വിവിധ സര്‍ക്കാര്‍ വകുപ്പുകളില്‍ ജോലിയില്‍ പ്രവേശിച്ചവരുടെ സര്‍വീസ് റഗുലറൈസ് ചെയ്യുന്നതുമായി ബന്ധപ്പെട്ട് ജൂലൈ 13 മുതല്‍ 17 വരെ പി എസ് സി ജില്ലാ ഓഫീസില്‍ നടത്താന്‍ നിശ്ചയിച്ചിരുന്ന സര്‍വീസ് വെരിഫിക്കേഷന്‍ ഇനിയൊരറിയിപ്പ് ഉണ്ടാകുന്നതുവരെ മാറ്റിവച്ചു. ജില്ലാ ഓഫീസുമായുള്ള പൊതുവായ അന്വേഷണങ്ങള്‍ക്ക് 0474-2743624 നമ്പരിലോ doklm.psc@kerala.gov.in വെബ്‌സൈറ്റിലോ ബന്ധപ്പെടാം.
(പി.ആര്‍.കെ നമ്പര്‍ 1828/2020)  

ബെന്‍സിഗര്‍ ആശുപത്രിയ്ക്ക് സമീപമുള്ള ഹനുമാന്‍ കോവിലില്‍ നിന്നും ആരംഭിച്ച് ആണ്ടാമുക്കം പ്രൈവറ്റ് ബസ് സ്റ്റാന്‍ഡ് വഴി ചിറ്റടീശ്വരം ശിവക്ഷേത്രം വരെ എത്തുന്ന റോഡ്, പി എസ് സി ഓഫീസിന് മുന്നിലൂടെ കടന്നുപോകുന്ന റോഡ്, എതിര്‍വശത്തേക്കുള്ള റോഡ് എന്നിവിടങ്ങളില്‍ ടാറിംഗ് പ്രവൃത്തികള്‍ ആരംഭിക്കുന്നതിനാല്‍ ഇന്ന് മുതല്‍(ജൂലൈ 09) ഒരാഴ്ച്ചക്കാലത്തേക്ക് ഇതുവഴിയുള്ള ഗതാഗതം നിരോധിച്ചതായി  പൊതുമരാമത്ത്  നിരത്ത് വിഭാഗം അസിസ്റ്റന്റ് എഞ്ചിനീയര്‍ അറിയിച്ചു.
(പി.ആര്‍.കെ നമ്പര്‍ 1827/2020)
 

ജില്ലയിലെ സര്‍ക്കാര്‍,  എയ്ഡഡ്, അംഗീകൃത സ്വകാര്യ സ്‌കൂളുകളില്‍ പഠിക്കുന്ന പട്ടികവര്‍ഗ വിദ്യാര്‍ഥികള്‍ക്കുള്ള വിദ്യാഭ്യാസ ധനസഹായത്തിന് അപേക്ഷിക്കാം. ഒന്ന് മുതല്‍ പത്ത് വരെയുള്ള വിദ്യാര്‍ഥികള്‍ക്കാണ് ധനസഹായം. സ്‌കൂള്‍ മേധാവികളുടെ ബാങ്ക് പാസ്ബുക്കിന്റെ  പകര്‍പ്പ്, കുട്ടികളുടെ ലിസ്റ്റ് എന്നിവ സഹിതം ജൂലൈ 15 ന് മുമ്പ് പുനലൂര്‍ പട്ടികവര്‍ഗ വികസന ഓഫീസില്‍ അപേക്ഷിക്കണം.

നാഷണല്‍ ട്രസ്റ്റ് ലീഗല്‍ ഗാര്‍ഡിയന്‍ഷിപ്പ് ഹിയറിങ് നടത്തി,  56 പരാതികള്‍ തീര്‍പ്പാക്കി. കലക്‌ട്രേറ്റ് കോണ്‍ഫറന്‍സ് ഹാളില്‍ നടന്ന  ഓണ്‍ലൈന്‍ ഹിയറിങില്‍ ജില്ലാ കലക്ടര്‍ ബി അബ്ദുല്‍ നാസര്‍ അധ്യക്ഷനായി.
59 പരാതികളാണ് ഹിയറിങില്‍ പരിഗണിച്ചത്. നിയമപരമായി രക്ഷകര്‍ത്താവിനെ ലഭിക്കുന്നതുമായി ബന്ധപ്പെട്ട 51 പരാതികളും വസ്തു സംബന്ധമായ അഞ്ച് പരാതികളും ഹിയറിങില്‍ പരിഗണിച്ച് തീര്‍പ്പാക്കി. മൂന്ന് പരാതികള്‍ ബന്ധപ്പെട്ടവയല്ലാത്തതിനാല്‍ ഒഴിവാക്കി.

തരിശ് നിലങ്ങള്‍  കൃഷിയോഗ്യമാക്കി  കാര്‍ഷിക മേഖലയില്‍ ജില്ല മികച്ച നേട്ടം കൈവരിച്ചിരിക്കുകയാണെന്ന്  ജില്ലാ പഞ്ചായത്ത് പ്രസിഡന്റ് സി രാധമണി. ജില്ലാ പഞ്ചായത്തില്‍ ചേര്‍ന്ന കാര്‍ഷിക വികസന സമിതി യോഗത്തില്‍ അധ്യക്ഷത വഹിക്കുകയായിരുന്നു അവര്‍.
കുട്ടികളടക്കമുള്ളവര്‍ കാര്‍ഷിക മേഖലയിലേക്ക് വരുന്നുണ്ട്. സുഭിക്ഷ കേരളം പദ്ധതി വഴി കാര്‍ഷിക മേഖലയില്‍ വലിയ മാറ്റമാണ് സൃഷ്ടിക്കാന്‍ പോകുന്നതെന്നും പ്രസിഡന്റ് പറഞ്ഞു.

കോവിഡ് 19 രോഗവ്യാപന  പ്രതിരോധത്തിന്റെ ഭാഗമായി ജില്ലയിലെ എംപ്ലോയ്‌മെന്റ് എക്‌സ്‌ചേഞ്ച്കള്‍ വഴിയുള്ള സേവനങ്ങള്‍ക്ക് ഓണ്‍ലൈന്‍ ക്രമീകരണങ്ങള്‍ ഏര്‍പ്പെടുത്തി. രജിസ്‌ട്രേഷന്‍,  പുതുക്കല്‍, സര്‍ട്ടിഫിക്കറ്റ് ചേര്‍ക്കല്‍,  തൊഴില്‍ പരിചയ സര്‍ട്ടിഫിക്കറ്റ് കൂട്ടിച്ചേര്‍ക്കല്‍ എന്നിവ 2020 സെപ്റ്റംബര്‍ 30 വരെ www.eemployment.kerala.gov.in വെബ്‌സൈറ്റില്‍ ഓണ്‍ലൈനായി ലഭിക്കും. ഉദ്യോഗാര്‍ഥികളുടെ അപേക്ഷപ്രകാരം രജിസ്‌ട്രേഷന്‍ പുതുക്കല്‍ ടെലഫോണ്‍/ഇ-മെയില്‍ വഴിയും ചെയ്യാം.

രോഗവ്യാപനത്തോത് വർദ്ധിച്ചുവരുന്ന സാഹചര്യത്തിൽ കോട്ടപ്പുറം ചന്തയിലെ നിയന്ത്രണങ്ങൾ കൂടുതൽ കർശനമാക്കുവാൻ തീരുമാനം. ചെയർമാൻ കെ.ആർ. ജൈത്രന്റെ അദ്ധ്യക്ഷതയിൽ നഗരസഭയിൽ ചേർന്ന വ്യാപാരി-തൊഴിലാളി സംഘടനാ ഭാരവാഹികളുടെയും ജനപ്രതിനിധികളുടെയും ഉദ്യോഗസ്ഥരുടെയും യോഗത്തിലാണ് തീരുമാനം.

കടപ്പുറം ഗവണ്മെന്റ് വിഎച്ച്എസ്സി സ്‌ക്കൂളിലെ എൻഎസ്എസ് യൂണിറ്റ് തയ്യാറാക്കിയ കോവിഡ് ഡയറികൾ വിതരണം ചെയ്തു. കോവിഡ് 19 ജാഗ്രതയുടെ ഭാഗമായി വാഹനങ്ങളിൽ യാത്ര ചെയ്യുന്നവരുടേയും, കടകളിൽ വരുന്നവരുടേയും വിവരങ്ങൾ രേഖപ്പെടുത്താൻ വേണ്ടിയാണ് ഡയറികൾ വിദ്യാർഥികൾ തയ്യാറാക്കിയത്. ഡയറി വിതരണ ഉദ്ഘാടനം കടപ്പുറം പഞ്ചായത്ത് പ്രസിഡണ്ട് പി. വി ഉമ്മർ കുഞ്ഞി നിർവഹിച്ചു. കടപ്പുറം അഞ്ചങ്ങാടിയിലുള്ള മുഴുവൻ കടക്കാർക്കും, ഓട്ടോ, ടാക്‌സി തൊഴിലാളികൾക്കും ഡയറികൾ നൽകി.