ഭിന്നശേഷിക്കാർക്കായുളള നാഷണൽ അവാർഡ് ഫോർ എംപവർമെന്റ് ഓഫ് പേഴ്‌സൺ വിത്ത് ഡിസബിലിറ്റീസ് നാമനിർദ്ദേശം ക്ഷണിച്ച് കേന്ദ്ര സർക്കാർ ഉത്തരവായി. 14 വിഭാഗങ്ങളിലേക്കാണ് നാമനിർദ്ദേശം ക്ഷണിച്ചിട്ടുളളത്. സംസ്ഥാന സർക്കാർ മുഖേന നാമനിർദ്ദേശം ലഭിക്കേണ്ട അവസാന തിയതി സെപ്റ്റംബർ ഒൻപത് ആണ്. വിശദ വിവരങ്ങളും അപേക്ഷാ ഫാറവും സാമൂഹ്യനീതി വകുപ്പിന്റെ ഔദ്യോഗിക വെബ്‌സൈറ്റിൽ ലഭിക്കും. കൂടാതെ കേന്ദ്ര സർക്കാർ വെബ്‌സൈറ്റായ www.disabilityaffairs.gov.in  ലും വിശദ വിവരങ്ങൾ ലഭ്യമാണ്.
പി.എൻ.എക്‌സ്. 2959/2020

ജയിലിൽ തടവുശിക്ഷ അനുഭവിക്കുന്നവരുടെ പെൺമക്കൾക്ക് സാമൂഹ്യ നീതി വകുപ്പ് വിവാഹ ധനസഹായം നൽകും. വകുപ്പ് നടപ്പിലാക്കുന്ന പ്രൊബേഷൻ സംവിധാനത്തിന്റെ ഭാഗമായി 2020-21 സാമ്പത്തിക വർഷത്തേക്ക് വിവാഹ ധനസഹായത്തിന് അപേക്ഷ ക്ഷണിച്ചു.

സംസ്ഥാനത്തെ ഗ്രാമപഞ്ചായത്ത്, മുൻസിപ്പാലിറ്റി, കോർപ്പറേഷൻ മേഖലകളിൽ പരമ്പരാഗതമായി ബാർബർ തൊഴിൽ ചെയ്തുവരുന്ന ഒ.ബി.സി വിഭാഗത്തിൽപ്പെട്ടവർക്ക് തൊഴിൽ നവീകരണത്തിന് പിന്നാക്ക വിഭാഗ വികസന വകുപ്പ് മുഖേന ധനസഹായം നൽകുന്ന ബാർബർഷോപ്പ് നവീകരണ പദ്ധതി പ്രകാരം അപേക്ഷ സമർപ്പിക്കേണ്ട അവസാന തിയതി, സെപ്റ്റംബർ 25 വരെ നീട്ടി. കൂടുതൽ വിവരങ്ങൾ പിന്നാക്ക വിഭാഗ വികസന വകുപ്പിന്റെ മേഖലാ ഓഫീസുകളുമായി ബന്ധപ്പെടുക. എറണാകുളം: 0484 2429130, കോഴിക്കോട്:0495 2377786.
പി.എൻ.എക്‌സ്. 2958/2020

സംസ്ഥാനത്തിന്റെ പുതിയ സ്വർണവേട്ട നയപ്രഖ്യാപനത്തിന് ശേഷം ആദ്യമായി 3.846 കിലോഗ്രാം സ്വർണം പിടികൂടിയതായി ധനമന്ത്രി ഡോ. ടി. എം. തോമസ് ഐസക്ക് പറഞ്ഞു. 1.96 കോടി രൂപ വിലമതിക്കുന്ന സ്വർണമാണ് പിടികൂടിയത്. രഹസ്യവിവരത്തിന്റെ അടിസ്ഥാനത്തിലായിരുന്നു നടപടി. അനധികൃതമായി കടത്തുന്ന സ്വർണം പിടികൂടാൻ ജി. എസ്. ടി വകുപ്പ് കർക്കശ നടപടി സ്വീകരിക്കുമെന്ന് മന്ത്രി പറഞ്ഞു.  
പി.എൻ.എക്‌സ്. 2957/2020

ജി. എസ്. ടി കുടിശിക ലഭിക്കുന്നത് സംബന്ധിച്ച് ഏഴു ദിവസത്തിനകം സംസ്ഥാനങ്ങൾ നിലപാടറിയിക്കുമെന്ന് ധനമന്ത്രി ഡോ. ടി. എം. തോമസ് ഐസക്ക് പറഞ്ഞു. ജി. എസ്. ടി കൗൺസിൽ യോഗത്തിനു ശേഷം മാധ്യമങ്ങളോടു സംസാരിക്കുകയായിരുന്നു അദ്ദേഹം.

ഉപഭോക്തൃ സംരക്ഷണാർത്ഥം തൃശൂർ ലീഗൽ മെട്രോളജി വകുപ്പിന്റെ പരാതി പരിഹാര സെൽ പ്രവർത്തനമാരംഭിച്ചു. ഓണക്കാല പരിശോധനയുടെ ഭാഗമായി പാക്ക് ചെയ്ത ഉൽപ്പന്നങ്ങളുടെ തൂക്കത്തിലെ കുറവ്, എംആർപിയേക്കാൾ അധിക വില ഈടാക്കൽ, നിർമ്മാതാവിന്റെ മേൽവിലാസം, പായ്ക്കിങ് തിയ്യതി, തൂക്കം എന്നിവ രേഖപെടുത്താത്ത പായ്ക്കറ്റുകളുടെ വിൽപ്പന തുടങ്ങിയ പരാതികൾ ഉപഭോക്താക്കൾക്ക് ജില്ലാ ലീഗൽ മെട്രോളജി ഓഫീസിൽ അറിയിക്കാം. ഫോൺ: 8281698075, 8281698084

ജില്ലയിൽ 97.13 ശതമാനം മഞ്ഞ കാർഡുടമകൾ സൗജന്യ ഓണക്കിറ്റ് കൈപ്പറ്റി. 50867 കാർഡ് ഉടമകളാണ് സൗജന്യ കിറ്റ് കൈപ്പറ്റിയത്. 283132 പിങ്ക് കാർഡുടമകളിൽ 89.65 ശതമാനം വരുന്ന 253542 കാർഡ് ഉടമകൾ, 21.56 ശതമാനം വരുന്ന 51727 നീല കാർഡുടമകൾ എന്നിവരും സൗജന്യ കിറ്റ് കൈപറ്റി. സെപ്റ്റംബർ മാസത്തെ റേഷൻ വിതരണവും ജില്ലയിൽ ആരംഭിച്ചു. മഞ്ഞ കാർഡുകൾക്ക് 30 കിലോ അരി, 5 കിലോ ഗോതമ്പ് എന്നിവ സൗജന്യമായി ലഭിക്കും. കൂടാതെ ഒരു കിലോ പഞ്ചസാര 21 രൂപ നിരക്കിലും ലഭിക്കും.

പൊതു വിദ്യാഭ്യാസ മേഖലയിൽ ഗണ്യമായ മുന്നേറ്റം കൈവരിക്കാൻ ഈ സർക്കാരിന്റെ കാലത്ത് കഴിഞ്ഞതായി പൊതുവിദ്യാഭ്യാസ വകുപ്പ് മന്ത്രി പ്രൊഫ.സി.രവീന്ദ്രനാഥ് പറഞ്ഞു. ഇരിങ്ങാലക്കുട നഗരസഭയിൽ മാടായിക്കോണം പി.കെ. ചാത്തൻമാസ്റ്റർ മെമ്മോറിയൽ ഗവ. യു പി സ്‌കൂളിന്റെ പുതിയ കെട്ടിടത്തിന്റെ ഉദ്ഘാടനം ഓൺലൈനായി നിർവ്വഹിച്ച് സംസാരിക്കുകയായിരുന്നു മന്ത്രി. സർക്കാരിനൊപ്പം എല്ലാ വിഭാഗം ജനങ്ങളുടെയും ഇടപെടൽ പൊതുവിദ്യാലയങ്ങളുടെ ശക്തി വർദ്ധിപ്പിക്കുകയാണെന്നും മന്ത്രി പറഞ്ഞു.