എന്‍ ഊര് ഗോത്ര പൈതൃക ഗ്രാമത്തിലേക്കുള്ള റോഡില്‍ അറ്റകുറ്റ പണികള്‍ നടക്കുന്നതിനാല്‍ ഇന്ന് (മാര്‍ച്ച് 20) എന്‍ ഊര് ഗോത്ര പൈതൃക ഗ്രാമം തുറന്ന് പ്രവര്‍ത്തിക്കില്ലെന്ന് അധികൃതര്‍ അറിയിച്ചു.

ജില്ലയില്‍ വിവിധ വകുപ്പില്‍ ഡ്രൈവര്‍ ഗ്രേഡ് 2 (എല്‍ഡിവി)/ഡ്രൈവര്‍ കം ഓഫീസ് അസിസ്റ്റന്റ് (എല്‍ഡിവി) ഡയറക്ട് ആന്‍ഡ് ബൈ ട്രാന്‍സ്ഫര്‍ (കാറ്റഗറി നമ്പര്‍ 623/2024 ,624/2024), തസ്തികയിലേക്കുള്ള പ്രായോഗിക പരീക്ഷ (എച്ച് ടെസ്റ്റ് + റോഡ് ടെസ്റ്റ്) മാര്‍ച്ച് 24, 25 തിയ്യതികളില്‍ രാവിലെ 5.30 മുതല്‍ സുല്‍ത്താന്‍ ബത്തേരി സെന്റ് മേരീസ് കോളേജ് ഹെലിപാഡ് ഗ്രൗണ്ടില്‍ നടക്കും. ഉദ്യോഗാര്‍ത്ഥികള്‍ അഡ്മിഷന്‍ ടിക്കറ്റ്, ഡ്രൈവിങ് ലൈസെന്‍സിന്റെ അസല്‍, ഡ്രൈവിങ് ലൈസെന്‍സ് പര്‍ട്ടിക്കുലര്‍സ്, മെഡിക്കല്‍ സര്‍ട്ടിഫിക്കറ്റ് എന്നിവ സഹിതം ടെസ്റ്റ് കേന്ദ്രത്തില്‍ എത്തണം. ഫോണ്‍- 04936 202539.
 

വയനാട് ജില്ലയില്‍ നിയമസഭാ തിരഞ്ഞെടുപ്പിനുള്ള നാമനിര്‍ദേശ പത്രികാ സമര്‍പ്പണം തുടങ്ങി. മാനന്തവാടി നിയമസഭ മണ്ഡലത്തില്‍ സ്ഥാനാര്‍ഥിയായി മന്ത്രി ഒ.ആര്‍ കേളു വ്യാഴാഴ്ച (മാര്‍ച്ച് 19) നാമനിര്‍ദേശ പത്രിക സമര്‍പ്പിച്ചു. ഉച്ചക്ക് രണ്ട് മണിയോടെ മാനന്തവാടി മണ്ഡലത്തിന്റെ റിട്ടേണിംഗ് ഓഫീസര്‍ സബ് കളക്ടര്‍ അതുല്‍ സാഗറിന്റെ മുന്‍പാകെയാണ് അദ്ദേഹം പത്രിക നല്‍കിയത്. 

കല്‍പറ്റ നിയമസഭ മണ്ഡലത്തില്‍ കെ.വി പ്രകാശന്‍  സി പി ഐ (എം എല്‍) മണ്ഡലത്തിന്റെ റിട്ടേണിംഗ് ഓഫീസര്‍ എല്‍ ആര്‍ ഡെപ്യൂട്ടി കളക്ടര്‍ കെ.കെ ബിനിയുടെ മുന്‍പാകെ പത്രിക സമര്‍പ്പിച്ചു.

2026 നിയമസഭ തിരഞ്ഞെടുപ്പില്‍ ജില്ലയില്‍ ചുമതലയുള്ള നിരീക്ഷകരെ നേരില്‍ കാണാനും ഫോണില്‍ ബന്ധപ്പെടനും പൊതുജനങ്ങള്‍ക്ക് സൗകര്യമുണ്ടാകും. കല്‍പറ്റ പി.ഡബ്യൂ.ഡി റസ്റ്റ് ഹൗസിലെത്തി തെരഞ്ഞെടുപ്പ് പൊതുനിരീക്ഷകന്‍, ചെലവ് നിരീക്ഷകന്‍, പോലീസ് നിരീക്ഷകന്‍ എന്നിവരെ പൊതുജനങ്ങള്‍ക്ക് നേരില്‍ കണ്ട് പരാതികളും നിര്‍ദേശങ്ങളും മറ്റ് വിവിരങ്ങളും അറിയിക്കാം. 

പൊതുജനങ്ങളുമായി നേരിട്ട് സംവദിക്കുന്നതിനായി പൊതു നിരീക്ഷകന്‍ വൈകിട്ട് നാല് മുതല്‍ അഞ്ചു വരെയും പോലീസ് നിരീക്ഷകന്‍ വൈകിട്ട് 4.30 മുതല്‍ 5.30 വരെയും സമയം ക്രമീകരിച്ചിട്ടുണ്ട്. 

നിയമസഭ തെരഞ്ഞെടുപ്പിന് മുന്നോടിയായി ജില്ലയിലെത്തിയ തെരഞ്ഞെടുപ്പ് നിരീക്ഷകര്‍ വിവിധ രാഷ്ട്രീയ പാര്‍ട്ടി പ്രതിനിധികളുമായി ചര്‍ച്ച നടത്തി. ജില്ലയിലെ തെരഞ്ഞെടുപ്പ് ഒരുക്കങ്ങള്‍ വിലയിരുത്തി. സുതാര്യമായ തെരഞ്ഞെടുപ്പ് പ്രക്രിയക്ക് എല്ലാവരുടെയും സഹകരണം പ്രതീക്ഷിക്കുന്നതായി നിരീക്ഷകര്‍ പറഞ്ഞു. ജില്ലയില്‍ തെരഞ്ഞെടുപ്പ് നടത്തിപ്പിനായി ഇതുവരെ കാണിച്ച സഹകരണം വളരെ വലുതാണ്. എന്തെങ്കിലും പരാതികളോ ബുദ്ധിമുട്ടുകളോ ഉണ്ടെങ്കില്‍ നേരിട്ട് അറിയിക്കാവുന്നതാണെന്നും തെരഞ്ഞെടുപ്പ് നിരീക്ഷകരായ ഡോ. ശ്രീധര്‍ ബാബു അധാന്‍കി, കനിക ഹസിജ, ഡോ. വിഷ്ണുകാന്ത എന്നിവര്‍  പറഞ്ഞു. 

തെരഞ്ഞെടുപ്പ് പ്രവര്‍ത്തനങ്ങളില്‍ അതീവ ജാഗ്രതയുണ്ടാകണമെന്നും ഗൗരവത്തോടെയും ഉത്തരവാദിത്തത്തോടെയും നിശ്ചയിച്ച ജോലികള്‍ ഏറ്റെടുത്ത് നടപ്പാക്കണമെന്നും ജില്ലയിലെ നോഡല്‍ ഒഫീസര്‍മാര്‍ക്ക് തെരഞ്ഞെടുപ്പ് നിരീക്ഷകര്‍ നിര്‍ദ്ദേശം നല്‍കി. നിയമസഭാ തെരഞ്ഞെടുപ്പിന്റെ ഭാഗമായി കളക്ടറേറ്റ് മിനി കോണ്‍ഫറന്‍സ് ഹാളില്‍ ചേര്‍ന്ന നോഡല്‍ ഒഫീസര്‍മാരുടെ യോഗത്തിലാണ് നിര്‍ദ്ദേശം. തെരഞ്ഞെടുപ്പ് കമ്മീഷന്റെ നിര്‍ദ്ദേശങ്ങള്‍ കൃത്യമായി പാലിക്കണമെന്ന് ജില്ലയിലെ തെരഞ്ഞെടുപ്പ് പൊതുനിരീക്ഷകന്‍ ഡോ. ശ്രീധര്‍ ബാബു അധാന്‍കി നിര്‍ദ്ദേശിച്ചു. ചെറിയ പിഴവുകള്‍ പോലും ഒഴിവാക്കാന്‍ അതീവ ശ്രദ്ധ ചെലുത്തണം.

പട്ടികവര്‍ഗ വിദ്യാര്‍ഥികളുടെ വിദ്യാഭ്യാസത്തിന്റെ ഗുണമേന്മ മെച്ചപ്പെടുത്തുന്നതിനുള്ള കര്‍മ്മ പദ്ധതിയുമായി ബന്ധപ്പെട്ട് 21  ന് നടത്താന്‍ തീരുമാനിച്ച ജില്ലാതല കോര്‍ഡിനേഷന്‍ കമ്മറ്റി യോഗം മാറ്റിവെച്ചതായി വിദ്യാഭ്യാസ ഉപഡയറക്ടര്‍ അറിയിച്ചു.

ചെര്‍ക്കള-ജാല്‍സൂര്‍ റോഡിന്റെ  ടാറിംഗ് പ്രവര്‍ത്തി ആരംഭിച്ചതിനാല്‍ ഇതുവഴിയുള്ള ഗതാഗതം മാര്‍ച്ച് 23 മുതല്‍ ഏപ്രില്‍ അഞ്ച് വരെ നിരോധിച്ചു. ചെര്‍ക്കളയില്‍ നിന്ന് ജാല്‍സൂര്‍ പോകുന്ന വാഹനങ്ങള്‍ പടിയത്തടുക്കയില്‍ നിന്നും വലത് ഭാഗത്ത് കയറി  അടൂര്‍ വഴി കൊട്ട്യോടി വഴി പോകണം. ജാല്‍സൂരില്‍ നിന്നും ചെര്‍ക്കള എത്തേണ്ട വാഹനങ്ങള്‍ കൊട്ട്യോടിയില്‍ നിന്നും ഇടതുവശത്തേക്ക് കയറി അടൂര്‍ വഴി പടിയത്തടുക്ക എത്തി ചെര്‍ക്കളക്ക് പോകണമെന്ന് പി.ഡബ്ല്യു.ഡി റോഡ്‌സ് അസിസ്റ്റന്റ് എക്‌സിക്യുട്ടീവ് എഞ്ചിനീയര്‍ അറിയിച്ചു.

നിയമസഭാ തിരഞ്ഞെടുപ്പില്‍ ഗ്രീന്‍ പ്രോട്ടോക്കോള്‍ ഫലപ്രദമായി നടപ്പാക്കും. പരിസ്ഥിതിക്ക് നാശം സംഭവിക്കാതിരിക്കാനും മാലിന്യം പരമാവധി കുറയ്ക്കാനും രാഷ്ട്രീയ പാര്‍ട്ടികള്‍, സ്ഥാനാര്‍ഥികള്‍, സര്‍ക്കാര്‍ വകുപ്പുകള്‍, തദ്ദേശ സ്വയംഭരണ സ്ഥാപനങ്ങള്‍ എന്നിവയുടെ ഏകോപിത പ്രവര്‍ത്തനം ഉറപ്പാക്കും. ഇതിനായുള്ള സര്‍ക്കുലറും മുഖ്യ തിരഞ്ഞെടുപ്പ് ഓഫീസര്‍ പുറപ്പെടുവിച്ചിട്ടുണ്ട്.

ഒബ്‌സര്‍വര്‍മാര്‍ ജില്ലയിലെത്തി