കോവിഡ് 19 പ്രതിരോധ പ്രവർത്തനങ്ങൾക്ക് ജില്ലാ ഭരണകൂടത്തിന് കൂടുതൽ സഹായങ്ങൾ ഒരുക്കാൻ തയ്യാറായി ജില്ലയിലെ ഹോട്ടൽ ഉടമകളുടെ സംഘടന. ജില്ലയിലെ നൂറോളം വരുന്ന ഹോട്ടൽ സമുച്ചയങ്ങളാണ് കെയർ സെന്ററുകൾ ഒരുക്കുന്നതിനും ആളുകളെ താമസിക്കുന്നതിനുമായി സജ്ജീകരിക്കുക. തദ്ദേശസ്വയംഭരണ വകുപ്പ് മന്ത്രി എ സി മൊയ്തീന്റെ അധ്യക്ഷതയിൽ ജില്ലാ കളക്ടർ എസ് ഷാനവാസിന്റെ ചേമ്പറിൽ നടന്ന ഹോട്ടൽ ഉടമകളുടെ സംഘടനാപ്രതിനിധികളുമായുള്ള യോഗത്തിലാണ് ഇക്കാര്യം അറിയിച്ചത്.

ജില്ലയിൽ ഒരാൾക്ക് കൂടി കോവിഡ് 19 സ്ഥിരീകരിച്ചു. വെളളിയാഴ്ച (മാർച്ച് 27) ലഭിച്ച 68 പരിശോധനഫലങ്ങളിൽ ഈ ഒരെണ്ണം ഒഴികെ 67 എണ്ണവും നെഗറ്റീവാണ്. ഇതോടെ ജില്ലയിൽ കോവിഡ് 19 ബാധിച്ചവരുടെ എണ്ണം 6 ആയി. ഇതിൽ രണ്ടു പേർ നേരെത്ത രോഗം ഭേദമായി ആശുപത്രി വിട്ടു. 4 പേരാണ് ഇപ്പോൾ രോഗം സ്ഥിരീകരിച്ച് ചികിത്സയിലുളളത്. 26 സാമ്പിളുകൾ വെളളിയാഴ്ച (മാർച്ച് 27) പരിശോധനയ്ക്ക് അയച്ചു. ഇതുവരെ 552 എണ്ണത്തിന്റെ ഫലം വന്നിട്ടുണ്ട്. 26 പേരുടെ പരിശോധനാ ഫലം ഇനിയും ലഭിക്കാനുണ്ട്.

കോവിഡ് 19 മുന്‍കരുതലിന്റെ ഭാഗമായി വീടുകളില്‍ കഴിഞ്ഞിരുന്ന നാലുപേര്‍ക്കു രോഗലക്ഷണങ്ങള്‍ കണ്ടതിനെ തുടര്‍ന്ന് അവരെ ആശുപത്രിയില്‍ ഐസലേഷനില്‍ പ്രവേശിപ്പിച്ചതായി ജില്ലാ കളക്ടര്‍ പി.ബി നൂഹ് പറഞ്ഞു. വിദേശത്തു നിന്നെത്തിയവരുമായി സമ്പര്‍ക്കം പുലര്‍ത്തിയ രണ്ടുപേര്‍, അമേരിക്കയില്‍ നിന്നെത്തിയ വ്യക്തി, പൂനെയില്‍ നിന്നെത്തിയ വ്യക്തി എന്നിവരെയാണ് ഐസലേഷന്‍ വാര്‍ഡിലേക്ക് മാറ്റിയത്. ഇവര്‍ക്ക് രോഗലക്ഷണങ്ങളുണ്ടെങ്കിലും വലിയ ആരോഗ്യപ്രശ്‌നങ്ങള്‍ കാണിക്കുന്നില്ല. മൂന്നുപേരെ പത്തനംതിട്ട ജനറല്‍ ആശുപത്രിയിലും ഒരാളെ കോഴഞ്ചേരി ജില്ലാ ആശുപത്രിയിലുമാണു പ്രവേശിപ്പിച്ചിരിക്കുന്നത്.

കോവിഡ് 19 പ്രതിരോധ പ്രവര്‍ത്തനങ്ങള്‍ക്ക് ഊര്‍ജം പകര്‍ന്ന്  മാധ്യമ കൂട്ടായ്മയും. ബ്രേക്ക് ദ ചെയിന്‍ കാമ്പയിന്‍ ഹ്രസ്വചിത്രമൊരുക്കിയാണ് മാധ്യമ കൂട്ടായ്മ ഭാഗമായത്. കളക്ടറേറ്റില്‍ നടന്ന ചടങ്ങില്‍ ജില്ലാ കളക്ടര്‍ പി.ബി.നൂഹ് പ്രകാശനം നിര്‍വഹിച്ചു. ഡി.എം.ഒ.(ആരോഗ്യം)ഡോ.എ.എല്‍ ഷീജ, ജില്ലാ ഇന്‍ഫര്‍മേഷന്‍ ഓഫീസര്‍ സി. മണിലാല്‍, അസിസ്റ്റന്റ്് എഡിറ്റര്‍ സി.ടി ജോണ്‍, മാധ്യമപ്രവര്‍ത്തകര്‍ തുടങ്ങിയവര്‍ ചടങ്ങില്‍ പങ്കെടുത്തു. മാധ്യമ പ്രവര്‍ത്തകനായ ജസ്റ്റിന്‍ വാളക്കുഴിയുടേതാണ് ആശയവും, ആവിഷ്‌ക്കാരവും.

കോവിഡ് 19 പ്രതിരോധത്തിനായി പന്തളം നഗരസഭയിലെ ആരോഗ്യവിഭാഗത്തിന്റെ നേതൃത്വത്തില്‍ നിര്‍മ്മിച്ച ഹാന്‍ഡ് സാനിറ്റൈസറിന്റെ നിര്‍മാണോദ്ഘാടനം നഗരസഭാചെയര്‍പേഴ്സണ്‍ ടി.കെ സതി നിര്‍വഹിച്ചു. നഗരസഭാ വൈസ്ചെയര്‍മാന്‍ ആര്‍.ജയന്‍, സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍മാര്‍, കൗണ്‍സിലര്‍മാര്‍, നഗരസഭാ സെക്രട്ടറി ബിനുജി, സൂപ്രണ്ട് ആര്‍.രേഖ എന്നിവരുടെ സാന്നിധ്യത്തിലാണ് ഹാന്‍ഡ്‌വാഷ് സാനിറ്റൈസര്‍ നിര്‍മ്മാണം ആരംഭിച്ചത്. 

 ജില്ലയില്‍ കോവിഡ് 19 വൈറസ്ബാധയുമായി ബന്ധപ്പെട്ട് അടിയന്തര സാഹചര്യമുണ്ടായാല്‍ ആളുകളെ താമസിപ്പിക്കുന്നതിനായി കൂടുതല്‍ ഐസലേഷന്‍ വാര്‍ഡുകള്‍ ക്രമീകരിക്കുന്നതിനായി ജില്ലാ കളക്ടര്‍ പിബി.നൂഹ്, തിരുവല്ല സബ് കളക്ടര്‍ ഡോ.വിനയ് ഗോയല്‍, എന്‍എച്ച്എം: ഡി.പി.എം ഡോ. എബി സുഷന്‍ എന്നിവരുടെ നേതൃത്വത്തില്‍ പെരുനാട് കാര്‍മല്‍ എഞ്ചിനീയറിംഗ് കോളേജ്, തിരുവല്ല ബിലിവേഴ്സ് ചര്‍ച്ച് മെഡിക്കല്‍ കോളജ് ആശുപത്രി എന്നിവിടങ്ങളില്‍ സന്ദര്‍ശനം നടത്തി. 

കോവിഡ് 19 വൈറസ് ബാധയുമായി ബന്ധപ്പെട്ട് അടിയന്തര സാഹചര്യമുണ്ടായാല്‍ ഐസലേഷന്‍ സൗകര്യത്തിനായി അടൂരില്‍ വിവിധ സ്ഥലങ്ങളില്‍ 450 പേരെ നിരീക്ഷണത്തില്‍ പാര്‍പ്പിക്കാനായി ആറു കെട്ടിടങ്ങള്‍ ഏര്‍പ്പെടുത്തിയതായി ചിറ്റയം ഗോപകുമാര്‍ എം.എല്‍.എ പറഞ്ഞു. പന്തളം തീര്‍ത്ഥാടന കേന്ദ്രം, പന്തളം എന്‍.എസ്.എസ് കോളേജിലെ ആണ്‍കുട്ടികളുടെ ഹോസ്റ്റല്‍,  അടൂര്‍ ബി.എഡ് സെന്റര്‍, മണക്കാല ഡിക്സണ്‍ അപ്പാര്‍ട്ട്മെന്റ്, മണക്കാല ആര്‍.കെ ഹോസ്റ്റല്‍, മണക്കാല പെനിയേല്‍  ഹോസ്റ്റല്‍, പറന്തല്‍ ബൈബിള്‍ കോളേജ്  ഹോസ്റ്റല്‍ എന്നിവയാണ് ഇപ്പോള്‍ തയ്യാറാക്കിയിട്ടുള്ളതെന്ന് ചിറ്റയം ഗോപകുമാര്‍ എം.എല്‍.എ അറിയിച്ചു.