2018-19 ലെ കാലവര്‍ഷത്തില്‍ തകര്‍ന്ന ഗ്രാമീണ റോഡുകള്‍ പുനരുദ്ധരിക്കുന്നതിന് മുഖ്യമന്ത്രിയുടെ തദ്ദേശ റോഡ് പുനരുദ്ധാരണ ഫണ്ട് പദ്ധതിയില്‍ നിന്നും (സി എം എല്‍ ആര്‍ ആര്‍ പി ) ആദ്യ ഘട്ടമായി 57 റോഡുകള്‍ക്ക് 8.75 കോടി രൂപ റാന്നി നിയോജക മണ്ഡലത്തിന് അനുവദിച്ചതായി രാജു എബ്രഹാം എംഎല്‍എ അറിയിച്ചു. തദ്ദേശ സ്വയംഭരണ സ്ഥാപനങ്ങള്‍ മുഖേന നടപ്പാക്കുന്ന പദ്ധതിയുടെ പരിപാലനം രണ്ടു വര്‍ഷത്തേക്ക് ഉറപ്പുവരുത്തണം എന്ന നിബന്ധനയോടെ ആണ് പദ്ധതിക്ക് ഭരണാനുമതി  നല്‍കിയിട്ടുള്ളത്. റോഡുകളുടെ പഞ്ചായത്ത് തിരിച്ചുള്ള പട്ടികയും അവയുടെ തുക ലക്ഷത്തില്‍ ബ്രാക്കറ്റിലും ചുവടെ.

മല്ലപ്പള്ളി ഗ്രാമപഞ്ചായത്ത് ബജറ്റില്‍ ടൗണ്‍ഹാള്‍ നിര്‍മിക്കുന്നതിന് തുക വകയിരുത്തി.  ഷോപ്പിംഗ് കോംപ്ലക്‌സിനോട് അനുബന്ധിച്ചാണു നിര്‍മാണം നടത്തുന്നത്.  12.35 കോടി രൂപയുടെ ബജറ്റാണ് വൈസ് പ്രസിഡന്റ് രോഹിണി ജോസ് അവതരിപ്പിച്ചത്. നികുതി വരുമാനമായി 1.5 കോടി രൂപയും, നികുതിയേതര വരുമാനം 52.97 ലക്ഷം രൂപയും, പൊതു ആവശ്യ ഗ്രാന്റായി 86.24 ലക്ഷം രൂപയും, പദ്ധതി ചെലവുകള്‍ക്കുള്ള റവന്യൂ ഗ്രാന്റുകള്‍ 61 ലക്ഷം രൂപയും, പദ്ധതിയേതര ചെലവുകള്‍ക്കുള്ള റവന്യൂ ഗ്രാന്റുകള്‍ 25 ലക്ഷം രൂപയും, മൂലധന വരവിനത്തില്‍ 6.32 കോടി രൂപയും പ്രതീക്ഷിക്കുന്നു. 

ഇളമണ്ണൂര്‍ ക്ഷീരോത്പാദക സഹകരണ സംഘം കോവിഡ് -19 പ്രതിരോധ പ്രവര്‍ത്തനങ്ങളിലൂടെ നാടിനു മാതൃകയാകുന്നു. കോവിഡ് -19 പ്രതിരോധ പ്രവര്‍ത്തനങ്ങളുടെ ഭാഗമായ ബ്രേയ്ക്ക് ദ ചെയിന്‍ ക്യാമ്പയിന്റെ ഭാഗമായി ഇളമണ്ണൂര്‍ ക്ഷീരോത്പാദക സഹകരണ സംഘത്തിന് മുന്നില്‍ ടാങ്കും കൈകഴുകാനായി ടാപ്പും സോപ്പ് ലായനിയും സജ്ജീകരിച്ചിട്ടുണ്ട്. ഏനാദിമംഗലം പഞ്ചായത്ത് ഓഫീസ്, സബ് റജിസ്ട്രര്‍ ഓഫീസ് തുടങ്ങിയ സര്‍ക്കാര്‍ ഓഫീസുകളും ഈ സംഘത്തിന്റെ സമീപത്തായി സ്ഥിതി ചെയ്യുന്നുണ്ട്. ക്ഷീരവികസ വകുപ്പ് ഡയറക്ടര്‍റുടെ നിര്‍ദേശത്തെത്തുടര്‍ന്നാണ് ഇത്തരത്തിലൊരു സംവിധാനം ഒരുക്കിയത്. സംഘത്തില്‍ പാല്‍ നല്‍കുന്ന കര്‍ഷകര്‍ക്ക് ഓരോ സോപ്പും വിതരണം ചെയ്തു.

കോവിഡ് 19 നിയന്ത്രണത്തിന്റെ ഭാഗമായി ജില്ലയിലെ എല്ലാ തദ്ദേശസ്വയംഭരണ സ്ഥാപനങ്ങളിലും ഉച്ചഭാഷണിയിലൂടെ പൊതുജനങ്ങള്‍ക്ക് ബോധവത്ക്കരണവും നിര്‍ദേശങ്ങളും നല്‍കിത്തുടങ്ങി. ഇന്നലെ (21), ഇന്നും (22) മായാണ് ജില്ലയിലെ മുഴുവന്‍ തദ്ദേശസ്വയംഭരണ സ്ഥാപനങ്ങളിലും ബോധവത്ക്കരണം നടക്കുക. ജനങ്ങള്‍ക്ക് കോവിഡ് 19 സംബന്ധിച്ച് ആരോഗ്യവകുപ്പും സര്‍ക്കാരും നല്‍കുന്ന നിര്‍ദേശങ്ങളെകുറിച്ച് അവബോധം വര്‍ധിപ്പിക്കുകയാണ് ഇതിന്റെ ലക്ഷ്യം.

ജില്ലാ ഭരണകൂടവും ഹരിതകേരളം മിഷനും ചേര്‍ന്ന് ബസ് സ്റ്റാന്‍ഡ്, ഓട്ടോ-ടാക്‌സി സ്റ്റാന്‍ഡുകള്‍  കേന്ദ്രീകരിച്ച് നടത്തുന്ന കൊറോണ ബോധവത്ക്കരണ പ്രവര്‍ത്തനങ്ങള്‍ക്കു തുടക്കമായി. ഹരിതകേരളം മിഷന്‍ ജില്ലാ കോര്‍ഡിനേറ്റര്‍ ആര്‍.രാജേഷ് സാനിറ്റേഷന്‍ കിറ്റ് നല്‍കിയും ഓട്ടോയില്‍ സ്റ്റിക്കര്‍ പതിപ്പിച്ചും ബോധവത്ക്കരണ പ്രവര്‍ത്തനങ്ങള്‍ക്ക് തുടക്കം കുറിച്ചു.

 പൊതുഗതാഗത സംവിധാനങ്ങളില്‍ സ്റ്റിക്കര്‍ മുഖേനയും യാത്രക്കാര്‍ ഉള്‍പ്പെടെയുള്ളവര്‍ക്ക് നോട്ടീസ് മുഖേനയും കോവിഡ്-19 പ്രതിരോധിക്കുന്നതിനുളള ബോധവത്ക്കരണ പ്രവര്‍ത്തനങ്ങള്‍ നടക്കുക. 

കൊറോണ പ്രതിരോധമാര്‍ഗങ്ങളെക്കുറിച്ചും ജനനന്മയ്ക്കായി ചെയ്യാവുന്ന സുരക്ഷാകാര്യങ്ങളെക്കുറിച്ചും ചര്‍ച്ച ചെയ്യാനായി അടൂരും പരിസരപ്രദേശത്തുമുള്ള സന്നദ്ധസംഘടനാ നേതാക്കളുടേയും റസിഡന്‍സ് അസോസിയേഷന്‍ ഭാരവാഹികളുടേയും യോഗം ചിറ്റയം ഗോപകുമാര്‍ എം.എല്‍.എയുടെ അധ്യക്ഷതയില്‍ ചേര്‍ന്നു. അടൂര്‍ ആര്‍ഡിഒ ഓഫീസില്‍ ചേര്‍ന്ന യോഗത്തില്‍ 'ആയുര്‍വേദ മെഡിക്കല്‍ അസോസിയേഷന്‍ ഓഫ് ഇന്ത്യ അടൂര്‍ സെക്രട്ടറി ഡോ. ദിവ്യ എസ് ഉണ്ണി മാസ്‌ക് ധരിക്കേണ്ട അവസരങ്ങളെക്കുറിച്ചും ശ്രദ്ധിക്കേണ്ട കാര്യങ്ങളെക്കുറിച്ചും  ആരോഗ്യസുരക്ഷയ്ക്കായി ജനങ്ങള്‍ക്കായി ചെയ്തു നല്കാവുന്ന സേവനങ്ങളെ കുറിച്ചും ബോധവത്ക്കരണം നടത്തി.

പത്തനംതിട്ട ജില്ലയില്‍ ഇന്ന്(21) ഒരു കേസും പോസീറ്റിവായി കണ്ടെത്തിയിട്ടില്ല.

കൊറോണ നിയന്ത്രണത്തിന്റെ ഭാഗമായി വീടുകളില്‍ ഐസലേഷനില്‍ കഴിയുന്നവര്‍ ആരോഗ്യവകുപ്പിന്റെ നിര്‍ദ്ദേശങ്ങള്‍ പാലിക്കുന്നില്ലെന്ന് തെളിവുസഹിതം കണ്ടെത്തിയാല്‍ നാളെ മുതല്‍(മാര്‍ച്ച് 23) പോലീസ് കേസെടുക്കുമെന്ന് ജില്ലാ കളക്ടര്‍ പി.ബി നൂഹ് പറഞ്ഞു. നാളെ മുതല്‍ വീടുകളില്‍ നിരീക്ഷണത്തിലുള്ളവരെ കര്‍ശനമായി പരിശോധിക്കും. 12 തഹസില്‍ദാര്‍മാര്‍ അടങ്ങുന്ന ടീമുകള്‍, സബ് കളക്ടറിന്റെ നേതൃത്വത്തിലുള്ള ടീം, ആര്‍ഡിഒ യുടെ ടീം, 20 പോലീസ് സ്‌റ്റേഷനുകളിലെ ടീം എന്നിവര്‍ നേരിട്ട് പരിശോധന നടത്തും. വീടുകളില്‍ കഴിയാതെ പുറത്തുപോകുന്നതായി ശ്രദ്ധയില്‍പ്പെട്ടാല്‍ അവര്‍ക്കെതിരേ കര്‍ശന നടപടികള്‍ സ്വീകരിക്കും.

കോവിഡ് 19 നിയന്ത്രണത്തിന്റെ ഭാഗമായി വിവിധ പ്രവര്‍ത്തനങ്ങളില്‍ ഏര്‍പ്പെട്ടിരിക്കുന്ന ജില്ലാഭരണകൂടത്തിന് 1008 കുപ്പി വെള്ളം സംഭാവന നല്‍കി ഇന്ത്യന്‍ റെഡ് ക്രോസ് സൊസൈറ്റി പത്തനംതിട്ട ബ്രാഞ്ച്. കളക്ടറേറ്റില്‍ നടന്ന ചടങ്ങില്‍ കുപ്പിവെള്ളം ജില്ലാ കളക്ടര്‍ പി.ബി.നൂഹ് ഏറ്റുവാങ്ങി. റെഡ് ക്രോസ് ജില്ലാ ബ്രാഞ്ച് സെക്രട്ടറി കെ.പി രഞ്ജിത്, വൈസ് ചെയര്‍മാന്‍ സുബിന്‍ വര്‍ഗീസ് തുടങ്ങിയവര്‍ പങ്കെടുത്തു.