ജില്ലയിലെ പട്ടികവർഗ്ഗ അധ്യാപക കൂട്ടായ്മ  നിർദ്ധനരായ  സ്കൂൾ കുട്ടികൾക്ക് ഓൺലൈൻ പഠന സൗകര്യമൊരുക്കുന്നതിൻ്റെ ഭാഗമായി 2 ടീവി ജില്ലാ കളക്ടർ ഡോ. അദീല അബ്ദുള്ളയ്ക്ക്  കൈമാറി. അധ്യപകരായ ടി .അയ്യപ്പൻ , കെ.കെ അജയൻ , ടി .പി.പ്രജീഷ് എന്നിവരാണ് കൈമാറിയത്.

ബ്രഹ്മഗിരി ഡെവലപ്മെന്റ് സൊസൈറ്റിയുടെ പുതിയ പദ്ധതിയായ ബ്രഹ്മഗിരി വയനാട് കോഫിയുടെ വ്യാവസായിക ഉത്പാദക യൂണിറ്റും വെബ്സൈറ്റും ഇന്ന് (28.07.20) രാവിലെ 10 ന് ഉദ്ഘാടനം ചെയ്യും. കണിയാമ്പറ്റയിലുള്ള വ്യാവസായിക ഉത്പാദക യൂണിറ്റ് വ്യാവസായിക വകുപ്പ് മന്ത്രി ഇ.പി. ജയരാജനും വെബ്സൈറ്റ് ക്ഷീര വികസന വകുപ്പ് മന്ത്രി അഡ്വ. കെ. രാജുവും ഉദ്ഘാടനം ചെയ്യും. കോവിഡ് സുരക്ഷ മാനദണ്ഡങ്ങള്‍ പാലിച്ച് ഓണ്‍ലൈന്‍ വഴിയാണ് പരിപാടി സംഘടിപ്പിക്കുന്നത്.

കൃഷി വകുപ്പ് വയനാട് ജില്ലയില്‍ നടപ്പാക്കിവരുന്ന സബ്മിഷന്‍ ഓണ്‍ അഗ്രിക്കള്‍ച്ചര്‍ മെക്കനൈസേഷന്‍ എന്ന കാര്‍ഷിക യന്ത്രവത്ക്കരണ പദ്ധതിയുടെ ഭാഗമായ കൃഷി കല്യാണ്‍ അഭിയാന്‍ എന്ന പരിപാടി വഴി കര്‍ഷകരുടെ സംഘങ്ങള്‍ക്ക് വിവിധതരം കാര്‍ഷിക യന്ത്രങ്ങള്‍ വാങ്ങി ഫാം മെഷീനറി ബാങ്കുകള്‍ സ്ഥാപിക്കുന്നതിന് സാമ്പത്തിക സഹായം അനുവദിക്കും. കര്‍ഷകര്‍ www.agrimachinery.nic.in ല്‍  ഓണ്‍ലൈനായി രജിസ്റ്റര്‍ ചെയ്ത് അപേക്ഷ സമര്‍പ്പിക്കണം. വിശദവിവരങ്ങള്‍ക്ക് വയനാട് കൃഷി അസിസ്റ്റന്റ് എക്സിക്യൂട്ടീവ് എന്‍ജിനീയറുടെ ഓഫീസുമായി ബന്ധപ്പെടണം.  ഫോണ്‍: 0493 6202747, 9446307887.

കാരാപ്പുഴ ജലസേചന പദ്ധതിയിലെയും സ്വാഭാവിക നീരുറവകളിലെയും വെള്ളമുപയോഗിച്ച് കാപ്പിത്തോട്ടങ്ങളില്‍ സൂക്ഷ്മ ജലസേചനത്തിനുള്ള പദ്ധതികള്‍ നടപ്പിലാക്കുമെന്ന് സി കെ ശശീന്ദ്രന്‍ എംഎല്‍എ അറിയിച്ചു. ഇതിനുള്ള പൈലറ്റ് പ്രോജക്ട് നടപ്പിലാക്കുന്നതിനായി മുട്ടില്‍ പഞ്ചായത്ത് തിരഞ്ഞെടുത്തു. മുട്ടില്‍ പഞ്ചായത്ത് ഓഫീസില്‍ ചേര്‍ന്ന ഉദ്യോഗസ്ഥരുടെയും കര്‍ഷകരുടെയും യോഗത്തില്‍ ഇത് സംബന്ധിച്ച പദ്ധതി തയ്യാറാക്കി സമര്‍പ്പിക്കുന്നതിന് മൈനര്‍ ഇറിഗേഷന്‍ വകുപ്പിന് നിര്‍ദേശം നല്‍കി.

കല്‍പ്പറ്റ മണ്ഡലത്തിലെ മുഴുവന്‍ പൊതു വിദ്യാലയങ്ങള്‍ക്കും എം.എല്‍.എ ഫണ്ടില്‍ നിന്നും അനുവദിച്ച ടെലിവിഷനുകളുടെ വിതരണോദ്ഘാടനം പൊതുവിദ്യാഭ്യാസ വകുപ്പ്  മന്ത്രി പ്രൊഫ. സി. രവീന്ദ്രനാഥ് ഇന്ന് (28.07.20) ഓണ്‍ലൈനായി നിര്‍വഹിക്കും. കല്‍പ്പറ്റ എസ്.കെ. എം.ജെ ഹയര്‍ സെക്കണ്ടറി സ്‌കൂളില്‍ ഉച്ചക്ക് രണ്ടിന് നടക്കുന്ന ചടങ്ങില്‍ സി.കെ. ശശീന്ദ്രന്‍ എം.എല്‍.എ അധ്യക്ഷത വഹിക്കും. ചടങ്ങില്‍ കല്‍പ്പറ്റ മണ്ഡലത്തിലെ 279 പൊതുപഠന കേന്ദ്രങ്ങളിലും സന്ദര്‍ശനം നടത്തിയതിന്റെ റിപ്പോര്‍ട്ട് പ്രകാശനവും നടക്കും.

കോവിഡ് പ്രതിരോധത്തിന്റെ ഭാഗമായി ജില്ലയിലെ എല്ലാ ടാക്‌സി വാഹനങ്ങളും നിര്‍ബന്ധമായും ഡബിള്‍ ചേംബറാക്കണമെന്ന് ജില്ലാ കലക്ടര്‍ കര്‍ശന നിര്‍ദ്ദേശം നല്‍കി.

തവിഞ്ഞാല്‍ പഞ്ചായത്തിലെ വാളാട് സമ്പര്‍ക്ക വ്യാപനത്തിന് കാരണമായ മരണാനന്തര ചടങ്ങിലും വിവാഹ ചടങ്ങിലും പങ്കെടുത്ത എല്ലാവരും നിര്‍ബന്ധമായും ബന്ധപ്പെട്ട പ്രാഥമികാരോഗ്യ കേന്ദങ്ങളില്‍ റിപ്പോര്‍ട്ട് ചെയ്യണമെന്ന് ജില്ലാ കലക്ടര്‍ ഡോ. അദീല അബ്ദുള്ള അറിയിച്ചു. രണ്ട് ചടങ്ങുകളിലും പങ്കെടുത്ത എല്ലാവരെയും അടിയന്തര പരിശോധനയ്ക്ക് വിധേയമാക്കേണ്ടതുണ്ടെന്നും ആരും റിപ്പോര്‍ട്ട് ചെയ്യാതിരിക്കരുതെന്നും കലക്ടര്‍ അഭ്യര്‍ഥിച്ചു.

തവിഞ്ഞാല്‍ പഞ്ചായത്തിലെ എല്ലാ വാര്‍ഡുകളും കണ്ടെയ്ന്‍മെന്റ് സോണായി ജില്ലാ കലക്ടര്‍ പ്രഖ്യാപിച്ചു.

അമ്പലവയൽ ഗ്രാമപഞ്ചായത്തിലെ 5, 6, 7, 13 വാര്‍ഡുകള്‍ കണ്ടെയ്ന്‍മെന്റ് സോണുകളായി ജില്ലാ കലക്ടര്‍ പ്രഖ്യാപിച്ചു.

കേപ്പിന്റെ  കീഴില്‍ ചീമേനിയില്‍ പ്രവര്‍ത്തിക്കുന്ന തൃക്കരിപ്പൂര്‍ കോളേജ് ഓഫ് എഞ്ചിനീയറിങില്‍ ബി.ടെക് എന്‍.ആര്‍.ഐ  ഇലക്ട്രിക്കല്‍ ആന്‍ഡ് ഇലക്ട്രോണിക്‌സ്, ഇലക്ട്രോണിക്‌സ് ആന്‍ഡ് കമ്മ്യൂണിക്കേഷന്‍ എഞ്ചിനീയറിങ്് ബ്രാഞ്ചുകളില്‍   ഒഴിവുള്ള  സീറ്റുകളിലേക്ക്  രണ്ടാം ഘട്ട  അലോട്ട്‌മെന്റ് ആഗസ്റ്റ് മൂന്നിന് നടക്കും. താല്പര്യമുള്ളവര്‍.ആഗസ്റ്റ് രണ്ടിനകം www.cetkr.ac.in ലൂടെ ഓണ്‍ലൈനായി അപേക്ഷിക്കണം. കൂടുതല്‍ വിവരങ്ങള്‍ക്ക് 0467 2250377, 9400808443, 9847690280