ദേശീയ സമ്പാദ്യ പദ്ധതി ഏജന്‍റ്സ് അസോസിയേഷന്‍ കോട്ടയം ജില്ലാ കമ്മിറ്റി  മുഖ്യമന്ത്രിയുടെ ദുരിതാശ്വാസ നിധിയിലേക്ക് 100,101 രൂപ സംഭാവന നല്‍കി. സംസ്ഥാന വൈസ് പ്രസിഡന്‍റ് ടി.ബി പത്മകുമാരി, ജില്ലാ പ്രസിഡന്‍റ് സൂസി ഫിലിപ്പ്, സെക്രട്ടറി രാധാ ശ്രീനിവാസന്‍, വൈസ് പ്രസിഡന്‍റ് കെ.ആര്‍ സോഹന്‍ ലാല്‍ എന്നിവര്‍ ചേര്‍ന്ന് ജില്ലാ കളക്ടര്‍ എം. അഞ്ജനയ്ക്ക് ചെക്ക് കൈമാറി. സമ്പാദ്യ ഭവന്‍ ഡെപ്യൂട്ടി ഡയറക്ടര്‍ ജ്യോതി ദാമോദരന്‍, അസിസ്റ്റന്‍റ് ഡയറക്ടര്‍ ഷിബു എബ്രഹാം എന്നിവര്‍ സന്നിഹിതരായിരുന്നു.

 വനിതാ ശിശു വികസന വകുപ്പിന്‍റെ  കീഴില്‍ പ്രവര്‍ത്തിക്കുന്ന കോട്ടയം ഗവൺമെന്‍റ് ചില്‍ഡ്രന്‍സ് ഹോമില്‍ അന്താരാഷ്ട്ര യോഗാ ദിനം ആചരിച്ചു. മഹാത്മാഗാന്ധി സര്‍വ്വകലാശാല സ്കൂള്‍ ഓഫ് ഗാന്ധിയന്‍ തോട്ട് ആന്‍റ് ഡെവലപ്മെന്‍റ് സ്റ്റഡീസിലെ യോഗാ സെന്‍റര്‍ ഡയറക്ടര്‍ ഡോ. ഹരി ലക്ഷ്മീന്ദ്രകുമാര്‍ ഉദ്ഘാടനം ചെയ്തു. 

 യോഗാ പരിശീലകന്‍ സഞ്ജയ് ആനന്ദ്, ചില്‍ഡ്രന്‍സ് ഹോം സൂപ്രണ്ട് ബിന്ദു ഭായ്, ചൈല്‍ഡ് വെല്‍ഫയര്‍ ഇന്‍സ്പെക്ടര്‍ സെയ്തലവി തുടങ്ങിയവര്‍ നേതൃത്വം നല്‍കി.

ചികിത്സയിലുള്ളത് 96 പേര്‍

കോട്ടയം ജില്ലയില്‍ പതിമൂന്നു പേര്‍ക്കു കൂടി കോവിഡ് സ്ഥിരീകരിക്കുകയും നാലു പേര്‍ രോഗമുക്തരാകുകയും ചെയ്തു. രോഗം ബാധിച്ച് ചികിത്സയിലുള്ളവരുടെ എണ്ണം 96 ആയി. ഇതുവരെ 65 പേര്‍ക്കാണ് ജില്ലയില്‍ കോവിഡ് ഭേദമായത്. 

ക്ലീന്‍ കോട്ടയം-ഗ്രീന്‍ കോട്ടയം പദ്ധതി

കോഴിക്കടകളില്‍നിന്നുള്ള അവശിഷ്ടങ്ങള്‍ ഉയര്‍ത്തുന്ന മലിനീകരണ ഭീഷണിക്ക് ശാശ്വത പരിഹാരമൊരുക്കാന്‍ കോട്ടയം ജില്ലാ പഞ്ചായത്തിന്‍റെ പദ്ധതി. കോഴിക്കോട്, വയനാട്, മലപ്പുറം ജില്ലാ പഞ്ചായത്തുകളുടെ മാതൃക പിന്തുടര്‍ന്ന് ക്ലീന്‍ കോട്ടയം -ഗ്രീന്‍ കോട്ടയം പദ്ധതിയുടെ ഭാഗമായി തദ്ദേശഭരണ സ്ഥാപനങ്ങളെ ഏകോപിപ്പിച്ചുകൊണ്ടുള്ള മാലിന്യ ശേഖരണ- സംസ്കരണ സംവിധാനമൊരുക്കാനാണ് ലക്ഷ്യമിടുന്നതെന്ന് ജില്ലാ പഞ്ചായത്ത് പ്രസിഡന്‍റ് അഡ്വ. സെബാസ്റ്റ്യന്‍ കുളത്തുങ്കല്‍ പറഞ്ഞു.

കോട്ടയം ജില്ലയിലെ കാലവര്‍ഷ ദുരന്തനിവാരണ മുന്നൊരുക്കങ്ങളുടെ ഭാഗമായി നാളെ(ജൂണ്‍ 24) തീക്കോയി ഗ്രാമപഞ്ചായത്തില്‍ നടക്കുന്ന മോക് ഡ്രിലിന്‍റെ ഒരുക്കങ്ങള്‍ പൂര്‍ത്തിയായി. ജില്ലാ കളക്ടര്‍ എം. അഞ്ജനയുടെ നേതൃത്വത്തില്‍  കളക്ടറേറ്റ് കോണ്‍ഫറന്‍സ് ഹാളില്‍ നടന്ന ടേബിള്‍ ടോപ് എക്സര്‍സൈസിൽ ക്രമീകരണങ്ങള്‍ വിലയിരുത്തി.

ഇളംദേശം ബ്ലോക്ക് പഞ്ചായത്ത് 2020-21 സാമ്പത്തിക വര്‍ഷം നടപ്പിലാക്കുന്ന വനിതാ ഗ്രൂപ്പ് സംരംഭങ്ങള്‍ക്കുള്ള ധന സഹായത്തിന്  ഇളംദേശം ബ്ലോക്ക് പരിധിയില്‍ സ്ഥിര താമസക്കാരായ 18 നും 60 നും ഇടയില്‍ പ്രായമുള്ള തൊഴില്‍ രഹിതരായ വനിതകളുടെ  രജിസ്‌ട്രേഷന്‍ ഉള്ള ഗ്രൂപ്പുകളില്‍ നിന്നും അപേക്ഷ ക്ഷണിച്ചു. പുതുതായി സംരംഭങ്ങള്‍ ആരംഭിക്കുവാന്‍ താല്പര്യമുള്ള വനിതാ ഗ്രൂപ്പുകള്‍
ജൂണ്‍ 30ന് മുമ്പായി ഇളംദേശം ബ്ലോക്ക് ഓഫീസില്‍ അപേക്ഷ സമര്‍പ്പിക്കണം.

ഉപ്പുതറ സാമൂഹികാരോഗ്യകേന്ദ്രത്തിലെ ഈവനിംഗ് ഒ.പിയിലേക്ക് താല്‍ക്കാലികാടിസ്ഥാനത്തില്‍ മെഡിക്കല്‍ ഓഫീസര്‍  തസ്തികയിലേക്ക് നിയമനം നടത്തുന്നു. യോഗ്യത എം.ബി.ബി.എസ്, ടി.സി.എം.സി രജിസ്‌ട്രേഷന്‍. തദ്ദേശവാസികള്‍ക്ക് മുന്‍ഗണന. താല്‍പര്യമുള്ള ഉദ്യോഗാര്‍ത്ഥികള്‍ ജൂണ്‍ 23ന് രാവിലെ 11 മണിക്ക് ബയോഡേറ്റയും യോഗ്യതയും പ്രവൃത്തി പരിചയവും തെളിയിക്കുന്ന സര്‍ട്ടിഫിക്കറ്റുകളുടെ അസ്സലും പകര്‍പ്പുമായി ആശുപത്രി കോണ്‍ഫറന്‍സ് ഹാളില്‍ നടത്തുന്ന ഇന്റര്‍വ്യൂവിന് ഹാജരാകണം. വിവരങ്ങള്‍ക്ക് ഫോണ്‍ 04869244019.
 

നാഷണല്‍ ആയുഷ്മിഷന്റെയും ഭാരതീയ ചികിത്സാ വകുപ്പിന്റെയും ആഭിമുഖ്യത്തില്‍ ജൂണ്‍ 21ന് ആറാം അന്താരാഷ്ട്ര യോഗാദിനമായി ആഘോഷിക്കുന്നു. കോവിഡ് സാഹചര്യത്തില്‍ പൊതുപരിപാടികള്‍ സംഘടിപ്പിക്കാന്‍ സാധിക്കാത്തതിനാല്‍ യോഗ കുടുംബത്തോടൊപ്പം എന്നതാണ് ആറാം അന്താരാഷ്ട്ര ദിനാചരണത്തിന്റെ അജണ്ട. വര്‍ദ്ധിച്ചുവരുന്ന ജീവിതശൈലീ രോഗത്തില്‍ നിന്നും ജനതയെ രക്ഷിക്കുവാനും ശാരീരിക മാനസിക വിഷമങ്ങളില്‍ നിന്നും രോഗങ്ങളില്‍ നിന്നും രക്ഷനേടാനും യോഗ ജനങ്ങള്‍ക്ക്  പ്രയോജനപ്പെടുത്തുക എന്നതാണ് ഉദ്ദേശം.