ജില്ലയിൽ കനത്ത മഴ തുടരുന്ന സാഹചര്യത്തിൽ മലമ്പുഴ നിയോജക മണ്ഡലത്തിലെ മരുതറോഡ്,  പുതുപ്പരിയാരം, അകത്തേത്തറ, മലമ്പുഴ ഗ്രാമപഞ്ചായത്തുകളിൽ അടിയന്തര സാഹചര്യമുണ്ടായാൽ  ജനങ്ങളെ മാറ്റി  പാർപ്പിക്കുന്നതിനുള്ള  ക്യാമ്പുകൾ ആരംഭിക്കുന്നതിന്  വിവിധ  സ്ഥാപനങ്ങൾ ക്രമീകരിച്ചതായി  ഭരണപരിഷ്കാര കമ്മീഷൻ ചെയർമാനും എം.എൽ. എയുമായ  വി.എസ് അച്യുതാനന്ദന്റെ   ഓഫീസിൽ നിന്നും അറിയിച്ചു. മഴക്കാല കെടുതികൾ  വിലയിരുത്തുന്നതിനും  മുൻകരുതലുകൾ സ്വീകരിക്കുന്നതിനും  മരുതറോഡ്,  മലമ്പുഴ ഗ്രാമപഞ്ചായത്തുകളിൽ ഇന്ന് (ഓഗസ്റ്റ് 8) ഗ്രാമപഞ്ചായത്ത് അധ്യക്ഷ മാരുടെ നേതൃത്വത്തിൽ ദുരന്തനിവാരണ സമിതി യോഗം ചേരും.

മഴ കനക്കുന്ന  സാഹചര്യത്തിൽ പട്ടാമ്പി താലൂക്ക് പരിധിയിൽ ഉള്ളവർക്ക് അടിയന്തര സഹായങ്ങൾക്കായി താലൂക്കിൽ സജ്ജമാക്കിയിരിക്കുന്ന കൺട്രോൾ റൂം നമ്പറായ 0466 2214300ൽ ബന്ധപ്പെടാം.
നിലവിൽ പട്ടാമ്പി മണ്ഡലത്തിൽ 4 നാല് വീടുകൾ പൂർണമായും 51 വീടുകൾ ഭാഗികമായും തകർന്നതായി എം.എൽ.എ അറിയിച്ചു. കടകളിലേക്ക് വെള്ളം കയറിയാൽ ഉൽപ്പന്നങ്ങൾ ഗോഡൗണിലേക്ക് മാറ്റുന്നതിനുള്ള സഹായത്തിനായി വ്യാപാരികൾ കൺട്രോൾ റൂമുമായി ബന്ധപ്പെടണം. റോഡുകളിൽ ഭീഷണിയായി നിൽക്കുന്ന  മരങ്ങൾ ഉണ്ടെങ്കിൽ പഞ്ചായത്ത് അധികൃതരെ അറിയിക്കാവുന്നതാണ്.
 

പട്ടാമ്പിയിലും സമീപപ്രദേശങ്ങളിലും കൂടുതൽ രോഗബാധിതരെ കണ്ടെത്തുന്നതിനായി വരുംദിവസങ്ങളിലും പട്ടാമ്പി ഗവ ഹയർ സെക്കൻഡറി സ്കൂളിൽ കോവിഡ് പരിശോധന ക്യാമ്പ് തുടരുമെന്ന് മുഹമ്മദ് മുഹ്സിൻ എംഎൽഎ അറിയിച്ചു. ഇന്ന് 196 പേർക്കാണ് പരിശോധന നടത്തിയത്.പട്ടാമ്പി മത്സ്യമാർക്കറ്റ് മായി നേരിട്ട് ബന്ധപ്പെട്ടിട്ടുള്ള എല്ലാവരിലും ഇതിനകം പരിശോധന നടത്താൻ കഴിഞ്ഞിട്ടുണ്ട്. നിലവിൽ നേരിട്ട് ബന്ധമില്ലാത്ത സമ്പർക്ക സാധ്യതയുള്ളവർക്കാണ് പരിശോധന നടത്തുന്നത്.

കഴിഞ്ഞ രണ്ട് ദിവസങ്ങളിലായി അട്ടപ്പാടി മേഖലയിലെ ശക്തമായ മഴയിലുണ്ടായ നാശനഷ്ങ്ങൾ വിലയിരുത്തുന്നതിനും ആവശ്യമായ മുൻകരുതലുകൾ സ്വീകരിക്കുന്നതിനുമായി അട്ടപ്പാടി നോഡൽ ഓഫീസറും ഒറ്റപ്പാലം സബ് കലക്ടറുമായ അർജ്ജുൻ പാണ്ഡ്യന്റെ നേതൃത്വത്തിൽ അഗളി മിനി സിവിൽ സ്റ്റേഷനിൽ ഉദ്യോഗസ്ഥരുടെ യോഗം ചേർന്നു. 

 ജില്ലയിൽ മഴ തുടരുന്ന സാഹചര്യത്തിൽ ആലത്തൂരിൽ ഒരു ക്യാമ്പ് കൂടി തുറന്നതായി ജില്ലാ ദുരന്തനിവാരണ അതോറിറ്റി അധികൃതർ അറിയിച്ചു. കഴിഞ്ഞ ദിവസം മണ്ണാർക്കാട് താലൂക്കിൽ രണ്ട് ക്യാമ്പ് തുറന്നിരുന്നു.  മണ്ണാർക്കാട് താലൂക്കിൽ ഷോളയൂർ ഗവ. ട്രൈബൽ ഹയർ സെക്കൻഡറി സ്കൂളിലും പാലക്കയം ദാറുൽ ഫർഖാൻ ഗേൾസ് ഹോമിലുമാണ് ക്യാമ്പുകൾ നിലവിലുണ്ടായിരുന്നത്.  

മണ്ണാർക്കാട് താലൂക്കിലെ രണ്ട്  ക്യാമ്പുകളിലായി  11 കുടുംബങ്ങളിലെ 34 പേരാണ് ഉള്ളത് (സ്ത്രീ 12, പുരുഷൻ ഒൻപത്,  കുട്ടികൾ 13) .

ആലത്തൂരിൽ പാറശ്ശേരി അംഗനവാടിയിൽ തുറന്ന  ക്യാമ്പിൽ ഒരു കുടുംബത്തിലെ മൂന്നു പേരാണ് ഉള്ളത് (സ്ത്രീ രണ്ട്, പുരുഷൻ ഒന്ന്)

ജില്ലയിൽ കാലവർഷം ആരംഭിക്കുകയും മഴ ശക്തമാവുകയും ചെയ്യുന്ന സാഹചര്യത്തിൽ     സ്വീകരിക്കുന്ന  സുരക്ഷാ നടപടികൾ  സംബന്ധിച്ച് ജില്ലാ ദുരന്തനിവാരണ അതോറിറ്റിയുടെ  യോഗത്തിൽ എ.ഡി.എം ആർ.പി സുരേഷ്  പുറപ്പെടുവിച്ച നിർദ്ദേശങ്ങൾ ചുവടെ.

നിർദേശങ്ങൾ

1. അടിയന്തിര സാഹചര്യങ്ങളിൽ ഒഴികെ രാത്രി ഏഴ് മുതൽ രാവിലെ ആറ് വരെയുള്ള യാത്രകൾ കർശനമായി നിരോധിച്ചു.

2. അടുത്ത രണ്ടാഴ്ചത്തേക്ക് ജില്ലയിലെ എല്ലാ ക്വാറികളുടെയും പ്രവർത്തനങ്ങൾ നിർത്തി വയ്ക്കണം. ക്രഷിങ് നടത്താവുന്നതാണ്. 

കോവിഡ് 19 രോഗവ്യാപനം തടയുന്നതിനുള്ള സർക്കാർ നിർദ്ദേശങ്ങൾ പാലിക്കാത്തതിനെ തുടർന്ന് ഇന്ന് (ഓഗസ്റ്റ് 7) വൈകിട്ട് 7 വരെ ജില്ലയിൽ പോലീസ് നടത്തിയ പരിശോധനയിൽ 68 കേസുകൾ രജിസ്റ്റർ ചെയ്തതായി സ്പെഷൽ ബ്രാഞ്ച് ഡി.വൈ.എസ്.പി എം. കൃഷ്ണൻ അറിയിച്ചു. ഇത്രയും കേസുകളിലായി 122 പേരെ അറസ്റ്റ് ചെയ്തു. 6 വാഹനങ്ങൾ പിടിച്ചെടുത്തു.

 മാസ്ക് ധരിക്കാത്ത 363 പേർക്കെതിരെ കേസ് 

മാസ്ക് ധരിക്കാതെ പൊതുസ്ഥലങ്ങളിൽ ഇറങ്ങിയ 363 പേർക്കെതിരെ പോലീസ് കേസെടുത്തു.  മാസ്ക് ധരിക്കേണ്ടതിന്റെ   ആവശ്യകത ബോധ്യപ്പെടുത്തിയ  കോടതിയിൽ പിഴ അടയ്ക്കാൻ നോട്ടീസ് നൽകി വിട്ടയച്ചു. 
 

കാലവർഷം ശക്തമായതിനെ തുടർന്ന് ജില്ലയിൽ  ഓഗസ്റ്റ് ആറ് രാവിലെ എട്ട്  മുതൽ ഇന്ന് (ഓഗസ്റ്റ് ഏഴ്) രാവിലെ എട്ട് വരെ ലഭിച്ചത് 103.71 മില്ലിമീറ്റർ മഴ. ജില്ലയിലെ ആറു  താലൂക്കുകളിലായി ലഭിച്ച  ശരാശരി മഴയാണിത്. 

 മണ്ണാർക്കാട് താലൂക്കിൽ 108.6 മില്ലിമീറ്റർ, പട്ടാമ്പിയിൽ 82.65,   ആലത്തൂരിൽ 119,  ഒറ്റപ്പാലം 120.8, ചിറ്റൂർ 63,  പാലക്കാട് 128.2 മില്ലിമീറ്റർ മഴയാണ് ലഭിച്ചത്.