കേരളത്തിൽ 39 പേർക്ക് വെള്ളിയാഴ്ച കോവിഡ്19 സ്ഥിരീകരിച്ചതായി മുഖ്യമന്ത്രി പിണറായി വിജയൻ അറിയിച്ചു. കാസർഗോഡ് ജില്ലയിൽ നിന്നുള്ള 34 പേർക്കും കണ്ണൂർ ജില്ലയിൽ നിന്നുള്ള രണ്ടുപേർക്കും തൃശൂർ, കോഴിക്കോട്, കൊല്ലം ജില്ലകളിൽ നിന്നുള്ള ഓരോരുത്തർക്കുമാണ് രോഗം സ്ഥിരീകരിച്ചത്. ഇതോടെ നിലവിൽ 164 പേരാണ് സംസ്ഥാനത്തെ വിവിധ ആശുപത്രികളിൽ രോഗബാധിതരായി ചികിത്സയിലുള്ളത്. കേരളത്തിൽ 176 പേർക്കാണ് ഇതുവരെ ആകെ രോഗബാധ സ്ഥിരീകരിച്ചത്.

ജില്ലയില്‍  ഇന്നലെ (മാര്‍ച്ച് 27) 17008 പേരാണ് ഗൃഹനിരീക്ഷണത്തില്‍ ഉള്ളത്. ഇന്നു മാത്രം 1270 പേര്‍ ഗൃഹ നിരീക്ഷണത്തില്‍ പ്രവേശിച്ചു. ഇതില്‍ ദുബായില്‍ നിന്നുള്ള 1475 പേര്‍ ഉള്‍പ്പെടെ ഗള്‍ഫ് മേഖലയില്‍ നിന്ന് തിരികെ എത്തിയ 4405 പേരും  ഗൃഹനിരീക്ഷണത്തില്‍ ഉള്‍പ്പെടുന്നു.  ആശുപത്രിയില്‍ 13 പേര്‍ ഐ പി യില്‍ ഉണ്ട്.
കോവിഡ് 19 മായി ബന്ധപ്പെട്ട വിവരങ്ങള്‍ കൈമാറുന്നതിനും സംശയങ്ങള്‍ക്കും 8589015556, 0474-2797609, 1077, 7306750040(വാട്‌സ് ആപ് മാത്രം), 1056(ദിശ) എന്നീ നമ്പരുകളില്‍ ബന്ധപ്പെടാം.
 

കൊവിഡ് 19 രോഗബാധ ലക്ഷണങ്ങള്‍ പ്രകടിപ്പിക്കുന്നവരെ കൂടാതെ ലോക്ക് ഡൗണ്‍ കാലയളവില്‍  വീടില്ലാത്തവര്‍ക്കും അനാഥര്‍ക്കുമായി തിരഞ്ഞെടുത്ത കൊറോണ കെയര്‍ സെന്ററുകളില്‍  പ്രത്യേകം പ്രവേശനം നല്‍കി റീഹാബിലിറ്റേഷന്‍ സെന്റര്‍ ആയി പ്രവര്‍ത്തിക്കും. നിലവില്‍ രണ്ടു സെന്ററുകള്‍ ഉണ്ട്.

കോവിഡ് - 19 അടിയന്തിര സാഹചര്യം പരിഗണിച്ച് 16 കൊറോണ കെയര്‍ സെന്ററുകള്‍ പൂര്‍ണസജ്ജമായി. ഇപ്പോള്‍ 7 സെന്ററുകളിലായി 127 പേര്‍ ഐസൊലേഷനില്‍ ഉണ്ട്. മറ്റു സംസ്ഥാനങ്ങളില്‍ നിന്നും എത്തുന്നവരെ കൊറോണ കെയര്‍ സെന്ററുകളില്‍ നേരിട്ട് പ്രവേശിപ്പിക്കും. ഇവരും മറ്റു ജില്ലകളില്‍ നിന്നും എത്തുന്നവരും 14 ദിവസം നിരീക്ഷണത്തില്‍  തുടരണം.

ജില്ലയില്‍ ഒരാള്‍ക്ക് കോവിഡ്-19 സ്ഥിരീകരിച്ചു. തൃക്കരുവ പ്രാഥമികാരോഗ്യ കേന്ദ്രത്തിന്റെ പരിധിയില്‍ ഗൃഹനിരീക്ഷണത്തിലുണ്ടായിരുന്ന ആളുടെ സാമ്പിള്‍ പരിശോധനയില്‍ പോസിറ്റീവ് ആയി സ്ഥിരീകരിക്കുകയായിരുന്നു. അടിയന്തരമായി പാരിപ്പള്ളി ഗവണ്‍മെന്റ് മെഡിക്കല്‍ കോളജില്‍ തുടര്‍ചികിത്സയ്ക്കായി പ്രവേശിപ്പിച്ചിട്ടുണ്ട്.  കുടുംബാംഗങ്ങളേയും ആശുപത്രിയില്‍ ഐസൊലേഷനില്‍ ആക്കിയിട്ടുണ്ട്. ഇയാള്‍ ദുബെയില്‍ നിന്നും വന്നയാളാണ്. റൂട്ട് മാപ്പ് ഉള്‍പ്പെടെയുള്ള വിശദാംശങ്ങള്‍ തയ്യാറാക്കിയിട്ടുണ്ട്.

ലോക്ക് ഡൗണ്‍ സമയത്ത് അപകടരഹിതമായ ദിവസങ്ങള്‍ക്ക് വേണ്ടി പൊതുജനങ്ങള്‍ സഹകരിക്കണമെന്ന് വൈദ്യുതി ബോര്‍ഡ്. നനഞ്ഞ കൈകള്‍ കൊണ്ട് വൈദ്യുതി ഉപകരണങ്ങള്‍ പ്രവര്‍ത്തിപ്പിക്കരുത്. വൈദ്യൂതി ലൈനിന്റെ സമീപമുള്ള മരങ്ങളില്‍ കയറാനോ ശിഖരങ്ങള്‍ വെട്ടിമാറ്റാനോ ശ്രമിക്കരുത്. ഇരുമ്പുതോട്ടി, ഏണി തുടങ്ങിയവ വൈദ്യുതി ലൈനിന്റെ സമീപത്തേക്ക് കൊണ്ടുപോവുകയോ ഉപയോഗിക്കുകയോ ചെയ്യരുത്. വൈദ്യുതി ലൈനുകള്‍ പൊട്ടികിടക്കുന്നതോ അപകടാവസ്ഥയിലോ കണ്ടാല്‍ 1912, 9496061061, 94966010101 എന്നീ നമ്പരുകളില്‍ അറിയിക്കണം.

കൊട്ടിയം ഉമയനല്ലൂര്‍ മേഖലയിലുള്ള അതിഥി തൊഴിലാളികളുടെ 40 ക്യാമ്പുകള്‍ കണ്ടെത്തി പരിശോധന നടത്തി. ഏകദേശം 2000 തൊഴിലാളികള്‍ താമസിക്കുന്നതായി കണ്ടെത്തി. ചില ക്യാമ്പുകളില്‍ ഉള്‍ക്കൊള്ളാന്‍ കഴിയുന്നതിലും കൂടതല്‍ തൊഴിലാളികള്‍ താമസിക്കുന്നതായും കണ്ടെത്തി. ഇവരെ മറ്റ് ക്യാമ്പുകളിലേക്ക് മാറ്റിപാര്‍പ്പിച്ചു. ക്യാമ്പുകളില്‍ ആവശ്യത്തിനുള്ള ഭക്ഷ്യധാന്യങ്ങള്‍ സ്റ്റോക്കുണ്ട്. കെട്ടിട ഉടമകളും ആവശ്യമായ ഭക്ഷ്യധാന്യങ്ങള്‍ എത്തിച്ചുനല്‍കുന്നുണ്ട്.

പൊതുവിതരണ വകുപ്പിന്റെയും ലീഗല്‍ മെട്രോളജി വകുപ്പിന്റെയും സംയുക്താഭിമുഖ്യത്തില്‍ കൊല്ലം താലൂക്കിലെ വ്യാപാര സ്ഥാപനങ്ങളില്‍ പരിശോധന നടത്തി. കൊല്ലം പൊതുകമ്പോളം, കേരളപുരം, കുണ്ടറ, ആറുമുറിക്കട, മുഖത്തല മേഖലകളിലാണ് പരിശോധന നടത്തിയത്. ഭക്ഷ്യധാന്യങ്ങള്‍ക്ക് അമിതവില ഈടാക്കുന്നതായി കണ്ടെത്തിയ സ്ഥാപനങ്ങളില്‍ വില കുറയ്ക്കുന്നതിന് കര്‍ശന നിര്‍ദേശം നല്‍കി.

ജില്ലയിലെ കോവിഡ് രോഗപ്രതിരോധ പ്രവര്‍ത്തനങ്ങളുമായി നേരിട്ട് ബന്ധപ്പെടുന്ന റവന്യൂ, ആരോഗ്യം, പോലിസ്, തദ്ദേശ സ്വയംഭരണം ഒഴികെയുള്ള എല്ലാ വകുപ്പുകളും അവരുടെ അധീനതയിലുള്ള വാഹനങ്ങളുടെ വിവരങ്ങള്‍ ബന്ധപ്പെടേണ്ട ഫോണ്‍ നമ്പര്‍ ഉള്‍പ്പടെ  9447677800 എന്ന മൊബൈല്‍ നമ്പറില്‍ വാട്‌സ് ആപ്പ് സന്ദേശമായോ എസ് എം എസ് ആയോ  c19kollam@gmail.com  എന്ന ഇമെയില്‍ വിലാസത്തിലോ ഇന്ന് (മാര്‍ച്ച് 28) രാവിലെ 10 നകം നല്‍കണമെന്ന് ജില്ലാ കലക്ടര്‍ അറിയിച്ചു.