കൊടുങ്ങല്ലൂരിൽ അധികവില ഈടാക്കിയ സാനിറ്റൈസറുകൾ പിടിച്ചെടുത്തു. ചന്തപ്പുരയിലുള്ള റിലീഫ് മെഡിക്കൽസാണ് സാനിറ്റൈസറിന് അധികവില ഈടാക്കിയത്. 60 എം എല്ലിന്റെ കുപ്പിയ്ക്ക് 30 രൂപയാണ് സാധാരണ വില. എന്നാൽ 94 രൂപയ്ക്കായിരുന്നു ഇവിടെ വിൽപന. മരുന്നുകൾക്കും മാസ്‌ക്കുകൾക്കും സാനിറ്റൈസറുകൾക്കും അധിക വില ഈടാക്കുന്നത് തടയാൻ ജില്ലാഭരണകൂടം ഏർപ്പാടാക്കിയ പ്രത്യേക സ്‌ക്വാഡിന്റെ സാന്നിധ്യത്തിൽ തഹസിൽദാർ 217 കുപ്പികൾ പിടിച്ചെടുത്ത് നഗരസഭാ ആരോഗ്യ വിഭാഗത്തിന് കൈമാറി.

കോവിഡ് 19 വ്യാപനത്തിന് ശേഷം ജില്ലാ ലീഗൽ മെട്രോളജി വകുപ്പ് സ്‌പെഷ്യൽ സ്‌ക്വാഡ് ഇരുപത്തിരണ്ട് കേസുകൾ ചാർജ്ജ് ചെയ്തു. കോവിഡ് 19 മായി ബന്ധപ്പെട്ട് ലീഗൽ മെട്രോളജി നടത്തിയ മിന്നൽ പരിശോധനയിലാണ് അമിതവില ഈടാക്കുന്ന കടകൾക്കെതിരെ കേസെടുത്തത്. മാസ്‌ക്കിന് അമിത വില ഈടാക്കിയതിന് 11 കേസും കുപ്പിവെള്ളത്തിന് അമിത വില ഈടാക്കിയതിന് 7 കേസുകളും സാനിറ്റൈസറിന് അമിത വില ഈടാക്കിയതിന് 4 കേസുകളുമാണ് ഇതുവരെ ചാർജ്ജ് ചെയ്തത്. ഈ കേസുകളിൽ പിഴയായി ഇതുവരെ 90,000 രൂപ ഈടാക്കിയിട്ടുണ്ട്.

കോവിഡ് 19 വ്യാപനം പ്രതിരോധിക്കുന്നതിന് പ്രഖ്യാപിച്ച അടച്ചിടൽ നടപടികളെ നേരിടുന്നതിന്റെ ഭാഗമായി ജില്ലയിലെ തദ്ദേശസ്ഥാപനങ്ങളിൽ കുടുംബശ്രീ സമൂഹ അടുക്കളകളുടെ പ്രവർത്തനം സജീവം. നിരവധി പഞ്ചായത്തുകളിലും നഗരസഭകളിലും സമൂഹ അടുക്കളകൾ ഇതിനകം പ്രവർത്തനം ആരംഭിച്ചു. തദ്ദേശസ്വയംഭരണസ്ഥാപനവും കുടുംബശ്രീയും ചേർന്നാണ് സമൂഹ അടുക്കള സംഘടിപ്പിക്കുന്നത്. നഗരസഭകളിൽ അതിവേഗം സമൂഹ അടുക്കളയുടെ സേവനം പെതു ജനങ്ങൾക്ക് ലഭ്യമാക്കാനാണ് നഗരസഭകളും കുടുംബശ്രീയും ശ്രമിക്കുന്നത്.

എറിയാട് ഗ്രാമപഞ്ചായത്ത് കമ്മ്യൂണിറ്റി കിച്ചണിലേക്ക് വിഭവങ്ങൾ സമാഹരിക്കുന്നുണ്ട്. അരി, പയർ, പരിപ്പ്, കടല, സവാള, ഉരുളക്കിഴങ്ങ്, തക്കാളി, മല്ലിപ്പൊടി, ഉള്ളി, മഞ്ഞൾപ്പൊടി, മുളകുപൊടി, സാമ്പാർപൊടി, പുളി, വെളിച്ചെണ്ണ, കടുക്, ഓയിൽ, ഉലുവ, ഉണക്കമുളക്, പച്ചക്കറികൾ, ക്യാബേജ്, കായം, ചായപൊടി, പഞ്ചസാര, പച്ചമുളക്, പച്ചമാങ്ങ, അരിപ്പൊടി, പച്ചക്കായ, വെണ്ടയ്ക്ക, ചേന, ചെറു പയർ, ശർക്കര, ആട്ട പൊടി എന്നിവയാണ് സമാഹരിക്കുന്നത്. അവശ്യവസ്തുക്കൾ നൽകാൻ ആഗ്രഹിക്കുന്നവർ താഴെ കാണുന്ന നമ്പറുകളിൽ ബന്ധപ്പെടുക.

പ്രസാദിനി മോഹൻ
പ്രസിഡന്റ്
8547509331

കോവിഡ് 19 മാനസിക പിരിമുറുക്കം അനുഭവപ്പെടുന്നവർക്ക് ഫോണിലൂടെ ആശ്വാസം നൽകാൻ ജെ.സി.ഐ തൃപ്രയാറിന്റെ സേവനം. സൈക്കോളജിസ്റ്റുകൾ, അന്താരാഷ്ട്ര ട്രെയ്നർമാർ എന്നിവരുടെ സേവനമാണ് ജെ.സി.ഐ സൗജന്യമായി ലഭ്യമാക്കുന്നത്.
ഏങ്ങണ്ടിയൂർ, വാടാനപ്പള്ളി, തളിക്കുളം, നാട്ടിക, വലപ്പാട്, താന്ന്യം, എടത്തിരുത്തി പഞ്ചായത്തുകളിലെ താമസക്കാർക്ക് ബന്ധപ്പെടാവുന്നതാണെന്ന് പ്രസിഡന്റ് കെ.ബി.ബിനീഷ്, പ്രോഗ്രാം ഡയറക്ടർ ഡോ.ഷൈജു കാരയിൽ എന്നിവർ അറിയിച്ചു. ഫോൺ:9961444539, 9544666222