മന്ത്രിസഭാ രണ്ടാം വാര്‍ഷികത്തോട് അനുബന്ധിച്ച് നാഗമ്പടത്ത് നടക്കുന്ന പ്രദര്‍ശന മേളയില്‍ പോലീസ് നായ്കളുടെ അഭ്യാസ പ്രകടനം. ജില്ലാ ഡോഗ് സ്‌ക്വാഡിലെ ജില്‍, ബെയ്‌ലി, റീന എന്നിവരാണ് വേദിയില്‍ പ്രകടനം കാഴ്ചവെച്ചത്. സദസിനെ അഭിസംബോധന ചെയ്താണ് പോലീസ് നായ്കള്‍ പ്രകടനം തുടങ്ങിയത്. പരിശീലകര്‍ നല്‍കുന്ന ശബ്ദം, ആഗ്യം, എന്നിവ ശ്രദ്ധിച്ച് അവര്‍ മികച്ച പ്രകടനം അവതരിപ്പിച്ച് സദസിന്റെ കൈയടി നേടി. അഞ്ചു കസേരകളില്‍ ഒന്നിനടിയില്‍ വെച്ച ബോംബ് കൃത്യമായി കണ്ടെത്തിയും മണം പിടിച്ചോടി അന്വേഷണത്തിലേക്കു സൂചന നല്‍കുന്ന വിധം കാണിച്ചും നായകള്‍ ശ്രദ്ധേയമായി.

സംസ്ഥാന സര്‍ക്കാരിന്റെ രണ്ടാം വാര്‍ഷികത്തോടനുബന്ധിച്ച് നടക്കുന്ന ദിശ - ഉല്പന്ന പ്രദര്‍ശന വില്പന മേളയില്‍ കോട്ടയം ജില്ലാ പോലീസിന്റെ പ്രതിരോധ പരിശീലന പരിപാടി നടത്തി.സ്ത്രീകള്‍ക്ക് അപ്രതീക്ഷിതമായി നേരിടേണ്ടി വരുന്ന അക്രമണങ്ങളെ പ്രതിരോധിക്കാന്‍ സ്വയം പ്രാപ്തരാക്കുന്ന പരിശീലന പരിപാടിയാണ് ജില്ലാ പോലീസ് അവതരിപ്പിച്ചത്. പോലീസ് സേനയിലെ ആറ് വനിത ഉദ്യോഗസ്ഥരും പ്രത്യേക പരിശീലനം നേടിയ  കുടുംബശ്രീ പ്രവര്‍ത്തകരും അടങ്ങിയ ടീമാണ് പരിശീലനം നല്‍കുന്നത്. എസ്.പി വി.എം മുഹമ്മദ് റഫീക്ക് ഐപിഎസ്, വനിത സി.ഐ എന്‍. ഫിലോമിന, ജില്ലാ നോഡല്‍ ഓഫീസര്‍ വിനോദ് പിള്ള എന്നിവരാണ് ടീമിനെ നയിക്കുന്നത്.

സർവീസ് വോട്ടർമാരുടെ സൗകര്യാർത്ഥം തിരഞ്ഞെടുപ്പ് കമ്മീഷൻ ആരംഭിച്ച ഇലക്‌ട്രോണിക്കലി ട്രാൻസ്മിറ്റഡ് പോസ്റ്റൽ ബാലറ്റ് സിസ്റ്റം ചെങ്ങന്നൂരിലും പരീക്ഷിക്കുന്നു. കേരളത്തിൽ ആദ്യമായാണ് ഇ.ടി.പി.ബി.എസ് പരീക്ഷണാടിസ്ഥാനത്തിൽ നടപ്പാക്കുന്നത്. ഇ.ടി.പി.ബി.എസിന് സമാന്തരമായി തന്നെ പഴയ രീതിയിലുള്ള പോസ്റ്റൽ ബാലറ്റും ഉണ്ടാകും. 797 സർവീസ് വോട്ടർമാരാണ് ചെങ്ങന്നൂരിൽ ഉള്ളത്. ഇ.ടി.പി.ബി.എസിൽ ബാലറ്റ് കംപ്യൂട്ടറിൽ ജനറേറ്റ് ചെയ്യും. വോട്ട് ചെയ്ത ശേഷം ബാലറ്റ് ഇടേണ്ട ചെറിയ കവർ, വലിയ കവർ എന്നിവയും കംപ്യൂട്ടറിൽ നിന്ന് എടുക്കാൻ കഴിയും. ഇത് അതാത് സർവീസ് വോട്ടറുടെ ഓഫീസുകളിലേക്ക് നൽകും.

ആലപ്പുഴ: വോട്ടർമാർക്കുള്ള ബോധവത്ക്കരണത്തിനും തിരഞ്ഞെടുപ്പ് പ്രക്രിയയിലെ വോട്ടർ പങ്കാളിത്തം ഉറപ്പാക്കുന്നതിനുമുള്ള സ്വീപ്പ് പദ്ധതിയിൽ (സിസ്റ്റമാറ്റിക് വോട്ടേഴ്സ് എജ്യുക്കേഷൻ ആന്റ് ഇലക്ടറൽ പാർട്ടിസിപ്പേഷൻ) വിപുലമായ പരിപാടികൾ ആസൂത്രണം ചെയ്തതായി ജില്ല തിരഞ്ഞെടുപ്പ് ഓഫീസറായ ജില്ലാ കളക്ടർ ടി.വി.അനുപമ  അറിയിച്ചു. ഇതിന്റെ ഭാഗമായി മണ്ഡലത്തിൽ  പ്രത്യേക വാഹനത്തിൽ മാതൃക പോളിംഗ് ബൂത്തു സജ്ജമാക്കി ജനങ്ങളെ വി.വി.പാറ്റ് സംവിധാനം പരിചയപ്പെടുത്തി വരികയാണ്.