ജില്ലയുടെ അതിര്‍ത്തികളിലൂടെയാണ് കേരളത്തിലേക്കുള്ള പച്ചക്കറി, പാല്‍, അവശ്യവസ്തുക്കളുടെ വരവ്. ഈ വരവിന് ഒരുകാരണവശാലും തടസമുണ്ടാകുന്നില്ലെന്ന് ഉറപ്പുവരുത്തും. പച്ചക്കറിക്ക് അമിത വില ഈടാക്കാന്‍  അനുവദിക്കില്ല. മറയൂര്‍. വട്ടവട എന്നിവിടങ്ങളില്‍ ഇപ്പോള്‍ അധികമായിട്ടുള്ള പച്ചക്കറികള്‍ ജില്ലയുടെ വിവിധ ഭാഗങ്ങളില്‍ എത്തിക്കാന്‍ ഹോര്‍ട്ടികള്‍ച്ചര്‍ കോര്‍പറേഷനും വി എഫ് പി സികെയും ഇടപെടും. പഞ്ചായത്തുകളിലെ ഇക്കോഷോപ്പുകളും സഹ. ബാങ്കുകളുടെ സ്റ്റാളുകളും തുറക്കാന്‍ അനുവദിക്കും. പച്ചക്കറികളുടെ വില നിജപ്പെടുത്തി പ്രസിദ്ധപ്പെടുത്താന്‍ കൃഷി വകുപ്പിനും നിര്‍ദേശം നല്‍കി.

 ജില്ലയില്‍ രണ്ടു കോവിഡ് കേസുകള്‍ പുതുതായി റിപ്പോര്‍ട്ട് ചെയ്യപ്പെട്ടുവെങ്കിലും സ്ഥിതിഗതികള്‍ പൂര്‍ണമായും നിയന്ത്രണത്തിലാണെന്നു ജില്ലയുടെ ചുമതലയുള്ള വൈദ്യുതി മന്ത്രി എം എം മണി പറഞ്ഞു. ജനങ്ങള്‍ ഒരുതരത്തിലുമുള്ള വ്യാജപ്രചാരണങ്ങളില്‍ വിശ്വസിക്കരുത്. സര്‍ക്കാര്‍ നല്‍കുന്ന മുന്നറിയിപ്പുകളും നിര്‍ദേശങ്ങളും അക്ഷരംപ്രതി പാലിച്ചുകൊണ്ട് ലോക്ഡൗണ്‍ കാലാവധി തീരുന്നതുവരെ വീടുകള്‍ക്കുള്ളില്‍ സുരക്ഷിതരായി കഴിയണം. എങ്കില്‍ മാത്രമേ നമുക്ക് ആത്മവിശ്വാസത്തോടെ ഈ മഹാമാരിയെ തുരത്താനാകൂ.

ഇടുക്കി ജില്ലയില്‍ ഒരാള്‍ക്ക് കൂടി കോവിഡ് 19 സ്ഥിരീകരിച്ചതായി ജില്ലാ കളക്ടര്‍ എച്ച്. ദിനേശന്‍ അറിയിച്ചു. ഇടുക്കി സ്വദേശിക്കാണ് രോഗമുള്ളതായി പരിശോധനയില്‍ ബോധ്യപ്പെട്ടത് . ഇദ്ദേഹത്തെ തൊടുപുഴ ജില്ലാ ആശുപത്രി ഐസോലേഷന്‍ വാര്‍ഡിലേക്ക് മാറ്റി. ഇതോടെ ജില്ലയില്‍ ഇതുവരെ രണ്ടു പേര്‍ക്ക് രോഗം ബാധിച്ചു. നേരത്തെ മുന്നാര്‍ സന്ദര്‍ശനത്തിനെത്തിയ ബ്രിട്ടീഷ് പൗരനു രോഗം സ്ഥിരീകരിച്ചിരുന്നു. ഇദ്ദേഹം ഇപ്പോള്‍ സുഖം പ്രാപിച്ചു. ഇപ്പോള്‍ രോഗം സ്ഥിരീകരിച്ച പൊതുപ്രവര്‍ത്തകനായ ഇടുക്കി

.

 ജില്ലാ സപ്ലൈ ഓഫീസില്‍  24 മണിക്കൂര്‍ കണ്‍ട്രോള്‍ റൂം ആരംഭിച്ചു.  29 ലോഡ് ഭക്ഷ്യധാന്യങ്ങള്‍ എടുത്തിട്ടുണ്ട്.  ഏപ്രില്‍ മാസത്തെ അഡ്വാന്‍സ് വാതില്‍പ്പടിവിതരണം നടന്നുവരുന്നു.  വിതരണസംബന്ധമായി നിലവില്‍ പ്രശ്‌നങ്ങളൊന്നുമില്ല. താലൂക്കുകളില്‍ താലൂക്ക് സപ്ലൈ ഓഫീസര്‍മാരും  റേഷനിംഗ് ഇന്‍സ്‌പെക്ടര്‍മാരും  പൊതുവിപണിയിലെ വിലനിലവാരം പരിശോധിക്കുന്നതിനും കരിഞ്ചന്ത, പൂഴ്തിത്തിവയ്പ് എന്നിവ തടയുന്നതിനുമായി  48 പരിശോധനകള്‍   നടത്തി തുടര്‍നടപടികള്‍ സ്വീകരിച്ചു. നിലവില്‍  പൊതുവിപണിയില്‍ എല്ലാ അവശ്യസാധനങ്ങളും ലഭ്യമാണ്.

''അയ്യോ സാറേ, ഞാനൊന്നുമറിഞ്ഞില്ലേ .... ഇത്രയും നിയന്ത്രണം ഉണ്ടായിരുന്നോ?... ഇത്രയും ഗൗരവമാണോ കൊറോണ .....' ഇത്തരത്തിലുള്ള യാതൊരു വിശദീകരണങ്ങള്‍ക്കും പോലീസിന്റെ മുന്നില്‍ ലോക്ക് ഡൗണ്‍ ദിനങ്ങളില്‍  സ്ഥാനമില്ലെന്ന് ഏവരെയും  ഓര്‍മപ്പെടുത്തട്ടെ.ലോക്ക് ഡൗണ്‍ ദിവസങ്ങളില്‍ അനാവശ്യമായി ചുറ്റിക്കറങ്ങാന്‍ ഇറങ്ങുന്നവര്‍ പോലീസ് തടയുമ്പോള്‍ പറയുന്ന  ന്യായവാദങ്ങള്‍ പലതാണ്. ഈ വാദങ്ങള്‍ ഇനി ഇടുക്കിയില്‍ വിലപ്പോകില്ല. കാരണം മലയോര മേഖലയുടെ ഓരോ ഗ്രാമപ്രദേശത്തും മുക്കിലും മൂലയിലും  കോവിഡ് പ്രതിരോധവും അനാവശ്യമായി പുറത്തിറങ്ങരുതെന്ന മുന്നറിയിപ്പുകളും നല്കി അനൗണ്‍സ്‌മെന്റ് വാഹനങ്ങള്‍ വന്നു പോകുന്നുണ്ട്.

 ലോക്ഡൗണ്‍ ലംഘിച്ചതിന് ജില്ലയില്‍ ഇന്നലെ പോലീസ് 245 കേസെടുത്തു. 305 പേരെ പ്രതി ചേര്‍ത്തതായി ജില്ലാ പോലീസ് മേധാവി പി. കെ. മധു അറിയിച്ചു. തൊടുപുഴയിലാണ് കൂടുതല്‍ കേസുകളും പ്രതികളുമുണ്ടായിരിക്കുന്നത്. അനാവശ്യമായി നിരത്തിലിറക്കിയ 61 വാഹനങ്ങള്‍ പിടിച്ചെടുത്തു. ഈ വാഹനങ്ങള്‍ ഇനി ലോക് ഡൗണ്‍ കാലാവധി തീരുന്ന ഏപ്രില്‍ 14 നു ശേഷമേ ഉടമയ്ക്കു തിരികെ നല്‍കൂ. പരിശോധന വരുംദിവസങ്ങളിലും ശക്തമായി തുടരുമെന്നു എസ് പി. അറിയിച്ചു. മതിയായ കാരണമില്ലാതെ ഒരു കാരണവശാലും ജനങ്ങള്‍ റോഡിലിറങ്ങാന്‍ അനുവദിക്കുകയില്ല. കവലകളിലും കടത്തിണ്ണകളിലും അനാവശ്യമായി ഇരിക്കാന്‍ പാടില്ല. കൂട്ടംകൂടിയുള്ള ഒരു പരിപാടിയും നടത്തരുത്.

 ഇടുക്കി ജില്ലയില്‍ നിരീക്ഷണത്തില്‍ കഴിയുന്നവരുടെ വീടുകളിലേക്ക് ശുദ്ധജലം ഉറപ്പാക്കാന്‍ തൊടുപുഴ. മുവാറ്റുപുഴ ജല അതോറിറ്റി ഓഫീസില്‍ 24 മണിക്കൂറും കണ്‍ട്രോള്‍ റൂം തുറന്നു.  തൊടുപുഴ ഫോണ്‍ 04862 222812, മൊബെല്‍ 9188127933. മുവാറ്റുപുഴ 0485 2832252, 9188127934. ഈ നമ്പറുകളില്‍ ബന്ധപ്പെട്ടാല്‍ അത്യാവശ്യക്കാര്‍ക്ക് ജല അതോറിറ്റി ജീവനക്കാര്‍ കാനുകളില്‍ വെള്ളം എത്തിക്കും.

അത്യാവശ്യമില്ലാത്തവര്‍ ബാങ്കുകളിലേക്കു വരരുതെന്ന് ലീഡ് ബാങ്ക് മനേജര്‍ വി.വിജയകുമാരന്‍ അറിയിച്ചു. സര്‍ക്കാര്‍ അനുവദിച്ച വിവിധ പെന്‍ഷനുകള്‍, ധനസഹായങ്ങള്‍ തുടങ്ങിയവ ബാങ്ക് അക്കൗണ്ടിലൂടെ വിതരണം ചെയ്തു തുടങ്ങിയിട്ടുണ്ട്. ബാങ്കുകളില്‍ ആളുകള്‍ കൂട്ടം കൂടുന്നതും കറന്‍സി നോട്ടുകളുടെ അനാവശ്യ കൈകാര്യവും രോഗവ്യാപനത്തിനുള്ള സാധ്യത വര്‍ധിപ്പിക്കും. അക്കൗണ്ടില്‍ വന്നിട്ടുള്ള തുക ഗുണഭോക്താക്കള്‍ ആവശ്യത്തിനുമാത്രം പിന്‍വലിച്ചാല്‍ മതിയാകും. 

തദ്ദേശസ്വയംഭരണ സ്ഥാപനങ്ങള്‍ ആരംഭിച്ച സമൂഹ അടുക്കളകളില്‍ ആള്‍ക്കാര്‍ അനധികൃതമായി കയറുന്നതുടയാന്‍ കര്‍ശന നടപടി സ്വീകരിക്കണമെന്നു സംസ്ഥാന പോലീസ് മേധാവി ലോക്നാഥ് ബെഹ്റ എല്ലാ ജില്ലാ പോലീസ് മേധാവിമാര്‍ക്കും നിര്‍ദേശം നല്‍കി. ഇതിനായി കണ്‍ട്രോള്‍ റൂമിന്റെയോ അതത് പോലീസ് സ്റ്റേഷനുകളുടെയോ സേവനം വിനിയോഗിക്കണം.

സമൂഹ അടുക്കളകളില്‍ നിന്ന് വിവിധ സ്ഥലങ്ങളിലേക്കു വിതരണം ചെയ്യുന്നതിനു  ഭക്ഷണം കൊണ്ടുപോകുന്നവരെ വഴിയില്‍ തടയരുതെന്നും നിര്‍ദേശിച്ചിട്ടുണ്ട്. സമൂഹ അടുക്കളകളില്‍ ജോലി ചെയ്യുന്നവരുടെ പേരും വിവരങ്ങളും ശേഖരിക്കണമെന്നും  ജില്ലാ പോലീസ് മേധാവിമാരോട് ആവശ്യപ്പെട്ടു.