സംസ്ഥാന വിവരാവകാശ കമ്മീഷണർ ശ്രീലത പി.ആർ വയനാട് കളക്‌ട്രേറ്റ് വീഡിയോ കോൺഫറൻസ് ഹാളിൽ 10 നും കോഴിക്കോട് കളക്‌ട്രേറ്റ് വീഡിയോ കോൺഫറൻസ് ഹാളിൽ 15 നും നടത്താൻ നിശ്ചയിച്ചിരുന്ന ഹിയറിംഗ് മാറ്റി വച്ചു.
പി.എൻ.എക്സ്.2241/19

ഉപതെരഞ്ഞെടുപ്പിന് മുന്നോടിയായി സംസ്ഥാനത്തെ 11 ജില്ലകളിലെ 28 വാർഡുകളിൽ വോട്ടർപട്ടിക പുതുക്കുന്നതിന് നടപടികൾ സ്വീകരിക്കാൻ സംസ്ഥാന തെരഞ്ഞെടുപ്പ് കമ്മീഷണർ വി. ഭാസ്‌കരൻ ഇലക്ടറൽ രജിസ്‌ട്രേഷൻ ഓഫീസർമാർക്ക് നിർദ്ദേശം നൽകി. 

കെ.എച്ച്.ആർ.ഡബ്ല്യു.എസിന്റെ ആഭിമുഖ്യത്തിൽ പൂജപ്പുര പഞ്ചകർമ ആയുർവേദ ആശുപത്രിയിൽ ആരംഭിച്ച പേവാർഡിൽ പഞ്ചകർമ ചികിൽസക്കായി ബുക്കിംഗ് ആരംഭിച്ചു. നിലവിൽ കണ്ണൂർ പരിയാരം ആയുർവേദ ആശുപത്രി, പാലക്കാട് ജില്ലാ ആയുർവേദ ആശുപത്രി, നെയ്യാറ്റിൻകര ആയുർവേദ ആശുപത്രി എന്നിവിടങ്ങളിലും പേവാർഡുകൾ പ്രവർത്തിക്കുന്നുണ്ട്. ആധുനിക സൗകര്യങ്ങളോടെ പൂജപ്പുര പഞ്ചകർമ്മ ആശുപത്രിയിൽ സ്ഥാപിച്ചിട്ടുള്ള പേവാർഡിൽ 38 രോഗികൾക്ക് ചികിൽസ നൽകാനാവും. പിഴിച്ചിൽ, ഉഴിച്ചിൽ, കിഴി, ധാര, നസ്യം, തിരുമ്മൽ തുടങ്ങി എല്ലാവിധ പഞ്ചകർമ ചികിൽസകളും ഇവിടെ ലഭിക്കും. ചികിത്സ ആവശ്യമുള്ളവർ ആശുപത്രിയിലെ കെ.എച്ച്.ആർ.ഡബ്ല്യു.എസ്. കൗണ്ടറുമായി ബന്ധപ്പെടണം.

സംസ്ഥാനത്തെ ഒരു അർദ്ധസർക്കാർ സ്ഥാപനത്തിൽ 22,000 രൂപ ശമ്പളനിരക്കിൽ സൂപ്പർവൈസർ (ടെക്‌സ്റ്റൈൽസ്) താത്കാലിക ഒഴിവുണ്ട് (എൽ.സി/എ.ഐ വിഭാഗത്തിനായി സംവരണം ചെയ്തിരിക്കുന്നു). എസ്.എസ്.എൽ.സിയും സ്റ്റേറ്റ് ബോർഡ് ഓഫ് ടെക്‌നിക്കൽ എഡ്യൂക്കേഷൻ അംഗീകരിച്ച ത്രിവത്സര ഡിപ്ലോമയും സ്പിന്നിംഗ് മില്ലിൽ രണ്ട് വർഷം പ്രവൃത്തി പരിചയവുമാണ് യോഗ്യത. പ്രായപരിധി 01.01.2018 ന് 18-41 (നിയമാനുസൃത വയസ്സിളവ് ബാധകം). നിശ്ചിത യോഗ്യതയുള്ള ഉദ്യോഗാർത്ഥികൾ അസൽ സർട്ടിഫിക്കറ്റുകളുമായി അതത് എംപ്ലോയ്‌മെന്റ് എക്‌സ്‌ചേഞ്ചുകളിൽ ജൂലൈ 24 നകം ഹാജരാകണം.

കൊച്ചി: ജനറൽ എഞ്ചിനീയറിംഗ് രംഗത്തെ നവ കാഴ്ചപ്പാടുകളുമായി ഏകദിന ശിൽപശാല ശ്രദ്ധേയമായി. സംസ്ഥാന  വ്യവസായ വാണിജ്യ വകുപ്പിന്റെ നേതൃത്വത്തിൽ കെ-ബിപിന്റെ സഹകരണത്തോടെ നടത്തിയ ശിൽപശാലയാ ണ് നൂതനാവിഷ്കാരങ്ങൾ കൊണ്ട് ശ്രദ്ധേയമായത്. രാവിലെ 10.30 ആരംഭിച്ച ശിൽപശാലയുടെ ഉദ്ഘാടനം വ്യവസായ വകുപ്പ് മന്ത്രി ഇ.പി.ജയരാജനാണ് നിർവഹിച്ചത്. തുടർന്നാണ് വിദഗ്ദർ നയിച്ച ക്ലാസുകൾ നടന്നത്. വെൽഡിങ്ങ് രംഗത്തെ മുന്നൊരുക്കങ്ങൾ എന്ന വിഷയത്തിൽ ട്രിച്ചി വെൽഡിങ്ങ് ഇൻസ്റ്റിറ്റ്യൂട്ട് മാനേജർ ഡോ. പി. ആർ. വെങ്കിടേശ്വരനാണ് ആദ്യ ക്ലാസ് നയിച്ചത്.

തൈക്കാട് ഗവൺമെന്റ് കോളേജ് ഓഫ് ടീച്ചർ എഡ്യൂക്കേഷനിൽ രണ്ടു വർഷ എം.എഡ്. കോഴ്‌സിൽ ഒഴിവുള്ള സീറ്റുകളിലേക്കുള്ള സ്‌പോട്ട് അഡ്മിഷൻ 10ന് രാവിലെ 10ന് കോളേജിൽ നടത്തും. വിദ്യാർഥികൾ അസ്സൽ സർട്ടിഫിക്കറ്റുകൾ സഹിതം ഹാജരാകണം. ഫോൺ: 0471-2323964.
പി.എൻ.എക്സ്.2237/19

തിരുവനന്തപുരം മെഡിക്കൽ കോളേജ് ചൈൽഡ് ഡെവലപ്പ്‌മെന്റ് സെന്ററിൽ ഡയറക്ടറുടെ പേഴ്‌സണൽ സെക്രട്ടറി (25200-54000) തസ്തികയിൽ ഡെപ്യൂട്ടേഷന് അപേക്ഷ ക്ഷണിച്ചു. ഇംഗ്ലീഷിൽ ബിരുദവും സർക്കാർ/ സ്വയംഭരണ സ്ഥാപനങ്ങളിൽ അഞ്ചു വർഷത്തെ പ്രവൃത്തി പരിചയവുമാണ് യോഗ്യത. ബയോഡേറ്റ, വകുപ്പ് മേധാവിയുടെ എൻ.ഒ.സി, കെ.എസ്.ആർ പാർട്ട്-1, റൂൾ 144 പ്രകാരമുള്ള സ്റ്റേറ്റ്‌മെന്റ്, ഡിക്ലറേഷൻ എന്നിവ സഹിതമുള്ള അപേക്ഷ ഡയറക്ടർ, ചൈൽഡ് ഡെവലപ്പ്‌മെന്റ് സെന്റർ, മെഡിക്കൽ കോളേജ്, തിരുവനന്തപുരം-11 (ഫോൺ: 0471-2553540) എന്ന വിലാസത്തിൽ ജൂലൈ 20നകം ലഭിക്കണം.
പി.എൻ.എക്സ്.2236/19

കൊച്ചി: എഞ്ചിനീയറിംഗ് മേഖല വിപുലീകരിക്കേണ്ടത് എല്ലാ വ്യവസായങ്ങളുടെയും  വളർച്ചക്ക് അത്യാവശ്യമാണെന്ന് വ്യവസായ വകുപ്പ് മന്ത്രി ഇ.പി.ജയരാജൻ അഭിപ്രായപ്പെട്ടു. വ്യവസായ - വാണിജ്യ വകുപ്പിന്റെ നേതൃത്വത്തിൽ കെ-ബിപി ന്റെ സഹകരണത്തോടെ ജനറൽ എഞ്ചിനീയറിംഗ്  മേഖലയെ കുറിച്ച് നടത്തിയ ശിൽപ ശാലയുടെ ഉദ്ഘാടനം നിർവഹിച്ച് സംസാരിക്കുകയായിരുന്നു മന്ത്രി. മനുഷ്യ ജീവിതത്തിന്റെ സമസ്ത മേഖലകളിലും സ്പർശിക്കുന്ന ഒന്നായി എഞ്ചിനീയറിംഗ് മേഖല മാറി. ഭൂകമ്പങ്ങൾ, പ്രകൃതി ദുരന്തങ്ങൾ തുടങ്ങി എല്ലാ മേഖലകളിലും ഇതിന്റെ പ്രാധാന്യം അനുദിനം വർധിക്കുകയാണ്.