കൊടുവള്ളി പോലീസ് സ്റ്റേഷന്‍-ഉളിയാടന്‍കുന്ന്-ബസ്സ്റ്റാന്റ്‌റോഡിന്റെ ഉദ്ഘാടനം കാരാട്ട് റസാഖ് എംഎല്‍എ നിര്‍വഹിച്ചു. എംഎല്‍എയുടെ ആസ്തി വികസന ഫണ്ടില്‍ ഉള്‍പ്പെടുത്തി 15 ലക്ഷം രൂപ ചെലവഴിച്ചാണ് റോഡ് നിര്‍മിച്ചത്. നഗരസഭ ഡിവിഷന്‍ കൗണ്‍സിലര്‍ ഇ.സി. മുഹമ്മദ് അധ്യക്ഷത വഹിച്ചു. കൗണ്‍സിലര്‍മാരായ കാരാട്ട് ഫൈസല്‍, ഒ.പി. റസാഖ്, യു.കെ. അബൂബക്കര്‍, വഖഫ് ബോര്‍ഡ് മെമ്പര്‍ റസിയ ഇബ്രാഹിം, ഒപിഐ കോയ, ഒ.പി.റഷീദ്, എ.പി. സിദ്ധീഖ്, കെ.ശറഫുദ്ധീന്‍, പി.കെ.മുഹമ്മദ്, ചോലക്കര റസാഖ് എന്നിവര്‍ പങ്കെടുത്തു. യു. കെ.കാദര്‍ സ്വാഗതവും യു.കെ. പ്രസാദ് നന്ദിയും പറഞ്ഞു.

അടച്ചിട്ട മുറിയിൽ ഒറ്റക്കിരിക്കുമ്പോൾ ഒരാൾ  അനുഭവിക്കുന്ന ഒറ്റപ്പെടൽ  ഭയാനകമാണ്. മറ്റൊന്നും ചെയ്യാനില്ലാതെ ഭ്രാന്തിലേക്ക് വരെ വഴുതിവീഴാൻ സാധ്യതയുള്ള സാഹചര്യം. നടുവണ്ണൂർ ഗ്രാമപഞ്ചായത്തിൽ കോവിഡ് നിരീക്ഷണത്തിൽ കഴിയുന്ന പ്രവാസിയുടെ വാക്കുകളാണിവ. കോവിഡ് കാലത്ത് ഇങ്ങനെ ദുരവസ്ഥയിൽ കഴിയുന്നവർക്ക് വാട്സ്ആപ്പ് ഗ്രൂപ്പ് വഴി  ആശ്വാസം പകരുകയാണ് നടുവണ്ണൂർ ഗ്രാമപഞ്ചായത്ത്. നടുവണ്ണൂർ പഞ്ചായത്തിന്റെ ഈ മാതൃകാപരമായ ഇടപെടൽമറ്റ് പഞ്ചായത്തുകളിലേക്കും വ്യാപിപ്പിക്കുന്നതിന് സംവിധാനമൊരുക്കുമെന്ന് കലക്ടർ എസ്. സാംബശിവ റാവു പറഞ്ഞു.

ഇന്ന് പുതുതായി വന്ന 1,409 പേർ ഉൾപ്പെടെ ജില്ലയിൽ 18,029 പേർ നിരീക്ഷണത്തിലുണ്ട്.  ജില്ലയിൽ ഇതുവരെ 53,653 പേർ നിരീക്ഷണം പൂർത്തിയാക്കി.  ഇന്ന് പുതുതായി വന്നവരിൽ 51 പേർ ഉൾപ്പെടെ 264 പേരാണ് ആശുപത്രികളിൽ നിരീക്ഷണത്തിലുള്ളത്. ഇതിൽ 175 പേർ മെഡിക്കൽ കോളേജിലും 89 പേർ കോവിഡ് ഫസ്റ്റ് ലൈന് ട്രീറ്റ്മെന്റ് സെന്ററായ കോഴിക്കോട്ടെ ലക്ഷദ്വീപ് ഗസ്റ്റ്ഹൗസിലുമാണ്. 32 പേർ ഇന്ന് ഡിസ്ചാർജ്ജ് ആയി.

അഞ്ചു  പേർ രോഗമുക്തി നേടി

കോഴിക്കോട് - ജില്ലയിൽ ഇന്ന് (ജൂലൈ 05) 20 കോവിഡ് പോസിറ്റീവ്  കൂടി റിപ്പോർട്ട് ചെയ്തതായി  ജില്ലാ  മെഡിക്കൽ ഓഫീസർ ഡോ. ജയശ്രീ  വി. അറിയിച്ചു.

പോസിറ്റീവായവർ:

1. കട്ടിപ്പാറ സ്വദേശി(34) ജൂൺ 30 ന് ഖത്തറിൽനിന്നും   വിമാനമാര്ഗ്ഗം കോഴിക്കോട് എയര്പ്പോര്ട്ടിലെത്തി. റാപ്പിഡ് ടെസ്റ്റ് പോസിറ്റീവ് ആയതിനെ തുടര്ന്ന് സ്രവ സാമ്പിള് പരിശോധനക്കെടുത്തു.  ഫലം പോസിറ്റീവ് ആയതിനെ തുടര്ന്ന്  ചികിത്സയിലാണ്.

 കോഴിക്കോട് ജില്ലയിൽ ഇന്നും നാളെയും (ജൂലൈ 6, 7 ) കേന്ദ്ര കാലാവസ്ഥ വകുപ്പ് മഞ്ഞ അലേർട്ട് പ്രഖ്യാപിച്ചു.  ഒറ്റപ്പെട്ടയിടങ്ങളിൽ  64.5 മി.മീ. മുതൽ 115.5 മി.മീ. വരെ ലഭിക്കുന്ന ശക്തമായ മഴയാണ് പ്രവചിക്കപ്പെട്ടിരിക്കുന്നത്.

 പൊതുജനങ്ങളും ബന്ധപ്പെട്ട ഉദ്യോഗസ്ഥരും ശ്രദ്ധയോടെ സ്ഥിതിഗതികൾ വീക്ഷിക്കുക എന്നതാണ് മഞ്ഞ അലേർട്ട് കൊണ്ട് ഉദ്ദേശിക്കുന്നത്.

കട്ടിപ്പാറ ഗ്രാമപഞ്ചായത്തിലെ  11-ാം വാർഡ് കോളിക്കൽ - ഇല്ലക്കുന്ന് എസ്.സി. കോളനി റോഡ് ഗ്രാമപഞ്ചായത്ത് വൈസ് പ്രസിഡൻറ് നിധീഷ് കലുള്ളതോട് ഉദ്ഘാടനം ചെയ്തു.  13.8 ലക്ഷം രൂപ വിനിയോഗിച്ചാണ് റോഡ്  ഗതാഗത യോഗ്യമാക്കിയത്.  
വികസന കാര്യ സ്റ്റാൻ്റിങ്ങ് കമ്മറ്റി ചെയർപേഴ്സൺ മദാരി ജുബൈരിയ അധ്യക്ഷത വഹിച്ചു. വാർഡ് വികസന സമിതി കൺവീനർ ഐ.പി അബ്ദുൾ സലാം,വി പി സതീഷ് എന്നിവർ സംസാരിച്ചു.

എലത്തൂര്‍ നിയോജക മണ്ഡലത്തിലുള്‍പ്പെട്ട പഞ്ചായത്തുകളിലെയും കോര്‍പ്പറേഷന്‍ പരിധിയിലെയും വിവിധ റോഡുകളുടെ നവീകരണത്തിന് 82 ലക്ഷം രൂപയുടെ ഭരണാനുമതി ലഭിച്ചതായി ഗതാഗത മന്ത്രി എ.കെ.ശശീന്ദ്രൻ അറിയിച്ചു.  കഴിഞ്ഞ കാലവര്‍ഷത്തില്‍ ഗതാഗത യോഗ്യമല്ലാതായി തീര്‍ന്ന റോഡുകളുടെ അടിയന്തര പുനരുദ്ധാരണ പ്രവര്‍ത്തികള്‍ക്കാണ് വെള്ളപ്പൊക്ക ദുരിതാശ്വാസ നിധിയിലുള്‍പ്പെടുത്തി തുക അനുവദിച്ചത്. എത്രയും വേഗം ടെന്‍ഡര്‍ നടപടികള്‍ പൂര്‍ത്തീകരിച്ച് പ്രവര്‍ത്തി ആരംഭിക്കാന്‍ ബന്ധപ്പെട്ട ഉദ്യോഗസ്ഥര്‍ക്ക് അദ്ദേഹം നിര്‍ദ്ദേശം നല്‍കി.

കുന്ദമംഗലം നിയോജകമണ്ഡലത്തിലെ ഒളവണ്ണ, മാവൂര്‍, കുന്ദമംഗലം ഗ്രാമപഞ്ചായത്തുകളെ ജലജീവന്‍ പദ്ധതിയില്‍ ഉള്‍പ്പെടുത്തുന്നതിന് തീരുമാനമായതായി പി.ടി.എ റഹീം എം.എല്‍.എ അറിയിച്ചു.

എല്ലാവീടുകളിലും കുടിവെള്ള കണക്ഷൻ നൽകുന്ന  ജലജീവൻ പദ്ധതിയിൽ ബാലുശ്ശേരി മണ്ഡലത്തിലെ  2250 വീടുകളിൽ   ആദ്യ ഘട്ടത്തിൽ വെള്ളമെത്തും.  പദ്ധതി നടപ്പിലാക്കുന്നതിന്റെ ഭാഗമായി പുരുഷൻ കടലുണ്ടി എംഎൽഎ യുടെ അധ്യക്ഷതയിൽ ആലോചനായോഗം ചേർന്നു. കേന്ദ്ര-സംസ്ഥാന  ഫണ്ടുകൾ വിനിയോഗിച്ച്  തദ്ദേശസ്വയംഭരണ ഭരണ സ്ഥാപനങ്ങളുടെയും ഗുണഭോക്താക്കളുടെയും പങ്കാളിത്തത്തോടു കൂടിയാണ്  ജലജീവൻ മിഷൻ പദ്ധതി കേരള വാട്ടർ അതോറിറ്റി മുഖേന നടപ്പിലാക്കുന്നത്.