ഐ.എസ്.എല്‍ പോലുള്ള ടൂര്‍ണമെന്റുകള്‍ കാരണം കുട്ടികള്‍ക്കിടയില്‍ ഫുട്‌ബോളിനോടുള്ള താല്‍പര്യം കൂടിയിട്ടുണ്ടെങ്കിലും അവര്‍ക്ക് കളിക്കാന്‍ കളിക്കളങ്ങളില്ലാത്ത സ്ഥിതിയാണെന്ന് ഫുട്‌ബോള്‍ താരം സി.കെ വിനീത്. ജില്ലാ പഞ്ചായത്ത് വികസന സെമിനാറില്‍ സംസാരിക്കുകയായിരുന്നു അദ്ദേഹം. പാടങ്ങള്‍ക്കൊപ്പം നമ്മുടെ കളിമൈതാനങ്ങളും വളരെ വേഗം അപ്രത്യക്ഷമായിക്കൊണ്ടിരിക്കുകയാണ്. ഇവ വീണ്ടെടുക്കാന്‍ നമുക്ക് സാധിക്കണം. ഇതിന്റെ ഭാഗമായി ഓരോ തദ്ദേശ സ്ഥാപനത്തിന്റെയും നേതൃത്വത്തില്‍ മികച്ച പരിശീലന സൗകര്യങ്ങളോടു കൂടി കളിക്കളങ്ങള്‍ നിര്‍മിക്കണമെന്നും അദ്ദേഹം അഭിപ്രായപ്പെട്ടു.

ജില്ലയുടെ സമഗ്ര വികസനം ലക്ഷ്യമിട്ട് നൂതനവും ത്രിതല പഞ്ചായത്തുകള്‍ സംയുക്തമായി നടപ്പിലാക്കേണ്ടതുമായ പദ്ധതികള്‍ക്ക് മുന്‍ഗണന നല്‍കുന്ന ജില്ലാ പഞ്ചായത്തിന്റെ 2018-19 വാര്‍ഷിക കരട് പദ്ധതി രേഖ ജില്ലാ പഞ്ചായത്ത് വികസന സമിതി യോഗം ചര്‍ച്ച ചെയ്തു. അടുത്ത സാമ്പത്തിക വര്‍ഷം മെയിന്റനന്‍സ് ഗ്രാന്റ് ഉള്‍പ്പെടെ ജില്ലാ പഞ്ചായത്ത് പ്രതീക്ഷിക്കുന്ന 101 കോടി രൂപ അടങ്കലില്‍ 126 പദ്ധതികളാണ് കരട് രേഖയില്‍ നിര്‍ദ്ദേശിച്ചിട്ടുള്ളത്. പൊതുവിഭാഗത്തില്‍ 45 കോടി, പ്രത്യേക ഘടകപദ്ധതിയില്‍ 4.9 കോടി, പട്ടികവര്‍ഗ പദ്ധതിയില്‍ 3.01 കോടി എന്നിങ്ങനെ 52.98 കോടി രൂപയുടെ വികസന ഫണ്ടാണ് ജില്ലാ പഞ്ചായത്ത് പ്രതീക്ഷിക്കുന്നത്.

ജില്ലാ പദ്ധതി മുന്നേട്ടുവെച്ചിട്ടുള്ള നിര്‍ദേശങ്ങള്‍, പ്രത്യേകിച്ച് ഏകോപിത പദ്ധതികളുടെ ആശയങ്ങള്‍, ജില്ലയിലെ തദ്ദേശസ്ഥാപനങ്ങളുടെ വാര്‍ഷിക പദ്ധതിയില്‍ പ്രതിഫലിക്കണമെന്ന് സംസ്ഥാന ആസൂത്രണ ബോര്‍ഡ് വൈസ് ചെയര്‍മാന്‍ ഡോ. വി കെ രാമചന്ദ്രന്‍ അഭിപ്രായപ്പെട്ടു. ജില്ലാ പഞ്ചായത്ത് വികസന സെമിനാര്‍ വീഡിയോ കോണ്‍ഫറന്‍സിലൂടെ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. 

          കേരള ഖാദി ഗ്രാമവ്യവസായ ബോര്‍ഡില്‍ നിന്നും കണ്‍സോര്‍ഷ്യം ബാങ്ക് ക്രഡിറ്റ് (സി.ബി.സി) പദ്ധതി പ്രകാരം വായ്പയെടുത്തു കുടിശ്ശിക വരുത്തിയ വ്യവസായസംരംഭകര്‍ക്കുള്ള ഒറ്റത്തവണ തീര്‍പ്പാക്കല്‍ പദ്ധതിയുടെ കാലാവധി മാര്‍ച്ച് 31 വരെ ദീര്‍ഘിപ്പിച്ചു. ഇതനുസരിച്ച് പിഴപ്പലിശ പൂര്‍ണ്ണമായും ഒഴിവാക്കും. അര്‍ഹതയുള്ള സംരംഭകര്‍ ഖാദി ബോര്‍ഡിന്റെ ജില്ലാ ഓഫീസുകളുമായി ബന്ധപ്പെടണം. 

പി.എന്‍.എക്‌സ്.886/18

  2018 മാര്‍ച്ച് എസ്.എസ്.എല്‍.സി പരീക്ഷയുടെ മൂല്യനിര്‍ണ്ണയം നടത്തുന്നതിന് അഡീഷണല്‍ ചീഫ് എക്‌സാമിനേഴ്‌സ്, അസിസ്റ്റന്റ് എക്‌സാമിനേഴ്‌സ് ആയി അതത് സോണുകളില്‍ അപേക്ഷിക്കുന്നതിന് മാര്‍ച്ച് 12 വരെ സൗകര്യം ഉണ്ടായിരിക്കും.  പ്രഥമാധ്യാപകര്‍ തങ്ങളുടെ സ്‌കൂളിലെ എല്ലാ അദ്ധ്യാപകരും മൂല്യ നിര്‍ണ്ണയത്തിന് അപേക്ഷിച്ചിട്ടുണ്ടെന്ന് ഉറപ്പുവരുത്തണം. പ്രഥമാദ്ധ്യാപകര്‍ iExams HM login വഴി 12 ന് മുമ്പായി അപേക്ഷകരുടെ വിവരങ്ങള്‍ ഓണ്‍ലൈനായി സമര്‍പ്പിക്കണം. 

പി.എന്‍.എക്‌സ്.883/18

കേരള കര്‍ഷകത്തൊഴിലാളി ക്ഷേമനിധി ബോര്‍ഡ് തിരുവനന്തപുരം ഡിവിഷന്റെ 2011-ലെ അധിവര്‍ഷാനുകൂല്യ വിതരണം ഇന്നും നാളെയും കൂടി (ശനി, ഞായര്‍) ഉണ്ടായിരിക്കുമെന്ന് വെല്‍ഫയര്‍ഫണ്ട് ഓഫീസര്‍ അറിയിച്ചു.

പി.എന്‍.എക്‌സ്.882/18

കേരള മീഡിയ അക്കാദമി ഇൻഫർമേഷൻ-പബ്ളിക് റിലേഷൻസ് വകുപ്പിന്റെ സഹകരണത്തോടെ സംഘടിപ്പിക്കുന്ന രാജ്യാന്തര വാർത്ത ചിത്ര മേളയോടനുബന്ധിച്ച് ഇന്ന് (മാർച്ച് 9) രാവിലെ 10ന് മാസ്‌കറ്റ് ഹോട്ടലിൽ പ്രശസ്ത ഫേട്ടോജേണലിസ്റ്റുകളായ നിക് ഉട്ടും റൗൾറോയും നയിക്കുന്ന ശിൽപശാല നടക്കും. തെരഞ്ഞെടുക്കപ്പെട്ട 50 പ്രസ് ഫോട്ടോ ജേണലിസ്റ്റുകൾ പങ്കെടുക്കും. 

ഗസൽപൂക്കളുടെ നറുമണത്തിലലിഞ്ഞ് തലസ്ഥാനം. ഭജൻ സാമ്രാട്ട് അനൂപ് ജലോട്ടയുടെ മാസ്മരിക ശബ്ദം ആസ്വാദകരിൽ സംഗീതത്തിന്റെ നറുനിലാവ് വിടർത്തി. പ്രണയവും വിരഹവും സിരകളിൽ പടർത്തിയ പാട്ടുകളെ ആസ്വാദകർ ഹർഷാരവത്തോടെയാണ് സ്വീകരിച്ചത്. ഒന്നര മണിക്കൂറോളം നീണ്ട ഗസൽസായാഹ്നം തലസ്ഥാനത്തിന് നവ്യാനുഭവമായി.

ഇന്ന് (മാർച്ച് 9) വൈകിട്ട് 6.30 ന് പ്രശസ്ത ചലച്ചിത്ര സംഗീത സംവിധായകൻ ജെറി അമൽദേവിന്റെ നേതൃത്വത്തിൽ ഗാനസന്ധ്യ അരങ്ങേറും. ജെറി അമൽദേവിന്റെ മഞ്ഞിൽവിരിഞ്ഞ പൂക്കൾ മുതൽ ആക്ഷൻ ഹീറോ ബിജു വരെയുള്ള എഴുപതോളം ചിത്രങ്ങളിലെ മികച്ച ഗാനങ്ങൾ കോർത്തിണക്കിയുള്ള സംഗീതവിരുന്നിലേക്ക് പ്രവേശനം സൗജന്യമാണ്. 

* വേൾഡ് ഫോട്ടോഗ്രാഫർ പ്രൈസ് നിക് ഉട്ടിന് സമ്മാനിച്ചു

സാമ്രാജ്യത്വ വിരുദ്ധ നിലപാടുകൾ ഉയർത്തിപിടിക്കുന്ന നിക്ക് ഉട്ടിന്റെ ചിത്രങ്ങൾ ജീവിതം തുളുമ്പി നിൽക്കുന്നതാണെന്ന് മുഖ്യമന്ത്രി പിണറായി വിജയൻ പറഞ്ഞു. കേരള മീഡിയ അക്കാദമി ഇൻഫർമേഷൻ-പബ്ളിക് റിലേഷൻസ് വകുപ്പിന്റെ സഹകരണത്തോടെ തിരുവനന്തപുരം ടാഗോർ സെന്റിനറി ഹാളിൽ സംഘടിപ്പിക്കുന്ന രാജ്യാന്തര വാർത്ത ചിത്ര മേള  ഉദ്ഘാടനം ചെയ്ത,് പ്രഥമ വേൾഡ് പ്രസ് ഫോട്ടോഗ്രാഫർ പ്രൈസ് ലോകപ്രശസ്ത  ഫോട്ടോ ജേർണലിസ്റ്റ് നിക്ക് ഉട്ടിന് സമ്മാനിച്ച് പ്രസംഗിക്കുകയായിരുന്നു അദ്ദേഹം.  

മണക്കാട് വില്ലേജില്‍ പാര്‍വ്വതി ഫുഡ്‌സ് വില്‍പ്പന നികുതിയില്‍ കുടിശ്ശികയിനത്തില്‍ വരുത്തിയ 3,48,162 രൂപയും പലിശയും നടപടി ചെലവുകളും വസൂലാക്കുന്നതിനായി ജംഗമ വസ്തുക്കള്‍ മാര്‍ച്ച് 24ന് രാവിലെ 11ന് മണക്കാട് വില്ലേജ് ഓഫീസില്‍ പരസ്യമായി ലേലം ചെയ്ത് വില്‍പ്പന നടത്തും. സര്‍ക്കാര്‍ ലേലത്തിന്റെ എല്ലാ നിബന്ധനകളും ഈ ലേലത്തിനും ബാധകമായിരിക്കും. കൂടുതല്‍ വിവരങ്ങല്‍ക്ക് മണക്കാട് വില്ലേജ് ഓഫീസുമായി ബന്ധപ്പെടണം.