പ്രളയപുനരുജ്ജീവ പ്രവര്‍ത്തനങ്ങളുടെ ഭാഗമായി ജില്ലയിലെ മുഖ്യശുദ്ധജല സ്രോതസ്സായ ചൂരക്കാട്ടുകര ചീരംചിറയുടെ പുനരുദ്ധാരണം ജനുവരി 26 ന്‌ നടക്കും. ജില്ലാ ഭരണകൂടത്തിന്റെ ആഭിമുഖ്യത്തില്‍ നടത്തുന്ന പുനരുദ്ധാരണം പ്രവൃത്തികള്‍ക്ക്‌ ശനിയാഴ്‌ച രാവിലെ 7 ന്‌ തുടക്കമാവും. കൃഷി വകുപ്പ്‌ മന്ത്രി അഡ്വ. വി എസ്‌ സുനില്‍കുമാര്‍, ജില്ലാ കളക്‌ടര്‍ ടി വി അനുപമ, മറ്റു എംഎല്‍എ മാര്‍, ത്രിതലപഞ്ചായത്ത്‌ പ്രതിനിധികള്‍, വിവിധ വകുപ്പു ഉദ്യോഗസ്ഥര്‍ തുടങ്ങിയവര്‍ പങ്കെടുക്കും.

പ്രധാനമന്ത്രി നരേന്ദ്രമോദിയുടെ തൃശൂര്‍ സന്ദര്‍ശനം സംബന്ധിച്ച ഒരുക്കങ്ങള്‍ ചര്‍ച്ച ചെയ്യുന്നതിനുളള ആലോചനയോഗം കളക്‌ടറേറ്റ്‌ കോണ്‍ഫറന്‍സ്‌ ഹാളില്‍ ചേര്‍ന്നു. ജില്ലാ കളക്‌ടര്‍ ടി വി അനുപമയുടെ അദ്ധ്യക്ഷതയില്‍ ചേര്‍ന്ന യോഗം സുരക്ഷാ ക്രമീകരണങ്ങള്‍, മുന്നൊരുക്കങ്ങള്‍ എന്നിവയെക്കുറിച്ച്‌ ചര്‍ച്ച ചെയ്‌തു. ജനുവരി 27 നാണ്‌ പ്രധാനമന്ത്രി നരേന്ദ്രമോദി തൃശൂരിലെത്തുന്നത്‌. വൈകീട്ട്‌ നാലു മണിയോടെ കുട്ടനെല്ലൂര്‍ ഹെലിപാഡില്‍ ഇറങ്ങുന്ന പ്രധാനമന്ത്രി തൃശൂര്‍ തേക്കിന്‍കാട്‌ മൈതാനത്തെ പരിപാടിക്കു ശേഷം 5.15 ന്‌ തിരിച്ച്‌ പോകും.

ശബരമിലയിൽ പ്രവേശനത്തിന് ശ്രമിച്ച അദ്ധ്യാപികയുടെ മകളുടെ പഠനം തടസ്സപ്പെടുത്തിയെന്ന പരാതിയിൽ സംസ്ഥാന ബാലാവകാശ സംരക്ഷണ കമ്മീഷൻ കേസെടുത്തു.  ക്ലാസ് ടീച്ചറുടെ പ്രേരണയാൽ ജനക്കൂട്ടം മകളുടെ പഠനം തടസ്സപ്പെടുത്തുകയും തങ്ങളെ അപമാനിക്കുകയും ചെയ്‌തെന്നായിരുന്നു പരാതി.

പി.എൻ.എക്സ്. 252/19

  ബംഗ്ലൂരുവിലെ നോർക്ക റൂട്ട്സ് സാറ്റലൈറ്റ് ഓഫീസ് മെച്ചപ്പെട്ട സൗകര്യങ്ങളോടെ പുതിയ മന്ദിരത്തിലേയ്ക്ക് മാറ്റി.  എഫ് - 09, ജെം പ്ലാസ, ഇൻഫെന്റെറി റോഡ്, ശിവാജി നഗർ, ബംഗ്ലൂരു - 560 001, ഫോൺ:- 080 - 25585090 ആണ് പുതിയ മേൽവിലാസമെന്ന് നോർക്ക റൂട്ട്സ് ചീഫ് എക്സിക്യൂട്ടീവ് ഓഫീസർ ഹരികൃഷ്ണൻ നമ്പൂതിരി അറിയിച്ചു.

പി.എൻ.എക്സ്. 250/19

സെന്റർ ഫോർ ഡിസെബിലിറ്റി സ്റ്റഡീസ് പൂജപ്പുരയിൽ സൗജന്യമായി പത്താം ക്ലാസ് പാസ്സായ ഭിന്നശേഷിയുള്ളവർക്ക് ഫോട്ടോഷോപ്പ്, എം.എസ് ഓഫീസ്, ഇന്റർനെറ്റ്, ഡി.റ്റി.പി എന്നീ കമ്പ്യൂട്ടർ കോഴ്‌സുകളും എട്ടാം ക്ലാസ് പാസ്സായവർക്ക് ബുക്ക് ബയന്റിംഗ് കോഴ്‌സും ആരംഭിക്കുന്നു. താൽപര്യമുള്ളവർ ഈ മാസം 24 ന് രാവിലെ 10 ന് സെന്ററിൽ അഭിമുഖത്തിന് എത്തണം. അപേക്ഷഫോറം  cdskerala.org  എന്ന വെബ്‌സൈറ്റിൽ ലഭിക്കും. ഫോൺ: 0471-2345627, 7907456510. 

പി.എൻ.എക്സ്. 248/19

മെഡിക്കൽ വിദ്യാഭ്യാസ ഡയറക്ടറേറ്റിന് കീഴിൽ നടത്തിവരുന്ന പാരാമെഡിക്കൽ ഡിപ്ലോമ കോഴ്‌സുകളുടെ സ്‌പോട്ട് അലോട്ട്‌മെന്റ് സർക്കാർ കോളേജുകളുടേത് ഈ മാസം 30 ന് തിരുവനന്തപുരം ഗവ. മെഡിക്കൽ കോളേജ് പ്രിൻസിപ്പാൾ ഓഫീസിനു സമീപത്തെ സി.ഒ.കെ. ഓഡിറ്റോറിയത്തിൽ രാവിലെ 10 മുതൽ നടക്കും. കൂടുതൽ വിവരങ്ങൾക്ക്  www.dme.kerala.gov.in     സന്ദർശിക്കുക.

പി.എൻ.എക്സ്. 247/19

മത്സ്യബന്ധന മേഖല നേരിടുന്ന പ്രശ്‌നങ്ങള്‍ പരിശോധിക്കാനും പ്രായോഗിക മാര്‍ഗങ്ങളിലൂടെ പരിഹാരം കണ്ടെത്താനും പ്രത്യേക കമ്മീഷനെ നിയമിക്കണമെന്ന് ഭരണ പരിഷ്‌കരണ കമ്മീഷന്‍ സര്‍ക്കാരിനോട് ശുപാര്‍ശ ചെയ്തു. ജില്ലയിലെ തീരദേശവാസികള്‍, മത്സ്യതൊഴിലാളി പ്രതിനിധികള്‍, സന്നദ്ധ പ്രവര്‍ത്തകര്‍ എന്നിവരെ പ്രത്യേക ക്ഷണിതാക്കളായി 'പാര്‍ശ്വവല്‍ക്കരിക്കപ്പെട്ടവരുടെ അടുത്തേക്ക്' എന്ന വിഷയത്തില്‍ കളക്ടറേറ്റ് മിനി കോണ്‍ഫറന്‍സ് ഹാളില്‍ നടന്ന യോഗത്തില്‍ സംസാരിക്കുകയായിരുന്നു കമ്മീഷന്‍.