മല്ലപ്പള്ളി സര്‍ക്കിള്‍ ഓഫീസ് പരിധിയില്‍ നടത്തിയ മിന്നല്‍ പരിശോധനയില്‍ കുന്നന്താനത്തുനിന്ന് മൂന്ന് ലക്ഷം രൂപാ വിലവരുന്ന പുകയില ഉത്പന്നങ്ങള്‍ പിടികൂടി. മാവേലിക്കല സ്വദേശി കെ.സുനില്‍ എന്ന ആളുടെ വാടക വീട്ടില്‍ നിന്നു നാലുചാക്കുകളിലായി പുകയില ഉത്പന്നങ്ങള്‍ പിടികൂടിയത്. രഹസ്യ വിവരത്തിന്റെ അടിസ്ഥാനത്തില്‍ നടന്ന പരിശോധനയില്‍ മല്ലപ്പള്ളി എക്സൈസ് സര്‍ക്കിള്‍ ഇന്‍സ്പെക്ടര്‍ വി. റോബര്‍ട്ടിന്റെ നേതൃത്വത്തിലാണ് പുകയില ഉത്പന്നങ്ങള്‍ പിടികൂടിയത്. ഓരോ ചാക്കിലും 50 എണ്ണമുള്ള പായ്ക്കറ്റുകളും അതിനുള്ളില്‍ 30 എണ്ണം വീതമുള്ള ചെറിയ പായ്ക്കറ്റുകളുമാണ് ഉണ്ടായിരുന്നത്. സുനിനെതിരെ കോട്പ നിയമപ്രകാരം കേസെടുത്തു.

കോവിഡ് 19 നിയന്ത്രണത്തിന്റെ ഭാഗമായി ശബരിമലയിലെത്തുന്ന തീര്‍ഥാടകരെ പമ്പയില്‍  ബോഡി ഇന്‍ഫ്രാറെഡ് തെര്‍മോമീറ്റര്‍ ഉപയോഗിച്ചു പരിശോധന നടത്തിവരുന്നു. പനിയുള്ളവരെ മലകയറാന്‍ അനുവദിക്കില്ല. പനി ലക്ഷണം സ്ഥിരീകരിക്കുന്നവരെ ആശുപത്രിയില്‍ പരിശോധനക്കയക്കുകയും ഡോക്ടര്‍മാരുടെ നിര്‍ദേശപ്രകാരം കോവിഡ് 19 ലക്ഷണമുണ്ടെങ്കില്‍ പത്തനംതിട്ട ജനറല്‍ ആശുപത്രിയിലേക്ക് മാറ്റി മറ്റു പരിശോധന നടത്തുകയും ആവശ്യമെങ്കില്‍ ഐസ്വലേഷന്‍ വാര്‍ഡിലേക്കും മാറ്റും.

കോവിഡ് 19 വൈറസ് പ്രതിരോധ ബോധവത്കരണ പ്രവര്‍ത്തനങ്ങള്‍ ജില്ലയിലെ വിവിധ ഭാഗങ്ങളില്‍ ജില്ലാ ലേബര്‍ ഓഫീസര്‍ ടി.സൗദാമിനിയുടെ നേതൃത്വത്തില്‍ നടത്തി.   പത്തനംതിട്ട നഗരം, പന്തളം കടക്കാട്, മുട്ടാര്‍, കുളനട, കിടങ്ങന്നൂര്‍, ആറന്മുള എന്നിവിടങ്ങളിലെ തൊഴിലാളി ക്യാമ്പുകള്‍, എന്‍.എസ്.ടി.സി കമ്പനി എന്നിവിടങ്ങളിലെ ലേബര്‍ ക്യാമ്പുകളിലെത്തി അന്യസംസ്ഥാന തൊഴിലാളികളെ സന്ദര്‍ശിച്ച് കോവിഡ് 19 ന് എതിരേ മുന്‍കരുതലുകളും ജാഗ്രതാ നിര്‍ദേശവും ലഘുലേഖ വിതരണവും നടത്തി. കെട്ടിട ഉടമകള്‍ക്കും, തൊഴിലുടമകള്‍ക്കും ആവശ്യമായ നിര്‍ദേശവും സംഘം നല്‍കി.

പത്തനംതിട്ട ജില്ലയില്‍ കോവിഡ് 19 സ്ഥിരീകരിച്ച് ഒരാഴ്ച്ച പിന്നിടുമ്പോള്‍ ജില്ലാ ഭരണകൂടത്തിന്റെയും ആരോഗ്യവകുപ്പിന്റെയും ഒപ്പം രാപ്പകല്‍ വ്യത്യാസമില്ലാതെ ജോലിചെയ്യുന്ന ചിലരുണ്ട്. 

വൈറസ് നിയന്ത്രണത്തിന്റെ ഭാഗമായി വീടുകളില്‍ നിരീക്ഷണത്തില്‍ കഴിയുന്നവര്‍ക്ക് സാന്ത്വനമായും കരുതലായും നിരന്തരം ഫോണിലൂടെ ബന്ധപ്പെടുന്നവര്‍. ഒറ്റപ്പെട്ടുപോകുമോ എന്ന ഭയത്തില്‍ കഴിഞ്ഞവര്‍ക്ക് കൂട്ടായി നില്‍ക്കുന്നവര്‍. ഹോം ഐസലേഷനില്‍ കഴിയുന്നവരുമായി ബന്ധപ്പെടുന്ന പത്തനംതിട്ട കളക്ടറേറ്റിലെ കോള്‍ സെന്ററിലെ ഉദ്യോഗസ്ഥരുടെ അനുഭവങ്ങള്‍ വ്യത്യസ്തമാണ്.  

തിരുവനന്തപുരം സാംസ്‌കാരിക വകുപ്പ് ഡയറക്ടറുടെ കാര്യാലയത്തിൽ രണ്ടു സീനിയർ ക്ലാർക്കുമാരുടെ ഒഴിവിൽ ഒരു വർഷത്തെ ഡെപ്യൂട്ടേഷനിൽ നിയമിക്കുന്നു. സംസ്ഥാന സർക്കാർ വകുപ്പുകളിൽ ക്ലാർക്ക്, സീനിയർ ക്ലാർക്ക് തസ്തികയിൽ ജോലി ചെയ്യുന്ന ഉദ്യോഗസ്ഥർക്ക് മേലധികാരി മുഖേന നിശ്ചിത പ്രൊഫോർമയിൽ അപേക്ഷിക്കാം. അപേക്ഷകർ പി.എസ്.സി മുഖേന നിയമനം നേടിയവരും 25200-54000 ശമ്പള സ്‌കെയിലിലോ അതിനു താഴെയുള്ള സ്‌കെയിലിലോ ജോലി ചെയ്യുന്നവരുമാകണം. അപേക്ഷ 31നകം സാംസ്‌കാരിക വകുപ്പു ഡയറക്ടർ, സാംസ്‌കാരിക വകുപ്പധ്യക്ഷ കാര്യാലയം, അനന്തവിലാസം കൊട്ടാരം, ഫോർട്ട്.പി.ഒ, തിരുവനന്തപുരം എന്ന വിലാസത്തിൽ ലഭിക്കണം.
പി.എൻ.എക്സ്.1057/2020

കുടുംബശ്രീ ജില്ലാ മിഷനുകളിലെ അസി. ജില്ലാ മിഷൻ കോ-ഓർഡിനേറ്റർ തസ്തികയിൽ ഡെപ്യൂട്ടേഷൻ നിയമനത്തിന് കേന്ദ്ര-സംസ്ഥാന സർക്കാർ/ അർദ്ധ സർക്കാർ ജീവനക്കാരിൽ നിന്ന് അപേക്ഷ ക്ഷണിച്ചു. ജീവനക്കാർ ചട്ടപ്രകാരം അവരുടെ മാതൃവകുപ്പിൽ നിന്നുള്ള എൻ.ഒ.സി സഹിതം അപേക്ഷിക്കണം.

അടൽ മിഷൻ ഫോർ റജ്യൂവനേഷൻ ആൻഡ് അർബൻ ട്രാൻസ്‌ഫോർമേഷൻ (അമൃത്) പദ്ധതിയിൽ പരിസ്ഥിതി വിദഗ്ധനെ (എൻവയോൺമെന്റൽ എക്‌സ്‌പെർട്ട്) കരാർ അടിസ്ഥാനത്തിൽ നിയമിക്കുന്നു. വിശദ വിവരങ്ങൾക്ക് smmukerala.org.    
പി.എൻ.എക്സ്.1055/2020

കോവിഡ് 19 പ്രതിരോധ പ്രവർത്തനങ്ങളുടെ ഭാഗമാകാൻ ആരോഗ്യപ്രവർത്തകർക്ക് അവസരം. സംസ്ഥാനത്തെ കൊവിഡ് 19 വ്യാപനം തടയാൻ പിഴവറ്റ രീതിയിലുള്ള പ്രതിരോധ പ്രവർത്തനങ്ങളാണ് നടക്കുന്നത്. കൊറോണ പ്രതിരോധ പ്രവർത്തനങ്ങൾ ശക്തിപ്പെടുത്തുന്നതിനായി ആരോഗ്യ പ്രവർത്തകരുടെ പങ്കാളിത്തം അഭ്യർത്ഥിക്കുന്നതായി ആരോഗ്യ മന്ത്രി കെ.കെ. ശൈലജ ടീച്ചർ പറഞ്ഞു.

കൊറോണയുടെ  സാഹചര്യത്തിൽ  വിനോദ സഞ്ചാര മേഖലകളിൽ  നിയന്ത്രണമേർപ്പെടുത്തി  ഇടുക്കി ജില്ലാ ഭരണകൂടം. കൂടുതൽ മേഖലകളിലേക്ക് വൈറസ് പടരാനുള്ള സാഹചര്യം ഒഴിവാക്കുന്നതിനുള്ള നടപടികളെപ്പറ്റി ആലോചിക്കുന്നതിനായി മൂന്നാറിനു പിന്നാലെ തൊട്ടടുത്ത ആനച്ചാലിലും  ജില്ലാ ഭരണകൂടം അടിയന്തര യോഗം ചേർന്നു. ഏറ്റവും കൂടുതൽ വിദേശീയർ തങ്ങുന്ന സ്ഥലങ്ങളിലൊന്നാണ് ആനച്ചാൽ.

 

മുന്നാറിൽ താമസിച്ച ബ്രിട്ടീഷ് പൗരന് കൊറോണ സ്ഥിരീകരിച്ച സാഹചര്യത്തിൽ പ്രദേശത്ത് മുൻ കരുതൽ നടപടികൾ ശക്തമാക്കാൻ തീരുമാനം.

മൂന്നാർ പഞ്ചായത്ത് ഹാളിൽ മന്ത്രി എം എം മണിയുടെ നേതൃത്വത്തിൽ  എസ് രാജേന്ദ്രൻ എം എൽ എ യുടെ അധ്യക്ഷതയിൽ ചേർന്ന സർവകക്ഷി യോഗത്തിൽ ഇനി സ്വീകരിക്കേണ്ട നടപടികൾ ചർച്ച ചെയ്തു.