രാജ്യത്തെ ഏറ്റവും മികച്ച നിലവാരമുള്ള ആശുപത്രികളുടെ പട്ടികയില്‍ ഇനി മലബാര്‍ കാന്‍സര്‍ സെന്ററും. ഉത്തരകേരളത്തിലെ ഏറ്റവും വലിയ കാന്‍സര്‍ ചികിത്സാ കേന്ദ്രമായ എംസിസിക്ക് ഉന്നത ഗുണനിലവാരത്തിനുള്ള എന്‍എബിഎച്ച് അംഗീകാരം ലഭിച്ചു.

കോവിഡ് വ്യാപന സാഹചര്യത്തില്‍ പ്രതിരോധ പ്രവര്‍ത്തനത്തിന്റെ ഭാഗമായി താമരശ്ശേരി ക്ലസ്റ്റര്‍ പട്ടികയില്‍ ഉള്‍പ്പെട്ടു. ഇതുവരേ 55 പേര്‍ക്കാണ് ഇവിടെ രോഗം സ്ഥിരീകരിച്ചത്. 

രോഗികള്‍ കുറഞ്ഞതിനാല്‍ നാദാപുരവും ചാലിയവും ക്ലസ്റ്ററില്‍ നിന്ന് ഒഴിവായി. ഇതോടെ ജില്ലയിലെ ക്ലസ്റ്ററുകളുടെ എണ്ണം പത്തായി. ഒളവണ്ണ- 6, വെള്ളയില്‍ -113, മുഖദാര്‍- 37, ചെക്യാട് - 12, ചോറോട്- 144, കുറ്റിച്ചിറ - 6, വടകര- 51, തിരുവള്ളൂര്‍- 20, വലിയങ്ങാടി 18 എന്നിങ്ങനെയാണ് ക്ലസ്റ്ററുകളില്‍ നിലവില്‍ ചികിത്സയിലുള്ള രോഗികളുടെ എണ്ണം..

ജില്ലയില്‍ കൊവിഡ് കേസുകള്‍ വര്‍ധിച്ചു വരുന്ന സാഹചര്യത്തില്‍ ഈ വര്‍ഷം ഓണത്തോടനുബന്ധിച്ചുള്ള എല്ലാ ആഘോഷങ്ങളും അതീവ ജാഗ്രതയോടെ ലളിതമായ രീതിയില്‍ സ്വന്തം വീടുകളില്‍ ആഘോഷിക്കണമെന്ന് ജില്ലാ മെഡിക്കല്‍ ഓഫീസര്‍ (ആരോഗ്യം) ഡോ.കെ നാരായണ നായ്ക് അറിയിച്ചു. സമ്പര്‍ക്കമുണ്ടാക്കുന്ന എല്ലാതരം പരിപാടികളില്‍ നിന്നും പൂര്‍ണ്ണമായി വിട്ടു നിന്ന് രോഗവ്യാപനം തടയാനുള്ള പ്രവര്‍ത്തനങ്ങളില്‍ സഹകരിക്കണമെന്നും അദ്ദേഹം അഭ്യര്‍ത്ഥിച്ചു.

ലൈഫ് പദ്ധതിയിൽ ഉൾപ്പെടുത്തുന്നതിന് ഓൺ ലൈൻ അപേക്ഷ സമർപ്പിക്കേണ്ട സമയം സെപ്റ്റംബർ ഒൻപത് വരെ നീട്ടി. ഇതുവരെ കോഴിക്കോട് ജില്ലയിൽ 28655 ഭവന രഹിത കുടുംബങ്ങളും 6928 ഭൂരഹിത കുടുംബങ്ങളും ഓൺലൈൻ അപേക്ഷ സമർപ്പിട്ടുണ്ട്.

അർഹതയുള്ള എല്ലാ ഗുണഭോക്‌താക്കളും നിശ്ചിത സമയപരിധിക്കുള്ളിൽ ഓൺലൈൻ അപേക്ഷ സമർപ്പിക്കേണ്ടതാണ്. അക്ഷയ/ജനസേവന കേന്ദ്രങ്ങൾ വഴിയോ  തദ്ദേശ സ്വയം ഭരണ സ്ഥാപന ഹെൽപ്പ് ഡെസ്ക് വഴിയോ  സ്വന്തമായി മൊബൈൽ ഫോൺ ഉപയോഗിച്ചോ ഓൺലൈൻ  അപേക്ഷ സമർപ്പിക്കാവുന്നതാണെന്ന് ലൈഫ് മിഷൻ ജില്ലാ    കോഓർഡിനേറ്റർ അറിയിച്ചു.

ധര്‍മ്മടം മണ്ഡലത്തിലെ പിണറായി - ധര്‍മ്മടം ഗ്രാമപഞ്ചായത്തുകളെ ബന്ധിപ്പിക്കുന്ന കോളാട് പാലത്തിന്റെ പ്രവൃത്തി ഉദ്ഘാടനം മുഖ്യമന്ത്രി പിണറായി വിജയന്‍ നിര്‍വഹിച്ചു. കേരളത്തില്‍ വാഹനങ്ങള്‍ വര്‍ധിച്ചു വരുന്ന സാഹചര്യത്തില്‍ ഇവയ്ക്കാവശ്യമായ റോഡ് സൗകര്യങ്ങളുണ്ടാകണമെന്നും പശ്ചാത്തല സൗകര്യ വികസനത്തില്‍ ആകാവുന്നതെല്ലാം ചെയ്തു കൊണ്ടിരിക്കുകയാണെന്നും മുഖ്യമന്ത്രി  പറഞ്ഞു. രണ്ട് വാഹനങ്ങള്‍ക്ക് ഒരേ സമയം കടന്നുപോകാന്‍ കഴിയുന്ന പാലമാണ് കോളാട് നിര്‍മ്മിക്കുന്നത്. നിലവില്‍ സമയ ബന്ധിതമായി പാലം പൂര്‍ത്തീകരിക്കാന്‍ കഴിയുമെന്നും അദ്ദേഹം വ്യക്തമാക്കി.  

സംസ്ഥാന സർക്കാർ ഉന്നത വിദ്യാഭ്യാസ വകുപ്പ് കീഴിലുള്ള കോടഞ്ചേരി ഗവ. കോളജ് മികവിന്റെ  കേന്ദ്രമാക്കുന്ന പദ്ധതിയുടെ ഭാഗമായി കോളേജിന് അനുവദിച്ച ആധുനിക ലൈബ്രറി ബ്ലോക്കിന്റെ  പ്രവൃത്തി ഉദ്ഘാടനം 27 ന് നടക്കും. രാവിലെ 10 മണിക്ക് നടക്കുന്ന ചടങ്ങിൽ ജോർജ് എ തോമസ് എംഎൽഎ പ്രവൃത്തി ഉദ്ഘാടനം നിർവഹിക്കും.

ജില്ലാ പഞ്ചായത്തും ചേമഞ്ചേരി ഗ്രാമ പഞ്ചായത്തും സംയുക്തമായി കാപ്പാട് കടലോരത്ത് 1.10 കോടി രൂപ ചെലവില്‍ നിര്‍മ്മിച്ച ആധുനിക ഹൈടെക്ക് ശ്മാശാനം ഇന്ന് (ബുധൻ) വൈകീട്ട് നാല് മണിക്ക് കെ. ദാസന്‍ എം.എല്‍.എ ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് ബാബു പറശ്ശേരി, ജനപ്രതിനിധികൾ, തദ്ദേശ സ്വയംഭരണ സ്ഥാപന പ്രതിനിധികൾ ഉള്‍പ്പടെയുളളവര്‍ പങ്കെടുക്കും. 

ശ്മശാനം നിര്‍മ്മിക്കാന്‍ കെ.ദാസന്‍ എം.എല്‍.എ 42 ലക്ഷം രൂപയും, ജില്ലാ പഞ്ചായത്ത് 40 ലക്ഷവും, ചേമഞ്ചേരി ഗ്രാമ പഞ്ചായത്ത് 28 ലക്ഷം രൂപയുമാണ് നല്‍കിയത്. വിശ്രാന്തിയെന്നാണ് ശ്മശാനത്തിന് പേര് നല്‍കിയത്. 

കാസർഗോഡ് ജില്ലയിൽ കേരള സാമൂഹ്യ സുരക്ഷ മിഷൻ വഴി പെൻഷൻ ലഭിക്കുന്ന എൻഡോസൾഫാൻ ദുരിതബാധിതർക്ക് ഓണത്തോടനുബന്ധിച്ച് ധനസഹായമായി 1,000 രൂപ അനുവദിച്ച് സാമൂഹ്യനീതി വകുപ്പ് ഉത്തരവിട്ടതായി ആരോഗ്യ സാമൂഹ്യനീതി വകുപ്പ് മന്ത്രി കെ.കെ. ശൈലജ ടീച്ചർ അറിയിച്ചു. പെൻഷൻ ലഭിക്കുന്ന 5425 എൻഡോസൾഫാൻ ദുരിത ബാധിതർക്ക് ഈ ധനസഹായം ലഭിക്കും.  ഇതിനുള്ള അനുമതി സാമൂഹ്യ സുരക്ഷമിഷൻ എക്സിക്യുട്ടീവ് ഡയറക്ടർക്ക് നൽകിയിട്ടുണ്ട്.

* ബദലായി ശാസ്ത്രീയമായ ജൈവ നിയന്ത്രണമാർഗ്ഗങ്ങൾ ശക്തിപ്പെടുത്തണം-മന്ത്രി വി.എസ്. സുനിൽ കുമാർ