കോഴിക്കോട്, കണ്ണൂർ, കാസറഗോഡ് ജില്ലകളിൽ ജൂൺ 9 ന് കേന്ദ്ര കാലാവസ്ഥ വകുപ്പ് റെഡ് അലർട്ട് പ്രഖ്യാപിച്ചു.

 തിരുവനന്തപുരം എൻ.സി.സി ഡയറക്ടറേറ്റിലെ വിജിലൻസ് ഓഫീസർ ഒഴിവിലേയ്ക്ക് സർവ്വീസിൽ നിന്നും വിരമിച്ച ആർമി/നേവി/എയർഫോഴ്‌സ്/സിവിലിയൻ ഓഫീസർമാരിൽ നിന്നും കരാർ നിയമനത്തിന് അപേക്ഷകൾ ക്ഷണിച്ചു. ഒരു ഒഴിവാണുള്ളത്. ഓൺലൈനായി  aociv.keraladte@nccindia.nic.in ലേക്ക് അപേക്ഷിക്കണം.

        കേരളത്തിനകത്ത് വിവിധ നഴ്സിംഗ് കോഴ്സുകൾ (പോസ്റ്റ് ബേസിക് ഡിപ്ലോമ ഇൻ സ്പെഷ്യാലിറ്റി നഴ്സിംഗ് ഒഴികെ) അനുവദനീയ കാലാവധിക്കുള്ളിൽ പൂർത്തീകരിച്ച് അവസാന വർഷ പരീക്ഷ എഴുതുവാൻ കഴിയാത്ത വിദ്യാർഥികൾക്ക് മേഴ്സി ചാൻസ് മുഖേന പരീക്ഷ എഴുതുന്നതിന് അനുമതി ലഭ്യമാക്കുന്നതിനായി ജൂൺ 24 ന് നടത്താനിരുന്ന മൾട്ടിപ്പിൾ ചോയ്സ് രീതിയിലുള്ള പരീക്ഷ ജൂലൈ 30 ലേക്ക് മാറ്റി വച്ചു.

        തിരുവനന്തപുരത്ത് പുതിയതായി ആരംഭിച്ച ചാല ഗവ. ഐ.ടി.ഐയിലെ വെൽഡർ ട്രേഡിലേക്ക് വർക്ക് ബെഞ്ച്, ഗ്യാസ് വെൽഡിങ് എക്വിപ്മെന്റ്സ്, ഫാബ്രിക്കേറ്റഡ് ടേബിൾസ്, ലൈറ്റ് മെഷീൻസ് ആൻഡ് എക്വിപ്മെന്റ്സ് എന്നീ പാക്കേജുകളിൽ ഉൾപ്പെടുത്തി ഐറ്റംസ് സംഭരിക്കുന്നതിന് ടെൻഡറുകൾ ക്ഷണിച്ചു.

2025-26 അധ്യയന വർഷം എസ്.എസ്.എൽ.സി., പ്ലസ് ടു, തത്തുല്യ പരീക്ഷകളിൽ മുഴുവൻ വിഷയങ്ങൾക്കും എ പ്ലസ് നേടിയ മദ്രസ അധ്യാപക ക്ഷേമനിധി അംഗങ്ങളുടെ മക്കൾക്ക് മെറിറ്റ് അവാർഡ് നൽകുന്നതിനായി മദ്രസ അധ്യാപക ക്ഷേമനിധി ബോർഡ് അപേക്ഷ ക്ഷണിച്ചു. ക്ഷേമനിധിയിൽ അംഗത്വമെടുത്ത് കുടിശികയില്ലാതെ 2 വർഷം പൂർത്തിയാക്കിയ അംഗങ്ങൾക്ക് അപേക്ഷിക്കാം.

തിരുവനന്തപുരം സ്റ്റേറ്റ് സെൻട്രൽ ലൈബ്രറിയിലേക്ക് 2026 ജൂലൈ 1 മുതൽ 2027 മാർച്ച് 31 വരെയുള്ള കാലയളവിലേയ്ക് ഇംഗ്ലീഷ്, മലയാളം, തമിഴ്, ഹിന്ദി ദിനപത്രങ്ങളും, ആനുകാലിക പ്രസിദ്ധീകരണങ്ങളും എത്തിച്ചു കൊടുക്കുന്നതിന് ക്വട്ടേഷൻ ക്ഷണിച്ചു.

കേരള സംസ്ഥാന പിന്നോക്ക വിഭാഗ വികസന കോർപ്പറേഷൻ മറ്റു പിന്നാക്ക മതന്യൂനപക്ഷ വിഭാഗങ്ങളിലെ ഗുണഭോക്താക്കൾക്കായി നടപ്പിലാക്കി വരുന്ന സ്വയംതൊഴിൽ വായ്പ, വിവാഹ ധനസഹായ വായ്പ, ഭവനനിർമ്മാണ വായ്പ, വിദ്യാഭ്യാസ വായ്പ, വിവിധോദ്ദേശ്യ വായ്പ, തുടങ്ങിയ വായ്പാപദ്ധതികളിലേക്ക് അപേക്ഷിക്കാം.

ശ്രീനാരായണ ഗുരു ഓപ്പൺ സർവകലാശാല ആരംഭിച്ച ശ്രീനാരായണഗുരു: ജീവിതവും ദർശനവും ഡിപ്ലോമ കോഴ്സിന്റെ ഉദ്ഘാടനം ഫാത്തിമ മാതാ നാഷണൽ കോളേജിൽ ശിവഗിരി മഠാധിപതി സച്ചിദാനന്ദ സ്വാമി നിർവഹിച്ചു.
ഓൺലൈനായും ഓഫ്‌ലൈനായും ക്ലാസുകൾ ക്രമീകരിച്ചിട്ടുണ്ട്.
30 ശതമാനം ഇന്റേണൽ മാർക്കും 70 ശതമാനം സെമസ്റ്റർ പരീക്ഷാ മാർക്കും അടിസ്ഥാനമാക്കിയാണ്  മൂല്യനിർണ്ണയം. 

വൈസ് ചാൻസലർ ഡോ വി പി ജഗതിരാജ് അധ്യക്ഷനായി.  സിൻഡിക്കറ്റ് അംഗങ്ങളായ ജി സുഗുണൻ, വി പി പ്രശാന്ത്, ഡോ എ ബാലകൃഷ്ണൻ, ഡോ സി ഉദയകല, ഓപ്പൺ യൂണിവേഴ്സിറ്റി റീജിയണൽ സെന്റർ ഡയറക്ടർ സോഫിയ രാജൻ, രജിസ്ട്രാർ അഭിലാഷ് ബാബു തുടങ്ങിയവർ പങ്കെടുത്തു.

നെടുമങ്ങാട് ഐ.ടി.ഡി പ്രൊജക്ട് ഓഫീസറുടെ അധികാരപരിധിയിൽ കട്ടേലയിൽ പ്രവർത്തിക്കുന്ന ഡോ.അംബേദ്കർ മെമ്മോറിയൽ മോഡൽ റസിഡൻഷ്യൽ സ്‌കൂളിൽ ഡാറ്റാ എൻട്രി ഓപ്പറേറ്ററുടെ താത്ക്കാലിക ഒഴിവുണ്ട്. ഡിഗ്രിയും അംഗീകൃത സർക്കാർ സ്ഥാപനത്തിൽ നിന്നുള്ള ഡിസിഎ മലയാളം അല്ലെങ്കിൽ ഇംഗ്ലീഷ് ടൈപ്പിംഗ് ആണ് യോഗ്യത.

പ്രവർത്തി പരിചയം ഉള്ളവർക്ക് മുൻഗണന ലഭിക്കും. പ്രായപരിധി 45 വയസ്സ്. യോഗ്യരായ ഉദ്യോഗാർത്ഥികൾ ബയോഡാറ്റയും സർട്ടിഫിക്കറ്റുകളും അവയുടെ പകർപ്പുകളും സഹിതം ഇന്ന് (ജൂൺ 9) രാവിലെ 10ന് സ്‌കൂളിൽ നടക്കുന്ന അഭിമുഖത്തിൽ പങ്കെടുക്കണമെന്ന് സീനിയർ സൂപ്രണ്ട് അറിയിച്ചു.

#വിവരങ്ങൾ പൊതുജനങ്ങൾക്ക് സ്വയം രേഖപ്പെടുത്താം#

സെൻസസ് 2027ന്റെ ഭാഗമായി പൊതുജനങ്ങൾക്ക് കുടുംബവിവരങ്ങൾ സ്വയം രേഖപ്പെടുത്തുന്നതിനുള്ള 'സെൽഫ് എനുമറേഷൻ' സൗകര്യം ജൂൺ 16 മുതൽ 30 വരെ ലഭ്യമാകും. മൊബൈൽ ഫോണിന്റെ സഹായത്തോടെ തന്നെ സെൽഫ് എനുമറേഷൻ പൂർത്തിയാക്കാവുന്നതാണ്. രണ്ട് ഘട്ടങ്ങളിലായുള്ള  സെൻസസ് നടപടിക്രമത്തിൽ, ഒന്നാം ഘട്ടത്തിൽ വീടുകളുടെ പട്ടിക തയ്യാറാക്കലും വീടുകളുടെ സെൻസസുമാണ് നടത്തുക. രണ്ടാം ഘട്ടത്തിലാണ് ജനസംഖ്യാ കണക്കെടുപ്പ് നടക്കുന്നത്.