കെട്ടിട നിർമ്മാണ തൊഴിലാളി ക്ഷേമബോർഡിലെ തിരുവനന്തപുരത്തെ ഗുണഭോക്താക്കൾക്ക് ജൂൺ 29 മുതൽ ജൂലായ് 15 വരെ അക്ഷയകേന്ദ്രങ്ങൾ വഴി മസ്റ്ററിംഗ് നടത്താം. ഇവ പരാജയപ്പെടുന്നവർക്ക് ജൂലായ് 16 മുതൽ 22 വരെ അക്ഷയയിൽ നിന്നുള്ള പരാജയസർട്ടിഫിക്കറ്റും ലൈഫ് സർട്ടിഫിക്കറ്റും ജില്ലാ ഓഫീസിൽ ഹാജരാക്കാം.
പി.എൻ.എക്സ്. 2300/2020

കേരള നിയമസഭയുടെ സെന്റർ ഫോർ പാർലമെന്ററി സ്റ്റഡീസ് ആന്റ് ട്രെയിനിംഗിന്റെ ആഭിമുഖ്യത്തിൽ 30ന് രാവിലെ 11 മണിക്ക് നിയമസഭാംഗങ്ങൾക്കായി 'കോവിഡ്: അനുഭവവും കരുതലും' എന്ന വിഷയത്തിൽ വെബിനാർ നടത്തും. ഡെപ്യൂട്ടി സ്പീക്കർ വി.ശശി സ്വാഗതം പറയും. സ്പീക്കർ പി.ശ്രീരാമകൃഷ്ണൻ ഉദ്ഘാടനം ചെയ്യും. ആരോഗ്യവും സാമൂഹ്യനീതിയും വനിത-ശിശു വികസനവും വകുപ്പു മന്ത്രി കെ.കെ.ശൈലജ ടീച്ചർ മുഖ്യപ്രഭാഷണം നടത്തും. ആരോഗ്യ വകുപ്പ് പ്രിൻസിപ്പൽ സെക്രട്ടറി ഡോ.രാജൻ എൻ.ക്രോബ്രഗഡെ വിഷയം അവതരിപ്പിക്കും.
പി.എൻ.എക്സ്. 2299/2020

സര്‍ക്കാര്‍ എയ്ഡഡ് ആര്‍ട്സ് ആന്‍ഡ് സയന്‍സ് കോളേജുകളിലെ അതിഥി അധ്യാപകരുടെ പാനല്‍ കോളേജ് വിദ്യാഭ്യാസ വകുപ്പിന്റെ http://www.collegiateedu.kerala.gov.in വെബ്സൈറ്റില്‍ പ്രസിദ്ധീകരിച്ചു.  കോഴിക്കോട് കോളേജ് വിദ്യാഭ്യാസ ഉപ ഡയറക്ടറുടെ കാര്യാലയത്തില്‍ പുതിയ രജിസ്‌ട്രേഷന്‍ നടത്തേണ്ടെന്ന് പ്രിന്‍സിപ്പല്‍ ഇന്‍ ചാര്‍ജ്ജ് ഓഫ് ഡെപ്യൂട്ടി ഡയറക്ടര്‍ അറിയിച്ചു. മുമ്പ് രജിസ്റ്റര്‍ ചെയ്തവര്‍ വീണ്ടും ചെയ്യേണ്ടതില്ല. പുതിയവ കോളേജ് വിദ്യാഭ്യാസ വകുപ്പിന്റെ വെബ്സൈറ്റില്‍ ചെയ്യാം.

 നവീകരിച്ച പെരുന്തുരുത്തിപാലത്തിലൂടെയുളള ജലവിതരണപൈപ്പുകള്‍ മാറ്റി സ്ഥാപിക്കുന്ന പ്രവൃത്തി നടക്കുന്നതിനാല്‍ കോഴിക്കോട് കോര്‍പ്പറേഷന്‍ എലത്തൂര്‍ സോണിലെ 1, 2 ഡിവിഷനുകളില്‍ ജൂണ്‍ 29, 30 ദിവസങ്ങളില്‍ ജലവിതരണം മുടങ്ങുമെന്ന്  ജലഅതോറിറ്റി അസിസ്റ്റന്റ് എക്സിക്യൂട്ടീവ് എഞ്ചിനീയര്‍ അറിയിച്ചു. ഫോണ്‍ : 0495 2370634.

ഈ വര്‍ഷത്തെ ട്രോള്‍നിരോധന കാലയളവിന് ശേഷം കോഴിക്കോട് ജില്ലയില്‍ പട്രോളിങ്ങ്, കടല്‍ രക്ഷ പ്രവര്‍ത്തനം എന്നിവക്കായി  ഒരു സ്വകാര്യ ബോട്ട് വാടക വ്യവസ്ഥയില്‍ ലഭ്യമാക്കുന്നതിന്് ബേപ്പൂര്‍ ഫിഷറീസ് അസിസ്റ്റന്റ് ഡയറക്ടര്‍  മത്സര സ്വഭാവമുളള ക്വട്ടേഷന്‍ ക്ഷണിച്ചു. ക്വട്ടേഷന്‍ ജൂലൈ ആറിന്  ഉച്ചയ്ക്ക്  മൂന്ന്   മണിക്കകം  ബേപ്പൂര്‍ ഫിഷറീസ് സ്റ്റേഷന്‍, ഫിഷറീസ് അസിസ്റ്റന്റ് ഡയറക്ടര്‍ മുമ്പാകെ സമര്‍പ്പിക്കണം.  കൂടുതല്‍ വിവരങ്ങള്‍ക്ക് 0495 - 2414074.

 കുടുംബശ്രീ മൈക്രോ എന്റര്‍പ്രൈസസ് കണ്‍സള്‍ടന്റ് എംപ്ലോയീസ് കോഴിക്കോട് യൂണിയന്‍ മുഖ്യമന്ത്രിയുടെ ദുരിതാശ്വാസ നിധിയിലേക്ക് 1,54,000 രൂപ സംഭാവന നല്‍കി. പാര്‍ലമെന്റ് അംഗം എളമരം കരീമിന് യൂണിയന്‍ ജനറല്‍ സെക്രട്ടറി പി കെ റീന ചെക്ക് കൈമാറി.  യൂണിയന്‍ ജില്ലയിലെ ആശാ വര്‍ക്കര്‍മാര്‍ക്കായി നിര്‍മ്മിച്ച 3,000 മാസ്‌കുകളും കൈമാറി. എം.ടി.ലീല, വി.പി. റീന, പി.ആര്‍. അനിത എന്നിവര്‍ പങ്കെടുത്തു.

കോഴിക്കോട് ജില്ലയില്‍ തുടര്‍ച്ചയായി 24 മണിക്കൂര്‍ മഴയുണ്ടാകുന്ന അവസരത്തിലും ദുരന്തനിവാരണ അതോറിറ്റി അലര്‍ട്ട് പ്രഖ്യാപിക്കുന്ന സാഹചര്യത്തിലും ജില്ലയിലെ എല്ലാ തരത്തിലുള്ള ഖനനപ്രവര്‍ത്തനങ്ങളും നിര്‍ത്തിവെക്കമണമെന്ന് മൈനിങ് ആന്റ് ജിയോളജി വകുപ്പ് ജില്ലാ ജിയോളജിസ്റ്റ് അറിയിച്ചു.

വിളിക്കുന്നിടത്തേക്ക് ഇനി ഇന്ധനമെത്തും

ആവശ്യക്കാരന്‍ വിളിക്കുന്നിടത്തേക്ക്  വിളിക്കുന്നിടത്തേക്ക് ഇനി ഇന്ധനമെത്തും.  ഹിന്ദുസ്ഥാന്‍ പെട്രോളിയത്തിന്റ മൊബൈല്‍ ഫ്യൂവല്‍ സ്റ്റേഷന്‍  ജില്ലാ കലക്ടര്‍ സാംബശിവ റാവു ഉല്‍ഘാടനം ചെയ്തു.  ആവശ്യക്കാര്‍ക്ക് ഫോണ്‍ കോളിലൂടെ വാഹനത്തിനരികെയും വ്യവസായ ആവശ്യത്തിനും ഇന്ധനം എത്തിക്കാനുള്ള സംവിധാനമാണിത്. മികച്ച സാങ്കേതിക വിദ്യ ഉപയോഗിച്ചു നിര്‍മിച്ച ഇന്ധന വണ്ടിയിലൂടെ ഡീസല്‍ബങ്ക് സേവനമാണ് ലഭ്യമാക്കുന്നത്.