കൈപ്പട്ടൂര്‍ ഗവണ്‍മെന്റ് വൊക്കേഷണല്‍ ഹയര്‍ സെക്കന്‍ഡറി സ്‌കൂളില്‍ എന്‍എസ്എസിന്റെയും സീഡിന്റെയും ആഭിമുഖ്യത്തില്‍ ജൈവപച്ചക്കറി കൃഷിയുടെ വിളവെടുപ്പ് ഉത്സവം നടത്തി. ജില്ലാ പഞ്ചായത്ത് വികസനകാര്യ സ്ഥിരം സമിതി അധ്യക്ഷ എലിസബത്ത് അബു ഉദ്ഘാടനം നിര്‍വഹിച്ചു. കോന്നി ബ്ലോക്ക് പഞ്ചായത്ത് വികസനകാര്യ സ്ഥിരം സമിതി അധ്യക്ഷ ലീലാരാജന്‍, പ്രിന്‍സിപ്പല്‍ വി.പ്രിയ, ഹെഡ്മിസ്ട്രസ് ബിന്ദു, അഡൈ്വസര്‍ തോമസ് വര്‍ഗീസ്, എന്‍എസ്എസ് പ്രോഗ്രാം ഓഫീസര്‍ അനില തോമസ് എന്നിവര്‍ സംസാരിച്ചു. 

                            (പിഎന്‍പി 262/19)

പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി ജില്ലയിലെ തെരഞ്ഞെടുക്കപ്പെട്ട വിദ്യാലയങ്ങള്‍ കേന്ദ്രീകരിച്ച് വിദ്യാലയ ശാക്തീകരണത്തിനുള്ള വ്യത്യസ്തങ്ങളായ   പരിപാടികള്‍ സംഘടിപ്പിക്കും. മുന്നേറ്റം എന്ന് പേരിട്ടിരിക്കുന്ന ഈ പരിപാടിയില്‍ ജില്ലയിലെ 11 സബ് ജില്ലകളില്‍ നിന്നും ഓരോ വിദ്യാലയത്തെ വീതമാണ് തെരഞ്ഞെടുത്തിരിക്കുന്നത്. കുട്ടികളുടെ കുറവിനെ പരിഹരിക്കുവാന്‍ വിദ്യാലയങ്ങള്‍ കേന്ദ്രീകരിച്ച് തനതായ പരിപാടികളാണ് നടത്തുന്നത്. ഇത്തരം പ്രവര്‍ത്തനങ്ങളിലെ മാതൃകാപരമായവ ജില്ലയിലെ മുഴുവന്‍   വിദ്യാലയങ്ങളിലും വ്യാപിപ്പിക്കും. 

ഐഎംസിയുടെ ആഭിമുഖ്യത്തില്‍ ചെന്നീര്‍ക്കര ഗവ.ഐടിഐയില്‍ തുടങ്ങിയ ഡ്രൈവിംഗ് പരിശീലന കോഴ്‌സിലേക്ക് അപേക്ഷ ക്ഷണിച്ചു. ഫോണ്‍-0468 2258710,  9745424281.                    (പിഎന്‍പി 260/19)

ചെന്നീര്‍ക്കര ഗ്രാമപഞ്ചായത്തിന്റെ വാര്‍ഷിക പദ്ധതിയുടെ ഭാഗമായി കുടുംബ,     വ്യക്തിഗത ആനുകൂല്യത്തിന് ഗുണഭോക്താക്കളെ തെരഞ്ഞെടുക്കുന്നതിന് അപേക്ഷ നല്‍കാം. അപേക്ഷാ ഫോറം ഗ്രാമപഞ്ചായത്ത് ഓഫീസിലും അങ്കണവാടികളിലും ലഭിക്കും. അപേക്ഷ ഈ മാസം 31 ന് വൈകിട്ട് നാല് വരെ  ഗ്രാമപഞ്ചായത്ത് ഓഫീസില്‍ സ്വീകരിക്കും.                   (പിഎന്‍പി 259/19)

സംസ്ഥാന വ്യവസായ വാണിജ്യ വകുപ്പിന്റെ ആഭിമുഖ്യത്തില്‍ ഇന്നും നാളെയും പത്തനംതിട്ടയില്‍ ജില്ലാ നിക്ഷേപക സംഗമം സംഘടിപ്പിക്കും. കുമ്പഴയില്‍ ഇന്ന് രാവിലെ 10ന് ജില്ലാ പഞ്ചായത്ത് പ്രസിഡന്റ് അന്നപൂര്‍ണാദേവി സംഗമം ഉദ്ഘാടനം ചെയ്യും. പത്തനംതിട്ട നഗരസഭാധ്യക്ഷ ഗീത സുരേഷ് അധ്യക്ഷത വഹിക്കുന്ന ചടങ്ങില്‍ കൗണ്‍സിലര്‍ ആമിന ഹൈദരലി, ജില്ലാ വ്യവസായ കേന്ദ്രം ജനറല്‍ മാനേജര്‍ ഡി.രാജേന്ദ്രന്‍, ലീഡ് ഡിസ്ട്രിക്ട് മാനേജര്‍ വി.വിജയകുമാര്‍, മോര്‍ലി ജോസഫ്, ജി.ഷാജി തുടങ്ങിയവര്‍ സംസാരിക്കും.  

കേരള ഖാദി ഗ്രാമവ്യവസായ ബോര്‍ഡിന്റെ ആഭിമുഖ്യത്തില്‍ ജില്ലയില്‍ നടത്തുന്ന ഗാന്ധിസ്മൃതിമേള ഇന്ന് (23) വൈകിട്ട് മൂന്നിന് നഗരസഭാധ്യക്ഷ പന്തളത്ത് ഉദ്ഘാടനം ചെയ്യും.  ഖാദി തുണിത്തരങ്ങള്‍ക്ക് മേളയില്‍ 20 ശതമാനം വരെ റിബേറ്റ് ലഭിക്കും. കൂടാതെ ആയിരം രൂപയുടെ പര്‍ച്ചേസിന് ഒരു ഗിഫ്റ്റ് കൂപ്പണും ലഭിക്കുമെന്ന് പ്രോജക്ട് ഓഫീസര്‍ അറിയിച്ചു.            (പിഎന്‍പി 257/19)

അടൂര്‍ നഗരസഭയുടെ 2019-20 വാര്‍ഷികപദ്ധതികള്‍ക്ക് ജില്ലാ ആസൂത്രണസമിതിയുടെ അംഗീകാരം. ഇതോടുകൂടി ജില്ലയിലെ എല്ലാ തദ്ദേശഭരണ സ്ഥാപനങ്ങളുടേയും വാര്‍ഷിക പദ്ധതികള്‍ക്ക് അംഗീകാരമായി. ജില്ലാ പഞ്ചായത്ത് പ്രസിഡന്റ് അന്നപൂര്‍ണദേവിയുടെ അധ്യക്ഷതയില്‍ ചേര്‍ന്ന ജില്ലാ ആസൂത്രണസമിതി യോഗമാണ് പദ്ധതികള്‍ക്ക് അംഗീകാരം നല്‍കിയത്. അടൂര്‍ നഗരസഭയുടെ 126797248 രൂപ അടങ്കല്‍ വരുന്ന 186 പദ്ധതികള്‍ക്കാണ് അംഗീകാരം ലഭിച്ചത്. മല്ലപ്പള്ളി ബ്ലോക്ക് പഞ്ചായത്ത്, റാന്നി ബ്ലോക്ക് പഞ്ചായത്ത്, അയിരൂര്‍ ഗ്രാമപഞ്ചായത്ത് എന്നിവയുടെ 2018-19 വാര്‍ഷികപദ്ധതി ഭേദഗതിക്കും യോഗം അംഗീകാരം നല്‍കി.

ആരോഗ്യ വകുപ്പ് ജില്ലാ മെഡിക്കല്‍ ഓഫീസിന്റെ നേതൃത്വത്തില്‍ നടത്തേണ്ട ആരോഗ്യ സന്ദേശയാത്ര, പോളിയോ ഇമ്യൂണൈസേഷന്‍ പരിപാടി, കുഷ്ഠരോഗ നിയന്ത്രണ പക്ഷാചരണം എന്നിവയുടെ നടത്തിപ്പിനെ സംബന്ധിച്ച് ഇന്ന് രാവിലെ 10.30ന് ജില്ലാ കളക്ടറുടെ അധ്യക്ഷതയില്‍ ഇന്റര്‍ സെക്ടറല്‍ കോ-ഓര്‍ഡിനേഷന്‍ കമ്മിറ്റി യോഗം ചേരും.

          (പിഎന്‍പി 254/19)

എംബിബിഎസ്, എന്‍ജിനീയറിംഗ്, ബിഡിഎസ് തുടങ്ങിയ പ്രൊഫഷണല്‍ കോഴ്‌സുകള്‍ക്ക് പഠിക്കുന്ന വിധവകളുടെ കുട്ടികളുടെ ട്യൂഷന്‍ ഫീസ്, ഹോസ്റ്റല്‍ ഫീസ് എന്നിവ നല്‍കുന്നതിന് ധനസഹായത്തിന് അപേക്ഷിക്കാം. വാര്‍ഷിക വരുമാനം മൂന്ന ലക്ഷം രൂപയില്‍ കവിയാന്‍ പാടില്ല. അപേക്ഷ സ്വീകരിക്കുന്ന അവസാന തീയതി ഈ മാസം 31. അപേക്ഷാഫോറവും കൂടുതല്‍ വിവരവും  ശിശുവികസന പദ്ധതി ഓഫീസുകളില്‍ ലഭിക്കും. ഫോണ്‍: 0468 2224130.                                                          (പിഎന്‍പി 253/19)