കോവിഡ്-19 ന്റെ വ്യാപനം വര്‍ദ്ധിച്ചുവരുന്ന സാഹചര്യത്തില്‍ സംസ്ഥാന  സര്‍ക്കാര്‍ പുറപ്പെടുവിച്ചിട്ടുള്ള റിവേഴ്സ് ക്വാറന്റയിന്‍ മാര്‍ഗ്ഗ നിര്‍ദ്ദേശങ്ങള്‍ പ്രകാരം വീടുകളിലും മറ്റും കഴിയുന്ന വയോജനങ്ങളുടെ മാനസിക ആരോഗ്യം  ലക്ഷ്യമിട്ട്   'കരുതലാവാം കാവലാവാം' സൗജന്യ കൗണ്‍സലിംഗ് സേവനത്തിന് തുടക്കമായി. ജില്ലാ  മെയിന്റനന്‍സ് ട്രൈബൂണല്‍,  സാമൂഹ്യനീതി വകുപ്പ്,  ജില്ലാതല സീനിയര്‍ സിറ്റിസണ്‍ സെല്‍ എന്നിവയുടെ  നേതൃത്വത്തില്‍ കേരള അസോസിയേഷന്‍ ഓഫ് പ്രൊഫഷണല്‍ സോഷ്യല്‍ വര്‍ക്കേഴ്‌സ്(കാപ്സ്)- പാലക്കാട് ചാപ്റ്ററിന്റെ സഹകരണത്തോടുകൂടിയാണ് പദ്ധതി നടപ്പിലാക്കുന്നത്.

ഉരുള്‍പൊട്ടല്‍ മൂലം ദുരന്ത ഭൂമിയായി മാറിയ രാജമല പെട്ടിമുടിയിലേക്ക് രക്ഷാപ്രവര്‍ത്തനത്തിന് ജില്ലയിലെ ഫയര്‍ ആന്‍ഡ് റെസ്‌ക്യൂ വിഭാഗവും. ദുരന്തമുഖത്തേക്ക് സ്വമേധയായാണ് രക്ഷാപ്രവര്‍ത്തനത്തിനായി ജില്ലയിലെ വിവിധ ഫയര്‍ സ്റ്റേഷനുകള്‍ക്ക് കീഴിലെ മുപ്പതോളം സിവില്‍ ഡിഫന്‍സ് അംഗങ്ങള്‍ പോയിരിക്കുന്നത്.

മലമ്പുഴ ജി.വി.എച്ച്. എസ്.എസ്.  ലെ  ഗാര്‍ഡനര്‍( ജി.എന്‍.ആര്‍ അഗ്രികള്‍ച്ചര്‍) , ഡെയറി ഫാം എന്റര്‍പ്രിന്യൂവര്‍ ( ഡി.എഫ്.ഇ), ഓര്‍ണമന്റല്‍ ഫിഷ് ടെക്നീഷ്യന്‍,( ഒ. ആര്‍.എഫ്.ടി) എന്നീ തൊഴിലധിഷ്ഠിത കോഴ്സുകളിലേയ്ക്ക് പ്രവേശനം ആരംഭിച്ചതായി പ്രിന്‍സിപ്പാള്‍ അറിയിച്ചു. നാഷണല്‍ സ്‌കില്‍സ് ക്വാളിഫിക്കേഷന്‍ ഫ്രെയിം വര്‍ക്കിന്റെ അംഗീകാരം ലഭിച്ചതിനാല്‍ കോഴ്സുകള്‍ക്ക് ദേശീയ അംഗീകാരമുള്ള നൈപുണി സര്‍ട്ടിഫിക്കറ്റുകള്‍ ലഭിക്കും. എസ്.എസ്.എല്‍.സി വിജയിച്ച  വിദ്യാര്‍ത്ഥികള്‍ക്ക് www.vhscap.kerala.gov.in ലൂടെ ഓഗസ്റ്റ് 14 വരെ അപേക്ഷിക്കാം.

ജില്ലയില്‍ മഴ തുടരുന്ന സാഹചര്യത്തില്‍ നിലവില്‍ മംഗലം, കാഞ്ഞിരപ്പുഴ ഡാമുകളാണ് തുറന്നിരിക്കുന്നത്. മലമ്പുഴ, വാളയാര്‍, പോത്തുണ്ടി ഡാമുകള്‍ തുറക്കുന്നതിനുള്ള മുന്നറിയിപ്പു നല്‍കിയിട്ടുണ്ട്. കാഞ്ഞിരപ്പുഴ ഡാമിന്റെ മൂന്ന് ഷട്ടറുകള്‍ 80 സെന്റിമീറ്റര്‍ തുറന്നിട്ടുണ്ട്. ഡാമിന്റെ പരമാവധി സംഭരണശേഷി 97.50 മീറ്ററാണ്. നിലവിലെ വെള്ളത്തിന്റെ അളവ് 93.54 മീറ്ററാണ്. 93.09 മീറ്ററിന് മേലെ ജലം ഉയര്‍ന്നതിനാലാണ്  ഡാം തുറന്നത്.

കെട്ടിട നിര്‍മ്മാണ തൊഴിലാളി ക്ഷേമനിധി ബോര്‍ഡിലെ  അംഗങ്ങള്‍ക്ക് കോവിഡ് - 19 പശ്ചാത്തലത്തില്‍ പ്രഖ്യാപിച്ച പ്രത്യേക ധനസഹായത്തിന് അപേക്ഷിക്കാമെന്ന് ജില്ലാ എക്സിക്യൂട്ടീവ് ഓഫീസര്‍ അറിയിച്ചു. ഓഗസ്റ്റ് 15 വരെ ഇമെയില്‍ മുഖാന്തിരമോ, അംഗീകൃത ട്രേഡ് യൂണിയനുകള്‍ മുഖാന്തരമോ, നേരിട്ടോ  അപേക്ഷ സമര്‍പ്പിക്കാം . അതിനുശേഷം സമര്‍പ്പിക്കുന്ന അപേക്ഷകള്‍ ചീഫ് ഓഫീസിലായിരിക്കും പരിഗണിക്കുകയെന്ന് ജില്ലാ എക്സിക്യൂട്ടീവ് ഓഫീസര്‍ അറിയിച്ചു.