കൊറോണ കെയര്‍ സെന്ററുകളും റീഹാബിലിറ്റേഷന്‍ സെന്ററുകളും ഇനി മുതല്‍ അതതു പ്രാഥമികാരോഗ്യകേന്ദ്രത്തിലെ മെഡിക്കല്‍ ഓഫീസര്‍മാരുടെ നിയന്ത്രണത്തിലായിരിക്കും പ്രവര്‍ത്തിക്കുക. സുഗമമായ പ്രവര്‍ത്തനത്തിന് ഒരു ജൂനിയര്‍ ഹെല്‍ത്ത് ഇന്‍സ്‌പെക്ടര്‍, ഹെല്‍ത്ത് വോളന്റിയര്‍, ജെ പി എച് എന്‍ എന്നിവര്‍ അടങ്ങിയ ടീം നേതൃത്വം നല്‍കും. ഹെല്‍ത്ത് ഇന്‍സ്‌പെക്ടര്‍മാര്‍ കോര്‍ഡിനേറ്റ് ചെയ്യും. ബ്ലോക്ക് മെഡിക്കല്‍ ഓഫീസര്‍, ഹെല്‍ത്ത് സൂപര്‍വൈസര്‍ എന്നിവര്‍ പ്രവര്‍ത്തനങ്ങള്‍ വിലയിരുത്തും.

വള്ളിക്കോട് ഗ്രാമപഞ്ചായത്ത് കുടുംബശ്രീയുമായി ചേര്‍ന്ന് കമ്മ്യൂണിറ്റി കിച്ചണ്‍ തുടങ്ങി. ഉച്ചഭക്ഷണം ആവശ്യമുള്ളവര്‍ തലേദിവസം 9847916063 എന്ന നമ്പരില്‍ അറിയിക്കണം. കമ്മ്യൂണിറ്റി കിച്ചണില്‍ അരി, പച്ചക്കറി, പലവ്യഞ്ജനങ്ങള്‍, പച്ചക്കറി എന്നിവ സൗജന്യമായി നല്‍കാന്‍ താത്പര്യമുള്ളവര്‍ 9496042679 എന്ന നമ്പരില്‍ അറിയിക്കണമെന്ന് സെക്രട്ടറി അറിയിച്ചു. 

കോവിഡ്  19 നിയന്ത്രണത്തിന്റെ ഭാഗമായി കമ്മ്യൂണിറ്റി കിച്ചണുകളില്‍ ആരോഗ്യ - ശുചിത്വ പരിശോധന നിര്‍ബന്ധമാക്കി. കിച്ചന്‍ സെന്ററുകളില്‍ പാചകം ചെയ്യുന്നവര്‍, വിതരണക്കാര്‍, ആരോഗ്യ വോളന്റിയര്‍മാര്‍ തുടങ്ങിയവരുടെ ആരോഗ്യ- ശുചിത്വ പരിശോധനയ്ക്കും ഭക്ഷ്യസാധനങ്ങളുടെ ഗുണനിലവാര പരിശോധനയ്ക്കും വിവിധ സ്‌ക്വാഡുകള്‍ രൂപീകരിച്ചു. പ്രാഥമികാരോഗ്യ കേന്ദ്രങ്ങളിലെ മെഡിക്കല്‍ ഓഫീസര്‍മാര്‍ ആരോഗ്യ പരിശോധനയ്ക്കും ബോധവല്ക്കരണ പ്രവര്‍ത്തനങ്ങള്‍ക്കും നേതൃത്വം നല്‍കുമെന്ന് ജില്ലാ മെഡിക്കല്‍ ഓഫീസര്‍ ഡോ ആര്‍ ശ്രീലത അറിയിച്ചു.

  ജില്ലയില്‍ കോവിഡ് 19 പോസിറ്റീവ് കേസ് റിപ്പോര്‍ട്ട് ചെയ്ത സാഹചര്യത്തില്‍ ബയോമഡിക്കല്‍ മാലിന്യ നിര്‍മാര്‍ജനത്തിന് കേന്ദ്ര മലിനീകരണ നിയന്ത്രണ ബോര്‍ഡിന്റെ മാര്‍ഗ നിര്‍ദേശം കര്‍ശനമാക്കി.  ക്വാറന്റൈന്‍ സെന്ററുകള്‍, ഐസൊലേഷന്‍ വാര്‍ഡുകള്‍, സാമ്പിള്‍ ശേഖരണ കേന്ദ്രങ്ങള്‍ എന്നിവിടങ്ങളില്‍ നിന്നുമുള്ള ബയോമെഡിക്കല്‍ മാലിന്യങ്ങളും ഇതര ഖരമാലിന്യങ്ങളും ശേഖരിക്കുന്നതിന് പ്രത്യേക ശുചീകരണ ജീവനക്കാരെ ചുമതലപ്പെടുത്തിയാണ് മാലിന്യ നിര്‍മാര്‍ജനം നടത്തുക.  

അടൂര്‍ നിയമസഭാ മണ്ഡലത്തിലെ എല്ലാ പഞ്ചായത്തിലും പന്തളം, അടൂര്‍ നഗരസഭകളിലും കമ്മ്യൂണിറ്റി കിച്ചണ്‍ സജീവമായെന്ന് ചിറ്റയം ഗോപകുമാര്‍ എം.എല്‍.എ പറഞ്ഞു. കമ്മ്യൂണിറ്റി കിച്ചണ്‍  പ്രവര്‍ത്തനം നേരിട്ടുവിലയിരുത്തുന്നതിന് എംഎല്‍എ എല്ലാ പഞ്ചായത്തും സന്ദര്‍ശിച്ചു. 

കോവിഡ് 19 ന്റെ പശ്ചാത്തലത്തില്‍ അതിഥി തൊഴിലാളികളുടെ സംരക്ഷണത്തിന് പ്രഥമ പരിഗണന നല്‍കുമെന്ന് ജില്ലാ കലക്ടര്‍ ബി. അബ്ദുല്‍ നാസര്‍ അറിയിച്ചു. സിറ്റി പോലീസ് കമ്മീഷണര്‍ ടി നാരായണനൊപ്പം കൊല്ലം ലാല്‍ ബഹാദുര്‍ സ്റ്റേഡിയം, പറക്കുളം, ഉമയനല്ലൂര്‍ മേഖലകള്‍ എന്നിവിടങ്ങളിലെ അതിഥി തൊഴിലാളി ക്യാമ്പുകളില്‍ സന്ദര്‍ശനം നടത്തുകയായിരുന്നു കലക്ടര്‍. ഇവരെ വിവിധ തൊഴിലുകള്‍ക്കെത്തിച്ച കോണ്‍ട്രാക്ടര്‍മാര്‍ കൂലിയും ഭക്ഷണവും മറ്റ് സൗകര്യങ്ങളും ഉറപ്പാക്കണം.

കോവിഡ് 19 പ്രതിരോധത്തിന്റെ ഭാഗമായി രാജ്യം ലോക്ക് ഡൗണായ സാഹചര്യത്തില്‍ കുട്ടികളും അവരവരുടെ വീടുകളില്‍ ബോറടിച്ച് അടങ്ങിയിരിപ്പാണ്. കൂട്ടുകാരോടൊത്ത് കളിക്കുന്നതിനുപോലും കഴിയാത്ത ഈ അവസരത്തില്‍ കുട്ടികളിലെ സര്‍ഗസൃഷ്ടികളെ ഉണര്‍ത്തിയെടുക്കുക എന്ന ലക്ഷ്യത്തോടെ പുത്തന്‍ ആശയുമായി എത്തിയിരിക്കുകയാണു ജില്ലാ ചൈല്‍ഡ് പ്രൊട്ടക്ഷന്‍ യൂണിറ്റ്.

കോവിഡ്-19 രോഗസാധ്യതയുള്ളവര്‍ക്ക് മാത്രമല്ല വയോധികര്‍ക്കും മറ്റു രോഗങ്ങളുള്ളവര്‍ക്കുമെല്ലാം ആരോഗ്യ സഹായവും പിന്തുണയുമായി സര്‍ക്കാര്‍ എത്തുന്നു. സാങ്കേതികവിദ്യയുടെ എല്ലാ സാധ്യതകളും കൊറോണ പ്രതിരോധപ്രവര്‍ത്തനങ്ങള്‍ക്ക് സര്‍ക്കാര്‍ ഉപയോഗിക്കുന്നതിന്റെ ഭാഗമായി സര്‍ക്കാര്‍ പോര്‍ട്ടലായ kerala.gov.in വെബ്സൈറ്റില്‍ രജിസ്റ്റര്‍ ചെയ്യാന്‍ അവസരം. 

സര്‍ക്കാര്‍ ഡോക്ടര്‍മാരുടെയും വിദഗ്ധരുടെയും വലിയൊരു ശൃംഖലയ്ക്ക് പുറമേ സ്വകാര്യ ഡോക്ടര്‍മാര്‍ ഉള്‍പ്പെടെയുള്ളവരുടെ സേവനം ഈ പോര്‍ട്ടലിലൂടെ ജനങ്ങള്‍ക്ക് ലഭ്യമാകും. 

തപാല്‍ വകുപ്പിന്റെ സഞ്ചരിക്കുന്ന പോസ്റ്റ് ഓഫീസ് സംവിധാനമായ പോസ്റ്റ് ഓഫീസ് ഓണ്‍ വീല്‍സ് മാര്‍ച്ച് (28) മുതല്‍ ജില്ലയുടെ വിവിധ ഭാഗങ്ങളില്‍ എത്തിത്തുടങ്ങി. സേവിംഗ്സ് ബാങ്ക് അക്കൗണ്ടില്‍ പണം നിക്ഷേപിക്കല്‍, പിന്‍വലിക്കല്‍, തപാല്‍ ഇന്‍ഷുറന്‍സ് പ്രീമിയം പേയ്‌മെന്റ്, രജിസ്ട്രേഡ് പോസ്റ്റ്, സ്പീഡ് പോസ്റ്റ്, ഇലക്ട്രോണിക് മണി ഓര്‍ഡര്‍ എന്നീ സേവനങ്ങള്‍ പോസ്റ്റ് ഓഫീസ് ഓണ്‍ വീല്‍സ്‌വഴി ലഭ്യമാണ്. 

വീടുകളില്‍ പുറത്തിറങ്ങാന്‍ കഴിയാത്തവര്‍ക്ക് അവശ്യ സാധനങ്ങളും മരുന്നും വാങ്ങുന്നതിനായി പത്തനംതിട്ട നഗരസഭ മുന്‍കൈയെടുത്ത് സാധനങ്ങള്‍ വീട്ടിലെത്തിക്കാനായി 'കരുതല്‍' പദ്ധതി ആരംഭിച്ചു. നഗരസഭയിലെ അന്തേവാസികള്‍ക്ക് അവശ്യ സാധനങ്ങളും മരുന്നുകളും പാകംചെയ്ത ഭക്ഷണവും വാങ്ങി വീടുകളില്‍ എത്തിക്കുന്നതിനായി ഫോണിലൂടെ ബന്ധപ്പെടാം. ആവശ്യപ്പെട്ട സാധനങ്ങള്‍ നഗരസഭ സംവിധാനം ഉപയോഗിച്ച് വീടുകളിലെത്തിച്ചു ബില്ലുകള്‍ നല്‍കും. ബില്ലിന്റെ തുകമാത്രം നല്‍കിയാല്‍ മതിയാകും. സര്‍വീസ് ചാര്‍ജ് ബാധകമല്ല. ഓണ്‍ലൈന്‍ ട്രാന്‍സാക്ഷന്‍ ആയിരിക്കും പരമാവധി ഉപയോഗപ്പെടുത്തുക. അത്യാവശ്യഘട്ടത്തില്‍ മാത്രമാകും പണം സ്വീകരിക്കുക.