വടക്കാഞ്ചേരി മണ്ഡലത്തിൽ കാർഷിക വികസന കർഷകക്ഷേമ വകുപ്പ് ഞാറ്റുവേല ചന്ത ആരംഭിച്ചു. വള്ളത്തോൾ നഗർ പഞ്ചായത്തിൽ യു.ആർ.പ്രദീപ് എം.എൽ.എ ഉദ്ഘാടനം ചെയ്തു. തക്കാളി , വെണ്ട, പയർ, വഴുതന, മുളക്, എന്നീ പച്ചക്കറിതൈകൾ, തെങ്ങിൻതൈകൾ തുടങ്ങിയവ കർഷകർക്ക് ഞാറ്റുവേലച്ചന്തയിൽ നിന്നും ലഭ്യമാകും. ഒരുകോടി ഫല വൃക്ഷ തൈകൾ വിതരണം പദ്ധതിയുടെ ഭാഗമായി മുരിങ്ങ, മാവ്, കറിവേപ്പ് തുടങ്ങിയ തൈകളുടെ സൗജന്യ വിതരണവും ഞാറ്റു വേലച്ചന്തയിൽ നടന്നു.

ഡെങ്കിപ്പനിക്കെതിരെ ഉറവിട നശീകരണ ക്യാമ്പയിനുമായി ആരോഗ്യവകുപ്പ്. തദ്ദേശസ്വയംഭരണ സ്ഥാപനങ്ങളുടെ സഹകരണത്തോടെ 'തോട്ടങ്ങളിലേക്ക് നീങ്ങാം' എന്ന പേരില്‍ സംഘടിപ്പിക്കുന്ന ക്യാമ്പയിന് ജൂണ്‍ 25 മുതല്‍ തുടക്കമാകും. റബ്ബര്‍, കവുങ്ങ്, പൈനാപ്പിള്‍, കൊക്കോ തോട്ടങ്ങള്‍ ഈഡീസ് കൊതുകിന്റെ വലിയ തോതിലുള്ള പ്രജനന ഉറവിട കേന്ദ്രങ്ങളാകുന്ന സാഹചര്യത്തിലാണ് ക്യാമ്പയിന്‍ സംഘടിപ്പിക്കുന്നത്. ഇതിനു മുന്നോടിയായി തദ്ദേശ സ്ഥാപനങ്ങള്‍ വഴി നടത്തേണ്ട പ്രവര്‍ത്തനങ്ങളുടെ മാര്‍ഗ്ഗനിര്‍ദ്ദേശങ്ങള്‍ ആരോഗ്യവകുപ്പ് പുറത്തിറക്കി.

തൃശൂർ ജില്ലയിലെ വിവിധ വകുപ്പുകളുടെ ജില്ലാ ഓഫീസുകളിൽ പാർട്ട് ടൈം ജീവനക്കാരുടെ ജില്ലാതല സീനിയോരിറ്റി ലിസ്റ്റ് പ്രസിദ്ധീകരിച്ചു. 2018 ഏപ്രിൽ 1 മുതൽ 2019 മാർച്ച് 31 വരെയുള്ള കാലയളവിൽ ജോലിയിൽ പ്രവേശിച്ചവരും മുൻപത്തെ സീനിയോരിറ്റി ലിസ്റ്റുകളിൽ ഉൾപ്പെടാതെ പോയവരുമായ പാർട്ട് ടൈം കണ്ടിജന്റ് ജീവനക്കാരുടെ ജില്ലാതല താൽക്കാലിക സീനിയോറിറ്റി ലിസ്റ്റാണ് പ്രസിദ്ധീകരിച്ചത്.

സംസ്ഥാനത്തെ വിദ്യാലയങ്ങളിൽ സാമ്പത്തികമായി പിന്നോക്കം നിൽക്കുന്ന വിദ്യാർത്ഥികൾക്കായി നൽകുന്ന വിവിധ സഹായങ്ങളും സേവനങ്ങളും പരസ്യവിതരണം ചെയ്യുന്നത് അവസാനിപ്പിക്കണമെന്ന് പൊതുവിദ്യാഭ്യാസ വകുപ്പ്. പല വിദ്യാലയങ്ങളിലും പാവപ്പെട്ട കുട്ടികൾക്കായി പിടിഎ, സന്നദ്ധ സംഘടനകൾ എന്നിവ സ്‌കൂൾ യൂണിഫോം, ബാഗ്, നോട്ട് ബുക്കുകൾ, മറ്റു പഠനോപകരണങ്ങൾ തുടങ്ങിയവ പരസ്യ പ്രചാരണം നടത്തിയും പൊതുയോഗങ്ങൾ സംഘടിപ്പിച്ചും വിതരണം ചെയ്യുന്നത് ശ്രദ്ധയിൽപെട്ടതിനെ തുടർന്നാണ് നടപടി.

ജെ ഡി സി; 30 വരെ അപേക്ഷിക്കാം

സംസ്ഥാന സഹകരണ യൂണിയന്റെ കീഴില്‍ പ്രവര്‍ത്തിക്കുന്ന കണ്ണൂര്‍ സഹകരണ പരിശീലന കേന്ദ്രത്തിലേക്ക് 2020-21 വര്‍ഷത്തെ ജൂനിയര്‍ ഡിപ്ലോമ ഇന്‍ കോ-ഓപ്പറേഷന്‍ (ജെ ഡി സി) പ്രവേശനത്തിന് എസ്സി/എസ്ടി വിഭാഗത്തില്‍പ്പെട്ട വിദ്യാര്‍ഥികള്‍ക്കുള്ള അപേക്ഷ സ്വീകരിക്കാനുള്ള അവസാന തീയതി ജൂണ്‍ 30 വൈകുന്നേരം അഞ്ച് മണി വരെ ദീര്‍ഘിപ്പിച്ചു.  ഫോണ്‍: 0497 2706790, 9747110083

ലെവല്‍ക്രോസ് അടച്ചിടും

സുഭിക്ഷ കേരളം പദ്ധതിയോടനുബന്ധിച്ച് ഞാറ്റുവേല കാലത്ത്  കൃഷി വകുപ്പ് മുഖേന നടപ്പിലാക്കുന്ന ഞാറ്റുവേല ചന്ത,  കര്‍ഷക സഭകള്‍ എന്നിവയുടെ പയ്യന്നൂര്‍ മണ്ഡലതല ഉദ്ഘാടനം നടന്നു. പെരിങ്ങോം വയക്കര പഞ്ചായത്തിന്റെ കണ്ണങ്കൈയില്‍ പ്രവര്‍ത്തിക്കുന്ന കാര്‍ഷിക നഴ്‌സറിയില്‍ നടന്ന ചടങ്ങ്  സി കൃഷ്ണന്‍ എം എല്‍ എ ഉദ്ഘാടനം ചെയ്തു.
ഞാറ്റുവേലക്ക് കൃഷിഭവനിലെത്തിയ തെങ്ങിന്‍ തൈകളുടെ ആദ്യവില്‍പനയും   പെരിങ്ങോം വയക്കരയിലെ കാര്‍ഷിക കര്‍മസേന ഉല്‍പാദിപ്പിച്ച കുരുമുളക് തൈയുടെ നടീല്‍ കര്‍മ്മവും  എംഎല്‍എ നിര്‍വഹിച്ചു.

ധര്‍മ്മടം മണ്ഡലത്തിലെ എട്ട് പഞ്ചായത്തുകളിലായി 17 പദ്ധതികള്‍ നടപ്പാക്കാന്‍ മുഖ്യമന്ത്രി ജില്ലാ കലക്ടര്‍ക്ക് നിര്‍ദേശം നല്‍കി. 2020-21 വര്‍ഷത്തെ ആസ്തി വികസന ഫണ്ട് ഉപയോഗിച്ച് 4.8 കോടി രൂപയുടെ പദ്ധതികളാണ് മണ്ഡലത്തിലെ വിവിധ പഞ്ചായത്തുകളിലായി നടപ്പാക്കുന്നത്. അഞ്ചരക്കണ്ടി, മുഴപ്പിലങ്ങാട്, പെരളശ്ശേരി, ചെമ്പിലോട്, കടമ്പൂര്‍, വേങ്ങാട്, ധര്‍മ്മടം, പിണറായി എന്നീ പഞ്ചായത്തുകളില്‍ 60 ലക്ഷം രൂപയുടെ വീതം പദ്ധതികള്‍ നടപ്പാക്കാനാണ് മുഖ്യമന്ത്രിയുടെ നിര്‍ദേശം.

കാർഷിക വികസന കർഷക ക്ഷേമ വകുപ്പിലെ 2020ലെ പൊതുസ്ഥലംമാറ്റ നടപടിക്രമങ്ങൾ ആരംഭിച്ചു.  ഈ മാസം 21 മുതൽ 27 വരെ സ്പാർക്ക് വഴി ഓൺലൈനായി അപേക്ഷകൾ സമർപ്പിക്കാം.  വിശദാംശങ്ങൾക്ക്: www.keralaagriculture.gov.in.    
പി.എൻ.എക്സ്. 2252/2020

കേരള സംസ്ഥാന ദുരന്ത നിവാരണ അതോറിറ്റിയിൽ കരാറടിസ്ഥാനത്തിൽ കൺസൾട്ടന്റ് തസ്തികയിൽ നിയമനത്തിന് അപേക്ഷ ക്ഷണിച്ചു.  വിശദവിവരങ്ങൾക്ക്: www.sdma.kerala.gov.in.    
പി.എൻ.എക്സ്. 2251/2020