കോവിഡ്-19 രോഗവുമായി ബന്ധപ്പെട്ട വിവരങ്ങള്‍ ജനങ്ങളില്‍ എത്തിക്കാന്‍ സര്‍ക്കാര്‍ മെബൈല്‍ ആപ് പുറത്തിറക്കി. Gok Direct എന്ന പേരിലുള്ള ആപ്ലിക്കേഷനാണ് പുറത്തിറക്കിയത്. കോവിഡ്-19 നെ സംബന്ധിച്ച കൃത്യമായ വിവരങ്ങള്‍ ജനങ്ങളിലേക്ക് എത്തിക്കാനാണിത്.   ഇന്റര്‍നെറ്റ് ഇല്ലാത്ത ഫോണുകളിലും ടെക്സ്റ്റ് മെസേജ് സംവിധാനത്തിലൂടെ വിവരങ്ങള്‍ ലഭിക്കും.

എടക്കഴിയൂർ പഞ്ചവടി കടൽ തീരത്തെ കടലാമ ഹാച്ചറിയൽ നിന്നും 132 കടലാമക്കുഞ്ഞുങ്ങൾ വിരിഞ്ഞിറങ്ങി. വേനൽമഴ പെയ്തിരുന്നത് മണലിൽ ജലത്തിന്റെ അളവ് കൂടാനും കൂട്ടിലെ ഊഷ്മാവ് കുറയാനും കാരണമായതും കടലാമ സംരക്ഷകർക്കിടയിൽ ആശങ്കയുണർത്തിയിരുന്നു. പിന്നീടുള്ള ദിവസങ്ങളിലെ കനത്ത ചൂട് ഊഷ്മാവ് ഉയർത്താൻ സഹായകമായതായി ഗ്രീൻ ഹാബിറ്റാറ്റ് എക്സിക്യൂട്ടീവ് ഡയറക്ടർ എൻ. ജെ ജെയിംസ് അഭിപ്രായപ്പെട്ടു.
കടൽ ഇറങ്ങിയതും വിരിപ്പ് കേന്ദ്രം ഉയരത്തിലായതും കൂടുതൽ കടലാമക്കുഞ്ഞുങ്ങൾ വിരിയാൻ കാരണമായി.

ചാവക്കാട് ഐസിഡിഎസിനു കീഴിൽ പ്രവർത്തിക്കുന്ന 126 അങ്കണവാടികൾക്ക് പ്രീസ്‌കൂൾ കിറ്റ് വിതരണം ചെയ്യുന്നതിന് ദർഘാസ് ക്ഷണിച്ചു. ദർഘാസ് സ്വീകരിക്കുന്ന അവസാന തീയതി മാർച്ച് 17 ഉച്ച രണ്ട് മണി. ഫോൺ: 0487 2507707.

രജിസ്റ്റർ ചെയ്യാൻ വിട്ടുപോയവർക്ക് വീണ്ടും അവസരം നൽകി സപ്ലൈകോ. സപ്ലൈകോ ഓൺലൈൻ രജിസ്‌ട്രേഷൻ വെബ് സൈറ്റ് മാർച്ച് 18 രാവിലെ 11 മുതൽ മാർച്ച് 19ന് വൈകീട്ട് 5 വരെ കർഷകർക്ക് തുറന്നു കൊടുക്കും. കോൾ ഡബിൾ ഉൾപ്പെടെ ഇനിയും രജിസ്റ്റർ ചെയ്യാൻ വിട്ടു പോയവർക്ക് രജിസ്റ്റർ ചെയ്യാനുള്ള അവസാനത്തെ അവസരമാണ് ഇതിലൂടെ നൽകുന്നത്. നെല്ല് സംഭരണത്തിനായി സപ്ലൈകോയുമായി 36 മില്ലുകളാണ് കരാറിലേർപ്പെട്ടിരിക്കുന്നത്. സംഭരണത്തിനുള്ള രണ്ടാംഘട്ട ഓൺലൈൻ രജിസ്‌ട്രേഷൻ ഫെബ്രുവരി 25നാണ് അവസാനിച്ചത്.

വടക്കാഞ്ചേരി ജില്ലാ ആശുപത്രിയിലേക്ക് 2020-21 സാമ്പത്തിക വർഷത്തേക്ക് കെഎഎസ്പി/ജെഎസ്എസ്‌കെ/ ആരോഗ്യകിരണം / ആർബിഎസ്‌കെ എന്നീ സർക്കാർ പദ്ധതികളിൽ ഉൾപ്പെടുന്ന രോഗികൾക്ക് ഡോക്ടർമാരുടെ കുറിപ്പടി പ്രകാരം മരുന്നുകൾ/അനുബന്ധ സാധനങ്ങൾ വിതരണം ചെയ്യുന്നതിന് ടെണ്ടർ ക്ഷണിച്ചു. ടെണ്ടർ സ്വീകരിക്കുന്ന അവസാന തീയതി മാർച്ച് 28 രാവിലെ 11 മണി. ഫോൺ: 04884 235214.
 

ബാങ്ക് വായ്പ കുടിശ്ശിക ഈടാക്കുന്നതിന് കെഎൽ 45 ഇ 6874 നമ്പർ സ്‌കോർപ്പിയോ കാർ ഏപ്രിൽ രണ്ട് രാവിലെ 11 ന് മുകുന്ദപുരം താലൂക്ക് ഓഫീസിൽ ലേലം ചെയ്യും. ഫോൺ: 0480 2825259.

കോവിഡ് 19 ന്റെ പശ്ചാത്തലത്തിൽ തൃശൂർ താലൂക്ക് ലീഗൽ സർവീസസ് കമ്മിറ്റി മാർച്ച് 25 ന് തൃശൂർ ഗവ. ലോ കോളേജിൽ നടത്താനിരുന്ന അദാലത്ത് മാറ്റിയതായി സെക്രട്ടറി അറിയിച്ചു.
 

തൃശൂർ കോർപ്പറേഷൻ പരിധിയിൽ കുരിയച്ചിറ മുതൽ തലോർ വരെയുള്ള റോഡ് വീതി കൂട്ടുന്നതിന്റെ ഭാഗമായുള്ള സർവ്വേ തുടങ്ങി. റോഡ് വികസനവുമായി ബന്ധപ്പെട്ട് 21 മീറ്ററായാണ് റോഡ് വീതി കൂട്ടുന്നത്. കുരിയച്ചിറ മുതൽ തലോർ വരെ ഏതാണ്ട് 6 കിലോമീറ്റർ ദൂരമാണ് 21 മീറ്റർ വീതിയിൽ വികസിപ്പിക്കുക. ഇതിന്റ അടിസ്ഥാനത്തിൽ റോഡ് അളക്കുന്നതിനും, 21 മീറ്റർ ആയി റോഡിന്റെ അതിർത്തി നിർണയിക്കുന്നതിനുമായാണ് സർവ്വേ നടത്തുന്നത്. പാക്കേജ് സൗജന്യം, ഗവ നിശ്ചയിക്കുന്ന വില എന്നീ നടപടിക്രമങ്ങൾ സ്ഥലം അളന്നതിന് ശേഷം തീരുമാനിക്കുമെന്നും കോർപ്പറേഷൻ സെക്രട്ടറി അറിയിച്ചു.

കൊടുങ്ങല്ലൂർ നഗരസഭയിലെ വോട്ടർപട്ടിക പട്ടിക പുതുക്കുന്നതുമായി ബന്ധപ്പെട്ട ഹിയറിങ്ങ് താൽക്കാലികമായി നിർത്തിവെച്ചതായി അധികൃതർ അറിയിച്ചു. കോവിഡ് 19 പടർന്നു പിടിക്കുന്ന സാഹചര്യത്തിൽ സംസ്ഥാന തെരഞ്ഞെടുപ്പ് കമ്മീഷന്റെ ഉത്തരവിന്റെ അടിസ്ഥാനത്തിലാണ് ഹിയറിങ്ങ് മാറ്റിവെച്ചത്. എന്നാൽ വോട്ടർപട്ടികയിലേക്ക് ഓൺലൈനായി പേര് രജിസ്റ്റർ ചെയ്ത ശേഷം ഹിയറിങിൽ പങ്കെടുത്ത് രേഖകൾ സമർപ്പിക്കാൻ അവസരം ലഭിക്കാത്തവർക്ക് മാർച്ച് 20 വരെ നഗരസഭയിൽ നേരിട്ട് രേഖകൾ ഹാജരാക്കാം. അവസരം ലഭിക്കാത്തവർ, തങ്ങളുടെ പ്രായം, താമസസ്ഥലം തുടങ്ങിയ യോഗ്യത തെളിയിക്കുന്ന രേഖകളും ഫോട്ടോയുമാണ് ഹാജരാക്കേണ്ടത്.