സംസ്ഥാനത്തിന്റെ പുരോഗതിക്കും വികസനത്തിനും പുതിയ കരുത്തും ദിശാബോധവും നൽകാൻ ജനങ്ങളുടെ അഭിപ്രായങ്ങൾ ആരായാൻ സംസ്ഥാന സർക്കാർ നടപ്പാക്കുന്ന നവകേരളം സിറ്റിസൺ റെസ്പോൺസ് പ്രോഗ്രാമിന്റെ ഭാഗമായി ചെങ്ങന്നൂർ മണ്ഡലത്തിലെ കർമ്മസമിതി അംഗങ്ങൾക്കുള്ള പരിശീലനത്തിന് തുടക്കമായി. പുലിയൂർ പഞ്ചായത്ത് ഹാളിൽ നടന്ന ആല, ചെറിയനാട്, പുലിയൂർ പഞ്ചായത്തുകളിലെ കർമ്മസമിതി അംഗങ്ങൾക്കുള്ള പരിശീലന പരിപാടി സിറ്റിസൺ റെസ്പോൺസ് ചെങ്ങന്നൂർ മണ്ഡലം ചാർജ് ഓഫീസർ പി സി ശ്രീകുമാർ ഉദ്ഘാടനം ചെയ്തു. 

സാക്ഷരതാ മിഷനും ശ്രീനാരായണഗുരു ഓപ്പൺ യൂണിവേഴ്സിറ്റിയുമായി ചേർന്ന് നടത്തുന്ന മുതിർന്നവരുടെ ബിരുദ പഠനത്തിന്റെ ഭാഗമായ പഠനപിന്തുണ പരിപാടി ആരംഭിച്ചു. മുതിർന്ന പഠിതാക്കളെ പഠനപ്രക്രിയയിൽ സഹായിക്കുക, അധിക പഠന സൗകര്യങ്ങൾ ഉറപ്പാക്കുക, ഭാഷാശേഷി വർദ്ധിപ്പിക്കുക, ആത്മവിശ്വാസം നൽകുക എന്നിവയാണ് പഠനപിന്തുണാ പരിപാടിയുടെ ഭാഗമായി നിശ്ചയിച്ചിട്ടുള്ളത്. പഠനപിന്തുണ പരിപാടിയുടെ ഉദ്ഘാടനം സംസ്ഥാന സാക്ഷരതാ മിഷൻ ഡയറക്ടർ എ ജി ഒലീന ഓൺലൈനായി നിർവ്വഹിച്ചു. അസിസ്റ്റന്റ് ഡയറക്ടർ ഡോ.രശ്മി അനിൽ, ഡോ.പി.മുരുകദാസ്, സാക്ഷരതാമിഷൻ ജില്ലാ കോർഡിനേറ്റർ കെ വി രതീഷ്, അസിസ്റ്റന്റ് കോർഡിനേറ്റർ എസ് ലേഖ എന്നിവർ സംസാരിച്ചു.

തൈക്കാട്ടുശ്ശേരി ബ്ലോക്ക് പഞ്ചായത്ത് ഓഫീസിലെ സിവിൽ പ്രവർത്തികൾക്കുള ക്വട്ടേഷൻ ക്ഷണിച്ചു. വിശദവിവരങ്ങൾ www.lsgkerala.gov.in/tender എന്ന വെബ് സൈറ്റിൽ  ലഭ്യമാണ്.

പണിമൂല ദേവീക്ഷേത്രത്തിലെ പൊങ്കാല മഹോത്സവത്തോടനുബന്ധിച്ച് വിവിധ സർക്കാർ വകുപ്പുകളുടെ മുന്നൊരുക്കങ്ങൾ വിലയിരുത്തുന്നതിനായി ഭക്ഷ്യപൊതുവിതരണ വകുപ്പ് മന്ത്രി ജി.ആർ അനിലിന്റെ അധ്യക്ഷതയിൽ അവലോകന യോ​ഗം ചേർന്നു.

ക്ഷേത്രത്തിലേക്കുള്ള പ്രധാന റോഡുകളും ഉപറോഡുകളും റീ ടാറിം​ഗ് നടത്തുന്നതിനും ക്ഷേത്രത്തിന് സമീപമുള്ള പഞ്ചായത്തുകളിലും കോർപ്പറേഷൻ വാർഡുകളിലും മാലിന്യം നീക്കം ചെയ്യുന്നതിനും നടപടി സ്വീകരിക്കാൻ മന്ത്രി ഉദ്യോ​ഗസ്ഥർക്ക് നിർദ്ദേശം നൽകി. പൊങ്കാല മഹോത്സവം ഫെബ്രുവരി 18,19, 20 തീയതികളിലാണ് നടക്കുന്നത്. ഫെബ്രുവരി 20ന് ആണ് പൊങ്കാല.

ജില്ലയില്‍ ന്യൂ ഇന്ത്യ ലിറ്ററസി പ്രോഗ്രാം (ഉല്ലാസ്) നടപ്പിലാക്കുന്ന ഗ്രാമപഞ്ചായത്തുകളിലെ ഇന്‍സ്ട്രക്ടര്‍മാര്‍ക്ക് പരീക്ഷാ മുന്നൊരുക്ക പ്രവര്‍ത്തനങ്ങളുടെ ഭാഗമായി നല്‍കുന്ന മേഖലാ പരിശീലന പരിപാടി ആരംഭിച്ചു. കട്ടപ്പന നഗരസഭാഹാളില്‍ സംഘടിപ്പിച്ച പരിപാടി നഗരസഭാ വൈസ് ചെയര്‍പേഴ്‌സന്‍ ലീലാമ്മ ബേബി ഉദ്ഘാടനം ചെയ്തു. നെടുങ്കണ്ടം ബ്‌ളോക്ക് പഞ്ചായത്ത് അംഗം ബീനാ ബിജു അധ്യക്ഷയായി. സാക്ഷരതാ മിഷന്‍ ജില്ലാ കോര്‍ഡിനേറ്റര്‍ പി എം അബ്ദുള്‍കരീം , അസിസ്റ്റന്റ് കോര്‍ഡിനേറ്റര്‍ ജെമിനി ജോസഫ്, വിനു പി ആന്റണി, മിനി ടി, ഗീതമ്മ ,അശ്വതി എന്നിവര്‍ പരിശീലത്തിന് നേതൃത്വം നല്‍കി.

ഇടുക്കി താലൂക്ക് വികസന സമിതിയുടെ യോഗം ഇടുക്കി താലൂക്ക് ഓഫീസില്‍ തഹസില്‍ദാരുടെ ചേമ്പറില്‍ 9ന് രാവിലെ 11 മണിക്ക് നടക്കും. താലൂക്ക് വികസന സമിതി അംഗങ്ങളും വകുപ്പ് ഉദ്യോഗസ്ഥരും യോഗത്തില്‍ പങ്കെടുക്കണമെന്ന് തഹസില്‍ദാര്‍ അറിയിച്ചു.

ദേശീയ വിരവിമുക്തദിനാചരണത്തിന്റെ ഭാഗമായി ഒന്ന് മുതല്‍ 19 വയസ്സുവരെ പ്രായമുളള എല്ലാ കുട്ടികള്‍ക്കും വിരനശീകരണത്തിനുളള ആല്‍ബന്‍ഡസോള്‍ ഗുളിക നല്‍കും. പരിപാടിയുടെ ജില്ലാതല ഉദ്ഘാടനം ഇന്ന് (ജനുവരി 6) ഉച്ചയ്ക്ക് 2 മണിക്ക് പൈനാവ് യുപി സ്‌കൂളില്‍ ജില്ലാ കളക്ടര്‍ ഡോ. ദിനേശന്‍ ചെറുവാട്ട് നിര്‍വഹിക്കും.

കുഷ്ഠരോഗ നിവാരണം ലക്ഷ്യമിട്ട് ആരോഗ്യ വകുപ്പിന്റെ നേതൃത്വത്തില്‍ സംഘടിപ്പിക്കുന്ന അശ്വമേധം 7.0 ക്യാമ്പയിന്റെ ഏഴാം ഘട്ടം ജനുവരി ഏഴിന് ജില്ലയില്‍ ആരംഭിക്കും. അന്നേദിവസം കളക്ടറുടെ വസതിയില്‍ സംഘടിപ്പിക്കുന്ന ചടങ്ങില്‍ പരിപാടിയുടെ ജില്ലാതല ഉദ്ഘാടനം ജില്ലാ കളക്ടര്‍ ഡോ.ദിനേശന്‍ ചെറുവാട്ട് നിര്‍വഹിക്കും.

അന്താരാഷ്ട്ര ദുരന്ത നിവാരണ ദിനാചരണത്തിന്റെ ഭാഗമായി കളക്ടറേറ്റില്‍ ജനുവരി 7 ന് ഉച്ച കഴിഞ്ഞ് 3 ന് മോക് ഡ്രില്‍ നടക്കും.