നിയമസഭാ തെരഞ്ഞെടുപ്പ് ഏപ്രില്‍ ഒന്‍പതിന് നടക്കാനിരിക്കെ ഹോം വോട്ടിങ് ഈ മാസം 30ന് ആരംഭിക്കും. ജില്ലയില്‍ ഇതുവരെ പതിനൊന്നായിരത്തോളം വോട്ടര്‍മാരാണ് ഹോം വോട്ടിങ്ങിനായി അപേക്ഷിച്ചിട്ടുള്ളത്. ജില്ലയിലെ 16 നിയോജക മണ്ഡലങ്ങളിലായി 181 പേരടങ്ങുന്ന ടീമിനെയാണ് ഹോം വോട്ടിങിനായി നിയോഗിച്ചിട്ടുള്ളത്.

അരീക്കോട് ഗവ. ഐ.ടി.ഐ.യില്‍ പ്ലസ് ടു യോഗ്യതയുള്ളവര്‍ക്ക് ഫിനാന്‍ഷ്യല്‍ അക്കൗണ്ടിംഗ് ആന്റ് ടാക്സേഷന്‍ കോഴ്‌സിലേക്ക് പ്രവേശനം ആരംഭിച്ചു. ഇന്റേണ്‍ഷിപ്പ്, ഇംഗ്ലീഷ് ഭാഷാ പരിജ്ഞാനം, വ്യക്തിത്വ വികസനം എന്നിവയില്‍ പ്രത്യേക പരിശീലനം നല്‍കും. ഫോണ്‍: 8590082853, 7510481819.

നിയമസഭാ തെരഞ്ഞെടുപ്പില്‍ 100 ശതമാനവും ഭിന്നശേഷി സൗഹൃദമായ മൂന്നു ബൂത്തുകളുടെ ഒരുക്കങ്ങള്‍ ജില്ലയില്‍ പുരോഗമിക്കുന്നു. ഒരു ജില്ലയില്‍ കുറഞ്ഞത് ഒരു ഇന്‍ക്ലുസീവ് ബൂത്തെങ്കിലുമുണ്ടായിരിക്കണമെന്ന ചീഫ് ഇലക്ടറല്‍ ഓഫീസറുടെ നിര്‍ദേശത്തെത്തുടര്‍ന്നാണ് മൂന്നു നിയോജക മണ്ഡലങ്ങളിലായി വിവിധ തരത്തിലുള്ള ശാരീരിക ബുദ്ധിമുട്ടുകള്‍ അനുഭവിക്കുന്ന എല്ലാവര്‍ക്കും വോട്ട് ചെയ്യുന്നതിനുള്ള സജ്ജീകരണങ്ങളോടെ ബൂത്തുകള്‍ ഒരുങ്ങുന്നത്.

പാചക വാതക ക്ഷാമം രൂക്ഷമാവുന്ന സാഹചര്യത്തില്‍ ജില്ലാ കളക്ടര്‍ ഡോ. വിനയ് ഗോയലിന്റെ നേതൃത്വത്തില്‍ പൊതു വിതരണ വകുപ്പ് ഉദ്യോഗസ്ഥരുടെയും ഓയില്‍ ഏജന്‍സികളുടെയും യോഗം ചേര്‍ന്നു. ജില്ലയില്‍ ഗാര്‍ഹിക പാചകവാതക സിലിണ്ടറുകളുടെ ലഭ്യതയില്‍ യാതൊരു തരത്തിലുള്ള ആശങ്കയും വേണ്ടെന്നും നിലവില്‍ ജില്ലയില്‍ ഗാര്‍ഹിക പാചകവാതക ദൗര്‍ലഭ്യമില്ലെന്നും ബുക്ക് ചെയ്തിട്ടുള്ള എല്ലാവര്‍ക്കും യാതൊരു തടസ്സവും കൂടാതെ ഗ്യാസ് സിലിണ്ടറുകള്‍ ബന്ധപ്പെട്ട ഏജന്‍സികള്‍ വഴി വീടുകളില്‍ എത്തിച്ച് വിതരണം നടത്തി വരുന്നുണ്ടെന്നും ജില്ലാ കളക്ടര്‍ അറിയിച്ചു.

ജില്ലാ ലീഗൽ സർവീസ് അതോറിറ്റി, ഇലക്ഷൻ കമ്മീഷൻ, ജനമൈത്രി പോലീസ് എന്നിവരുടെ സംയുക്താഭിമുഖ്യത്തിൽ മാനവീയം വീഥിയിൽ ' എൻ്റെ വോട്ട് എൻ്റെ ശക്തി' എന്ന പേരിൽ  വോട്ടവകാശ വിനിയോഗ ബോധവത്ക്കരണം സംഘടിപ്പിച്ചു.

പ്രിൻസിപ്പൽ ജില്ലാ ജഡ്ജി എസ്. നസീറ പരിപാടി ഉദ്ഘാടനം ചെയ്തു. ചീഫ് ഇലക്ടറൽ ഓഫീസർ രത്തൻ യു. കേൽക്കർ മുഖ്യ പ്രഭാഷണം നടത്തി. അഡീഷണൽ ചീഫ് ഇലക്ടറൽ ഓഫീസർ ഷർമിള, സീനിയർ സിവിൽ ജഡ്ജി എസ്. ഷംനാദ്, അസിസ്റ്റൻ്റ് കളക്ടർ ശിവശക്തിവേൽ, ഐ.ജി അജിതാ ബീഗം, ഐജി നിശാന്തിനി തുടങ്ങിയർ പങ്കെടുത്തു.

നിയമസഭാ പൊതുതിരഞ്ഞെടുപ്പുമായി ബന്ധപ്പെട്ട്  തിരഞ്ഞെടുപ്പ് നിരീക്ഷകരെ സ്ഥാനാർത്ഥികൾക്കും ഇലക്ഷൻ ഏജന്റുമാർക്കും നേരിൽ കാണാം.  തിരഞ്ഞെടുപ്പ് സംബന്ധമായ പരാതികളും പ്രശ്‌നങ്ങളും ശ്രദ്ധയിൽ പെടുത്തുന്നതിനും സംശയനിവാരണത്തിനും ഈ അവസരം ഉപയോഗിക്കാമെന്ന്നിരീക്ഷകർ അറിയിച്ചു.  പൊതുജനങ്ങൾക്കും നിരീക്ഷകരെ നേരിൽ കണ്ട് വിവരങ്ങൾ അറിയിക്കാവുന്നതാണ്. ജില്ലയിൽ നാല് പൊതു നിരീക്ഷകരും നാല് ചെലവ് നിരീക്ഷകരും ഒരു പോലീസ് ഒബ്‌സർവറുമാണുള്ളത്.

നിയമസഭാ തിരഞ്ഞെടുപ്പുമായി ബന്ധപ്പെട്ട് പാറശ്ശാല നിയോജക മണ്ഡലത്തിലെ പോളിംഗ് ജീവനക്കാർക്ക് വോട്ട് രേഖപ്പെടുത്തുന്നതിനായി വോട്ടേഴ്സ് ഫെസിലിറ്റേഷൻ സെൻ്റർ ധനുവച്ചപുരം വിടിഎം എൻഎസ്.എസ് കോളേജിൽ സജ്ജീകരിക്കുമെന്ന് പാറശ്ശാല നിയോജക മണ്ഡലം വരണാധികാരി അറിയിച്ചു.

ഏപ്രിൽ ഒന്ന് മുതൽ കോളേജിലെ രണ്ട് സ്ഥലത്തായിട്ടാണ് സെൻ്ററുകൾ ക്രമീകരിക്കുക. രാവിലെ 9 മുതൽ വൈകുന്നേരം 5 മണി വരെ വോട്ട് രേഖപ്പെടുത്താം.

കൂടാതെ എസൻഷ്യൽ സർവ്വീസ് ജീവനക്കാർക്കുള്ള പോസ്റ്റൽ  വോട്ടിംഗ് സെൻ്റർ മാർച്ച് 31ന് പാറശ്ശാല ഗവ ഗേൾസ് ഹയർ സെക്കൻ്ററി സ്കൂളിലും സജ്ജമാക്കും.  രാവിലെ 9 മുതൽ വൈകുന്നേരം 5 വരെയാണ് സമയം.

നിയമസഭാ പൊതുതിരഞ്ഞെടുപ്പിനോടനുബന്ധിച്ച്  ആദ്യഘട്ട റാന്‍ഡമൈസേഷന്‍ പൂര്‍ത്തിയാക്കി  കളക്ടററേറ്റിലെ സ്ട്രോംഗ് റൂമില്‍ സൂക്ഷിച്ചിട്ടുള്ള ഇലക്ട്രോണിക് വോട്ടിംഗ് മെഷീനുകള്‍ ബന്ധപ്പെട്ട വരണാധികാരികള്‍ക്ക് വിതരണം ചെയ്തു തുടങ്ങി.  ഇവിഎം വിതരണത്തിന്റെ ഉദ്ഘാടനവും ഫ്ളാഗ് ഓഫും ജില്ലാ കളക്ടറും ജില്ലാ തിരഞ്ഞെടുപ്പ് ഉദ്യോഗസ്ഥയുമായ  അനു കുമാരി  നിര്‍വഹിച്ചു.

 വര്‍ക്കല, ചിറയിന്‍കീഴ്, വാമനപുരം, കാട്ടാക്കട, അരുവിക്കര, അറ്റിങ്ങല്‍, നെടുമങ്ങാട് മണ്ഡലങ്ങളിലേക്കുള്ള മെഷീനുകളുടെ വിതരണമാണ് പൂര്‍ത്തിയായത്‌