ആലപ്പുഴ : ജില്ലാ പഞ്ചായത്തിന്റെ വാർഷിക പദ്ധതിയിൽ ഉൾപ്പെടുത്തി കാറ്ററിംഗ് യൂണിറ്റ്, പേപ്പർ ക്യാരി ബാഗ് നിർമ്മാണ യൂണിറ്റ് എന്നിവ തുടങ്ങുന്നതിന് ഗ്രൂപ്പുകൾക്ക് ധനസഹായ വിതരണം ജില്ലാ പഞ്ചായത്ത് പ്രസിഡന്റ് ജി.വേണുഗോപാൽ നിർവഹിച്ചു. കാറ്ററിങ് യൂണിറ്റ് തുടങ്ങുന്നതിന് 13 ഗ്രൂപ്പുകൾക്ക് മൂന്നു ലക്ഷം രൂപ വീതം 39, 00, 000 രൂപയും, പേപ്പർ ക്യാരി ബാഗ് നിർമാണ യൂണിറ്റ് തുടങ്ങുന്നതിന് മൂന്ന് ഗ്രൂപ്പുകൾക്ക് രണ്ട് ലക്ഷം രൂപ വീതം 6, 00, 000 രൂപയുമാണ് അനുവദിച്ചത്.

* കെട്ടിടത്തിന്റെ പരിപാലനം മാരാരിക്കുളം പഞ്ചായത്ത് ഏറ്റെടുത്തു

ഹരിപ്പാട് : നഗരസഭയുടെ പുതിയ ബഹുനില കെട്ടിടത്തിന്റെ ഉദ്ഘാടനം  17-09-2020 രാവിലെ 10 ന് മന്ത്രി എ. സി മൊയ്തീൻ വീഡിയോ കോൺഫറൻസിലൂടെ നിർവ്വഹിക്കും. പ്രതിപക്ഷ നേതാവ് രമേശ്‌ ചെന്നിത്തല ചടങ്ങിൽ അധ്യക്ഷത വഹിക്കും.

  കര്‍ഷകര്‍ക്ക് ഏറെ പ്രയോജനകരമായി മാറുന്ന കൃഷി മൂല്യവര്‍ധിത സംരംഭത്തിന്റെ പ്രവര്‍ത്തനങ്ങള്‍ റാന്നിയില്‍ ആരംഭിക്കുന്നു. റാന്നി ബ്ലോക്ക് പഞ്ചായത്തിന്റെ ചുമതലയില്‍ റാന്നി-പഴവങ്ങാടി ഗ്രാമപഞ്ചായത്തിന്റെ മാര്‍ക്കറ്റിലെ കെട്ടിടത്തിലാണ് സംരംഭം ആരംഭിക്കുന്നത്. പ്രാഥമിക പ്രവര്‍ത്തനങ്ങള്‍ രാജു എബ്രഹാം എംഎല്‍എ ഉദ്ഘാടനം ചെയ്തു.  കെട്ടിടത്തിന്റെ രേഖകളും താക്കോല്‍ കൈമാറ്റ ചടങ്ങും രാജു എബ്രഹാം എംഎല്‍എ നിര്‍വഹിച്ചു. ഗ്രാമപഞ്ചായത്ത് പ്രസിഡന്റ് ജോസഫ് കുര്യാക്കോസ് അധ്യക്ഷതവഹിച്ചു. ബ്ലോക്ക് പഞ്ചായത്ത് പ്രസിഡന്റ് ഗിരിജ മധു മുഖ്യാതിഥി ആയിരുന്നു.

ആലപ്പുഴ ജില്ലാ മൃഗസംരക്ഷണ ഓഫിസില്‍ സെപ്തംബര്‍ 18ന് നടത്താനിരുന്ന രാത്രികാല വെറ്ററിനറി സര്‍ജന്‍മാരെ തിരഞ്ഞെടുക്കുന്നതിനുള്ള കൂടിക്കാഴ്ച ചില സാങ്കേതിക കാരണങ്ങളാല്‍ മാറ്റി വച്ചതായി ജില്ലാ മൃഗസംരക്ഷണ ഓഫീസര്‍ അറിയിച്ചു. പുതുക്കിയ തീയതി പിന്നീട് അറിയിക്കും.

ചെങ്ങന്നൂർ: പ്രളയ ബാധിതർക്ക് ആട്ടിൻകുട്ടികളെ വിതരണം ചെയ്ത് ചെറിയനാട് ഗ്രാമപഞ്ചായത്ത്. 2018 പ്രളയത്തിൽ ജീവനോപാധികൾ നഷ്ടപ്പെട്ടവർക്കാണ് ആട്ടിൻകുട്ടികളെ വിതരണം ചെയ്തത്. പദ്ധതിയുടെ ഉദ്ഘാടനം ചെറിയനാട് ഗ്രാമപഞ്ചായത്ത് പ്രസിഡന്റ് കെ. കെ. രാധമ്മ നിർവഹിച്ചു.

പ്രളയ ബാധിതർക്ക് കൈത്താങ്ങായി ആറുലക്ഷം രൂപ വകയിരുത്തിയാണ് പഞ്ചായത്ത് പദ്ധതി ആവിഷ്കരിച്ചത്.പൊതു വിഭാഗത്തിൽ 40 പേർക്കും പട്ടികജാതി വിഭാഗത്തിൽ 20 പേർക്കും ഒരു വ്യക്തിക്ക് രണ്ട് ആടുകൾ വീതമാണ് വിതരണം ചെയ്യുന്നത്. 13 പേർക്ക് ആടുകളെ വിതരണം ചെയ്ത് കഴിഞ്ഞു.

തിരുവല്ല കടപ്ര പഞ്ചായത്തിലെ ഉപദേശിക്കടവ്  പാലത്തിന്റെ ശിലാസ്ഥാപനം ഇന്ന് (17) ഉച്ചയ്ക്ക് 12ന് കോവിഡ് മാനദണ്ഡങ്ങള്‍ പാലിച്ച് മുഖ്യമന്ത്രി പിണറായി വിജയന്‍ ഓണ്‍ലൈനായി നിര്‍വഹിക്കും. ഉപദേശിക്കടവില്‍ നടക്കുന്ന ചടങ്ങളില്‍ ഓണ്‍ലൈനിലൂടെ പൊതുമരാമത്ത് വകുപ്പ് മന്ത്രി ജി.സുധാകരന്‍ അധ്യക്ഷനാകും. മാത്യു ടി തോമസ് എംഎല്‍എ സ്വാഗതം ആശംസിക്കുന്ന ചടങ്ങില്‍ ആന്റോ ആന്റണി എം.പി മുഖ്യപ്രഭാഷണം നടത്തും. 

ആലപ്പുഴ :സാമൂഹ്യനീതി വകുപ്പ് മുഖേന നടപ്പിലാക്കി വരുന്ന ട്രാൻസ്‌ജെൻഡർ ക്ഷേമ പ്രവർത്തനങ്ങളുടെ ഭാഗമായി ലിംഗമാറ്റ ശാസ്ത്രക്രിയയ്ക്ക് വിധേയരായി ഹോർമോൺ ചികിത്സ ന ടത്തുന്ന ട്രാൻസ്‌ജെൻഡർ വ്യക്തികൾക്ക് ഹോർമോൺ മരുന്നുകളുടെ തുക റീഇമ്പേഴ്‌സ് ചെയ്ത് നൽകും. ജില്ലയിൽ ലിംഗമാറ്റ ശാസ്ത്രക്രിയയുടെ ഭാഗമായി ഹോർമോൺ ചികിത്സ നടത്തുന്ന ട്രാൻസ്‌ജെൻഡർ വ്യക്തികൾ ജില്ല സാമൂഹ്യനീതി ഓഫീസുമായി ബന്ധപ്പെടെണം. ഫോൺ: 0477 2253870.

ആലപ്പുഴ: മഹാത്മാഗാന്ധി ഗ്രാമീണ തൊഴിലുറപ്പ് പദ്ധതിയുടെ ഫീൽഡ് പ്രവർത്തനങ്ങൾ ഏകോപ്പിക്കുന്നതിന് ജില്ലാതലത്തിൽ ജോയിന്റ് പ്രോഗ്രാം കോ-ഓർഡിനേറ്റർ ഓഫീസിലേക്ക് കരാർ അടിസ്ഥാനത്തിൽ 5 സീറ്റർ വാഹനം/കാർ വിഭാഗത്തിലുള്ള വാഹനം ഡ്രൈവർ ഉൾപ്പെടെ നൽകുന്നതിന് താൽപര്യമുള്ള ടാക്സി ഓപ്പറേറ്റർമാരിൽ നി്ന്ന് ക്വട്ടേഷൻ ക്ഷണിച്ചു. ക്വട്ടേഷൻ സെപ്റ്റംബർ 23 വൈകിട്ട് മൂന്നുവരെ സ്വീകരിക്കും. അന്നേ ദിവസം വൈകിട്ട് നാലിന് തുറക്കും. കൂടുതൽ വിവരങ്ങൾ ജോയിന്റ് പ്രോഗ്രാം കോ-ഓർഡിനേറ്റർ, എം.ജി.എൻ.ആർ.ഈ.ജി.എസ്, , കളക്ടറേറ്റ്, ആലപ്പുഴ എന്ന ഓഫീസിൽ ലഭിക്കും.