ഇടുക്കി ജില്ലാ ആശുപത്രിയിൽ കോവിഡ് 19 പ്രതിരോധ പ്രവർത്തനങ്ങൾക്കായി വാർഡുകൾ മുഴുവൻ സജ്ജീകരിച്ചു  പ്രവർത്തനമാരംഭിച്ചതിനാൽ ഗർഭിണികൾക്കും നവജാത ശിശുക്കൾക്കുള്ള തുടർചികിത്സ ഇനി ഒരു അറിയിപ്പ് ഉണ്ടാകുന്നതുവരെ ഉണ്ടായിരിക്കില്ല. പകരം  അടിമാലി, നെടുങ്കണ്ടം താലൂക്ക് ആശുപത്രിയിൽ നിന്നും ചികിത്സ തേടേണ്ടതാണ് ആശുപത്രി സൂപ്രണ്ട് അറിയിച്ചു.

  കോവിഡിനെ തുരത്താന്‍ മുന്‍കരുതലും ജാഗ്രതയുമായി വീടുകളില്‍ കഴിയണമെന്ന് ഉറക്കെ വിളംബരം ചെയ്ത് അവര്‍ ജില്ലയുടെ ഗ്രാമഗ്രാമാന്തരങ്ങളിലും പട്ടണങ്ങളിലും ചുറ്റിക്കറങ്ങാന്‍ തുടങ്ങി. ജനനന്‍മയ്ക്കായി  ഒരു പ്രതിഫലവും ആഗ്രഹിക്കാതെ ഇന്നലെ മുതല്‍. ഓള്‍ കേരള ലൈറ്റ് ആന്റ് സൗണ്ട് അസോസിയേഷന്‍ ജില്ലാ ഘടകമാണ് ഈ നിസ്വാര്‍ഥ സേവനത്തിനു മുന്നിട്ടിറങ്ങിയിരിക്കുന്നത്. കോവിഡ് സംബന്ധിച്ചും ലോക് ഡൗണ്‍ സംബന്ധിച്ചുമുള്ള മുന്നറിയിപ്പുകളും ജാഗ്രതയും വിളംബരം ചെയ്ത് ഓരോ അനൗണ്‍സ്‌മെന്റ് വാഹനവും ഇനിയുള്ള ദിനങ്ങളില്‍ ജില്ലയില്‍ ചുറ്റിക്കറങ്ങും. ജില്ലാ ഭരണകൂടവും പോലീസുമായി സഹകരിച്ചാണ് അസോസിയേഷന്‍ ഈ സേവനത്തിനു ഇറങ്ങിത്തിരിച്ചത്.

കൊറോണയുടെ പശ്ചാത്തലത്തില്‍ ആരും വിശന്നിരിക്കേണ്ടി വരില്ല എന്ന സര്‍ക്കാരിന്റെ പ്രഖ്യാപനത്തെ  ജനങ്ങളും ഏറ്റെടുത്തു കഴിഞ്ഞു. ഇതിന്റെ ഭാഗമായി അടിമാലി മേഖലയിലെ വീടുകളില്‍ നിന്നും ശേഖരിച്ച 50തോളം ഭക്ഷണ പൊതികള്‍ യുവജന കൂട്ടായ്മയുടെ നേതൃത്വത്തില്‍ അന്യസംസ്ഥാന തൊഴിലാളികള്‍ക്ക് എത്തിച്ചു നല്‍കി.അടിമാലി  മേഖലകളിലും ചിത്തിരപുരം പ്രാഥമികാരോഗ്യ കേന്ദ്രത്തിലുള്ളവര്‍ക്കുമാണ് ഭക്ഷണം നല്‍കിയത്.ചിത്തിരപുരം പ്രാഥമികാരോഗ്യ കേന്ദ്രത്തിലെത്തിച്ച ഭക്ഷപൊതി മെഡിക്കല്‍ ഓഫീസര്‍ ഡോ. റെനി ഏറ്റുവാങ്ങി.കെ.

കുടുംബശ്രീയുടെ നേതൃത്വത്തില്‍ കട്ടപ്പന നഗരസഭയില്‍ സമൂഹ പാചകമുറിയുടെ പ്രവര്‍ത്തനം ആരംഭിച്ചു. കുടുംബശ്രീ പ്രവര്‍ത്തകരുടെ നേതൃത്വത്തില്‍ ടൗണ്‍ഹാള്‍ ജംഗ്ഷനിലാണ്  തയ്യാറാക്കുന്നത്.  പ്രഭാത ഭക്ഷണം രാവിലെ 8 മുതല്‍ 10 വരെയും, ഉച്ച ഭക്ഷണം 12.30 മുതല്‍  2 വരെയും, സായാഹ്ന ഭക്ഷണം 4 മുതല്‍ 5 വരെയുമാണ് വിതരണം നടത്തുന്നത്. ലോഡ്ജുകളില്‍ താമസിക്കുന്ന ഭക്ഷണത്തിന് വിഷമിക്കുന്നവര്‍, ഹോസ്റ്റല്‍ ക്യാന്റീന്‍ പ്രവര്‍ത്തിക്കാത്തതുകൊണ്ട് വിഷമിക്കുന്നവര്‍, ഓഫീസുകളിലും സ്ഥാപനങ്ങളിലും പ്രവര്‍ത്തിക്കുന്നവര്‍ എന്നിവരെ ഉദ്ദേശിച്ചാണ് ഭക്ഷണ ശാല ആരംഭിക്കുന്നത്.

* ധനസഹായത്തിനും വായ്പയ്ക്കുമായി അംഗങ്ങള്‍ അപേക്ഷിക്കണം
* അപേക്ഷ ഇ-മെയില്‍ മുഖാന്തിരം
* തിരിച്ചറിയല്‍ രേഖകളും ബാങ്ക് അക്കൗണ്ടും നിര്‍ബന്ധം

കോവിഡ് - 19 പ്രതിരോധ ഭാഗമായി ലോക്ക് ഡൗണ്‍ നിലനില്‍ക്കുന്ന സാഹചര്യത്തിലും വണ്ടിപ്പെരിയാര്‍ ഗ്രാമപഞ്ചായത്തില്‍ പട്ടിണി കിടക്കുന്നവരുണ്ടാകില്ല. ഇതിനായി പഞ്ചായത്തിന്റെ നേതൃത്വത്തില്‍ സമൂഹ പാചകമുറി പ്രവര്‍ത്തനമാരംഭിച്ചു. ആദ്യ ദിനത്തില്‍ വീടുകളില്‍ നിരീക്ഷണത്തിലിരിക്കുന്ന ആളുകള്‍ക്കാണ് കമ്യൂണിറ്റി കിച്ചണില്‍ നിന്നും ഊണ് എത്തിച്ചത്. 97 പേരാണ് ഇവിടെ നിരീക്ഷണത്തിലുള്ളത്. പഞ്ചായത്ത് കമ്മ്യൂണിറ്റി ഹാളിലാണ് കിച്ചണ്‍ ക്രമീകരിച്ചത്.  ഇവിടെ ഭക്ഷണമുണ്ടാക്കുന്നത് അറിഞ്ഞെത്തിയ 40 പേര്‍ക്കു കൂടി ഇവിടെ നിന്നും ഉച്ചഭക്ഷണം നല്കി.

 ജില്ലാ ഭരണകൂടവുമായി ചേര്‍ന്ന് പോലീസ് കര്‍ശന ജാഗ്രതയും നിരീക്ഷണവും പുലര്‍ത്തിവരുകയാണെന്നു ജില്ലാ പോലീസ് മേധാവി പി. കെ. മധു യോഗത്തില്‍ അറിയിച്ചു. അനാവശ്യമായി വഴിയിലിറങ്ങുന്നവര്‍ക്കെതിരേ നടപടി തുടരും. പോലീസ് സേനാംഗങ്ങള്‍ പൊതുജനങ്ങളോടു ഒരുകാരണവശാലും മോശമായി പെരുമാറാന്‍ പാടില്ലെന്ന സര്‍ക്കാര്‍ നിര്‍ദേശം കൃത്യമായി പാലിക്കണമെന്നു മന്ത്രി വ്യക്തമാക്കി. മുന്‍കരുതലിനൊപ്പം നിയന്ത്രണവും നിരോധനവും ശക്തമാക്കുക എന്ന നിലപാടാണ് സ്വീകരിക്കേണ്ടത്. ജില്ലയില്‍ തമിഴ്ജനത കൂടുതലുള്ളതിനാല്‍ റവന്യൂ, പോലീസ്, വനംവകുപ്പുകള്‍ കടുത്ത ജാഗ്രത പുലര്‍ത്തണമെന്നും മന്ത്രി നിര്‍ദേശിച്ചു.

 ഇടുക്കി സ്വദേശിയായ പൊതുപ്രവര്‍ത്തകനു കോവിഡ് സ്ഥിരീകരിച്ച സാഹചര്യത്തില്‍ അദ്ദേഹം ഏറ്റവും കൂടുതല്‍ ബന്ധപ്പെട്ടിട്ടുള്ള ചെറുതോണി ടൗണുമായി ബന്ധപ്പെട്ട മേഖലകളില്‍ ജാഗ്രതയും നിരീക്ഷണവും ശക്തമാക്കാന്‍ മന്ത്രി എം എം മണി നിര്‍ദേശിച്ചു.

 ജില്ലയില്‍ ലോക്ഡൗണിന്റെ പേരില്‍ ആരും പട്ടിണി കിടക്കാന്‍ അനുവദിക്കുകയില്ല. ജില്ലയിലെ 51 പഞ്ചായത്തുകളിലും കമ്യൂണിറ്റി കിച്ചന്‍ തുറന്നു കഴിഞ്ഞു. വീടുകളില്‍ നിരീക്ഷണമുള്ളവര്‍ക്കു ജില്ലാ ഭരണകൂടത്തിന്റെ ചെലവില്‍ ഭക്ഷണം എത്തിച്ചുകൊടുക്കും. ഉടമയുടെ കീഴില്‍ അല്ലാതെ ജോലി ചെയ്യുന്ന അതിഥി തൊഴിലാളികള്‍ക്കു പ്രത്യേക ക്യാമ്പ് ഒരുക്കി അവിടെ ഭക്ഷണം നല്‍കും. ഉടമകളുടെ കീഴിലുള്ളവര്‍ക്കു അവര്‍ തന്നെ ഭക്ഷണം നിര്‍ബന്ധമായും കൊടുത്തിരിക്കണം. ഇക്കാര്യത്തില്‍ വീഴ്ച വരുത്തുന്നുവര്‍ക്കെതിരേ നടപടിയെടുക്കും. കട്ടപ്പന, തൊടുപുഴ നഗരസഭകളിലും ഇത്തരത്തില്‍ പ്രവര്‍ത്തനം നടത്തും.