നേരിട്ടുള്ള സമ്പര്‍ക്കത്തിലൂടെ 320 പേര്‍ക്ക് വൈറസ്ബാധ
ഉറവിടമറിയാതെ രോഗബാധിതരായവര്‍ 15 പേര്‍
മൂന്ന് ആരോഗ്യ പ്രവര്‍ത്തകര്‍ക്കും രോഗബാധ
രോഗബാധിതരായി ചികിത്സയില്‍ 3,234 പേര്‍
ആകെ നിരീക്ഷണത്തിലുള്ളത് 33,926 പേര്‍

പൊന്നാനി നിയോജകമണ്ഡലത്തിലെ വിവിധ പദ്ധതികള്‍ക്ക് 782.60 ലക്ഷം രൂപ അനുവദിച്ച് ഭരണാനുമതിയായി. മണ്ഡലത്തിലെ വിവിധ റോഡുകളുടെ പ്രവൃത്തികള്‍ക്കാണ് തുക അനുവദിച്ചിരിക്കുന്നത്. പദ്ധതി അടിയന്തരമായി സാങ്കേതിക അനുമതി നേടി ടെന്‍ഡര്‍ ചെയ്ത് പ്രവൃത്തി നടത്തുന്നതിന് സ്പീക്കര്‍ പി. ശ്രീരാമകൃഷ്ണന്‍ ബന്ധപ്പെട്ട ഉദ്യോഗസ്ഥര്‍ക്ക് നിര്‍ദ്ദേശം നല്‍കി.

അരീക്കോട് ഐ.ടി.ഐ പ്രവേശനത്തിനുള്ള അപേക്ഷകള്‍ www.det.kerala.gov.in എന്ന വെബ്‌സൈറ്റിലൂടെ സെപ്തംബര്‍ 24നകം സമര്‍പ്പിക്കണം. അപേക്ഷാ ഫീസായ 100 രൂപയും ഓണ്‍ലൈനായി അടയ്ക്കണം. ഫോണ്‍: 0483 -2850238, 9446310127.

താനാളൂര്‍ പഞ്ചായത്ത് 23-ാം വാര്‍ഡിലെ കെ പുരത്ത് നിര്‍മാണം പൂര്‍ത്തീകരിച്ച 80-ാം നമ്പര്‍ അങ്കണവാടിയുടെ ഉദ്ഘാടനം വി.അബ്ദുറഹ്മാന്‍ എം.എല്‍.എ നിര്‍വഹിച്ചു. താനാളൂര്‍ പഞ്ചായത്ത് പ്രസിഡന്റ് എന്‍.മുജീബ് ഹാജി അധ്യക്ഷനായി. എടപ്പയില്‍ കരുണാകരന്റെ സ്മരണയില്‍ മക്കളായ ദയാനന്ദന്‍ രാജന്‍, ഹരീന്ദ്രന്‍, പുഷ്പ എന്നിവര്‍ സൗജന്യമായി വിട്ടുനല്‍കിയ സ്ഥലത്താണ് അങ്കണവാടി നിര്‍മിച്ചിരിക്കുന്നത്. വി.അബ്ദുറഹ്മാന്‍ എം.എല്‍.എയുടെ ആസ്തി വികസന ഫണ്ടില്‍ നിന്നും 13 ലക്ഷം രൂപ ചെലവിലാണ് നിര്‍മാണം പൂര്‍ത്തീകരിച്ചത്. വാര്‍ഡംഗം എടപ്പയില്‍ സുജ, അങ്കണവാടി വര്‍ക്കര്‍ ഉഷ പുന്നക്കല്‍ എന്നിവര്‍ സംസാരിച്ചു.
 

സപ്ലൈകോ ഒന്നാം വിള നെല്ലുസംഭരണത്തിന്  ഓണ്‍ലൈന്‍ രജിസ്‌ട്രേഷനായി പാഡി പോര്‍ട്ടല്‍ തുറന്നു. കഴിഞ്ഞ ഒന്നാംവിളയില്‍ സപ്ലൈകോക്ക് നെല്ല് അളന്ന കര്‍ഷകര്‍ ഇത്തവണ രജിസ്റ്റര്‍ ചെയ്യേണ്ടതില്ല. അവരുടെ രജിസ്‌ട്രേഷന്‍ കൃഷിഭവന്റെ സഹകരണത്തോടെ പുതുക്കുന്നതിനുള്ള നടപടികള്‍ ആരംഭിക്കും. നേരത്തെ നല്‍കിയ വിശദാംശങ്ങളില്‍ മാറ്റം വരുത്താന്‍ കൃഷിഭവനുകളില്‍ നേരിട്ടോ ഇ-മെയില്‍ മുഖേനയോ അപേക്ഷ നല്‍കി പരിഹരിക്കാം.
 

കേരള ലേബര്‍ വെല്‍ഫെയര്‍ ഫണ്ട് ബോര്‍ഡിലെ അംഗങ്ങളായ തൊഴിലാളികളുടെ മക്കള്‍ക്ക് സംസ്ഥാനത്തെ 12 ഐ.ടി.ഐകളിലെ 13 ട്രേഡുകളിലേക്കുള്ള പ്രവേശനത്തിനുള്ള അപേക്ഷ ക്ഷണിച്ചു. അഡ്മിഷന്‍ ലഭിക്കുന്ന ട്രെയിനിക്ക് പ്രതിമാസം 300 രൂപ സ്‌റ്റൈപ്പന്‍ഡ് ലഭിക്കും. താത്പര്യമുള്ളവര്‍ www.labourwelfarefund.in എന്ന വെബ്‌സൈറ്റിലൂടെ സെപ്തംബര്‍ 28ന് വൈകീട്ട് അഞ്ചിനകം അപേക്ഷ സമര്‍പ്പിക്കണം.
 

ജില്ലയില്‍ കോവിഡ് കേസുകള്‍ വര്‍ധിക്കുന്ന സാഹചര്യത്തില്‍ ആശുപത്രികള്‍, സ്വകാര്യലാബുകള്‍ എന്നിവ സര്‍ക്കാര്‍ നിര്‍ദ്ദേശങ്ങള്‍ പാലിക്കണമെന്ന് ജില്ലാ മെഡിക്കല്‍ ഓഫീസര്‍ ഡോ.കെ.സക്കീന അറിയിച്ചു. ജില്ലയില്‍ വിവിധ ലാബുകളില്‍ ചെയ്യുന്ന കോവിഡ് ടെസ്റ്റ് വിവരങ്ങള്‍ ക്രോഡീകരിക്കുന്നതിനായി ടെസ്റ്റുകള്‍ ചെയ്യുന്ന എല്ലാ സ്വകാര്യ ലാബുകളും അവരുടെ ഓരോ ദിവസത്തെയും പോസിറ്റീവ്, നെഗറ്റീവ് കേസുകള്‍ Healthmon  എന്ന പോര്‍ട്ടലില്‍ അപ്‌ലോഡ് ചെയ്യണം. റിപ്പോര്‍ട്ട് dsomal...@gmail.com എന്ന ഇ-മെയിലിലേക്കും അയക്കണം. റിപ്പോര്‍ട്ട് ചെയ്യാത്ത ലാബുകള്‍ക്കെതിരെ ശക്തമായ നടപടി സ്വീകരിക്കുമെന്നും ഡി.എം.ഒ അറിയിച്ചു.