പത്തനംതിട്ട ഡിസ്ട്രിക്റ്റ് കോ-ഓപ്പറേറ്റീവ് ഹോസ്പിറ്റല്‍ ആന്റ് റിസര്‍ച്ച് സെന്റര്‍ സൊസൈറ്റി ലിമിറ്റഡ് ആശുപത്രി ഇലന്തൂര്‍ പാലച്ചുവട് ജംഗ്ഷനില്‍ പ്രവര്‍ത്തനം ആരംഭിക്കുന്നതിന് മുന്നോടിയായി പ്രവര്‍ത്തനങ്ങള്‍ ഏകോപിപ്പിക്കുന്നതിന് ആരംഭിക്കുന്ന സംഘം ഓഫീസ് ഇന്ന് (സെപ്റ്റംബര്‍ 17) രാവിലെ 10ന് വീണാ ജോര്‍ജ് എംഎല്‍എ ഉദ്ഘാടനം നിര്‍വഹിക്കും. 

നാളെ  നടക്കേണ്ടിയിരുന്ന  ഹരിപ്പാട് നഗരസഭ മന്ദിരത്തിന്റെ  ഉദ്ഘാടന ചടങ്ങും താലൂക്ക് ആശുപത്രിയിലെ X RAY യൂണിറ്റിന്റെ സ്വിച്ച് ഓൺ കർമ്മവും  24-9-2020 ലേയ്ക്ക് മാറ്റിവെച്ചിരിക്കുന്നു . നഗരസഭയിലെ  രണ്ട് ജീവനക്കാർക്ക് കോവിഡ് പോസിറ്റീവ്  ആയതിനാലാണ് തീരുമാനം. സെപ്റ്റംബർ  22ന് മാത്രമേ ഇനി നഗരസഭ തുറന്ന്പ്രവർത്തിക്കൂവെന്നും  എല്ലാ ജീവനക്കാരും,  ഫസ്റ്റ് കോൺടാക്ട് ഉള്ളവരും ക്വോറന്റീനിൽ പോകാൻ നിർദേശിയ്ക്കുന്നതായും ഹരിപ്പാട് നഗരസഭ ചെയർപേഴ്സൺ വിജയമ്മ പുണ്ണൂർമഠം അറിയിച്ചു.

കോവിഡ് 19 രോഗ വ്യാപനം നിയന്ത്രിക്കുന്നതിന്റെ  ഭാഗമായി ജില്ലയിൽ കണ്ടെയ്ൻമെന്റ് സോണായി  പ്രഖ്യാപിച്ചിരുന്ന,  ആലപ്പുഴ നഗരസഭ വാർഡ് 2, വാർഡ് 50, ചേർത്തല സൗത്ത് ഗ്രാമപഞ്ചായത്ത്‌ വാർഡ് 18, ചേന്നം പള്ളിപ്പുറം ഗ്രാമപഞ്ചായത്ത്‌ വാർഡ് 6, വാർഡ് 9, വെണ്മണി ഗ്രാമപഞ്ചായത്ത്‌ വാർഡ് 6 വാർഡ് 9, ആല ഗ്രാമപഞ്ചായത്ത്‌  വാർഡ് 5, ചെന്നിത്തല ഗ്രാമപഞ്ചായത്ത്‌  8, 16, 18 വാർഡുകൾ, ചേപ്പാട് ഗ്രാമപഞ്ചായത്ത്‌ വാർഡ് 14, മാന്നാർ ഗ്രാമപഞ്ചായത്ത്‌ വാർഡ് 9, ആര്യാട് ഗ്രാമപഞ്ചായത്ത്‌ വാർഡ് 17, നീലംപേരൂർ ഗ്രാമപഞ്ചായത്ത്‌ 6, 7 വാർഡുകൾ, ചെറിയനാട് ഗ്രാമപഞ്ചായത്ത്‌ വാർഡ് 8എന്നിവ  കണ്ടെയ്ൻമെന്റ് സോണിൽ നിന്നും ഒഴിവാക്കി.

ആലപ്പുഴ: പുറക്കാട്  ഗ്രാമപഞ്ചായത്തിൽ തിരഞ്ഞെടുപ്പുമായി ബന്ധപെട്ട് ഓഗസ്റ് 12ന് പ്രസിദ്ധീകരിച്ച വോട്ടർപട്ടികയിൽ നിന്നും പേര് നീക്കം ചെയ്യുന്നതിന് ഫാറം അഞ്ച് മുഖേന പുറക്കാട് ഗ്രാമപഞ്ചായത്ത് ഓഫീസിൽ സമർപ്പിച്ച ആക്ഷേപങ്ങൾ പ്രകാരം പേര് നീക്കം ചെയ്യണ്ടവരുടെ പട്ടിക ഗ്രാമപഞ്ചായത്ത് ഓഫീസിൽ പ്രസിദ്ധീകരിച്ചിട്ടുണ്ട്. ഈ ലിസ്റ്റിൽ ആക്ഷേപം ഉള്ളവർ മതിയായ രേഖകൾ സഹിതം ഈ മാസം 19 ന് വൈകിട്ട് 5 മണിക്കകം ഓഫീസിൽ നേരിട്ട് ഹാജരാകണം. 
വിശദ വിവരങ്ങൾക്ക് ഫോൺ :0477 227 2031

ആലപ്പുഴ :  തണ്ണീർമുക്കം വടക്ക് കയർ വ്യവസായ സഹകരണ സംഘത്തിൽ ഓട്ടോമാറ്റിക് സ്പിന്നിങ് മെഷീൻ സ്ഥാപിക്കുന്നതിന്റെ ഉദ്ഘാടനം ധനകാര്യ കയർ വകുപ്പ് മന്ത്രി ഡോ. ടി എം തോമസ് ഐസക് ഓൺലൈൻ വഴി നിർവഹിച്ചു. രണ്ടാം കയർ പുനഃസംഘടനയുടെ ഭാഗമായാണ് സംസ്ഥാനത്തെ 100 കയർ സംഘങ്ങളിൽ 1000 ഓട്ടോമാറ്റിക് സ്പിന്നിങ് മെഷീനുകൾ സർക്കാർ സ്ഥാപിക്കുന്നത്. 

ആലപ്പുഴ: പ്രകൃതി ക്ഷോഭത്തിൽപ്പെടുന്നവർക്കായി മാരാരിക്കുളം വടക്ക് ഗ്രാമപഞ്ചയത്തിൽ നിർമ്മിച്ച സ്ഥിരം ദുരിതാശ്വാസ അഭയ കേന്ദ്രത്തിന്റെ താക്കോൽ പഞ്ചായത്ത് സമിതിക്ക് കൈമാറി. ദുരന്ത നിവാരണ വിഭാഗം ഡെപ്യൂട്ടി കളക്ടർ ആശാ സി എബ്രഹാം മാരാരിക്കുളം വടക്ക് വില്ലേജ് ഓഫീസർ അനൂജിനാണ് താക്കോൽ കൈമാറി. 

മാരാരിക്കുളം വടക്ക് പഞ്ചായത്ത് പ്രസിസന്റ് അഡ്വ. ഡി പ്രിയേഷ് കുമാർ ചെയർമാനായുള്ള സമിതി കെട്ടിടത്തിന്റെ പരിപാലന ചുമതല ഏറ്റെടുത്തു.  

കോന്നി ഗവ. മെഡിക്കല്‍ കോളജില്‍ പോലീസ് എയ്ഡ് പോസ്റ്റ് പ്രവര്‍ത്തനം ആരംഭിച്ചു. ജില്ലാ പോലീസ് ചീഫ് കെ.ജി. സൈമണ്‍ ഉദ്ഘാടനം ചെയ്തു. പ്രധാന കവാടത്തില്‍ ഒപി രജിസ്ട്രേഷന്‍ കൗണ്ടറിനു സമീപമുള്ള മുറിയിലാണ് എയ്ഡ് പോസ്റ്റ് ആരംഭിച്ചത്.

       മെഡിക്കല്‍ കോളജ് പൂര്‍ണതോതില്‍ പ്രവര്‍ത്തനം ആരംഭിക്കുമ്പോള്‍ പ്രത്യേക പോലീസ് സ്റ്റേഷന്‍ തന്നെ ഇവിടെ അനുവദിക്കും. പോലീസ് സ്റ്റേഷനുള്ള സ്ഥലവും, അനുവാദവും ലഭ്യമാക്കാന്‍ ആവശ്യമായ ഇടപെടല്‍ നടത്തണമെന്ന് അഡ്വ. കെ.യു.ജനീഷ് കുമാര്‍ എംഎല്‍എയോട് ജില്ലാ പോലീസ് ചീഫ് അഭ്യര്‍ഥിച്ചിരുന്നു. അതുവരെ എയ്ഡ് പോസ്റ്റായി പ്രവര്‍ത്തനം നടത്താനാണ് തീരുമാനം.

പ്രണയം നടിച്ച് വിവാഹവാഗ്ദാനം നല്‍കി ചൂഷണം ചെയ്തശേഷം പിന്‍മാറുകയും പെണ്‍കുട്ടികളെ ആത്മഹത്യയിലേക്ക് തള്ളിവിടുകയും ചെയ്യുന്ന സംഭവങ്ങളില്‍ കുറ്റക്കാര്‍ക്ക് തക്കതായ ശിക്ഷ നല്‍കുന്നതിന് നിയമസംവിധാനത്തില്‍ ആവശ്യമായ ഭേദഗതികള്‍ക്ക് കേരള വനിതാ കമ്മിഷന്‍ സര്‍ക്കാരിനോട് ശുപാര്‍ശ ചെയ്യുമെന്ന് കമ്മിഷന്‍ അംഗം അഡ്വ. എം.എസ്.താര പറഞ്ഞു. സംസ്ഥാനത്ത് അടിക്കടിയായി ഇത്തരം സംഭവങ്ങള്‍ ഉണ്ടാകുന്നത് വളരെ ഗൗരവത്തോടെയാണ് കമ്മിഷന്‍ കാണുന്നതെന്നും അഡ്വ.എം.എസ്.താര പറഞ്ഞു.