കോവിഡ് 19 നിയന്ത്രണത്തിന്റെ ഭാഗമായി വീടുകളില്‍ നിരീക്ഷണത്തിലുള്ളവരെ താല്‍ക്കാലികമായി സന്ദര്‍ശിക്കരുതെന്ന പോസ്റ്റര്‍ ഇവരുടെ വീടിന് മുന്നില്‍ സ്ഥാപിക്കുമെന്ന് ജില്ലാ കളക്ടര്‍ പി.ബി.നൂഹ് അറിയിച്ചു. രോഗവ്യാപനം തടയുന്നതിന് പ്രതിരോധമാര്‍ഗമെന്ന രീതിയിലാണു വീടുകളില്‍ പോസ്റ്റര്‍ സ്ഥാപിക്കുക.

അവശ്യസര്‍വീസ് മേഖലയില്‍ പ്രവര്‍ത്തിക്കുന്ന കൂടുതല്‍ വിഭാഗക്കാരെ പോലീസ് പാസ് ലഭിക്കുന്നതില്‍നിന്ന് ഒഴിവാക്കി. ഔദ്യോഗിക കൃത്യനിര്‍വഹണത്തിനു പോകുമ്പോള്‍ ഇവര്‍ തങ്ങളുടെ സ്ഥാപനം നല്‍കിയിട്ടുള്ള തിരിച്ചറിയല്‍ കാര്‍ഡ് പോലീസിനെ കാണിച്ചാല്‍ മതിയാകും. 

ജില്ലാ ഭരണകൂടത്തിന്റെ ആഭിമുഖ്യത്തില്‍ കൊറോണ വൈറസ് വ്യാപനത്തെ തടയുന്നതിനു പൊതുജനങ്ങളിലേക്കു നിര്‍ദേശങ്ങള്‍ എത്തിക്കാന്‍ ലൈറ്റ് ആന്റ് സൗണ്ട്‌സ് വെല്‍ഫെയര്‍ അസോസിയേഷന്‍ ഓഫ് കേരള(എല്‍.എസ്.ഡബ്ല്യൂ.എ.കെ) ജില്ലാ ഘടകത്തിന്റെ അനൗണ്‍സ്‌മെന്റ് വാഹനങ്ങള്‍ ഓടിത്തുടങ്ങി. എല്‍.എസ്.ഡബ്ല്യൂ.എ.കെ നല്‍കിയ 80 അനൗണ്‍സ്‌മെന്റ് വാഹനങ്ങളിലൂടെ കേള്‍പ്പിക്കുന്നതിനുള്ള സിഡി കളക്ടറേറ്റില്‍ നടന്ന ചടങ്ങില്‍ ജില്ലാ  കളക്ടര്‍ പി.ബി നൂഹ് എല്‍.എസ്.ഡബ്ല്യൂ.എ.കെ സംസ്ഥാന വക്താവ് എ.വി.ജോസിന് കൈമാറി. 

കോവിഡ് 19 ന്റെ വ്യാപനം തടയുന്നതിന്റെ ഭാഗമായി ഏര്‍പ്പെടുത്തിയിട്ടുള്ള പുറത്തിറങ്ങല്‍ വിലക്ക് ഉള്‍പ്പെടെയുള്ള നിയന്ത്രണങ്ങള്‍ കര്‍ശനമായി പാലിക്കുന്നുവെന്ന് ഉറപ്പുവരുത്തുമെന്ന് ജില്ലാ കളക്ടര്‍ പി.ബി നൂഹ് പറഞ്ഞു. 

കോവിഡ് 19 വൈറസ് വ്യാപനം തടയുന്നതിന് രാജ്യം മുഴുവന് കരുതല്‍ നടപടി സ്വീകരിക്കുമ്പോള്‍ അവശ്യവസ്തുവെന്ന നിലയില്‍  ആരോഗ്യവകുപ്പ്, ജില്ലാ ഭരണകൂടം, തദ്ദേശസ്വയംഭരണ സ്ഥാപനങ്ങള്‍, ക്ഷീരവികസ വകുപ്പ്, മില്‍മ എന്നിവയുടെ നിര്‍ദ്ദേശങ്ങള്‍ കര്‍ശനമായി പാലിച്ച് പാലിന്റെ സംഭരണവും വിതരണവും ഉറപ്പുവരുത്തിയിരിക്കുകയാണ് ക്ഷീരസംഘങ്ങള്‍. ജില്ലയിലെ 175 പ്രാഥമിക ക്ഷീരസഹകരണ സംഘങ്ങള്‍ ദിവസവും രണ്ടുനേരവും ക്ഷീരകര്‍ഷകരും പാല്‍  ഉപഭോക്താക്കളും ബന്ധപ്പെടുന്ന ക്ഷീരസംഘങ്ങളില്‍ സോപ്പ്, ഹാന്‍ഡ്  വാഷ്, സാനിറ്റൈസര് എന്നിവ ക്രമീകരിച്ചിട്ടുള്ളതും ക്യൂവില്‍ നിശ്ചിത അകലം പാലിച്ചുമാണ് സംഭരണ വിതരണ നടപടികള്‍ പൂര്‍ത്തിയാക്കുന്നത്.

കക്കാട്ടാറിലെ മാലിന്യങ്ങള്‍ നീക്കം ചെയ്യുന്നതിന് 26ന് ഉച്ചയ്ക്ക് രണ്ടിനും മൂന്നിനും ഇടയില്‍ മൂഴിയാര്‍ ഡാമിന്റെ മൂന്ന് റേഡിയല്‍ ഷട്ടറുകള്‍ അഞ്ചു സെന്റിമീറ്റര്‍ വീതം തുറന്ന് 15,000 ക്യുബിക് മീറ്റര്‍ ജലം കക്കാട്ടാറിലേക്ക് ഒഴുക്കി വിടും. ഇതുമൂലം ആങ്ങമൂഴി, സീതത്തോട് വരെയുള്ള സ്ഥലങ്ങളില്‍ കക്കാട്ടാറില്‍ അഞ്ചു സെന്റീമീറ്റര്‍ വരെ ജലനിരപ്പ് ഉയരാന്‍ സാധ്യതയുണ്ട്. പമ്പയുടെയും കക്കാട്ട് ആറിന്റെയും തീരത്തുള്ളവര്‍ പ്രത്യേകിച്ച് ആങ്ങമൂഴി, സീതത്തോട്, മണിയാര്‍, പെരുനാട്, റാന്നി, കോഴഞ്ചേരി, ആറന്മുള നിവാസികളും പൊതുജനങ്ങളും ജാഗ്രത പാലിക്കുകയും ആവശ്യമായ മുന്‍കരുതലുകള്‍ സ്വീകരിക്കണമെന്നും ജില്ലാ കളക്ടര്‍ പി.ബി.

അടൂരില്‍ കുടിവെള്ളപ്രശ്നത്താല്‍ ദുരിതമനുഭവിക്കുന്ന അസുഖബാധിതര്‍, കുടിവെള്ളം കിട്ടാത്തവര്‍ എന്നിവര്‍ക്ക് വാട്ടര്‍ അതോറിട്ടിയുടെ മേല്‍നോട്ടത്തില്‍ കുടിവെള്ളം എത്തിക്കുന്നതിന് എല്ലാ സൗകര്യവും ചെയ്തിട്ടുള്ളതായി ചിറ്റയം ഗോപകുമാര്‍ എം.എല്‍.എ പറഞ്ഞു. 

അടൂര്‍ കെ.എസ്.ആര്‍.ടി.സി ഡിപ്പോയില്‍ അടിയന്തര സാഹചര്യം വന്നാല്‍ ഉപയോഗിക്കാന്‍ അഞ്ച് ഫാസ്റ്റ് പാസഞ്ചര്‍ ബസുകളും ജീവനക്കാരും സജ്ജമാണെന്നെന്നും എം.എല്‍.എ പറഞ്ഞു.

കോവിഡ് 19 നിയന്ത്രണത്തിന്റെ ഭാഗമായി അടിയന്തര സാഹചര്യമുണ്ടായാല്‍ ആളുകളെ നിരീക്ഷണത്തില്‍ പാര്‍പ്പിക്കാനായി സ്വകാര്യസ്ഥാപനം വിട്ടുനല്‍കി ഏഴംകുളം സ്വദേശിനി. ഏഴംകുളം പ്ലാന്റേഷന്‍ ജംഗ്ഷനില്‍ പുത്തന്‍ബംഗ്ലാവ് വീട്ടില്‍ സുമിയുടെ ഉടമസ്ഥതയിലുള്ള കെട്ടിടമാണ് ഐസലേഷന്‍ വാര്‍ഡിനായി വിട്ടുനല്‍കിയത്. 35 പേരെ കിടത്താനുള്ള സൗകര്യം ഇവിടെ ലഭ്യമാകുമെന്ന് സ്ഥലം സന്ദര്‍ശിച്ച ചിറ്റയം ഗോപകുമാര്‍ എം.എല്‍.എ പറഞ്ഞു.

കോവിസ് 19 ന്റെ പശ്ചാത്തലത്തില്‍ പത്തനംതിട്ട പാര്‍ലമെന്റ് മണ്ഡലത്തിലെ ആശുപത്രികളില്‍ 15 വെന്റിലേറ്ററുകള്‍ വാങ്ങുന്നതിന് എം.പി ഫണ്ടില്‍ നിന്നും ആന്റോ ആന്റണി എം.പി ഒന്നരകോടി രൂപ അനുവദിച്ചു. കളക്ടറേറ്റില്‍ നടന്ന ചടങ്ങില്‍ ആന്റോ ആന്റണി എം.പി ഒന്നരകോടി രൂപയുടെ പദ്ധതി നിര്‍ദേശങ്ങള്‍ ജില്ലാ കളക്ടര്‍ പി.ബി നൂഹിനു കൈമാറി. കോവിഡ് 19 ഭീഷണിയുടെ സാഹചര്യത്തില്‍ കൂടുതല്‍ ആവശ്യമായിട്ടുള്ള ഉപകരണങ്ങളുടെ ദൗര്‍ലഭ്യം ജില്ലാ ഭരണകൂടം ശ്രദ്ധയില്‍പ്പെടുത്തിയതിനെ തുടര്‍ന്നാണ് എം.പി ഫണ്ടില്‍ നിന്നും ഒന്നരകോടി രൂപ അനുവദിച്ചതെന്ന് ആന്റോ ആന്റണി എം.പി പറഞ്ഞു.

ജില്ലയിലെ വ്യവസായി 25 ഇന്‍ഫ്രാറെഡ് തെര്‍മ്മോ മീറ്ററുകള്‍ ജില്ലാ ഭരണകൂടത്തിന് സംഭാവന ചെയ്തു. കേരളത്തില്‍ ഇന്‍ഫ്രാറെഡ് തെര്‍മ്മോ മീറ്റര്‍ ലഭ്യമല്ലാത്തതിനെ തുടര്‍ന്ന് ബാംഗ്ലൂരില്‍ നിന്നാണ് തെര്‍മ്മോ മീറ്റര്‍ എത്തിച്ചത്.  ജില്ലാ കളക്ടര്‍ പി.ബി.നൂഹ്, 

ഡി.എം.ഒ (ആരോഗ്യം) എ.എല്‍ ഷീജ എന്നിവര്‍ ചേര്‍ന്ന് ഇന്‍ഫ്രാറെഡ് തെര്‍മ്മോ മീറ്റര്‍ ഏറ്റുവാങ്ങി. ഡി.പി.എം ഡോ.എബി സുഷന്‍ പങ്കെടുത്തു. 14,750 രൂപയാണ് ഒരു ഇന്‍ഫ്രാറെഡ് തെര്‍മ്മോമീറ്ററിന്റെ വില.