കുഷ്ഠരോഗവുമായി ബന്ധപ്പെട്ട് ജില്ലയില്‍ ഇതുവരെ റിപ്പോര്‍ട്ട് ചെയ്തത് 36 കേസുകളാണ്. നേരത്തെ 32 പേര്‍ക്കായിരുന്നു രോഗം സ്ഥിരീകരിച്ചത്. കഴിഞ്ഞ മാസം നാല് പേര്‍ക്കുകൂടി രോഗം സ്ഥിരീകരിച്ചതോടെ ജില്ലയില്‍ നിലവില്‍ രോഗം സ്ഥിരീകരിച്ചവരുടെ എണ്ണം 36 ആയി.

ബാക്ടീരിയ ഉണ്ടാക്കുന്ന അസുഖമാണ് കുഷ്ഠരോഗം. രോഗം ബാധിച്ചവര്‍ ചുമക്കുമ്പോഴോ തുമ്മുമ്പോഴോ നേരിട്ട് സംസാരിക്കുകയോ ചെയ്യുമ്പോള്‍ അതുവഴി അസുഖം പകരും. മറ്റൊരാളുടെ ശരീരത്തില്‍ പ്രവേശിക്കുന്ന രോഗാണു വര്‍ഷങ്ങളോളം യാതൊരുവിധ പ്രശ്‌നങ്ങളും സൃഷ്ടിക്കാതെ നില്‍ക്കും. എന്നാല്‍ അഞ്ചുമുതല്‍ പത്തുവര്‍ഷം ആകുമ്പോള്‍ രോഗലക്ഷണങ്ങള്‍ കണ്ടുതുടങ്ങും. തൊലിപ്പുറത്തെ നിറംമങ്ങിയ പാടുകള്‍, തടിച്ച ഞരമ്പുകള്‍, അരികുകള്‍ വ്യക്തമല്ലാത്തതും സ്പര്‍ശന ശേഷിയില്ലാത്തതുമായ വെളുത്തതോ ചുവന്നതോ ആയ അടയാളം, വേദന ഇല്ലാത്ത മുറിവുകള്‍, ശരീരത്തിലെ നിറംമാറ്റം, ഉറച്ച ത്വക്ക് പാടുകള്‍, അനുഭൂതിക്കുറവ് തുടങ്ങിയവയാണ് രോഗലക്ഷണങ്ങള്‍.

കുഷ്ഠരോഗ കേസുകള്‍ ആരോഗ്യ സന്നദ്ധ പ്രവര്‍ത്തകര്‍ വീടുകള്‍ തോറും സന്ദര്‍ശിച്ച് രോഗനിര്‍ണയത്തിലൂടെ കണ്ടെത്തി പൂര്‍ണമായും സൗജന്യ ചികിത്സ ഉറപ്പുവരുത്തുന്ന യജ്ഞമാണ് അശ്വമേധം 7.0 കുഷ്ഠരോഗ നിര്‍ണയ ഭവന സന്ദര്‍ശന പരിപാടി. കുഷ്ഠരോഗത്തെ പൂര്‍ണമായി ഇല്ലാതാക്കുകയാണ് പരിപാടിയിലൂടെ ലക്ഷ്യമിടുന്നത്. ഭവന സന്ദര്‍ശനത്തിലൂടെ രോഗം തുടക്കത്തിലെ കണ്ടെത്തി ചികിത്സ നല്‍കുക, രോഗവ്യാപനം തടയുക, സമൂഹത്തില്‍ ബോധവത്ക്കരണം വര്‍ധിപ്പിക്കുക എന്നിവക്കാണ് മുന്‍ഗണന നല്‍കുന്നത്.

അശ്വമേധം 7.0:  കുഷ്ഠരോഗ നിര്‍ണയ ഭവന സന്ദര്‍ശനത്തിന് ജില്ലയില്‍ തുടക്കം

ആരോഗ്യ വകുപ്പ് നടത്തുന്ന 'അശ്വമേധം 7.0' കുഷ്ഠരോഗ നിര്‍ണയ ഭവന സന്ദര്‍ശന യജ്ഞത്തിന് ജില്ലയില്‍ തുടക്കമായി. ജില്ലാതല ഉദ്ഘാടനം രാമനാട്ടുകര മുനിസിപ്പാലിറ്റി ചെയര്‍മാന്‍ കല്ലട മുഹമ്മദ് അലി നിര്‍വഹിച്ചു. കുഷ്ഠരോഗം തിരിച്ചറിയാത്തതിനാല്‍ ചികിത്സ ലഭിക്കാതെ കഴിയുന്നവരെ കണ്ടെത്തി ചികിത്സ ഉറപ്പാക്കുകയാണ് ജനുവരി 20 വരെ തുടരുന്ന ക്യാമ്പയിന്റെ ലക്ഷ്യം.

  തൃശ്ശൂർ ഗവ.മെഡിക്കൽ കോളേജ് ആശുപത്രിയിലെ കൺസ്യൂമർ സ്റ്റോറിന്റെ ഒരു വർഷത്തെ (2026 - 2027) നടത്തിപ്പ് അനുവദിക്കുന്നതിന് മത്സരാധിഷ്ഠിത ഇ-ടെൻഡറുകൾ ക്ഷണിച്ചു. ജനുവരി 24 വരെ ഇ-ടെൻഡർ സമർപ്പിക്കാം. പങ്കെടുക്കാൻ താത്പര്യമുള്ളവർക്ക് വിശദ വിവരങ്ങൾ മെഡിക്കൽ കോളേജ് ആശുപത്രി ഓഫീസിൽ നിന്നോ അല്ലെങ്കിൽ https:/etenders.kerala.gov.in എന്ന വെബ് സൈറ്റിൽ നിന്നും ലഭിക്കും.
ഫോൺ: 0487 220310, 0487 2200219

ജില്ലയിലെ എച്ച്‌ഐവി പ്രതിരോധ പ്രവർത്തനങ്ങൾ വിലയിരുത്തുന്നതിനായി ആരോഗ്യ വകുപ്പ് അഡീഷണൽ ഡയറക്ടറും കേരള സ്റ്റേറ്റ് എയ്ഡ്സ് കൺട്രോൾ സൊസൈറ്റി പ്രോജക്ട് ഡയറക്ടറുമായ ഡോ. പീയൂഷ് നമ്പൂതിരിപ്പാട് എം ജില്ലയിൽ സന്ദർശനം നടത്തി. ഗവ. മെഡിക്കൽ കോളേജിൽ പ്രവർത്തിക്കുന്ന ഉഷസ് എ.ആർ.ടി. സെന്റർ, ജ്യോതിസ് ഐസിടിസി (ഇന്റഗ്രേറ്റഡ് കൗൺസിലിംഗ് ആൻഡ് ടെസ്റ്റിംഗ് സെന്റർ), വൈറൽ ലോഡ് ടെസ്റ്റിംഗ് ലബോറട്ടറി, സ്റ്റേറ്റ് റഫറൻസ് ലബോറട്ടറി എന്നിവ സന്ദർശിച്ച പ്രോജക്ട് ഡയറക്ടർ പ്രവർത്തനങ്ങൾ വിലയിരുത്തി അവ കൂടുതൽ ഊർജിതമാക്കുന്നതിനുള്ള നിർദ്ദേശങ്ങൾ നൽകി.

നാടിന് ഉത്സവമായി കൊയിലാണ്ടി നഗരസഭയിലെ കുറുവങ്ങാട് തരിശുനില നെല്‍കൃഷി വിളവെടുപ്പ്. കൊയ്ത്തുത്സവം നഗരസഭ ചെയര്‍മാന്‍ യു കെ ചന്ദ്രന്‍ ഉദ്ഘാടനം ചെയ്തു. കൊയിലാണ്ടി നഗരസഭ 2025-26 ജനകീയസൂത്രണം വാര്‍ഷിക പദ്ധതിയുടെ ഭാഗമായ സുധീര്‍ ഈന്താട്ട്, ദിവ്യശ്രീ ദമ്പതികളാണ് ഒരു ഏക്കാറോളം വരുന്ന തരിശു നിലത്ത് നെല്‍കൃഷി ചെയ്തത്. 

കൊടുങ്ങല്ലൂര്‍ ശ്രീകുരുംബ ഭഗവതി ക്ഷേത്രത്തിലെ താലപ്പൊലി മഹോത്സവവുമായി ബന്ധപ്പെട്ട് ക്രമാതീതമായ ജനത്തിരക്ക് പരിഗണിച്ച് ഒന്നാം താലപ്പൊലി ആഘോഷിക്കുന്ന ജനുവരി 15 ന് കൊടുങ്ങല്ലൂര്‍ താലൂക്ക് പരിധിയിലെ എല്ലാ സര്‍ക്കാര്‍ സ്ഥാപനങ്ങള്‍ക്കും അങ്കണവാടികള്‍ ഉള്‍പ്പെടെയുള്ള വിദ്യാഭ്യാസ സ്ഥാപനങ്ങള്‍ക്കും അവധി പ്രഖ്യാപിച്ചുകൊണ്ട് ജില്ലാ കളക്ടര്‍ അര്‍ജുന്‍ പാണ്ഡ്യന്‍ ഉത്തരവിറക്കി. മുന്‍നിശ്ചയിച്ച പ്രകാരമുള്ള പൊതു പരീക്ഷകള്‍ക്കും കേന്ദ്ര-സംസ്ഥാന, അര്‍ദ്ധസര്‍ക്കാര്‍ സ്ഥാപനങ്ങളിലേക്ക് നിയമനത്തിനായി നടത്തുന്ന പരീക്ഷകള്‍ക്കും അവധി ബാധകമല്ല.

സംസ്ഥാന സര്‍ക്കാര്‍ നടപ്പാക്കുന്ന മുഖ്യമന്ത്രിയുടെ കണക്ട്-ടു-വര്‍ക്ക് സ്‌കോളര്‍ഷിപ്പ് പദ്ധതിയിലേക്ക് അപേക്ഷ ക്ഷണിച്ചു. വാര്‍ഷിക കുടുംബ വരുമാനം ഒരു ലക്ഷം രൂപയോ അതില്‍ താഴെയോ ഉള്ളവര്‍ക്ക് 1000 രൂപ വീതം ഒരു വര്‍ഷത്തേക്ക് നല്‍കുന്നതാണ് പദ്ധതി. പ്രായപരിധി: 18-30 വയസ്സ്. തൊഴില്‍ രഹിതരും വിദ്യാര്‍ത്ഥികളുമായവര്‍ക്ക് അപേക്ഷിക്കാം. കേന്ദ്ര-സംസ്ഥാന സര്‍ക്കാര്‍ വകുപ്പുകള്‍, സ്ഥാപനങ്ങള്‍ എന്നിവ വിതരണം ചെയ്യുന്ന മറ്റേതെങ്കിലും സ്‌കോളര്‍ഷിപ്പുകള്‍ ലഭിക്കുന്നവരെ പരിഗണിക്കുന്നതല്ല. അപേക്ഷകള്‍ www.eemployment.kerala.gov.in എന്ന വെബ്‌സൈറ്റ് മുഖേന നല്‍കണം. ഫോണ്‍: 0495- 2225995.