സഹോദരങ്ങളുമായ ആല്‍ബിനും അലനും സ്വന്തം വീട്ടില്‍   വൈദ്യുതി വെളിച്ചത്തിലിരുന്ന് പഠിക്കാന്‍ തുടങ്ങി. അതും മറ്റ് വിദ്യാര്‍ഥികളെപ്പോലെ വീട്ടിലെ ടി.വി. യിലെ ഓണ്‍ലൈന്‍ ക്ലാസിലൂടെ തന്നെ. സംഭവിച്ചത് സ്വപ്നമാണോ യാഥാര്‍ത്ഥ്യമാണോ എന്ന അമ്പരപ്പിലാണ് ഇപ്പോഴിവര്‍.  കുളമാവ് നാടുകാണിക്ക് സമീപം കരിപ്പിലങ്ങാട് ഗവ. ട്രൈബല്‍ യു.പി. സ്‌കൂള്‍ വിദ്യാര്‍ഥികളാണിവര്‍. ആല്‍ബിനും അലനും ഓണ്‍ലൈന്‍ ക്ലാസില്‍ പങ്കെടുക്കാനാവാത്ത ദുരിതത്തിന് അറുതി വരുത്താന്‍  സ്‌കൂളിലെ അധ്യാപകര്‍ നടത്തിയ നിരന്തര ഇടപെടലാണ് വീട്ടില്‍ വൈദ്യുതിയും ടെലിവിഷനും എത്തിക്കാനിടയാക്കിയത്.

തൊടുപുഴ താലൂക്കില്‍ വീഡിയോ കോണ്‍ഫറന്‍സ് വഴി ജൂണ്‍ 26ന് നടത്താന്‍ നിശ്ചയിച്ചിരുന്ന ജില്ലാകലക്ടറുടെപരാതി പരിഹാര അദാലത്ത് സഫലം 2020 ജൂലൈ രണ്ടിന് നടത്തും. അന്നേ ദിവസം ഉടുമ്പന്‍ചോല താലൂക്കിലെ അദാലത്തും ഉണ്ടായിരിക്കും ജൂണ്‍ 29വരെ ഓണ്‍ലൈനായി അപേക്ഷ സമര്‍പ്പിക്കാം.

ഇടുക്കി ജില്ലാ പോലീസ് മേധാവിയായി ആര്‍.കറുപ്പസ്വാമി ചുമതലയേറ്റു. തൂത്തുക്കുടി സ്വദേശിയായ ഇദ്ദേഹം തിരുവനന്തപുരം ഡി സി പി ആയിരുന്നു. ഭാര്യ ഡോ.ജയലളിത, മകള്‍ ശോഭനാ റാം. ക്രൈംബ്രാഞ്ച് എസ് പി ആയി നിയമിതനായ മുന്‍ എസ് പി. പി.കെ മധുവിന്റെ ഒഴിവിലാണ് കറുപ്പസ്വാമി ഇടുക്കിയുടെ പുതിയ പോലീസ് മേധാവിയായത്.

       തൊണ്ടര്‍നാട് ഗ്രാമപഞ്ചായത്തിന്‍ കീഴിലെ പ്രാഥമികാരോഗ്യ കേന്ദ്രത്തില്‍ ഫാര്‍മസിസ്റ്റിനെ നിയമിക്കുന്നു. യോഗ്യതയുള്ള ഉദ്യോഗാര്‍ത്ഥികള്‍ വെള്ള പേപ്പറില്‍ തയ്യാറാക്കിയ അപേക്ഷ, സര്‍ട്ടിഫിക്കറ്റുകളുടെ പകര്‍പ്പ് സഹിതം ജൂണ്‍ 29 ന് വൈകീട്ട് 4 നകം  പ്രാഥമികാരോഗ്യ കേന്ദ്രത്തിലെ ഓഫീസില്‍ എത്തിക്കണം. അപേക്ഷയില്‍ മൊബൈല്‍ നമ്പര്‍ നിര്‍ബന്ധമായും രേഖപ്പെടുത്തേണ്ടതാണ്. തസ്തികയിലേക്കുള്ള കൂടിക്കാഴ്ച ജൂലായ് 2 ന് രാവിലെ 10 ന് പ്രാഥമികാരോഗ്യ കേന്ദ്രത്തില്‍ നടക്കും. ഫോണ്‍. 04935 235909. 

      കേരള ഇന്‍സ്റ്റിറ്റ്യൂട്ട് ഓഫ് ലോക്കല്‍ അഡ്മിനിസ്‌ട്രേഷന്‍ (കില) കിഫ്ബി ധനസഹായത്തോടെ നടപ്പാക്കുന്ന പ്രോജക്ടിലേക്ക് പ്രോജക്ട് എഞ്ചിനിയര്‍ (സിവില്‍)-3, പ്രോജക്ട് എഞ്ചിനിയര്‍ (ഐ.ടി) -1 എന്നീ തസ്തികളിലേക്ക് അപേക്ഷ ക്ഷണിച്ചു. അവസാന തിയ്യതി ജൂലൈ 10. കൂടുതല്‍ വിവരങ്ങള്‍ക്ക് www.kila.ac.in ദഎന്ന വെബ്‌സൈറ്റ് സന്ദര്‍ശിക്കുക.

    മീനങ്ങാടി ഗവണ്‍മെന്റ് കൊമേഴ്‌സ്യല്‍ ഇന്‍സ്റ്റിറ്റ്യൂട്ടില്‍ നിലവിലുള്ള ഇന്‍സ്ട്രക്ടര്‍ തസ്തികയിലേക്ക് ഗസ്റ്റ് അദ്ധ്യപകരെ നിയമിക്കുന്നു. എതെങ്കിലും അംഗീകൃത സര്‍വകലാശാലയില്‍ നിന്നും കൊമേഴ്‌സ് ബിരുദം, ഡിപ്ലോമ ഇന്‍ സെക്രട്ടേറിയല്‍ പ്രാക്ടീസ്, ഡി.റ്റി.പി (ഇംഗ്ലീഷ്,മലയാളം),ടാലി, വേഡ് പ്രാസസ്സിങ്ങ് (ഇംഗ്ലീഷ്, മലയാളം)
എന്നിവയില്‍ യോഗ്യതയുള്ള ഉദ്യോഗാര്‍ത്ഥികള്‍ അസ്സല്‍ രേഖകള്‍ സഹിതം ജൂണ്‍ 29 ന് രാവിലെ 11 ന് ഓഫീസില്‍ ഹാജരാകണം. ഫോണ്‍ 04936 248380.

      വരദൂര്‍ പ്രാഥമിക ആരോഗ്യ കേന്ദ്രത്തില്‍ ഈവനിംഗ് ഒ.പി തുടങ്ങുന്നതിനായി അസിസ്റ്റന്റ് സര്‍ജന്‍, ഫാര്‍മസിസ്റ്റ്, ക്ലീനിംഗ് സ്റ്റാഫ് എന്നിവരെ താല്‍ക്കാലികമായി നിയമിക്കുന്നു. തസ്തികയിലേക്കുളള ഇന്റര്‍വ്യൂ ജൂണ്‍ 30 ന് രാവിലെ 11 ന് ആരോഗ്യ കേന്ദ്രത്തില്‍ നടക്കും. നിശ്ചിത യോഗ്യതയുള്ള ഉദ്യോഗാര്‍ഥികള്‍ phc.varadoor@gmail.com   എന്ന ഇ മെയില്‍ വിലാസത്തില്‍  സര്‍ട്ടിഫിക്കറ്റുകളുടെ സാക്ഷ്യപ്പെടുത്തിയ പകര്‍പ്പ് അയക്കണം. ഫോണ്‍. 04936 289166.

      2010-21 ലെ കേരള ബജറ്റില്‍ പ്രഖ്യാപിച്ച വാറ്റ്, കെ.ജി.എസ്.ടി, എ.ഐ.ടി കുടിശ്ശിക നിവാരണവുമായി ബന്ധപ്പെട്ട് സമാശ്വാസ പദ്ധതികള്‍ക്ക് ജൂലൈ 31 വരെ വ്യാപാരികള്‍ക്ക് അപേക്ഷിക്കാം. പദ്ധതി പ്രകാരം പലിശ, പിഴ പലിശ എന്നിവ പൂര്‍ണ്ണമായും ഒഴിവാക്കും. കുടിശ്ശിക നികുതി ഒറ്റ തവണയില്‍ അടയ്ക്കുകയാണെങ്കില്‍ കുടിശ്ശിക 60 ശതമാനം ഒഴിവാക്കും. കുടിശ്ശിക നികുതി തവണ വ്യവസ്ഥയില്‍ അടയ്ക്കുകയാണെങ്കില്‍ കുടിശ്ശികയുടെ 50 ശതമാനം ഒഴിവാക്കും. www.keralataxes.gov.in  എന്ന വിലാസത്തില്‍ അപേക്ഷകള്‍ സമര്‍പ്പിക്കാം.ഫോണ്‍. 8330011252.

     ദുരന്തനിവാരണ പ്രവര്‍ത്തനങ്ങളുടെ ആവിശ്യത്തിലേക്കായി ജില്ലാ ഭരണകുടം വിവിധ സാധന സാമഗ്രികള്‍ക്ക് ടെന്‍ണ്ടര്‍ ക്ഷണിച്ചു. റെയിന്‍ കോട്ട്, ഗം ബൂട്ടുകള്‍, ഗ്ലൗസ്, കുടകള്‍, ഡെസ്‌ക്‌ടോപ്പ്, ലാപ്പ്‌ടോപ്പ്, പോര്‍ട്ടബിള്‍ പ്രൊജക്ടര്‍ തുടങ്ങിയവയ്ക്കാണ് ടെന്‍ണ്ടര്‍ ക്ഷണിച്ചിട്ടുള്ളത്. ടെന്‍ണ്ടര്‍ ഫോറം  ജൂണ്‍ 26 ന് വൈകീട്ട് 4.30 നകം  കളക്‌ട്രേറ്റ് ഹുസൂര്‍ ശിരസ്തദാര്‍ മുമ്പാകെ സമര്‍പ്പിക്കണം. ഫോണ്‍. 04936 204151.

          കോവിഡ് പശ്ചാത്തലത്തില്‍ എടവക ഗ്രാമപഞ്ചായത്ത് ഓഫീസില്‍ വിവിധ ആവശ്യങ്ങള്‍ക്കായി എത്തുന്ന പൊതുജനങ്ങള്‍ പ്രതിരോധ മുന്‍കരുതല്‍ കര്‍ശനമായി പാലിക്കണമെന്ന് ഗ്രാമ പഞ്ചായത്ത് സെക്രട്ടറി അറിയിച്ചു. ഓഫീസില്‍ എത്തുന്നവര്‍ താഴെപറയുന്ന നിര്‍ദേശങ്ങള്‍ കര്‍ശനമായി പാലിക്കണം.

· എടവക ഗ്രാമപഞ്ചായത്തില്‍ വിവിധ ആവശ്യങ്ങള്‍ക്കായി എത്തുന്ന സന്ദര്‍ശകരുടെ പേര്, മേല്‍വിലാസം, സന്ദര്‍ശന സമയം, ഫോണ്‍ നമ്പര്‍, കാണേണ്ട ഉദ്യോഗസ്ഥരുടെ പേര് എന്നിവ പ്രത്യേകം രജിസ്റ്ററില്‍ രേഖപ്പെടുത്തേണ്ടതാണ്.