ജില്ലയില്‍ സമര്‍പ്പിച്ചത് 4,707 അപേക്ഷകള്‍

നിയമസഭ തിരഞ്ഞെടുപ്പിനായി ഫോം 12 ഡി മുഖേന തപാല്‍ വോട്ടിനായി അപേക്ഷിച്ച എല്ലാ അവശ്യ സേവന വിഭാഗം ജീവനക്കാര്‍ക്കുമുള്ള തപാല്‍ വോട്ട് ഇന്ന് (മാര്‍ച്ച് 31) മുതല്‍ ഏപ്രില്‍ ഏഴ് വരെ രേഖപ്പെടുത്താം. തപാല്‍ വോട്ട് ചെയ്യുന്നതിനായി ജില്ലയിലെ 13 നിയോജക മണ്ഡലങ്ങളിലും പ്രത്യേക കേന്ദ്രങ്ങള്‍ ഒരുക്കിയിട്ടുണ്ട്. രാവിലെ ഒമ്പത് മുതല്‍ വൈകീട്ട് അഞ്ച് വരെ അതത് കേന്ദ്രങ്ങളിലെത്തി വോട്ട് രേഖപ്പെടുത്താം. 4,707 അപേക്ഷകളാണ് അവശ്യ സര്‍വീസുകാര്‍ക്കുള്ള തപാല്‍ വോട്ടിനായി ജില്ലയില്‍ സമര്‍പ്പിച്ചത്. 

സാമ്പത്തിക വര്‍ഷാരംഭ ദിനമായ ഏപ്രില്‍ ഒന്നിന് ട്രഷറി ഇടപാടുകള്‍ ഉണ്ടാകില്ലെന്ന് ജില്ലാ ട്രഷറി ഓഫീസര്‍ അറിയിച്ചു. മാര്‍ച്ച് 31ന് ട്രഷറി നീക്കിയിരിപ്പ് പൂര്‍ണമായും ബാങ്കില്‍ തിരിച്ചടക്കുന്നതിനാല്‍ ഏപ്രില്‍ മാസത്തെ ആദ്യ ഇടപാട് ദിവസമായ നാലാം തീയതി പണമിടപാടുകള്‍ ഏജന്‍സി ബാങ്കില്‍നിന്ന് പണം ലഭിക്കുന്നത് വരെ വൈകും.

ജില്ലയില്‍ നിയമസഭ തിരഞ്ഞെടുപ്പ് പോളിങ് ഡ്യൂട്ടിക്ക് നിയോഗിക്കപ്പെട്ട ഉദ്യോഗസ്ഥര്‍ക്ക് പോസ്റ്റല്‍ ബാലറ്റിന് ഏപ്രില്‍ രണ്ട് വരെ അപേക്ഷിക്കാം. തിരഞ്ഞെടുപ്പ് ഡ്യൂട്ടിയുള്ള ഉദ്യോഗസ്ഥര്‍ക്ക് അതത് ആര്‍.ഒമാരുടെ ഓഫീസിലും ജില്ലാതല ക്ലിയറന്‍സ് സെന്ററിലും (സിവില്‍ സ്റ്റേഷനിലെ രണ്ടാം നിലയിലെ ഡി ബ്ലോക്ക് ജില്ലാ ഓഡിറ്റ് കാര്യാലയം) രാവിലെ 10 മുതല്‍ വൈകീട്ട് അഞ്ച് വരെ ഫോം 12 മുഖേന അപേക്ഷ നല്‍കാം. 

നിയമസഭാ തിരഞ്ഞെടുപ്പിനോടനുബന്ധിച്ച് പേരാമ്പ്ര നിയോജക മണ്ഡലത്തില്‍ പോളിങ് ഡ്യൂട്ടി ലഭിച്ച ഉദ്യോഗസ്ഥര്‍ നിശ്ചയിക്കപ്പെട്ട ദിവസങ്ങളില്‍ ട്രെയിനിങ്ങിനായി പേരാമ്പ്ര സി.കെ.ജി മെമോറിയല്‍ കോളേജിലും പോളിങ് സാമഗ്രികള്‍ സ്വീകരിക്കാന്‍ ഏപ്രില്‍ എട്ടിന് പേരാമ്പ്ര ഹയര്‍സെക്കന്‍ഡറി സ്‌കൂളിലും ഹാജരാകണം.

നിയമസഭ തിരഞ്ഞെടുപ്പുമായി ബന്ധപ്പെട്ട് വിവിധ വകുപ്പുകളുടെ യോഗം ജില്ലാ തിരഞ്ഞെടുപ്പ് ഓഫീസര്‍ കൂടിയായ കലക്ടര്‍ സ്നേഹില്‍ കുമാര്‍ സിങ്ങിന്റെ അധ്യക്ഷതയില്‍ ചേര്‍ന്നു. ജില്ലയില്‍ പോളിങ് സ്റ്റേഷനുകളില്‍ ഹരിതചട്ടം നടപ്പാക്കല്‍, ഭിന്നശേഷി വോട്ടര്‍മാരെ സഹായിക്കല്‍, പോളിങ് സ്റ്റേഷനുകളിലെ ജീവനക്കാര്‍ക്ക് കുടുംബശ്രീ വഴി ഭക്ഷണം ഒരുക്കല്‍, മൊബൈല്‍ ഡെപ്പോസിറ്റ് സംവിധാനം, പ്രായമായവര്‍ക്കും ഭിന്നശേഷിക്കാര്‍ക്കും വോട്ടെടുപ്പ് ദിനത്തില്‍ യാത്രാ സംവിധാനം, തിരഞ്ഞെടുപ്പ് സേവനങ്ങളില്‍ എന്‍.എസ്.എസ് വോളണ്ടിയര്‍മാരെ നിയോഗിക്കല്‍ തുടങ്ങിയ കാര്യങ്ങള്‍ യോഗത്തില്‍ ചര്‍ച്ച ചെയ്തു.  

ജില്ലാ സപ്ലൈ ഓഫീസിലേക്ക് അഞ്ച് സീറ്റ്  വാഹനം (ഡ്രൈവര്‍ ഒഴികെ)   മൂന്ന് മാസത്തേക്ക് മാസ വാടകയ്ക്ക് നല്‍കുന്നതിന് ക്വട്ടേഷന്‍ ക്ഷണിച്ചു.  ജില്ലാ സപ്ലൈ ഓഫീസ്, കലക്ട്രേറ്റ്, കൊല്ലം 691013 വിലാസത്തില്‍ ഏപ്രില്‍ മൂന്ന് ഉച്ചയ്ക്ക് 2.30 നകം ലഭ്യമാക്കണം.  ഫോണ്‍: 0474 2794818.
 

കൊല്ലം വ്യാവസായിക ട്രൈബ്യൂണല്‍ സുനിത വിമല്‍ ഏപ്രില്‍ ആറ്, 13, 20, 27 തീയതികളില്‍ കോട്ടയം സിവില്‍സ്റ്റേഷന്‍ ബാര്‍ അസോസിയേഷന്‍ ഹാളിലും എട്ട്, 22, 29 തീയതികളില്‍ പുനലൂര്‍ മിനി സിവില്‍സ്റ്റേഷന്‍ ബാര്‍ അസോസിയേഷന്‍ ഹാളിലും  നാല്, 18, 25 തീയതികളില്‍ പീരുമേട് വ്യാവസായിക ട്രൈബ്യൂണല്‍ ഓഫീസിലും 28ന് തൊടുപുഴ കോടതി കോംപ്ലക്സിലും മറ്റു പ്രവൃത്തിദിനങ്ങളില്‍ ആസ്ഥാനത്തും തൊഴില്‍ തര്‍ക്ക കേസുകളും തൊഴിലാളി ഇന്‍ഷുറന്‍സ് കേസുകളും കോമ്പന്‍സേഷന്‍ കേസുകളും വിചാരണ നടത്തുമെന്ന് വ്യാവസായിക ട്രൈബ്യൂണല്‍ സെക്രട്ടറി അറിയിച്ചു. ഫോണ്‍: 04742792892.
 

കേരള മോട്ടോര്‍ ട്രാന്‍സ്പോര്‍ട്ട് വര്‍ക്കേഴ്സ് വെല്‍ഫയര്‍ ഫണ്ട് ബോര്‍ഡിലെ ജില്ലാ എക്സിക്യൂട്ടീവ് ഓഫീസര്‍/ അഡീഷണല്‍ ജില്ലാ എക്സിക്യൂട്ടീവ് ഓഫീസര്‍ (കാറ്റഗറി നം.415/2025) തസ്തികയിലേക്ക് ഏപ്രില്‍ ആറിന് രാവിലെ 10.30  മുതല്‍ 12.20  വരെ നടത്തുന്ന ഒ.എം.ആര്‍ പരീക്ഷയ്ക്ക്  തേവള്ളി സര്‍ക്കാര്‍ യുപി സ്‌കൂള്‍  പരീക്ഷാ കേന്ദ്രമായി അനുവദിച്ച രജിസ്റ്റര്‍ നമ്പര്‍ 1011391 മുതല്‍ 1011590 വരെയുള്ള   ഉദ്യോഗാര്‍ഥികളുടെ പരീക്ഷാ കേന്ദ്രം മുളങ്കാടകം സര്‍ക്കാര്‍ എച്ച്.എസ്   ആയി പുനഃക്രമീകരിച്ചതായി പി എസ് സി ജില്ലാ ഓഫീസര്‍ അറിയിച്ചു.
 

നിയമസഭ തിരഞ്ഞെടുപ്പുമായി ബന്ധപ്പെട്ട് പൊതുനിരീക്ഷക അപ്നീത് റിയത്ത്, ചെലവ് നിരീക്ഷകന്‍ പുഷ്‌കര്‍ കുമാര്‍ എന്നിവര്‍ എം.സി.എം.സി മീഡിയ സെല്‍ സന്ദര്‍ശിച്ചു. മീഡിയ സര്‍ട്ടിഫിക്കേഷന്‍ ആന്‍ഡ് മോണിറ്ററിങ് കമ്മിറ്റി (എം.സി.എം.സി) മീഡിയ സെല്‍ പ്രവര്‍ത്തനങ്ങള്‍ ജില്ലാ ഇന്‍ഫര്‍മേഷന്‍ ഓഫീസര്‍ സി പി അബ്ദുല്‍ കരീം വിശദീകരിച്ചു.

കരുനാഗപ്പള്ളി,  ചവറ,   കുന്നത്തൂര്‍,   കൊട്ടാരക്കര,  പത്തനാപുരം,  പുനലൂര്‍,  ചടയമംഗലം   മണ്ഡലങ്ങളിലെ നിയമസഭാ തിരഞ്ഞെടുപ്പ് പ്രക്രിയയ്ക്കായി ക്രിസ്തുരാജ് ഹൈസ്‌കൂള്‍, സെന്റ് അലോഷ്യസ് ഹൈസ്‌കൂള്‍ എന്നിവിടങ്ങളില്‍ സ്‌ട്രോങ്ങ് റൂമുകളും അനുബന്ധ സജ്ജീകരണങ്ങളും ഒരുക്കുന്നതിന് (സിവില്‍ വര്‍ക്കുകള്‍) ക്വട്ടേഷന്‍ ക്ഷണിച്ചു. അംഗീകൃത സ്ഥാപനങ്ങള്‍ക്ക് ക്വട്ടേഷന്‍ സമര്‍പ്പിക്കാം. ഏപ്രില്‍ മൂന്ന് വൈകിട്ട് അഞ്ചിനകം ജില്ലാ കലക്ടറുടെ കാര്യാലയത്തില്‍ ലഭ്യമാക്കണം. ഫോണ്‍: 0474 2794040.