കേരള ബിൽഡിംഗ് ആന്റ് അദർ കൺസ്ട്രക്ഷൻ വർക്കേഴ്സ് വെൽഫെയർ നടത്താൻ നിശ്ചയിച്ചിരുന്ന വിവിധ പരിപാടികൾ മാറ്റിവെച്ചതായി ജില്ലാ ലേബർ ഓഫീസർ അറിയിച്ചു. ബിൽഡിംഗ് ആന്റ് അദർ കൺസ്ട്രക്ഷൻ വർക്കേഴ്സ് വെൽഫെയർ സെസ് നിയമ പ്രകാരം കെട്ടിടങ്ങളുടെ സെസ് നിർണ്ണയിക്കുന്നത് സംബന്ധിച്ച് ഈ മാസം 23, 24 തീയതികളിൽ ജില്ലാ ലേബർ ഓഫീസിൽ നടത്താൻ നിശ്ചയിച്ചിരുന്ന കെട്ടിട ഉടമകളുടെ ഹിയറിംഗും മാർച്ച് 31 വരെ നടത്താൻ നിശ്ചയിച്ചിരുന്ന തൊഴിൽ തർക്കകേസുകളിലെ അനുരജ്ഞന ചർച്ചകളുമാണ് മാറ്റിവെച്ചത്. സെസ് ഹിയറിംഗ് നോട്ടീസ് ലഭിച്ചിട്ടുള്ളവർ ഏപ്രിൽ മാസത്തിൽ പ്രവൃത്തി ദിവസങ്ങളിൽ ഹാജരാകാകണം. ഫോൺ: 0487-2360469
 

കുന്നംകുളം നഗരസഭയുടെ ബസ്റ്റാൻഡ് നിർമ്മാണ പ്രവർത്തനം അവസാനഘട്ടത്തിലേക്ക് കടന്നതോടെ മൂന്ന് ബസുകളുടെ ട്രയൽ റൺ നടത്തി. ചെയർപേഴ്സൺ സീത രവീന്ദ്രൻ, തദ്ദേശ സ്വയംഭരണ വകുപ്പ് മന്ത്രിയുടെ പ്രതിനിധി ടികെ വാസു, നഗരസഭ സ്റ്റാൻഡിങ് കമ്മിറ്റി ചെയർമാൻമാർ, കൗൺസിലർമാർ തുടങ്ങിയവർ പങ്കെടുത്തു.
തദ്ദേശസ്വയംഭരണ വകുപ്പുമന്ത്രി എ സി മൊയ്തീന്റെ പ്രാദേശിക വികസന ഫണ്ടിൽ നിന്ന് 4.5 കോടി രൂപയും കുന്നംകുളം അർബൻ ബാങ്കിൽ നിന്നും 8.5 കോടി രൂപയും ചെലവഴിച്ചാണ് ബസ് സ്റ്റാൻഡ് നിർമ്മാണം പൂർത്തീകരിക്കുന്നത്. ഏപ്രിൽ - മെയ് മാസത്തിൽ ബസ് സ്റ്റാൻഡിന്റെ ഉദ്ഘാടനം നടത്താനാകുമെന്നാണ് നഗരസഭ പ്രതീക്ഷിക്കുന്നത്.

സപ്ലൈകോയുടെ പുതിയ ചെയർമാൻ ആൻഡ് മാനേജിങ് ഡയറക്ടറായി പി എം അലി അസ്ഗാർ പാഷ ചുമതലയേറ്റു. പാലക്കാട് ജില്ലാ കളക്ടറായും കെറ്റിഡിസി മാനേജിങ് ഡയറക്ടറായും സേവനമനുഷ്ഠിച്ചിട്ടുണ്ട്. പട്ടികജാതി-പട്ടികവർഗ്ഗ വകുപ്പ് സെക്രട്ടറിയായും പ്രവർത്തിച്ചിട്ടുണ്ട്. 2010 - 12 കാലയളവിൽ സപ്ലൈകോ ജനറൽ മാനേജറായിരുന്നു. 2004 ലാണ് അദ്ദേഹത്തിന് ഐ.എ.എസ് ലഭിച്ചത്. തിരുവനന്തപുരം ഗുഡ് ഷേപ്പേർഡ് സ്‌കൂൾ അധ്യാപികയായ സാജിതയാണ് ഭാര്യ. മകൾ താനിയ (യുണൈറ്റഡ് അറബ് ബാങ്ക് ഓഫീസർ), മകൻ കാലിഫ് (ബംഗ്ലൂർ എച്ച് ഡി എഫ് സി ബാങ്ക് ഓഫീസർ).

തൃശ്ശൂർ ജില്ലാ ശിശുക്ഷേമ സമിതി 2020 - 2023 കാലയളവിലേക്ക് എക്സിക്യൂട്ടീവ് കമ്മിറ്റി അംഗങ്ങളെ തെരഞ്ഞെടുത്തു. ഡോ. എം എൻ സുധാകരൻ (വൈസ് പ്രസിഡന്റ്), എൻ ചെല്ലപ്പൻ (സെക്രട്ടറി), പി കെ വിജയൻ (ജോയിന്റ് സെക്രട്ടറി), ഡോ പി ഉഷ (ട്രഷറർ), പി എൻ ഭാസ്‌ക്കരൻ, ബിന്നി ഇമ്മട്ടി, ഡോ പി ഭാനുമതി, കെ ജി മോഹനൻ (കമ്മിറ്റി അംഗങ്ങൾ) എന്നിവരെ തെരഞ്ഞെടുത്തു. കളക്ടർ എസ് ഷാനവാസിന് മുന്നിൽ അംഗങ്ങൾ സത്യപ്രതിജ്ഞ ചെയ്ത് സ്ഥാനം ഏറ്റെടുത്തു. അസിസ്റ്റന്റ് ഡവലെപ്മെന്റ് കമ്മീഷ്ണർ (ജനറൽ) പി എൻ അയന, സംസ്ഥാന എക്സിക്യൂട്ടീവ് കമ്മിറ്റി അംഗം എം കെ പശുപതി, ജില്ലാ റിട്ടേണിങ് ഓഫീസർ കെ ബഹുലേയൻ നായർ തുടങ്ങിയവർ പങ്കെടുത്തു.

2020- 2021 സാമ്പത്തിക വർഷത്തെ ജില്ലയിലെ ഗ്രാമ പഞ്ചായത്തുകളിലെ പദ്ധതി പ്രവർത്തനങ്ങളെ ജില്ലാ പഞ്ചായത്ത് യോഗത്തിൽ വിലയിരുത്തി. ജില്ലാ പഞ്ചായത്ത് കോൺഫറൻസ് ഹാളിൽ നടന്ന യോഗത്തിൽ പഞ്ചായത്ത് പ്രസിഡന്റ് മേരി തോമസ് അധ്യക്ഷയായി. രണ്ടാഴ്ച്ചയ്ക്കുളിൽ പദ്ധതി വിഹിതത്തിന്റെ 100 ശതമാനം ചെലവഴിച്ചതിന്റെ രേഖ നിർവ്വണ ഉദ്യോഗസ്ഥരോട് സമർപ്പിക്കാൻ ജില്ലാ പഞ്ചായത്ത് പ്രസിഡന്റ് മേരി തോമസ് നിർദ്ദേശിച്ചു.

ഗുരുവായൂർ ഉത്സവം കൊടിയിറങ്ങിയതോടെ ക്ഷേത്രപരിസരം വൃത്തിയാക്കാൻ നഗരസഭ മുന്നിട്ടിറങ്ങി. കൊറോണ പ്രതിരോധ പ്രവർത്തനങ്ങളോട് ഏവരും സഹകരിച്ചു വരുന്നതിനാൽ സാധാരണ നിലയിലുള്ള തിരക്ക് കഴിഞ്ഞ ദിവസങ്ങളിൽ ഗുരുവായൂരിൽ ഉണ്ടായിരുന്നില്ല. നിലവിലുള്ള മാലിന്യങ്ങൾ നീക്കം ചെയ്യുന്നതിനായി അതിരാവിലെ തന്നെ ശുചീകരണ പ്രവർത്തനങ്ങൾ നടത്തി.

കുന്ദമംഗലം - അഗസ്ത്യമുഴി റോഡിന്റെ ബി.എം. പ്രവൃത്തി ആരംഭിക്കുന്നതിനാല്‍ ഇന്ന് (മാര്‍ച്ച് 17) മുതല്‍ ടാറിംഗ് കഴിയുന്നത് വരെ റോഡില്‍ ഗതാഗത നിയന്ത്രണം ഏര്‍പ്പെടുത്തിയതായി എക്‌സിക്യൂട്ടീവ് എഞ്ചിനീയര്‍ അറിയിച്ചു.

കോഴിക്കോട് കോര്‍പ്പറേഷന്‍- സ്റ്റേഡിയം- അശോക ഹോസ്പിറ്റല്‍ റോഡിന്റെ പുനരുദ്ധാരണ പ്രവര്‍ത്തി തുടങ്ങുന്നതിനാല്‍ പ്രവര്‍ത്തി തീരുന്നത് വരെ വാഹന ഗതാഗതം പൂര്‍ണ്ണമായി നിരോധിച്ചതായി എക്‌സിക്യുട്ടീവ് എഞ്ചിനീയര്‍ അറിയിച്ചു.

പാഞ്ഞാൾ ഗ്രാമപഞ്ചായത്തിൽ കൊറോണ ബോധവൽക്കരണവും അടിയന്തിര അവലോകന യോഗവും ചേർന്നു. എല്ലാ വാർഡിലും നോട്ടീസ് വിതരണവും ബോധവത്ക്കരണവും നടത്തി. മെഡിക്കൽ ഓഫീസർ സുനിൽകുമാർ നേതൃത്വം നൽകി. പഞ്ചായത്ത് പ്രതിനിധികൾ, കുടുംബശ്രീ പ്രവർത്തകർ, എന്നിവരും പങ്കെടുത്തു.

ഉത്പാദന-സേവന-പശ്ചാത്തലമേഖലയ്ക്ക് ഊന്നൽ നൽകി എറിയാട് പഞ്ചായത്തിന്റെ 2020-21വർഷത്തെ ബജറ്റ്. പൊതുവിഭാഗം, ഉത്പാദനം, സേവനം, പശ്ചാത്തലം എന്നീ വിഭാഗങ്ങൾക്കായി 9,28,06,500 രൂപയാണ് വകയിരുത്തിയിരിക്കുന്നത്.