പത്തനംതിട്ട ജില്ലയില്‍ ഇന്ന് (18) 28 പേര്‍ക്ക് കോവിഡ്-19 സ്ഥിരീകരിച്ചു. ഇതില്‍ ഒരാള്‍ക്ക് ട്രൂനാറ്റ് പരിശോധനയിലൂടെയാണ് രോഗം സ്ഥിരീകരിച്ചത്.

  ജില്ലാ കളക്ടറുടെ തിരുവല്ല താലൂക്ക് തല ഓണ്‍ലൈന്‍ അദാലത്ത് ഓഗസ്റ്റ് ഒന്നിന് നടത്തും. ജില്ലാ കളക്ടര്‍ കളക്ടറേറ്റില്‍ നിന്നും വീഡിയോ കോണ്‍ഫറന്‍സിലൂടെ അക്ഷയ കേന്ദ്രങ്ങള്‍ മുഖേനയാണ് ജനങ്ങളുടെ പരാതികള്‍ കേള്‍ക്കുന്നത്. ഇതിനായി തിരുവല്ല താലൂക്കിലുള്ള അപേക്ഷകര്‍ക്ക് ജൂലൈ  20 മുതല്‍ 24 ന് വൈകുന്നേരം അഞ്ചു വരെ തിരുവല്ലയിലെ അക്ഷയകേന്ദ്രങ്ങളില്‍ ഫോണ്‍ മുഖേന രജിസ്റ്റര്‍ ചെയ്യാം.

     കോവിഡ് സമ്പര്‍ക്ക വ്യാപനം കൂടുന്ന പശ്ചാത്തലത്തില്‍ അടൂര്‍ നഗരസഭയിലെ എല്ലാ വാര്‍ഡിലും ഏഴു ദിവസത്തേക്ക് പൂര്‍ണമായും കണ്ടെയ്ന്‍മെന്റ് സോണ്‍ മാതൃകയില്‍ ക്രമീകരണം ഏര്‍പ്പെടുത്താന്‍ ചിറ്റയം ഗോപകുമാര്‍ എംഎല്‍എയുടെ അധ്യക്ഷതയില്‍ ആര്‍ഡിഒ ഓഫീസില്‍ ചേര്‍ന്ന യോഗം തീരുമാനിച്ചു. ജൂലൈ 18ന് രാത്രി മുതല്‍ പ്രാബല്യത്തില്‍ വരുന്ന നിലയിലാണ് തീരുമാനം.

സംസ്ഥാന സര്‍ക്കാര്‍ സ്ഥാപനമായ ഐഎച്ച്ആര്‍ഡിയുടെ ആറ് എന്‍ജിനിയറിംഗ് കോളജുകളിലേക്ക് 2020-21 അധ്യയന വര്‍ഷത്തില്‍ എന്‍ആര്‍ഐ സീറ്റുകളില്‍ ഓണ്‍ലൈന്‍ വഴി പ്രവേശനത്തിന് അപേക്ഷ ക്ഷണിക്കുന്നു.
അപേക്ഷ http://ihrd.kerala.gov.in/enggnri എന്ന വെബ്‌സൈറ്റ് അല്ലെങ്കില്‍ കോളജുകളുടെ വെബ്‌സൈറ്റ് വഴി (പ്രോസ്‌പെക്ടസ് പ്രകാരമുള്ള) ഓണ്‍ലൈനായി സമര്‍പ്പിക്കണം.  ജൂലൈ 17ന് രാവിലെ 10 മുതല്‍ ഓഗസ്റ്റ് മൂന്നിന് വൈകിട്ട് അഞ്ചു വരെ അപേക്ഷകള്‍ ഓണ്‍ലൈനായി സമര്‍പ്പിക്കാം. ഓരോ കോളജിലേയും പ്രവേശനത്തിന് പ്രത്യേകം അപേക്ഷകള്‍ സമര്‍പ്പിക്കണം.

പത്തനംതിട്ട ജില്ലയിലെ നാലാമത്തെ കോവിഡ് ഫസ്റ്റ് ലൈന്‍ ട്രീറ്റ്‌മെന്റ് സെന്റര്‍ പത്തനംതിട്ട ജിയോ ആശുപത്രിയില്‍ വീണാ ജോര്‍ജ് എംഎല്‍എ ഉദ്ഘാടനം ചെയ്തു. നിലവില്‍ 90 കിടക്കകളാണ് ആശുപത്രിയില്‍ സജ്ജമാക്കിയിട്ടുള്ളത്.  ചാര്‍ജ് ഡോക്ടര്‍ അടക്കം അഞ്ചു ഡോക്ടര്‍മാരെയും, ഏഴ് നഴ്‌സുമാരെയും, ഏഴ് പാരാമെഡിക്കല്‍ സ്റ്റാഫിനേഴും നിയമിച്ചിട്ടുണ്ട്.

ഓണ്‍ലൈനായി നടത്തിയ ജില്ലാ കളക്ടറുടെ മല്ലപ്പള്ളി താലൂക്ക്തല പൊതുജന പരാതി പരിഹാര അദാലത്തില്‍ 32 പരാതി ലഭിച്ചതില്‍ 11 എണ്ണം പരിഹരിച്ചു. ജില്ലാ കളക്ടര്‍ പി.ബി. നൂഹിന്റെ അധ്യക്ഷതയിലാണ് ഓണ്‍ലൈന്‍ അദാലത്ത് നടന്നത്. കോട്ടാങ്ങല്‍, കല്ലൂപ്പാറ ഗ്രാമപഞ്ചായത്തുകളിലെ നാല് വാര്‍ഡുകള്‍ കണ്ടെയ്ന്‍മെന്റ് സോണായതിനാല്‍ ആറു പരാതികള്‍ കേള്‍ക്കാന്‍ സാധിച്ചില്ല. ഇതൊഴികെ  26 പരാതികളാണ് പരിഗണിച്ചത്. ഇതില്‍ 11 എണ്ണം പരിഹരിച്ചു.

ജല ജീവന്‍ മിഷന്‍ പദ്ധതിയുടെ ഭാഗമായി  ആറന്മുള നിയോജക മണ്ഡലത്തില്‍ 4860 പുതിയ ശുദ്ധജല കണക്ഷനുകള്‍ നല്‍കുമെന്ന് വീണാ ജോര്‍ജ് എംഎല്‍എ അറിയിച്ചു.
പദ്ധതിയുടെ ഭാഗമായി ഓരോ പഞ്ചായത്തിലും ആവശ്യാനുസരണം പൈപ്പ് ലൈന്‍ എക്സ്റ്റഷന്‍ നടത്തുമെന്നും എംഎല്‍എ അറിയിച്ചു.
 മണ്ഡലത്തിലെ 12 പഞ്ചായത്തുകള്‍ക്കും ഇതിന്റെ പ്രയോജനം ലഭിക്കുമെന്ന് എംഎല്‍എ പറഞ്ഞു. 13.32 കോടി രൂപയാണ് പദ്ധതി നിര്‍വഹണത്തിനായി  ചെലവഴിക്കാന്‍ ഉദ്ദേശിക്കുന്നത്.  ഈ പദ്ധതിയിലൂടെ
ആറന്മുള മണ്ഡലത്തിലെ വിവിധ പ്രദേശങ്ങളില്‍ കുടിവെള്ള പ്രശ്‌നം നേരിടുന്നവര്‍ക്ക് പദ്ധതി പരിഹാരമാകുമെന്ന് എംഎല്‍എ പറഞ്ഞു.

താമരക്കുളം നീലാംബരി ആശുപത്രി രണ്ട് ദിവസത്തിനുള്ളിൻ സജ്ജമാക്കും. 

ചാരമൂട് :ഭരണിക്കാവ് ബ്ലോക്ക് പഞ്ചായത്ത് പരിധിയിലെ പഞ്ചായത്തുകളിൽ കൂടുതൽ സ്രവ പരിശോധനയ്ക്കായി താമരക്കുളം സ നീലാംബരി ആശുപത്രി സജ്ജമാക്കും.

ആരോഗ്യവകുപ്പിന്റെ നിർദ്ദേശം ജില്ലാ ഭരണകൂടം അംഗീകരിച്ചതായി സ്ഥിതിഗതികൾ വിലയിരുത്തുന്നതിനായി താമരക്കുളം പഞ്ചായത്തിൽ നടന്ന ജാഗ്രത സമിതി യോഗത്തിൽ ആർ. രാജേഷ്.എം. എൽ. എ അറിയിച്ചു. രണ്ട് ദിവസത്തിനുള്ളിൽ ആശുപത്രി ഇതിനായി സജ്ജമാക്കും.