കോവിഡ് 19 പ്രതിരോധത്തിന്റെ ഭാഗമായി ജില്ലയിലെ തെരുവുകളിൽ കഴിഞ്ഞിരുന്നവരെ മാറ്റിപ്പാർപ്പിക്കുന്നതിനുള്ള ഉദയം പദ്ധതിയിൽ ഉൾപ്പെട്ടവർക്ക് തൊഴിൽ സംരക്ഷണം ഉറപ്പുവരുത്തി ജില്ലാ ഭരണകൂടം.  

സാമൂഹികമായും മാനസികമായും തൊഴിൽപരമായും  മെച്ചപ്പെട്ട ജീവിതം നേടിയെടുക്കാൻ ഇവർക്ക് സാഹചര്യം ഒരുക്കുക എന്ന ലക്ഷ്യത്തോടെ  ആരംഭിച്ച 'ഉദയം പദ്ധതി' പ്രകാരം ജില്ലാ ഭരണകൂടം നിരവധി പേരെ വിവിധ ക്യാമ്പുകളിലേക്ക് മാറ്റി പാർപ്പിച്ചിരുന്നു.

കോവിഡ് 19 പ്രതിരോധത്തിനായി മുന്നിട്ടിറങ്ങി പേരാമ്പ്ര ഗ്രാമപഞ്ചായത്ത്.   കോവിഡ് ചികിത്സക്കായുള്ള ഫസ്റ്റ് ലൈൻ ട്രീറ്റ്‌മെന്റ് സെന്ററുകളുടെ(എഫ് എൽ ടി സി) സജ്ജീകരണം പഞ്ചായത്തിൽ പുരോഗമിക്കുകയാണ്.

കുന്ദമംഗലം നിയോജകമണ്ഡലത്തിലെ രണ്ടാമത്തെ കോവിഡ് ഫസ്റ്റ് ലൈന്‍ ട്രീറ്റ്മെന്‍റ്   സെന്‍റര്‍ എന്‍.ഐ.ടി മെഗാ ബോയ്സ് ഹോസ്റ്റലില്‍ പി.ടി.എ റഹീം എം.എല്‍.എ ഉദ്ഘാടനം ചെയ്തു. ഏഴ് നിലകളുള്ള ഈ ഹോസ്റ്റലില്‍ ഒരു നിലയില്‍ 56 ഡബിള്‍ റൂമുകളാണുള്ളത്. ഒരു മുറിയില്‍ രണ്ട് പേര്‍ക്ക് വീതം  ചികിത്സാ സൗകര്യവുമൊരുക്കിയിരിക്കുന്നു. ആകെ 560 പേരെ കിടത്തി ചികിത്സിക്കുന്നതിനുള്ള സംവിധാനമാണ് അഞ്ച് നിലകളിലായി ഒരുക്കിയിട്ടുള്ളത്. രണ്ട് നിലകള്‍ ഡോക്ടര്‍മാര്‍ ഉള്‍പ്പെടെയുള്ള ജീവനക്കാർക്കും  വളണ്ടിയര്‍മാര്‍ക്കും  ഉപയോഗിക്കാനായി സജ്ജമാക്കിയിരിക്കുന്നു.

ജില്ലാ വിദ്യാഭ്യാസ മിഷന്റെ നേതൃത്വത്തില്‍ ഒന്നു മുതല്‍ 12 വരെ ക്ലാസ്സുകളിലെ വിദ്യാര്‍ഥികള്‍ക്കായി ഇ-കണ്ടന്റ് പോര്‍ട്ടല്‍ വികസിപ്പിക്കുന്നു.   പൂര്‍ണ്ണമായും അതത് ക്ലാസ്സുകളിലെ ബന്ധപ്പെട്ട വിഷയ അധ്യാപകര്‍ വികസിപ്പിച്ച ഉള്ളടക്കങ്ങളാണ് എഡ്യൂ മിഷന്‍ പോര്‍ട്ടല്‍ വഴി ലഭ്യമാക്കുക. ആഗസ്റ്റ് ആദ്യവാരത്തോടെ ഒന്നാം ടേമിലെ പാഠ ഭാഗങ്ങളുമായി ബന്ധപ്പെട്ട ഡിജിറ്റല്‍ ഉള്ളടക്കങ്ങൾ അധ്യാപകര്‍ക്കും കുട്ടികള്‍ക്കും ഉപയോഗിക്കാവുന്ന രീതിയില്‍ ലഭ്യമാക്കും.

കോവിഡ്  വ്യാപനത്തിന്റെ പശ്ചാത്തലത്തില്‍ പല വിധത്തിലുള്ള മാനസിക സംഘര്‍ഷങ്ങള്‍ അനുഭവിക്കുന്ന വിദ്യാര്‍ഥികള്‍ക്ക് ആശ്വാസമേകുന്നതിനായി എസ്.പി.സി പദ്ധതിയുടെ നേതൃത്വത്തില്‍ 'ചിരി ' എന്ന പേരില്‍  ഓണ്‍ലൈന്‍ കൗണ്‍സലിംഗ് സംസ്ഥാന വ്യാപകമായി പ്രവര്‍ത്തനമാരംഭിച്ചു.

തുമ്പമണ്‍ സി.എച്ച്.സിയുടെ ചുമതലയില്‍ രൂപീകരിക്കുന്ന സി.എഫ്.എല്‍ .ടി .സി യിലേക്ക് താത്കാലിക അടിസ്ഥാനത്തില്‍   സ്റ്റാഫ് നഴ്സുമാര്‍ക്കായി ഈ മാസം 29 ന് രാവിലെ 11ന് വാക്ക്-ഇന്‍-ഇന്റര്‍വ്യു നടത്തും.  സര്‍ക്കാര്‍ അംഗീകൃത കോളജില്‍ ജിഎന്‍എം/ബി.എസ്.സി നഴ്സിംഗ് ഡിഗ്രിയും കേരള നഴ്സിംഗ് കൗണ്‍സില്‍ രജിസ്ട്രേഷനും ഉള്ളവര്‍ക്ക് പങ്കെടുക്കാം.

       തുമ്പമണ്‍ ഗ്രാമപഞ്ചായത്തില്‍ കോവിഡ് ഫസ്റ്റ്ലൈന്‍ ട്രീറ്റ്‌മെന്റ് സെന്റര്‍ ജൂലൈ 30ന് ആരംഭിക്കുന്നതിന് പ്രസിഡന്റ് സഖറിയാ വര്‍ഗീസിന്റെ അധ്യക്ഷതയില്‍ ചേര്‍ന്ന മാനേജിംഗ് കമ്മിറ്റി തീരുമാനിച്ചു. ചിറ്റയം ഗോപകുമാര്‍ എംഎല്‍എ യോഗം ഉദ്ഘാടനം ചെയ്തു.
ആദ്യം മുട്ടം മാര്‍ത്തോമ്മപാരിഷ് ഹാളില്‍ 50 കിടക്കകള്‍ സജ്ജമാക്കും. അടിസ്ഥാന സൗകര്യങ്ങള്‍ രണ്ടു ദിവസംകൊണ്ട് ഒരുക്കിയെടുക്കുന്നതിനും തീരുമാനിച്ചു. തുടര്‍ന്ന് യാക്കോബായ സഭയുടെ പാരീഷ് ഹാളില്‍ 50 കിടക്കകള്‍ കൂടി സജ്ജീകരിച്ച് ആവശ്യമായ എല്ലാ മുന്‍കരുതലും എടുക്കുമെന്ന് ചിറ്റയം ഗോപകുമാര്‍ എംഎല്‍എ പറഞ്ഞു.

ജനങ്ങള്‍ വീടുകളില്‍ തന്നെ തുടരേണ്ടതാണ്. അത്യാവശ്യ കാര്യങ്ങള്‍ക്ക് മാത്രമേ വീടുകളില്‍ നിന്ന് പുറത്തു പോകാന്‍ അനുവദിക്കുകയുള്ളു. മെഡിക്കല്‍ അത്യാഹിതങ്ങള്‍ക്കും ആവശ്യവസ്തുക്കളുടെ സേവനത്തിനും വിതരണത്തിനുമല്ലാതെ കണ്ടെയ്ന്‍മെന്റ് സോണില്‍ നിന്നു പുറത്തേക്കു പോകാനോ അകത്തേക്ക് പ്രവേശി ക്കാനോ അനുവദിക്കുന്നതല്ല. കണ്ടെയ്ന്‍മെന്റ് സോണുകളില്‍ ഏഴു ദിവസത്തേക്ക് പൊതുഗതാഗത സേവനങ്ങള്‍ അനുവദിക്കില്ല.

കോന്നി ഗവ.മെഡിക്കല്‍ കോളജ് യാഥാര്‍ഥ്യമാക്കാന്‍ എല്ലാവരുടെയും പിന്തുണ അഭ്യര്‍ഥിക്കുന്നതായി അഡ്വ.കെ.യു.ജനീഷ് കുമാര്‍ എംഎല്‍എ പറഞ്ഞു. മെഡിക്കല്‍ കോളജ് പ്രവര്‍ത്തിപഥത്തിലെത്തിക്കാന്‍ നമുക്ക് ഇനിയും നിരവധി പ്രവര്‍ത്തനങ്ങള്‍ പൂര്‍ത്തീകരിക്കേണ്ടതായുണ്ട്.  ഒരു ജന പ്രതിനിധിയായി തെരഞ്ഞെടുക്കപ്പെട്ടതു മുതല്‍ മെഡിക്കല്‍ കോളജ് യാഥാര്‍ഥ്യമാക്കുന്നതിനായി വിശ്രമമില്ലാതെ പ്രവര്‍ത്തനങ്ങള്‍ നടത്തിയിട്ടുണ്ട്. ജനപ്രതിനിധി എന്ന നിലയില്‍ അത് എന്റെ കടമയും, എന്നില്‍ നിക്ഷിപ്തമായ ബാധ്യതയുമാണ്.

വടശേരിക്കര ഗ്രാമപഞ്ചായത്തിലെ വാര്‍ഡ് ഒന്ന്, കുന്നന്താനം ഗ്രാമപഞ്ചായത്തിലെ വാര്‍ഡ് അഞ്ച്, എട്ട്, അരുവാപ്പുലം ഗ്രാമപഞ്ചായത്തിലെ വാര്‍ഡ് നാല്, 12, നിരണം ഗ്രാമപഞ്ചായത്തിലെ വാര്‍ഡ് 13, പള്ളിക്കല്‍ ഗ്രാമപഞ്ചായത്തിലെ വാര്‍ഡ് മൂന്ന് എന്നീ സ്ഥലങ്ങളില്‍ ഏര്‍പ്പെടുത്തിയിരുന്ന കണ്ടെയ്ന്‍മെന്റ് സോണ്‍ നിയന്ത്രണം ജൂലൈ 25 മുതല്‍ ഒഴിവാക്കി ഉത്തരവായി.