കേരള വന ഗവേഷണ സ്ഥാപനമായ കെ.എഫ്.ആർ.ഐയിൽ (Kerala Forest Research Institute) പ്രോജക്ട് ഫെല്ലോ തസ്തികയിലേക്ക് അപേക്ഷ ക്ഷണിച്ചു. 'Spatial variation in soil seed banks, seedling/sapling banks and their responses to forest disturbance in the forest areas of Munnar Landscape' എന്ന ഗവേഷണ പദ്ധതിയിലേക്കാണ് നിയമനം. ഒരു ഒഴിവാണ് നിലവിലുള്ളത്.

സുപ്രീം കോടതിയുടെ പരിഗണനയിലുള്ള കേസുകൾ വേഗത്തിൽ തീർപ്പാക്കുന്നതിനായി 2026 ഓഗസ്റ്റ് 21, 22, 23 തീയതികളിൽ പ്രത്യേക അദാലത്ത് സംഘടിപ്പിക്കുന്നു. മധ്യസ്ഥതയിലൂടെയും പരസ്പര ധാരണയിലൂടെയും കേസുകൾ ഒത്തുതീർപ്പാക്കുന്നതിനാണ് അദാലത്ത് നടത്തുന്നത്. വ്യക്തികൾ തമ്മിലുള്ള തർക്കങ്ങൾ, സർക്കാർ വകുപ്പുകൾ കക്ഷികളായ കേസുകൾ ഉൾപ്പെടെ വിവിധ കേസുകൾ പരിഗണനയ്ക്ക് വരും.

കേരളത്തിന്റെ പുതിയ മുഖ്യ തിരഞ്ഞെടുപ്പ് ഓഫീസറായി ഡോ. എ. കൗശിഗൻ ഐഎഎസിനെ നിയമിച്ചു. സ്ഥാനമൊഴിഞ്ഞ ഡോ. രത്തൻ യു ഖേൽക്കർക്ക് പകരമായാണ് നിയമനം.

സംസ്ഥാന കള്ള് വ്യവസായ തൊഴിലാളി ക്ഷേമനിധി ബോർഡിൽ അംഗങ്ങളായ തൊഴിലാളികളുടെ മക്കൾക്കുള്ള സൗജന്യ പഠനകിറ്റ് വിതരണത്തിന്റെ സംസ്ഥാനതല ഉദ്ഘാടനം തൊഴിൽ വകുപ്പ് മന്ത്രി ബിന്ദു കൃഷ്ണ  നിർവഹിച്ചു. സംസ്ഥാനതല ഉദ്ഘാടനത്തിന്റെ ഭാഗമായി കൊല്ലം ജില്ലയിലെ  അഞ്ചു കുട്ടികൾക്കാണ് പഠനോപകരണങ്ങൾ വിതരണം ചെയ്തത്.

  ഉള്‍നാടന്‍ ജലാശയങ്ങളുടെ സ്വാഭാവികഒഴുക്കിനും മത്സ്യങ്ങളുടെ പ്രജനനത്തിനും തടസംസൃഷ്ടിക്കുന്ന അനധികൃത മത്സ്യബന്ധനം,  ഊത്തപിടിത്തം എന്നിവയ്‌ക്കെതിരെ  കര്‍ശന നടപടിയെന്ന് ഫിഷറീസ് വകുപ്പ് മുന്നറിയിപ്പ്. ജലാശയങ്ങളില്‍ ഖര-ദ്രവമാലിന്യങ്ങള്‍, രാസവസ്തുക്കള്‍, കീടനാശിനികള്‍, പ്ലാസ്റ്റിക് എന്നിവ ഉപയോഗിച്ച് മത്സ്യബന്ധനം പാടില്ല. പൊതുജലാശയങ്ങളുടെ ഒഴുക്കിനു തടസമാകുന്ന മീന്‍പിടിത്തവും ശിക്ഷാര്‍ഹമായ കുറ്റമാണ്. നിയമലംഘകര്‍ക്ക്  മൂന്ന് മാസം തടവ്, 10,000 രൂപ വരെ പിഴ,  അല്ലെങ്കില്‍ രണ്ടും ശിക്ഷയായി ലഭിക്കാം.

മഴക്കാലരോഗപ്രതിരോധം ലക്ഷ്യമാക്കി ജില്ലയിലെ സര്‍ക്കാര്‍ ആരോഗ്യസ്ഥാപനങ്ങളില്‍ ശുചിത്വവും രോഗിസൗഹൃദ അന്തരീക്ഷവും ഉറപ്പാക്കുന്നതിനായി മേയ് 30ന് 'തുടക്കം' ജനകീയ ശുചീകരണ ക്യാമ്പയിന്‍ ആരംഭിക്കുമെന്ന് ജില്ലാ മെഡിക്കല്‍ ഓഫീസര്‍  അറിയിച്ചു.  എല്ലാ സര്‍ക്കാര്‍ ആശുപത്രികളിലും ആരോഗ്യകേന്ദ്രങ്ങളിലുമായി മഴക്കാലപൂര്‍വ ശുചീകരണ പ്രവര്‍ത്തനങ്ങള്‍ ശക്തിപ്പെടുത്തും.

ഉള്‍നാടന്‍ മത്സ്യബന്ധനമേഖലയുടെ സുസ്ഥിര വികസനത്തിനും മത്സ്യസംരക്ഷണത്തിനും ഫിഷറീസ് വകുപ്പ് മണ്‍സൂണ്‍ കാലയളവില്‍ അനധികൃത മത്സ്യബന്ധന രീതികള്‍ക്കെതിരെ ശക്തമായ നടപടികള്‍ സ്വീകരിക്കുമെന്ന് ഫിഷറീസ് ഡെപ്യൂട്ടി ഡയറക്ടർ അറിയിച്ചു.

തെക്കുപടിഞ്ഞാറന്‍ കാലവര്‍ഷത്തിന്റെ തുടക്കത്തില്‍ പ്രജനനത്തിനായി മത്സ്യങ്ങള്‍ നടത്തുന്ന  ഊത്തകയറ്റം എന്നതിനോട് അനുബന്ധിച്ചു പ്രാദേശികമായി നടത്തുന്ന അനധികൃത മത്സ്യബന്ധനരീതിയായ ഊത്തപിടുത്തം സര്‍ക്കാര്‍ നിയമപരമായി നിരോധിച്ചിട്ടുള്ളതാണ്.

 ജില്ലാ പൊലീസ് മേധാവിയുടെ അധീനതയിലുള്ളതും ജില്ലാ എ.ആർ. ക്യാമ്പിൽ സൂക്ഷിച്ചിട്ടുള്ളതുമായ വകുപ്പുതല വാഹനങ്ങളുടെ ഉപയോഗയോഗ്യമല്ലാത്ത സ്‌പെയര്‍ പാര്‍ട്‌സുകളുടെ പുനര്‍ലേലം എം.എസ്.ടി.സി. പോര്‍ട്ടല്‍ മുഖേന മേയ് 30-ന് രാവിലെ 11 മണി മുതല്‍ വൈകിട്ട് 4:30 വരെ ഓണ്‍ലൈനായി നടത്തും. കൂടുതൽ വിവരങ്ങൾക്ക് 0477-2239326 എന്ന നമ്പറിൽ ബന്ധപ്പെടാം.

വിജ്ഞാന കേരളം പദ്ധതിയുടെ ഭാഗമായി മേയ് 30-ന് വെർച്വൽ തൊഴിൽമേള സംഘടിപ്പിക്കുന്നു. സ്കിൽ ഡെലിവറി പ്ലാറ്റ്‌ഫോം കേരള (എസ്.ഡി.പി.കെ.) സെന്ററുകൾ മുഖേന രാവിലെ 10 മണി മുതൽ വൈകിട്ട് മൂന്ന് മണിവരെയാണ് മേള നടക്കുന്നത്.

കൊച്ചിൻ യൂണിവേഴ്സിറ്റി കോളേജ് ഓഫ് എഞ്ചിനീയറിങ് പുളിങ്കുന്ന്, കോളേജ് ഓഫ് എഞ്ചിനീയറിങ് ചെങ്ങന്നൂർ, കെ. കോളേജ് ഓഫ് എഞ്ചിനീയറിങ് ആലപ്പുഴ (കളർകോട് ജങ്ഷൻ) എന്നിവിടങ്ങളിലെ എസ്.ഡി.പി.കെ. സെന്ററുകളിലാണ് മേള ക്രമീകരിച്ചിട്ടുള്ളത്.