കോവിഡ് 19 വൈറസുമായി ബന്ധപ്പെട്ട് കടങ്ങോട് ഗ്രാമപഞ്ചായത്തിന്റെ നേതൃത്യത്തിൽ നിലവിലുള്ള അവസ്ഥ വിലയിരുത്തുന്നതിനും തുടർന്നുള്ള പ്രവർത്തനങ്ങൾ ഏകോപിപ്പിക്കുന്നതിനും ചർച്ച ചെയ്യുന്നതിനും വേണ്ടി അടിയന്തര യോഗം ചേർന്നു. പഞ്ചായത്ത് പ്രദേശത്ത് ഇതുവരെ വിവിധ വിദേശ രാജ്യങ്ങളിൽ നിന്നായി എത്തിയ 121 പേർ വീടുകളിൽ ആരോഗ്യ വകുപ്പിന്റെ നിർദ്ദേശമനുസരിച്ച് കഴിയുന്നുണ്ട്. ഇതുമായി ബന്ധപ്പെട്ട് ഇതര സംസ്ഥാന തൊഴിലാളികൾ, തൊഴിലുറപ്പ് തൊഴിലാളികൾ ഉൾപ്പെടെയുള്ള മേഖലകളിലേക്കും കൂടുതൽ ജാഗ്രതാ നിർദ്ദേശങ്ങൾ നൽകുന്നതിനും യോഗം തീരുമാനിച്ചു.

കടപ്പുറം അഞ്ചങ്ങാടിയിൽ കോവിഡ് 19 രോഗ പ്രതിരോധ പ്രവർത്തനങ്ങളുടെ ഭാഗമായി തീവ്ര ബോധവൽക്കരണം ആരംഭിച്ചു. എല്ലാ വീടുകളിലും ലഘുലേഖകളുമായി ആരോഗ്യ വകുപ്പ് പ്രവർത്തകർ ഉൾപ്പെടെയുള്ളവർ നേരിട്ടെത്തി ബോധവൽക്കരണം നൽകും. വിദേശത്ത് നിന്നെത്തുന്നവർക്ക് പ്രത്യേക നിർദ്ദേശങ്ങൾ നൽകും. ഒറ്റ ദിവസം കൊണ്ട് വാർഡിലെ മുഴുവൻ വീടുകളിലും ബോധവൽക്കരണ ലഘുലേഖകൾ പഞ്ചായത്ത് അംഗങ്ങൾ നൽകി.

കുന്നംകുളം നഗരസഭ പ്രദേശത്ത് കോവിഡ് 19 പ്രതിരോധ പ്രവർത്തനങ്ങളുടെ ഭാഗമായി പൊതുജനാരോഗ്യ പ്രവർത്തനങ്ങൾ ശക്തിപ്പെടുത്തുന്നതുമായി ബന്ധപ്പെട്ട് നഗരസഭ കോൺഫറൻസ് ഹാളിൽ അടിയന്തിര യോഗം ചേർന്നു. നഗരസഭ ചെയർപേഴ്സൺ സീത രവീന്ദ്രൻ അധ്യക്ഷത വഹിച്ചു.

കോവിഡ് 19 രോഗ പകർച്ച തടയുന്നതിന് അടിയന്തര നടപടികൾ സ്വീകരിക്കുന്നതിനായി വലപ്പാട് ഗ്രാമപഞ്ചായത്ത് തല യോഗം ചേർന്നു. ഗ്രാമപഞ്ചായത്ത് പ്രസിഡന്റ് ഇ.കെ.തോമസ് മാസ്റ്റർ ഉദ്ഘാടനം ചെയ്തു. ആരോഗ്യ സ്റ്റാൻഡിങ് ചെയർമാൻ കെ.എം.അബ്ദുൽ മജീദ് അധ്യക്ഷത വഹിച്ചു. വലപ്പാട് സാമൂഹികാരോഗ്യകേന്ദ്രം സൂപ്രണ്ട് ഡോ.ഫാത്തിമ സുഹറ പ്രവർത്തനങ്ങൾ വിശദീകരിച്ചു. സർക്കാരിന്റെ കോവിഡ്- 19 പ്രതിരോധ പ്രവർത്തനങ്ങൾക്ക് കൈതാങ്ങായി കരിമ്പ്രത്ത് ന്യൂവിജയ ക്ലബ് ആയിരം മാസ്‌ക് പഞ്ചായത്തിനും ആരോഗ്യ പ്രവർത്തകർക്കും നൽകി.

കോവിഡ് 19 പ്രതിരോധത്തിന്റെ ഭാഗമായി ഗുരുവായൂർ നഗരസഭയിൽ വിവാഹ രജിസ്ട്രേഷന് എത്തുന്നവർക്ക് സാനിറ്റൈസർ ഉപയോഗിച്ച് അണുവിമുക്തമാക്കാൽ നഗരസഭ ജീവനക്കാർ സൗകര്യമൊരുക്കി. ജനങ്ങളുടെ ആരോഗ്യ പരിപാലനം ഉറപ്പ് വരുത്തുന്നതിന് നഗരസഭ തന്നെ മുന്നിട്ടിറങ്ങുന്നത് കോവിഡ് 19 ബാധയുടെ കാര്യഗൗരവം കണക്കിലെടുത്താണ്. ലോഡ്ജുകളിൽ താമസിക്കുന്നവരുടെ സുരക്ഷയ്ക്കായി അവർക്ക് നൽകുന്ന കുടിവെള്ളം, ഭക്ഷണം എന്നിവ അണുവിമുക്തമാക്കിയതാണോ എന്ന് പരിശോധിക്കും.

തൃശൂർ കോർപ്പറേഷൻ 27-ാം ഡിവിഷനിലെ കുട്ടനെല്ലൂർ ഭഗവതി ക്ഷേത്രത്തിൽ നടന്ന പൂരത്തിൽ പങ്കെടുത്ത ഒരു വിദേശ പൗരന് കോവിഡ് 19 സ്ഥിരീകരിച്ച സാഹചര്യത്തിൽ ഈ പൗരനുമായി സെൽഫി എടുക്കുകയും, ഡാൻസ് ചെയ്യുകയും, ഹസ്ത ദാനം ഉൾപ്പെടെ ഏതെങ്കിലും തരത്തിൽ സമ്പർക്കത്തിൽ ഏർപ്പെട്ടവർ ഉണ്ടെങ്കിൽ അടിയന്തിരമായി ആരോഗ്യ വിഭാഗത്തിലോ, ദിശയുമായോ (0487 2320466) ബന്ധപ്പെടണമെന്ന് കോർപ്പറേഷൻ മേയർ അജിത ജയരാജൻ അറിയിച്ചു.

കോവിഡ് 19 രോഗബാധയുമായി ബന്ധപ്പെട്ട് വീടുകളിൽ 2425 ഉം ആശുപത്രികളിൽ 45 ഉം ആയി ആകെ 2470 പേരാണ് ഇപ്പോൾ തൃശൂർ ജില്ലയിൽ ആരോഗ്യവകുപ്പിന്റെ നിരീക്ഷണത്തിലുളളത്. തിങ്കളാഴ്ച (മാർച്ച് 16) 12 പേരെ ആശുപത്രികളിൽ നിന്നും ഡിസ്ചാർജ്ജ് ചെയ്തു. 5 പേരുടെ സാമ്പിളുകളാണ് പരിശോധനയ്ക്കായി തിങ്കളാഴ്ച (മാർച്ച് 16) വൈറോളജി ഇൻസ്റ്റിറ്റ്യൂട്ടിലേക്ക് അയച്ചത്. ഇതു വരെ 306 പേരുടെ സാമ്പിളുകൾ അയച്ചിട്ടുണ്ട്.

ജില്ലയില്‍ പക്ഷിപ്പനിയെ തുടര്‍ന്ന് കൊന്നൊടുക്കിയ പക്ഷികളുടെ ഉടമകള്‍ക്ക് മാര്‍ച്ച് 31 നകം നഷ്ടപരിഹാരം ബാങ്ക് അക്കൗണ്ടിലേക്ക് നല്‍കുമെന്ന് മൃഗസംരക്ഷണ വകുപ്പ് മന്ത്രി കെ.രാജു. പക്ഷിപ്പനി നിവാരണ പ്രവര്‍ത്തനങ്ങളുമായി ബന്ധപ്പെട്ട് കലക്ട്രേറ്റ് കോണ്‍ഫറന്‍സ് ഹാളില്‍ ചേര്‍ന്ന അവലോകന യോഗത്തില്‍ സംസാരിക്കുകയായിരുന്നു അദ്ദേഹം. രണ്ട് മാസത്തില്‍ താഴെ പ്രായമുള്ള കോഴിക്ക് ഒന്നിന് 100 രൂപയും ഇതിന് മുകളില്‍ പ്രായമുള്ള കോഴിക്ക് ഒന്നിന് 200 രൂപയും കോഴിമുട്ട ഒന്നിന് അഞ്ച് രൂപ ഇനത്തിലും നഷ്ടപരിഹാരം നല്‍കും.