കേരള ഇന്‍സ്റ്റീറ്റ്യൂട്ട് ഓഫ് കോ-ഓപ്പറേറ്റീവ് മാനേജ്‌മെന്റില്‍ എം.ബി.എ, (ഫുള്‍ടൈം) 2018 -20 ബാച്ച് പ്രവേശനം ഏപ്രില്‍ നാലിന് രാവിലെ 10 മുതല്‍ ക്യാമ്പസില്‍ നടത്തും. 
    കേരള സര്‍വകലാശാലയുടെയും, എ.ഐ.സി.റ്റി.ഇ.യുടെയും അംഗീകാരത്തോടെ നടത്തുന്ന ദ്വിവത്സര കോഴ്‌സില്‍ ഫിനാന്‍സ്, മാര്‍ക്കറ്റിംഗ്, ഹ്യൂമന്‍ റിസോഴ്‌സ്, സിസ്റ്റം എന്നിവയില്‍ ഡ്യുവല്‍ സ്‌പെഷ്യലൈസേഷന് അവസരമുണ്ട്.  സഹകരണ മേഖലയില്‍ പ്രവര്‍ത്തിക്കുന്നവരുടെ ആശ്രിതര്‍ക്ക് പ്രതേ്യക സ്‌കോളര്‍ഷിപ്പും, എസ്.സി., എസ്.റ്റി വിദ്യാര്‍ത്ഥികള്‍ക്ക് സര്‍ക്കാര്‍, യൂണിവേഴ്‌സിറ്റി നിബന്ധനകള്‍ക്ക് വിധേയമായി ഫീസ് ആനുകൂല്യവും ലഭിക്കും. 

    വ്യാപാരി ക്ഷേമനിധി അംഗത്വ ഫീസ്/വരിസംഖ്യ വര്‍ധിപ്പിച്ചു.  ഏപ്രില്‍ ഒന്നു മുതല്‍ ഇത് നിലവില്‍ വരും.  അംഗത്വഫീസ്: എ ക്ലാസ് 100 രൂപ, ബി ക്ലാസ് 750, സി ക്ലാസ് 500, ഡി ക്ലാസ് 200.  വരിസംഖ്യ : എ ക്ലാസ് 3,000 രൂപ, ബി ക്ലാസ് 2000, സി ക്ലാസ് 1,500, ഡി ക്ലാസ് 500.
പി.എന്‍.എക്‌സ്.1192/18

    ശ്രീപദ്മനാഭസ്വാമി ക്ഷേത്രം ആറാട്ട്, അമ്പലപ്പുഴ കൊടിയേറ്റ് എന്നിവ സര്‍ക്കാര്‍ കലണ്ടറില്‍ ഏപ്രില്‍ ഒന്നിനു പകരം ഏപ്രില്‍ രണ്ടിന് എന്നു തെറ്റായി രേഖപ്പെടുത്തിയത് തിരുത്തല്‍ വരുത്തി സര്‍ക്കാര്‍ ഉത്തരവായി.  ആറാട്ട് പ്രമാണിച്ച് രണ്ടിന് വൈകിട്ട് മൂന്നു മുതല്‍ തിരുവനന്തപുരം നഗരത്തിലെ സര്‍ക്കാര്‍ ഓഫീസുകള്‍ക്ക് പ്രഖ്യാപിച്ചിരുന്ന അവധിയും റദ്ദാക്കി.  രണ്ടിന് ഓഫീസുകള്‍ പതിവുപോലെ പ്രവര്‍ത്തിക്കും.
പി.എന്‍.എക്‌സ്.1190/18

    മലയാള ചലച്ചിത്രരംഗത്തെ സമഗ്രസംഭാവനയ്ക്കുള്ള ജെ സി ഡാനിയേല്‍ പുരസ്‌കാരത്തിന് പ്രശസ്ത ഗാനരചയിതാവും സംവിധായകനുമായ ശ്രീകുമാരന്‍ തമ്പിയെ തിരഞ്ഞെടുത്തതായി സാംസ്‌കാരിക വകുപ്പ് മന്ത്രി എ കെ ബാലന്‍ അറിയിച്ചു. സംസ്ഥാന സര്‍ക്കാരിന്റെ ഏറ്റവും വലിയ ചലച്ചിത്ര പുരസ്‌കാരമാണ് ജെ സി ഡാനിയേല്‍ പുരസ്‌കാരം. അഞ്ച് ലക്ഷം രൂപയും പ്രശസ്തിപത്രവും ഫലകവുമാണ് അവാര്‍ഡ്. കൊല്ലത്ത് നടക്കുന്ന ചലച്ചിത്ര അവാര്‍ഡ്ദാന ചടങ്ങില്‍ പുരസ്‌കാരം സമര്‍പ്പിക്കും.

    കന്റോണ്‍മെന്റ്  ഇലക്ട്രിക്കല്‍  സെക്ഷന്‍ പരിധിയില്‍  കുന്നുകുഴി, ചിന്ത, എ.കെ.ജി സെന്റര്‍ പരിസരം   എന്നീ  ട്രാന്‍സ്‌ഫോര്‍മറുകളില്‍ അറ്റകുറ്റപ്പണികള്‍   നടക്കുന്നതിനാല്‍ ഈ പ്രദേശത്ത്  ഇന്ന് (29) രാവിലെ ഒമ്പത് മുതല്‍ വൈകിട്ട്  അഞ്ചു  വരെ  വൈദ്യുതി  മുടങ്ങും.
    കഴക്കൂട്ടം  ഇലക്ട്രിക്കല്‍  സെക്ഷന്‍ പരിധിയില്‍  കഴക്കൂട്ടം ജംഗ്ഷന്‍ പ്രദേശത്ത്  ഇന്നു രാവിലെ ഒമ്പതു മുതല്‍  വൈകിട്ട് നാലു വരെ  കേബിള്‍  അറ്റകുറ്റപ്പണികള്‍ നടക്കുന്നതിനാല്‍ വൈദ്യുതി  മുടങ്ങും.
പി.എന്‍.എക്‌സ്.1188/18

    കിര്‍ടാഡ്‌സില്‍ (കേരള ഇന്‍സ്റ്റിറ്റ്യൂട്ട് ഫോര്‍ റിസര്‍ച്ച് ട്രെയിനിംഗ് ആന്റ് ഡെവലപ്‌മെന്റ് സ്റ്റഡീസ് ഓഫ് ഷെഡ്യൂള്‍ഡ് കാസ്റ്റ് ആന്റ് ഷെഡ്യൂള്‍ഡ് ട്രൈബ്‌സ്) റിസര്‍ച്ച് അസിസ്റ്റന്റ് തസ്തികയിലേക്ക് പ്രതിമാസ ഹോണറേറിയത്തിനു താല്‍ക്കാലിക അടിസ്ഥാനത്തില്‍ നിയമിക്കുന്നതിന് ഏപ്രില്‍ 10 രാവിലെ 11 ന് കിര്‍ടാഡ്‌സ് വകുപ്പില്‍ വാക്ക്-ഇന്‍-ഇന്റര്‍വ്യൂ നടത്തും. 

    കേരള സഹകരണ ട്രൈബ്യൂണല്‍ ഏപ്രില്‍ നാല്, 17, 25 തിയതികളില്‍ ആസ്ഥാനത്തും 12 ന് തൃശൂര്‍ ജില്ലാ സഹകരണ ബാങ്കിലും 20 ന് കോഴിക്കോട് ജില്ലാ സഹകരണ ബാങ്കിലും 27 ന് കോട്ടയം ജില്ലാ സഹകരണ ബാങ്കിലും സിറ്റിംഗ് നടത്തും. 
പി.എന്‍.എക്‌സ്.1187/18

    എസ്.എസ്.എല്‍.സി മാര്‍ച്ച് 2018 പരീക്ഷയോടൊപ്പം സവിശേഷസഹായം ആവശ്യമായ വിദ്യാര്‍ത്ഥികള്‍ക്ക് സി.ഡബ്ലിയു.എസ്.എന്‍ പരീക്ഷ കേരളത്തിലെ ഏഴ് പരീക്ഷാ കേന്ദ്രങ്ങളിലായി ഏപ്രില്‍ മൂന്നിന് നടത്തും.  വിശദവിവരങ്ങള്‍ www.keralapareeskshabhavan.in എന്ന വെബ്‌സൈറ്റില്‍ ലഭിക്കും.
പി.എന്‍.എക്‌സ്.1185/18

    കാനാമ്പുഴ സമഗ്ര നീര്‍ത്തട വികസനത്തിന്റെ വിശദ പദ്ധതി രേഖ തയ്യാറായി. കാനാമ്പുഴയെ പുനരുജ്ജീവിപ്പിക്കാന്‍ ലക്ഷ്യമിട്ട് 73.75 കോടിയുടെ മാസ്റ്റര്‍ പ്ലാനാണ് തയ്യാറാക്കിയിട്ടുള്ളത്. തിരുവനന്തപുരത്ത് ഹരിതകേരളം മിഷന്‍ ആസ്ഥാനത്ത് സംഘടിപ്പിച്ച ശില്പശാലയില്‍ വിശദമായ പദ്ധതിരേഖ അവതരിപ്പിച്ചു. ശില്പശാലയില്‍ ഉരുത്തിരിഞ്ഞ നിര്‍ദ്ദേശങ്ങളും ഭേദഗതികളും ഉള്‍പ്പെടുത്തി പദ്ധതിക്ക് അന്തിമരൂപം നല്‍കും.

സംസ്ഥാന യുവജന ക്ഷേമ ബോര്‍ഡിന്റെ പിഎസ്‌സി പരിശീലന പരിപാടിയുടെ ഭാഗമായി ക്ലബ്ബുകള്‍ക്കുള്ള ധനസഹായം വിതരണം ചെയ്തു. സംസ്ഥാന യുവജന ക്ഷേമ ബോര്‍ഡ് അംഗം ബിജു കണ്ടക്കൈയുടെ അധ്യക്ഷതയില്‍ ചേര്‍ന്ന യോഗത്തില്‍ ജില്ലാ പഞ്ചായത്ത് പ്രസിഡണ്ട് കെ വി സുമേഷ് ഉദ്ഘാടനം നിര്‍വഹിച്ചു. ജില്ലയിലെ 70 ക്ലബ്ബുകള്‍ക്കായി മൂന്നര ലക്ഷം രൂപയാണ് പിഎസ്‌സി പരിശീലന പരിപാടിക്കായി നല്‍കിയത്. ജില്ലാ പഞ്ചായത്ത് ആരോഗ്യ-വിദ്യാഭ്യാസ സ്റ്റാന്റിങ്ങ് കമ്മിറ്റി ചെയര്‍മാന്‍ കെ പി ജയബാലന്‍, സാക്ഷരതാ മിഷന്‍ ജില്ലാ കോ ഓര്‍ഡിനേറ്റര്‍ ഷാജു ജോണ്‍ എന്നിവര്‍ സംസാരിച്ചു.