ജില്ലയിലെ കോവിഡ് 19 പ്രതിരോധ പ്രവര്‍ത്തനങ്ങളുമായി ബന്ധപ്പെട്ട് മന്ത്രിമാരായ എ.കെ ബാലന്‍, കെ.കൃഷ്ണന്‍കുട്ടി എന്നിവരുടെ നേതൃത്വത്തില്‍ ഇന്ന് (ഓഗസ്റ്റ് 11) രാവിലെ 10 ന് കലക്ടറേറ്റ് കോണ്‍ഫറന്‍സ് ഹാളില്‍ അവലോകന യോഗം നടക്കും. യോഗത്തില്‍ ബന്ധപ്പെട്ട ഉദ്യോഗസ്ഥര്‍ പങ്കെടുക്കണമെന്ന് ജില്ലാ കലക്ടര്‍ അറിയിച്ചു.

ആറന്മുള മണ്ഡലത്തിലെ ഓമല്ലൂര്‍ പഞ്ചായത്തിലും, മെഴുവേലി പഞ്ചായത്തിലും കോവിഡ്- 19 ഫസ്റ്റ് ലൈന്‍ ട്രീറ്റ്‌മെന്റ് സെന്ററുകളുടെ ഉദ്ഘാടനം വീണാ ജോര്‍ജ് എംഎല്‍എ നിര്‍വഹിച്ചു. ഓമല്ലൂര്‍ പഞ്ചായത്തില്‍ മഡോണ ഇന്റര്‍നാഷണല്‍ റസിഡന്‍ഷ്യല്‍ സ്‌കൂളും,
മെഴുവേലിയില്‍ കോവിഡ് കെയര്‍ സെന്ററായിരുന്ന ശ്രീ ബുദ്ധ എന്‍ജിനിയറിംഗ് കോളജ് ഹോസ്റ്റലുമാണ് ഫസ്റ്റ് ലൈന്‍ ട്രീറ്റ്‌മെന്റ് സെന്ററുകള്‍ ആക്കിയിട്ടുള്ളത്.

അച്ചന്‍കോവില്‍ ആറ്റില്‍ വീണ് കാണാതായ പ്രമാടം സ്വദേശിയുടെ വീട്ടില്‍ അഡ്വ.കെ.യു.ജനീഷ് കുമാര്‍ എംഎല്‍എ സന്ദര്‍ശനം നടത്തി. പ്രമാടം മല്ലശേരി മുട്ടത്തു ഭാഗം പ്രസാദ് ഭവനില്‍ രാജന്‍ പിള്ളയുടെ വീട്ടിലാണ് എംഎല്‍എ സന്ദര്‍ശനം നടത്തിയത്.
        ഞായറാഴ്ച പകല്‍ 11 മണിയോടെ പ്രമാടം മഹാദേവക്ഷേത്രത്തിനു സമീപം മുട്ടത്തു ഭാഗം ഇടനാഴി കടവില്‍ കാല്‍ വഴുതി വീണാണ് രാജന്‍ പിള്ളയെ കാണാതായത്. വീട്ടിലെത്തിയ എംഎല്‍എ ഭാര്യ വല്‍സലയെയും, മക്കളേയും ആശ്വസിപ്പിച്ചു.

കോന്നി നിയോജക മണ്ഡലത്തില്‍ മഴയിലും, മണ്ണിടിച്ചിലിലും, വെള്ളപ്പൊക്കത്തിലും വ്യാപക നാശനഷ്ടമുണ്ടായതായി അഡ്വ.കെ.യു.ജനീഷ് കുമാര്‍ എംഎല്‍എ പറഞ്ഞു. നഷ്ടപരിഹാരം നല്‍കുന്നതിനാവശ്യമായ അടിയന്തിര നടപടി സ്വീകരിക്കാന്‍ റവന്യൂ, കൃഷി വകുപ്പു മന്ത്രിമാര്‍ക്ക് വിശദാംശങ്ങള്‍ ചൂണ്ടിക്കാട്ടി എംഎല്‍എ കത്തും നല്‍കി. നാശനഷ്ടം തിട്ടപ്പെടുത്താന്‍ ഉദ്യോഗസ്ഥര്‍ക്ക് നിര്‍ദേശം നല്‍കിയതായും എംഎല്‍എ പറഞ്ഞു. നാശനഷ്ടം നേരിട്ട മേഖലകളില്‍ എംഎല്‍എ സന്ദര്‍ശനവും നടത്തി.

ജില്ലയിലെ എല്ലാ പോലീസ് സ്റ്റേഷനുകളിലെയും കുറഞ്ഞത് നാല് പ്രധാന ജംഗ്ഷനുകളില്‍ ഈ മാസം 12 ന് കോവിഡ് പ്രതിജ്ഞയെടുക്കുമെന്ന് ജില്ലാപോലീസ് മേധാവി കെ.ജി. സൈമണ്‍ അറിയിച്ചു. ജനങ്ങളും പോലീസും, സര്‍ക്കാര്‍ ഉദ്യോഗസ്ഥരും ഉള്‍പ്പെടെയുള്ളവര്‍ സാമൂഹിക അകലം പാലിച്ച് എവിടെയാണോ ഉള്ളത് ആ സ്ഥലത്തു വച്ച് പ്രതിജ്ഞയെടുക്കണം. പോലീസ് ഉദ്യോഗസ്ഥര്‍ പ്രധാന ജംഗ്ഷനുകളില്‍ നിന്ന് പ്രതിജ്ഞ മറ്റുള്ളവര്‍ക്ക് ചൊല്ലിക്കൊടുക്കണം. സ്ഥലം തിരഞ്ഞെടുക്കുന്നത് ഉള്‍പ്പെടെയുള്ള കാര്യങ്ങള്‍ എല്ലാ എസ് എച്ച് ഒമാരും ചെയ്യേണ്ടതാണെന്നും, മുതിര്‍ന്ന പോലീസ് ഉദ്യോഗസ്ഥര്‍ ഇക്കാര്യം ശ്രദ്ധിക്കണമെന്നും  ജില്ലാപോലീസ് മേധാവി പറഞ്ഞു.

കോവിഡ് വ്യാപനവുമായി ബന്ധപ്പെട്ട ലോക്ക്ഡൗണ്‍ കാലഘട്ടത്തില്‍ ബ്രാന്‍ഡഡ് ആയ ഉത്പന്നങ്ങള്‍ വ്യാജമായി നിര്‍മിക്കുകയും വില്‍ക്കുകയും ചെയ്തു ജനങ്ങളെ കബളിപ്പിക്കുക വഴി ആരോഗ്യസുരക്ഷയ്ക്കു ഭീഷണിയുണ്ടാക്കുന്ന സാഹചര്യം തടയാന്‍ നടപടിയെടുക്കുമെന്ന് ജില്ലാപോലീസ് മേധാവി കെ.ജി. സൈമണ്‍ അറിയിച്ചു. ഇക്കാര്യത്തില്‍ സത്വര ശ്രദ്ധയുണ്ടാവണമെന്നും, ആവശ്യഘട്ടങ്ങളില്‍ കര്‍ശന നടപടികള്‍ സ്വീകരിക്കണമെന്നും എല്ലാ പോലീസ് ഉദ്യോഗസ്ഥര്‍ക്കും നിര്‍ദേശം നല്‍കിയതായും ജില്ലാപോലീസ് മേധാവി പറഞ്ഞു.
 

കോവിഡ് 19 പ്രതിരോധപ്രവര്‍ത്തനങ്ങള്‍ ഏകോപിപ്പിക്കുന്നതിനൊപ്പം, പ്രളയാശങ്ക ദൂരീകരിക്കുന്നതിനുള്ള നടപടികളും സ്വീകരിച്ചതായി ജില്ലാപോലീസ് മേധാവി കെ.ജി. സൈമണ്‍ അറിയിച്ചു. കോവിഡ് പ്രതിരോധപ്രവര്‍ത്തനങ്ങളില്‍ ഇതര വകുപ്പുകളുമായി ചേര്‍ന്ന് ജില്ലയിലെ പോലീസ് പ്രവര്‍ത്തിച്ചു വരുന്നതായും ജില്ലാപോലീസ് മേധാവി അറിയിച്ചു. ഡാമുകള്‍ നിയന്ത്രിത അളവില്‍ തുറക്കുന്നത് നദികളിലെയും മറ്റും ജലനിരപ്പുയരാനും അതുവഴി പ്രളയം ഉള്‍പ്പെടെ ദുരന്തങ്ങള്‍  ഉണ്ടാകുന്നതിനും സാധ്യത മുന്നില്‍കണ്ട് ജില്ലാ ഭരണകൂടം സ്വീകരിച്ചിട്ടുള്ള നടപടികളില്‍ പോലീസും പങ്കാളിയായിട്ടുണ്ട്.

കേരള ഷോപ്‌സ് ആന്റ് കമേഴ്‌സ്യല്‍ എസ്റ്റാബ്ലിഷ്‌മെന്റ് തൊഴിലാളി ക്ഷേമനിധി പദ്ധതിയിലെ അംഗങ്ങളുടെ മക്കളില്‍ 2018-19 , 2019-20 വര്‍ഷങ്ങളില്‍ സ്‌പോര്‍ട്‌സ് കൗണ്‍സില്‍ അംഗീകരിച്ച കായിക ഇനങ്ങളില്‍ ദേശീയ തലത്തിലും സംസ്ഥാന കലോത്സവങ്ങളിലും സര്‍വകലാശാല തലത്തിലും ഒന്നാം സ്ഥാനം നേടിയ വിദ്യാര്‍ത്ഥികള്‍ക്ക് 3000 രൂപ ക്യാഷ് അവാര്‍ഡിന് അപേക്ഷിക്കാം. അപേക്ഷാ ഫോറം peedika.kerala.gov.in എന്ന വെബ്‌സൈറ്റില്‍ ലഭിക്കും. അപേക്ഷ സ്വീകരിക്കുന്ന അവസാന തീയതി സെപ്റ്റംബര്‍ 10. ഫോണ്‍ 04936 206878,9496441862.