ജില്ലയില്‍ ഡെങ്കിപ്പനി കൂടുതലായി റിപ്പോര്‍ട്ട് ചെയ്യപ്പെട്ട 26 തദ്ദേശ സ്ഥാപനങ്ങളില്‍ പ്രത്യേക ശുചീകരണ ക്യാംപയിന്‍ സംഘടിപ്പിക്കാന്‍ ജില്ലാ കലക്ടര്‍ ടി വി സുഭാഷിന്റെ അധ്യക്ഷതയില്‍ ചേര്‍ന്ന ജില്ലാ ശുചിത്വ സമിതി യോഗം തീരുമാനിച്ചു. തദ്ദേശ സ്ഥാപനങ്ങള്‍, ശുചിത്വ മിഷന്‍, ആരോഗ്യ വകുപ്പ് എന്നിവയുടെ സംയുക്താഭിമുഖ്യത്തില്‍ സന്നദ്ധ പ്രവര്‍ത്തകരുടെ സഹകരണത്തോടെയാണ് ശുചീകരണ ക്യാംപയിന്‍ സംഘടിപ്പിക്കുക. വീട്ടിലും പരിസരങ്ങളിലും ഡെങ്കിപ്പനിക്ക് കാരണമാവുന്ന കൊതുകുകള്‍ വളരാനുള്ള സാഹചര്യങ്ങള്‍  ഇല്ലാതാക്കുകയാണ് ഇതില്‍ പ്രധാനമെന്ന് ജില്ലാ പഞ്ചായത്ത് പ്രസിഡണ്ട് കെ വി സുമേഷ് പറഞ്ഞു.

കൈത്തറി മേഖലയിൽ കോവിഡ് സൃഷ്ടിച്ച പ്രതിസന്ധി മറികടക്കാൻ 20 ശതമാനം പ്രത്യേക റിബേറ്റ് അനുവദിച്ചു. കൈത്തറി സംഘങ്ങൾ, ഹാൻടെക്‌സ്, ഹാൻവീവ് ഉൽപന്നങ്ങൾ റിബേറ്റ് വിലയിൽ ലഭിക്കും. ജൂലൈ ഒന്ന് മുതൽ 20 വരെയാണ് ആനുകൂല്യം. റിബേറ്റ് വിൽപന ഉദ്ഘാടനം ജൂലായ് ഒന്നിന് വ്യവസായ മന്ത്രി ഇ പി ജയരാജൻ ഓൺലൈനായി നിർവഹിക്കും.

സംസ്ഥാന സഹകരണ യൂണിയൻ നടത്തുന്ന ജെ.ഡി.സി 2020-21 ബാച്ച് പ്രവേശനത്തിനുള്ള പ്രാഥമിക ലിസ്റ്റ് പ്രസിദ്ധീകരിച്ചു. പരാതികൾ 30ന് വൈകിട്ട് അഞ്ച് മണിക്കകം നൽകണം. ജനറൽ വിഭാഗം അപേക്ഷയിലെ പരാതികൾ അതത് സഹകരണ പരീശീലന കേന്ദ്രം/കോളേജ് പ്രിൻസിപ്പൽമാർക്കും, സഹകരണസംഘം ജീവനക്കാർക്ക് അഡീഷണൽ രജിസ്ട്രാർ-സെക്രട്ടറി, സംസ്ഥാന സഹകരണ യൂണിയൻ, ഊറ്റുകുഴി, പി.ബി.നമ്പർ-1 എന്ന വിലാസത്തിലും നൽകണം.
പി.എൻ.എക്സ്. 2297/2020

കേരള പട്ടികജാതി പട്ടികവർഗ വികസന സഹകരണ ഫെഡറേഷന്റെ ആയൂർധാര പഞ്ചകർമ്മ ചികിത്സാ കേന്ദ്രത്തിന്റെ വികസന പ്രവർത്തനങ്ങളുടെ പ്രാരംഭ സിവിൽ നിർമ്മാണ ജോലികൾക്കായി താത്പര്യപത്രം ക്ഷണിച്ചു.  26 വരെ 10 മുതൽ നാല് മണി വരെ ഫെഡറേഷന്റെ ആസ്ഥാന ഓഫീസിൽ നിന്ന് വിശദവിവരങ്ങൾ ലഭിക്കും.  വിശദമായ എസ്റ്റിമേറ്റ്, സീൽ ചെയ്ത കവറിൽ പൂർണ്ണ മേൽവിലാസം/ മൊബൈൽ നമ്പർ എന്നിവ രേഖപ്പെടുത്തി 30ന് വൈകിട്ട് 5 മണിക്കകം ഫെഡറേഷനിൽ ലഭിക്കണം.
പി.എൻ.എക്സ്. 2296/2020

*പോകുന്ന സംസ്ഥാനത്തെ പാസും നിർബന്ധം
മറ്റു സംസ്ഥാനങ്ങളിൽ വിവാഹചടങ്ങുകൾക്കായി പോകുന്നവർ ജില്ലാ കളക്ടറിൽ നിന്ന് നിന്ന് പാസ് വാങ്ങണം. പോകുന്ന സംസ്ഥാനത്തെ പാസും നിർബന്ധമാണ്. ഇതുസംബന്ധിച്ച് സംസ്ഥാന സർക്കാർ പുതിയ ഉത്തരവിറക്കി.
മറ്റു സംസ്ഥാനത്തെ പാസ് ലഭിച്ചവർക്ക് മാത്രമായിരിക്കും ജില്ലകളിൽ നിന്ന് പാസ് അനുവദിക്കുക. വിവാഹസംഘം സാമൂഹ്യഅകലം പാലിച്ചും മറ്റ് ആരോഗ്യ സുരക്ഷാ മാനദണ്ഡങ്ങൾ പാലിച്ചുമായിരിക്കണം ചടങ്ങിൽ പങ്കെടുക്കേണ്ടത്. വിവാഹ വേദിയല്ലാതെയുള്ള സ്ഥലങ്ങൾ സന്ദർശിക്കരുത്.

ജില്ലയില്‍ ആകെ നിരീക്ഷണത്തിലുള്ളത് 23,966 പേര്‍

കോട്ടയം ജില്ലയില്‍  രണ്ടു പേര്‍ക്ക് കോവിഡ്‌ സ്ഥിരീകരിച്ചു.  ഡല്‍ഹിയില്‍നിന്ന് ജൂണ്‍ 12 ന് എത്തി ഹോം ക്വാറന്‍റയിനില്‍ കഴിഞ്ഞിരുന്ന കറുകച്ചാല്‍ വെട്ടിക്കാവുങ്കല്‍ സ്വദേശിനി(46)ക്കും  മുംബൈയില്‍ നിന്ന് ജൂണ്‍  19  ന് എത്തി പഴയിടത്തെ ക്വാറന്‍റയിന്‍ കേന്ദ്രത്തില്‍ കഴിഞ്ഞിരുന്ന കരിക്കാട്ടൂര്‍ സ്വദേശി(31)ക്കുമാണ് രോഗം ബാധിച്ചത്. കറുകച്ചാല്‍  സ്വദേശിനിക്ക് രോഗലക്ഷണങ്ങള്‍ ഉണ്ടായിരുന്നില്ല. തുടര്‍ച്ചയായ ചുമയെത്തുടര്‍ന്നാണ് കരിക്കാട്ടൂര്‍ സ്വദേശിയെ പരിശോധനയ്ക്ക് വിധേയനാക്കിയത്.