെട്ട് ജില്ലയില്‍ പ്രചരണ സാമഗ്രികള്‍ അച്ചടിക്കാന്‍ സമീപിക്കുന്നവരില്‍ നിന്ന് പ്രിന്റിംഗ് പ്രസ് ഉടമകള്‍ സത്യവാങ്മൂലം വാങ്ങി സൂക്ഷിക്കണമെന്ന് തിരഞ്ഞെടുപ്പ് വിഭാഗം അറിയിച്ചു. തിരുവല്ല, അടൂര്‍, ആറന്മുള, കോന്നി, റാന്നി നിയോജകമണ്ഡലങ്ങളിലെ ഏതെങ്കിലും സ്ഥാനാര്‍ഥികള്‍, അവരുടെ ഏജന്റുമാര്‍, സ്ഥാനാര്‍ഥികള്‍ക്കായി മറ്റാരെങ്കിലും, രാഷ്ട്രീയ പാര്‍ട്ടികള്‍ എന്നിവര്‍ പോസ്റ്റര്‍, ബാനര്‍ മറ്റ് പ്രചരണ സാമഗ്രികള്‍ എന്നിവ അച്ചടിക്കാന്‍ സമീപിക്കുന്ന പക്ഷം പ്രിന്റിംഗ് ജോലി ഏല്‍പ്പിക്കുന്നവരില്‍ നിന്ന് സത്യവാങ്മൂലം വാങ്ങി സൂഷിക്കണം.

നിയമസഭാ തിരഞ്ഞെടുപ്പിനോട് അനുബന്ധിച്ച് സര്‍ക്കാര്‍, പൊതു- സ്വകാര്യ ഇടങ്ങളില്‍ സ്ഥാപിച്ചിട്ടുള്ള പോസ്റ്റര്‍ നീക്കം ചെയ്യുക, ഔദ്യോഗിക വാഹനങ്ങളോ സര്‍ക്കാര്‍ താമസസൗകര്യങ്ങളോ രാഷ്ട്രീയ പാര്‍ട്ടികളോ സ്ഥാനാര്‍ഥികളോ ദുരുപയോഗം ചെയ്യാതിരിക്കുക, പൊതുഖജനാവില്‍ നിന്നുള്ള പണം ഉപയോഗിച്ചുള്ള പരസ്യം നിരോധിക്കുക തുടങ്ങിയവ കര്‍ശനമായി പാലിക്കാന്‍ തിരഞ്ഞെടുപ്പ് കമ്മീഷന്‍ ആവശ്യപ്പെട്ടു.

നിയമസഭാ തിരഞ്ഞെടുപ്പുമായി ബന്ധപ്പെട്ട് ദൃശ്യ- ശ്രവ്യ മാധ്യമങ്ങളിലൂടെ സ്ഥാനാര്‍ഥികളും വ്യക്തികളും നല്‍കുന്ന പരസ്യങ്ങള്‍ക്ക് ജില്ലാതല മീഡിയ സര്‍ട്ടിഫിക്കേഷന്‍ ആന്‍ഡ് മോണിറ്ററിങ് കമ്മിറ്റിയുടെ മുന്‍കൂര്‍ അംഗീകാരം നിര്‍ബന്ധം. സര്‍ട്ടിഫിക്കേഷന്‍ ഇല്ലാതെ പരസ്യം പ്രചാരണത്തിന് ഉപയോഗിക്കുന്നത് ചട്ടവിരുധമാണ്. ടെലിവിഷന്‍ ചാനല്‍, പ്രാദേശിക കേബിള്‍ ചാനല്‍, സ്വകാര്യ എഫ് എം ഉള്‍പ്പെടെയുള്ള റേഡിയോ, സിനിമ തീയേറ്റര്‍, പൊതു സ്ഥലങ്ങളിലും സാമൂഹിക മാധ്യമങ്ങളിലും നല്‍കുന്ന ഓഡിയോ, വിഡിയോ ഡിസ്പ്ലേ, ബള്‍ക്ക് എസ്എംഎസ്, വോയ്സ് മെസേജ്, ഇ-പേപ്പര്‍ തുടങ്ങിയവയിലൂടെ നല്‍കുന്ന പരസ്യങ്ങള്‍ക്കും മുന്‍കൂര്‍ അനുമതി നിര്‍ബന്ധം.

കാഴ്ച്ചശക്തി ഇല്ലാത്തവര്‍ക്കും അനാരോഗ്യം നേരിടുന്നവര്‍ക്കും വോട്ട് ചെയ്യുന്നതിന് 18 വയസില്‍ കുറയാത്ത  സഹായിയെ പോളിംഗ് ബൂത്തില്‍ അനുവദിക്കും. ബാലറ്റ് യൂണിറ്റിലെ ചിഹ്നങ്ങള്‍ തിരിച്ചറിയാനോ കൃത്യമായ ബട്ടണ്‍ അമര്‍ത്തി വോട്ട് ചെയ്യാനോ ശേഷിയില്ലാത്തവര്‍ക്കും വോട്ടിങ് കംപാര്‍ട്ട്മെന്റില്‍ സഹായിയെ കൊണ്ടുപോകാം. സ്വയം വോട്ട് ചെയ്യാന്‍ ശേഷിയുള്ള വോട്ടര്‍മാര്‍ക്കൊപ്പം എത്തുന്ന സഹായികള്‍ക്ക് വോട്ടിങ് കംപാര്‍ട്ട്മെന്റിനുള്ളില്‍ പ്രവേശനം ഉണ്ടാകില്ല. സാഹചര്യമനുസരിച്ച് പ്രിസൈഡിംഗ് ഓഫീസറാണ് തീരുമാനമെടുക്കുക. സഹായിക്ക് വോട്ടിങ്് കംപാര്‍ട്ട്മെന്റില്‍ പ്രവേശനം അനുവദിക്കുമ്പോള്‍ നടപടി റെക്കോഡ് ചെയ്യും.

നിയമസഭ തിരഞ്ഞെടുപ്പിനുള്ള നാമനിര്‍ദേശ പത്രിക സമര്‍പ്പിക്കേണ്ട മൂന്നാം ദിനമായ ഇന്നലെ (മാര്‍ച്ച് 18) ജില്ലയില്‍ ഒരു പത്രിക ലഭിച്ചു. ആറന്മുള മണ്ഡലത്തില്‍ എസ് യു സി ഐ (കമ്മ്യൂണിസ്റ്റ്) സ്ഥാനാര്‍ഥി രാധാമണിയാണ് പത്രിക സമര്‍പ്പിച്ചത്. ജില്ലയിലെ അഞ്ച് നിയോജക മണ്ഡലങ്ങളിലെ വരണാധികാരികള്‍ക്കും ഉപവരണാധികാരികള്‍ക്കും മുമ്പാകെയാണ് പത്രിക സമര്‍പ്പിക്കേണ്ടത്.

പത്തനംതിട്ട ജില്ലയിലെ തിരുവല്ല, ആറന്മുള, അടൂര്‍ മണ്ഡലങ്ങളിലെ നിയമസഭാ തിരഞ്ഞെടുപ്പ് പൊതു നിരീക്ഷകയായി  ഒഡീഷ  ഐസിഡിഎസ് ആന്‍ഡ് സാമൂഹിക ക്ഷേമ വനിത ശിശു വികസന വകുപ്പ് ഡയറക്ടര്‍ മോനിഷ ബാനര്‍ജി ചുമതലയേറ്റു. കലക്ടറേറ്റിലെത്തിയ നിരീക്ഷകയെ ജില്ല തിരഞ്ഞെടുപ്പ് ഓഫീസര്‍ കൂടിയായ ജില്ല കലക്ടര്‍ എസ് പ്രേം കൃഷ്ണന്‍ സ്വീകരിച്ചു. പൊതുജനങ്ങള്‍ക്കും രാഷ്ട്രീയ പാര്‍ട്ടി പ്രതിനിധികള്‍ക്കും തിരഞ്ഞെടുപ്പ് സംബന്ധിച്ച പരാതി പത്തനംതിട്ട പി ഡബ്ല്യൂ ഡി റസ്റ്റ് ഹൗസിലെ നിരീക്ഷകന്റെ ഓഫീസില്‍ നേരിട്ടും 9567902352 എന്ന നമ്പരിലും വൈകിട്ട് നാല് മുതല്‍ ആറ് വരെ അറിയിക്കാം.