എറണാകുളം കെല്‍ട്രോണ്‍ നോളജ് സെന്ററില്‍ സര്‍ക്കാര്‍ അംഗീകൃത കോഴ്‌സുകളായ പി.ജി ഡിപ്ലോമ ഇന്‍ കമ്പ്യൂട്ടര്‍ അപ്ലിക്കേഷന്‍, ഡിപ്ലോമ ഇന്‍ കമ്പ്യൂട്ടര്‍ അപ്ലിക്കേഷന്‍, എ.ഐ ഡിജിറ്റല്‍ മാര്‍ക്കറ്റിംഗ്, ഡിപ്ലോമ ഇന്‍ കമ്പ്യൂട്ടര്‍ ഹാര്‍ഡ് വെയര്‍ ആന്‍ഡ് നെറ്റ്വര്‍ക്ക് മെയിന്റനന്‍സ് വിത്ത് ഇ-ഗാഡ്‌ജെറ്റ് ടെക്‌നോളജി എന്നീ കോഴ്‌സുകളിലേക്കുള്ള സ്‌പോട്ട് അഡ്മിഷന്‍ ആരംഭിച്ചു. അവസാന തീയതി 2026 ജനുവരി 10. കൂടുതല്‍ വിവരങ്ങള്‍ക്കായി വിലാസം: ഹെഡ് ഓഫ് സെന്റര്‍, എം.ഇ.എസ് കള്‍ച്ചറല്‍ കോംപ്ലക്‌സ്, കലൂര്‍, എറണാകുളം-682017. ഫോണ്‍: 0484 2971400, 8590605259.

വിഷന്‍ 2031 ന്റെ ഭാഗമായി സംസ്ഥാനത്തെ സ്ത്രീകളുടെ തൊഴില്‍ പങ്കാളിത്തം 50 ശതമാനമായി ഉയര്‍ത്തുക എന്ന ലക്ഷ്യത്തോടെ കുടുംബശ്രീയുടെ നേതൃത്വത്തില്‍ സംസ്ഥാനത്തുടനീളം നടപ്പിലാക്കുന്ന 'ഉയരെ ഉയരട്ടെ കേരളം, വളരട്ടെ പങ്കാളിത്തം' എന്ന ജെന്‍ഡര്‍ ക്യാമ്പയിന്‍ ജില്ലയില്‍ നാളെ (ജനുവരി 1) തുടങ്ങും.

ചാവക്കാട് നഗരസഭയിലെ പരപ്പില്‍ത്താഴത്ത് സ്റ്റേഡിയം നിര്‍മ്മാണവുമായി ബന്ധപ്പെട്ട് സ്‌പോര്‍ട്‌സ് കേരള ഫൗണ്ടേഷന്‍ ഉദ്യോഗസ്ഥര്‍ സന്ദര്‍ശനം നടത്തി. ഫുട്‌ബോള്‍ ഗ്രൗണ്ടും സിന്തറ്റിക്ക് ട്രാക്ക് ഉള്‍പ്പെടെയുള്ള സംവിധാനവും ഒരുക്കുന്നതിന് വിശദമായ പ്രൊപ്പോസല്‍ തയ്യാറാക്കി ഖേലോ ഇന്ത്യ പദ്ധതിയില്‍ ഉള്‍പ്പെടുത്തുന്നതിന് സംസ്ഥാന സര്‍ക്കാരിന് സമര്‍പ്പിക്കുമെന്ന് സ്‌പോര്‍ട്‌സ് കേരള ഫൗണ്ടേഷന്‍ ഉദ്യോഗസ്ഥര്‍ അറിയിച്ചു. എന്‍.കെ അക്ബര്‍ എം.എല്‍.എ കായിക വകുപ്പ് മന്ത്രിക്ക് നല്‍കിയ നിവേദനത്തിന്റെ അടിസ്ഥാനത്തിലാണ് ഉദ്യോഗസ്ഥര്‍ സന്ദര്‍ശനം നടത്തിയത്.

തൃശ്ശൂര്‍ - കുറ്റിപ്പുറം സംസ്ഥാന പാതയിലെ ഗതാഗതക്കുരുക്ക് രൂക്ഷമായ കേച്ചേരി ജംഗ്ഷന്‍ വികസനത്തിനായി ഭൂമി ഏറ്റെടുക്കുന്നതിന് കിഫ്ബി 126 കോടി രൂപ അനുവദിച്ചു. കിഫ്ബിയുടെ 55-ാം ജനറല്‍ ബോഡി യോഗത്തിലാണ് പദ്ധതിയുടെ ഭൂമി ഏറ്റെടുപ്പ് ചെലവിനുള്ള ഫണ്ടിംഗിന് അന്തിമ അംഗീകാരമായത്.

കേച്ചേരി - അക്കിക്കാവ് ബൈപാസ് കിഫ്ബി ഫണ്ട് ഉപയോഗപ്പെടുത്തി യാഥാര്‍ത്ഥ്യമാക്കിയിരുന്നു. എം.എല്‍.എമാരായ എ.സി മൊയ്തീന്‍, മുരളി പെരുനെല്ലി എന്നിവരുടെ ശ്രമഫലമായാണ് കിഫ്ബിയുടെ സാമ്പത്തികാനുമതി ലഭ്യമായത്. ദീര്‍ഘനാളായുള്ള ഈ പ്രദേശത്തുകാരുടെ കാത്തിരിപ്പിനാണ് കേച്ചേരി ജംഗ്ഷന്‍ വികസനത്തോടെ അവസാനമാകുന്നത്.  

തമിഴ്‌നാട് തിരുനെല്‍വേലി സ്വദേശിയായ ആര്‍. ജമീല (59 വയസ്സ്) എന്ന സ്ത്രീയെ 2023 മാര്‍ച്ച് 29 മുതല്‍ തൃശ്ശൂര്‍ ദിവാന്‍ജിമൂലയില്‍ നിന്ന് കാണാതായി. ഇതുമായി ബന്ധപ്പെട്ട് തൃശ്ശൂര്‍ സിറ്റി പോലീസ് സി ബ്രാഞ്ച് കേസെടുത്ത് അന്വേഷണം നടത്തി വരികയാണ്. ജമീലക്ക് കാഴ്ചക്കുറവുണ്ട്. വലതു പുരികത്തിന് മുകളില്‍ ഒരു മുറിപ്പാടും രണ്ടു കാതിലും കമ്മല്‍ ഇടുന്നതിനായി വലിയ ദ്വാരവുമുണ്ട്. മുകള്‍നിരയിലെ മധ്യത്തിലുള്ള മൂന്ന് പല്ലുകള്‍ ഇല്ല.

 കുറുക്കന്‍പാറയിലെ കുന്നംകുളം താലൂക്ക് ഹെഡ് കോട്ടേഴ്‌സ് നിര്‍മ്മിക്കുന്ന സ്ഥലത്ത് സ്ഥിതിചെയ്യുന്ന വൃക്ഷങ്ങള്‍ മുറിച്ചു മാറ്റുന്നതിന് 2026 ജനുവരി 13 ന് രാവിലെ 11 ന് പൊതുമരാമത്ത് കെട്ടിടവിഭാഗം കുന്ദംകുളം അസിസ്റ്റന്റ് എഞ്ചിനീയറുടെ ഓഫീസില്‍ ലേലം ചെയ്യുന്നു. ലേലത്തില്‍ പങ്കെടുക്കാന്‍ താല്‍പര്യമുള്ളവര്‍ നിശ്ചിത സ്ഥലത്ത് കൃത്യസമയത്ത് ഹാജരാകണം. ലേലത്തില്‍ പങ്കെടുക്കുന്നവര്‍ 8200 രൂപ അസി. എക്‌സിക്യുട്ടീവ് എഞ്ചിനീയര്‍ കെട്ടിട ഉപവിഭാഗം എന്ന വിലാസത്തില്‍ വടക്കാഞ്ചേരിയില്‍ മാറാവുന്നതരത്തിലുള്ള ഡിമാന്റ് ഡ്രാഫ്റ്റായോ പണമായോ നിരതദ്രവ്യം കെട്ടിവെക്കണം. ക്വട്ടേഷനും സമര്‍പ്പിക്കാം.

പാലക്കാട് ലക്കിടിയില്‍ പ്രവര്‍ത്തിക്കുന്ന അസാപ് കേരളയുടെ കമ്മ്യൂണിറ്റി സ്‌കില്‍ പാര്‍ക്കിന് കീഴില്‍ നടത്തുന്ന ഡ്രോണ്‍ പൈലറ്റ് കോഴ്‌സിലേക്ക് അപേക്ഷ ക്ഷണിച്ചു. 18 വയസ്സ് പൂര്‍ത്തിയായവര്‍ക്ക് പുതിയ ബാച്ചിലേക്ക് പ്രവേശനം നേടാം. അഞ്ച് ദിവസത്തെ പരിശീലനം വിജയകരമായി പൂര്‍ത്തിയാക്കുന്നവര്‍ക്ക് ഡയറക്ടര്‍ ജനറല്‍ ഓഫ് സിവില്‍ ഏവിയേഷന്‍ നല്‍കുന്ന 25 കിലോ ഗ്രാം വരെ ഭാരമുള്ള ഡ്രോണ്‍ ഉപയോഗിക്കാനുള്ള ലൈസന്‍സ് ലഭിക്കും. അസാപ്പിന്റെ കാസര്‍ഗോഡ് വിദ്യാനഗറിലുള്ള കമ്മ്യൂണിറ്റി സ്‌കില്‍ പാര്‍ക്കിലാണ് കോഴ്‌സ് നടക്കുക. ഫോണ്‍: 9495999667, 9895967998.

ബിസില്‍ ട്രെയിനിംഗ് ഡിവിഷന്‍ നടത്തുന്ന ഒരു വര്‍ഷം, ആറു മാസം ദൈര്‍ഘ്യമുള്ള പ്രീ പ്രൈമറി, നഴ്സറി ടീച്ചര്‍ ട്രെയിനിംഗ് കോഴ്‌സുകള്‍ക്ക് പ്ലസ് ടു അല്ലെങ്കില്‍ എസ്.എസ്.എല്‍.സി യോഗ്യതയുള്ളവരില്‍ നിന്നും അപേക്ഷ ക്ഷണിച്ചു. കൂടുതല്‍ വിവരങ്ങള്‍ക്കായി ഫോണ്‍: 7994449314.

 46-ാമത് അഖില കേരള ടെക്‌നിക്കല്‍ ഹൈസ്‌കൂള്‍ കലോത്സവം തൃശ്ശൂരില്‍ നടക്കും. 2026 ജനുവരി 22 മുതല്‍ 25 വരെ തൃശ്ശൂര്‍ ഗവ. ടക്‌നിക്കല്‍ ഹൈസ്‌കൂളില്‍ നടക്കുന്ന കലോത്സവത്തില്‍ സംസ്ഥാനത്തെ ടെക്‌നിക്കല്‍ ഹൈസ്‌കൂളുകളില്‍ നിന്നുള്ള വിദ്യാര്‍ത്ഥികള്‍ പങ്കെടുക്കും. ഏഴു വേദികളിലായി രണ്ടായിരം കലാപ്രതിഭകള്‍ മാറ്റുരയ്ക്കും.