കോഴിക്കോട് വഖഫ് ട്രിബ്യൂണല്‍ ക്യാമ്പ് സിറ്റിങ് ജൂലൈ 14, 15,16 തീയതികളില്‍ എറണാകുളം കലൂരിലുളള കേരളാ സ്റ്റേറ്റ് വഖഫ് ബോര്‍ഡ് ഹെഡ് ഓഫീസ് കെട്ടിടത്തില്‍ നടക്കുമെന്ന് ശിരസ്തദാര്‍ അറിയിച്ചു.

കേരളത്തിലെ പത്ര-ദൃശ്യ-ഡിജിറ്റല്‍ മാധ്യമരംഗത്ത് പ്രവര്‍ത്തിക്കുന്നവര്‍ക്കും പത്ര ഏജന്റുമാര്‍ക്കും വിതരണക്കാര്‍ക്കും മറ്റ് ക്ഷേമനിധിയില്‍ അംഗങ്ങളല്ലാത്ത തൊഴിലാളികള്‍ക്കും കേരള സംസ്ഥാന അസംഘടിത ത്തൊഴിലാളി സാമൂഹ്യസുരക്ഷാ പദ്ധതിയില്‍ അംഗങ്ങളാകാം. പ്രാദേശിക മാധ്യമ പ്രവര്‍ത്തകര്‍ക്കും പദ്ധതിയില്‍ അംഗങ്ങളാകാം.  അംഗങ്ങള്‍ക്ക് കേരള അസംഘടിത തൊഴിലാളി സാമൂഹ്യസുരക്ഷാ ബോര്‍ഡ് മുഖാന്തരമുള്ള ആനുകൂല്യങ്ങള്‍ ലഭിക്കും.  

ജില്ലയിലെ മുഴുവന്‍ അധ്യാപക പരിശീലന സ്ഥാപനങ്ങള്‍ക്കും ഡയറ്റ് ഓണ്‍ലൈന്‍ ലേണിംഗ് മാനേജ്മെന്റ് സംവിധാനമൊരുക്കുന്നു.

കോഴിക്കോട് ഡയറ്റിന്റെ  നേതൃത്വത്തിലാണ് നേരിട്ടും ഓണ്‍ലൈനായുമുള്ള (ഫിസിക്കല്‍ + ഡിജിറ്റല്‍) ഇ-ലേണിംഗ് മാനേജ്മെന്റ് സംവിധാനമൊരുക്കുന്നത്. സ്വതന്ത്ര സോഫ്റ്റ് ഫെയര്‍ പ്ലാറ്റ്ഫോമിലുള്ള മൂഡില്‍ (MOODDLE)  ഉപയോഗിച്ചാണ് സംവിധാനമൊരുക്കുക. ഇതിന്റെ ഭാഗമായി തയ്യാറാക്കിയ ഇ-ലേണിംഗ് മാനേജ്മെന്റ് സംവിധാനം എസ്.സി.ആര്‍.ടി ഡയറക്ടര്‍ ഡോ.ജെ.പ്രസാദ് ഉദ്ഘാടനം ചെയ്തു. 

ജില്ലയിലെ 58 തദ്ദേശസ്വയംഭരണ സ്ഥാപനങ്ങളിലെ 'സുഭിക്ഷ കേരളം' പദ്ധതി ഉള്‍പ്പടെയുള്ള വാര്‍ഷിക പദ്ധതി ഭേദഗതിക്ക് ജില്ലാ ആസൂത്രണ സമിതി അംഗീകാരം നല്‍കി. സുഭിക്ഷകേരളം,  നവകേരള മിഷന്‍ പദ്ധതികളുടെ ഭാഗമായി നടന്നുവരുന്ന പ്രവര്‍ത്തനങ്ങളും യോഗം വിലയിരുത്തി. കാലതാമസമില്ലാതെ മുഴുവന്‍ പ്രവര്‍ത്തനങ്ങളും  പൂര്‍ത്തിയാക്കാന്‍ തദ്ദേശസ്വയംഭരണ സ്ഥാപനങ്ങള്‍ക്ക് ആസൂത്രണ സമിതി ചെയര്‍മാന്‍ ജില്ലാപഞ്ചായത്ത് പ്രസിഡന്റ് ബാബു പറശ്ശേരി നിര്‍ദേശം നല്‍കി. 

അഴിയൂര്‍ ഗ്രാമപഞ്ചായത്തിലെ കക്കടവ് ഭാഗത്ത് മാഹി പുഴയ്ക്ക് കുറുകെ ദേശീയ പാത ബൈപാസ് നിര്‍മാണത്തിന് നിര്‍മ്മിച്ച ബണ്ടുകള്‍ പൂര്‍ണ്ണമായി പൊളിച്ചുമാറ്റി. ബൈപ്പാസ് നിര്‍മ്മാണ കമ്പനിയായ ഇകെകെയോട് ബണ്ട് പൊളിച്ചു മാറ്റാന്‍ ജില്ലാ കലക്ടര്‍ സാംബശിവ റാവു കഴിഞ്ഞ മാസം നിര്‍ദ്ദേശിച്ചിരുന്നു. മാഹി പുഴയിലെ സ്വാഭാവിക ഒഴുക്ക് തടസ്സപ്പെടുത്തി നിര്‍മ്മിച്ച ബണ്ടുകള്‍ പ്രളയത്തിന് കാരണമായി എന്നു കാണിച്ച് അഴിയൂര്‍ ഗ്രാമപഞ്ചായത്ത് ജില്ലാ കലക്ടര്‍ക്ക് കത്ത് നല്‍കിയതിന്റെ അടിസ്ഥാനത്തിലാണ് 110 മീറ്റര്‍ വീതിയില്‍ ബണ്ടുകള്‍ പൊളിച്ചു മാറ്റിയത്. 

മലമ്പുഴ 2 വില്ലേജിലെ 0.35, 1.29 ഏക്കര്‍ സ്ഥലങ്ങളില്‍ കൃഷിചെയ്ത് വിളവെടുക്കാനുള്ള അവകാശം ജൂണ്‍ 22 ന് രാവിലെ 11 ന് മലമ്പുഴ 2 വില്ലേജ് ഓഫീസില്‍ ലേലം ചെയ്യുമെന്ന് പാലക്കാട് താലൂക്ക് തഹസില്‍ദാര്‍ (ഭൂരേഖ) അറിയിച്ചു. ബ്ലോക്ക് നമ്പര്‍ 28 ലെ 0.35 ഏക്കര്‍ ഭൂമി, 1.29 ഏക്കറിലെ തെങ്ങ്, പന, മൂച്ചി എന്നിവയില്‍ നിന്നും കായ്ഫലം എടുക്കുന്നതിനുള്ള അനുമതിയാണ് നല്‍കുന്നത്.

തമിഴ്നാട് പോലീസില്‍ ബി.ഡി.ഡി യൂണിറ്റ്സ് ഇന്‍ ആര്‍മി/എന്‍.എസ.്ജി & സി.എം.ഇ പൂനെ എന്നീ സ്ഥാപനങ്ങളില്‍ നിന്നും ബി.ഡി&ഡി കോഴ്സുകള്‍ വിജയകരമായി പൂര്‍ത്തിയാക്കി പ്രവൃത്തി പരിചയ സര്‍ട്ടിഫിക്കറ്റുളള ഇന്‍ഡ്യന്‍ ആര്‍മിയില്‍ നിന്നും വിരമിച്ച വിമുക്തഭടന്മാരെ നിയമിക്കുന്നു. നിര്‍ദ്ദിഷ്ട യോഗ്യതയുളള 10-ാം ക്ലാസ് പാസ്സായ 55 വയസ്സില്‍ താഴെയുളള വിമുക്തഭടന്മാര്‍ക്കാണ് അവസരം. കൂടുതല്‍ വിവരങ്ങള്‍ ജൈനിമേടിലുളള ജില്ലാ സൈനിക ക്ഷേമ ഓഫീസില്‍ ലഭിക്കും. ഫോണ്‍ : 0491-2971633.

പാലക്കാട് താലൂക്ക് പരാതി പരിഹാര അദാലത്ത് ജൂണ്‍ 20 ന് രാവിലെ 10.30 മുതല്‍ ജില്ലാ കലക്ടറുടെ നേതൃത്വത്തില്‍ വീഡിയോ കോണ്‍ഫറന്‍സ് മുഖേന നടക്കും. ഇന്ന് (ജൂണ്‍ 18) വൈകീട്ട് അഞ്ച് വരെ അക്ഷയകേന്ദ്രം വഴി ലഭിക്കുന്ന പരാതികളാണ് അദാലത്തില്‍ പരിഗണിക്കുക. പരാതി സമര്‍പ്പിച്ചവര്‍ക്ക് അദാലത്തില്‍ പങ്കെടുക്കാന്‍ അക്ഷയ കേന്ദ്രങ്ങളില്‍ സൗകര്യമൊരുക്കിയിട്ടുണ്ട്. കൂടുതല്‍ വിവരങ്ങള്‍ പ്രദേശത്തെ അക്ഷയ കേന്ദ്രത്തില്‍ ലഭിക്കുമെന്ന് പാലക്കാട് തഹസില്‍ദാര്‍ അറിയിച്ചു.