കൊവിഡ് പ്രതിരോധം ഊര്‍ജ്ജിതപ്പെടുത്തുന്നതിന്റെ ഭാഗമായി കണ്ണൂര്‍ റെയില്‍വേ സ്റ്റേഷനില്‍ തെര്‍മല്‍ ക്യാമറ സ്ഥാപിച്ചു. സ്റ്റേഷനിലെത്തുന്ന യാത്രക്കാരുടെ ശരീരോഷ്മാവ് പരിശോധിക്കുന്നതിനായി സ്ഥാപിച്ച തെര്‍മല്‍ ക്യാമറ തുറമുഖ പുരാവസ്തു വകുപ്പ് മന്ത്രി രാമചന്ദ്രന്‍ കടന്നപ്പള്ളി ഉദ്ഘാടനം ചെയ്തു.

കൊവിഡ് 19 ബാധിച്ച് ആശുപത്രികളിലും ഫസ്റ്റ്ലൈന്‍ കൊവിഡ് ട്രീറ്റ്മെന്റ് സെന്ററുകളിലും ചികിത്സയിലായിരുന്ന 31 പേര്‍ കൂടി ഇന്ന് (ആഗസ്ത് 15) രോഗം ഭേദമായി ആശുപത്രി വിട്ടു. ഇതോടെ ജില്ലയിലെ കൊവിഡ് ബാധിതരില്‍ രോഗമുക്തി നേടിയവരുടെ എണ്ണം 1492 ആയി. 10 പേര്‍ കൊവിഡ് ബാധിച്ചും ആറ് പേര്‍ കൊവിഡ് ഇതര കാരണങ്ങളാലും മരണപ്പെട്ടു. ബാക്കി 471 പേര്‍ വിവിധ ആശുപത്രികളില്‍ ചികിത്സയിലാണ്.

ജില്ലയില്‍ 52 പേര്‍ക്ക് ഇന്ന്  രോഗം സ്ഥിരീകരിച്ചു. 48 പേര്‍ക്ക് സമ്പര്‍ക്കം മൂലമാണ് രോഗബാധ. നാലു പേര്‍ ഇതര സംസ്ഥാനങ്ങളില്‍ നിന്നെത്തിയവരാണ്.

സ്വാതന്ത്ര്യദിനത്തില്‍ ആരോഗ്യപ്രവര്‍ത്തകര്‍ക്ക് ആദരമര്‍പ്പിച്ച് അഞ്ചരക്കണ്ടി കൊവിഡ് ആശുപത്രി
കൊവിഡ് പ്രതിരോധത്തിന്റെ മുന്‍നിരയില്‍ കര്‍മനിരതരായ ആരോഗ്യപ്രവര്‍ത്തകര്‍ക്ക് ആദരമര്‍പ്പിച്ച് അഞ്ചരക്കണ്ടി കൊവിഡ് ആശുപത്രിയില്‍ 74മാത് സ്വാതന്ത്ര്യദിനം കൊണ്ടാടി. മലബാര്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജി അങ്കണത്തില്‍ നടന്ന പരിപാടിയില്‍ നോഡല്‍ ഓഫീസര്‍ ഡോ. സി അജിത്ത് കുമാര്‍ പതാക ഉയര്‍ത്തി. തുടര്‍ന്ന് ആരോഗ്യപ്രവര്‍ത്തകര്‍ക്ക് മേല്‍ പുഷ്പവൃഷ്ടിയും നടത്തി.

  കോവിഡ് പോരാട്ടത്തിനിടയിലും രാജ്യത്തിന്റെ 74 -ാമത് സ്വാതന്ത്ര്യ ദിനാഘോഷം ജില്ലയില്‍ കര്‍ശന നിയന്ത്രണങ്ങളോടെ നടന്നു. കൊവിഡ് പ്രോട്ടോക്കോള്‍ പാലിച്ച് നടന്ന ചടങ്ങില്‍ ജില്ല കലക്ടര്‍ ടി വി സുഭാഷ് പതാക ഉയര്‍ത്തി.
കണ്ണൂര്‍ ജില്ലാ പൊലീസ്, എക്‌സൈസ്, കണ്ണൂര്‍ എസ് എന്‍ കോളേജ്, ഗവ. പോളി ടെക്‌നിക് എന്‍സിസി  സീനിയര്‍ ഡിവിഷന്‍ എന്നീ പ്ലാറ്റൂണുകള്‍ അണിനിരന്ന പരേഡില്‍ കലക്ടര്‍ അഭിവാദ്യം സ്വീകരിച്ചു. തലശ്ശേരി കോസ്റ്റല്‍ പൊലീസ്  ഇന്‍സ്‌പെക്ടര്‍  കെ വി സ്മിതേഷ് പരേഡിനു നേതൃത്വ നല്‍കി.

ജില്ലയിലെ രണ്ടാംഘട്ട സൗജന്യ ഓണക്കിറ്റ് വിതരണം ആരംഭിച്ചു. 165633 മുന്‍ഗണന (പിങ്ക്) കാര്‍ഡുകള്‍ക്കാണ് രണ്ടാം ഘട്ടത്തില്‍ ഓണക്കിറ്റുകള്‍ വിതരണം ചെയ്യുക. പൊതുവിതരണ വകുപ്പിന്റെ കണ്ണൂര്‍ ഡിപ്പോയില്‍ 45150ഉം, തലശ്ശേരിയില്‍ 72592ഉം, തളിപ്പറമ്പില്‍ 47253 കിറ്റുകളും ഇതിനകം വിതരണത്തിനായി തയ്യാറായിട്ടുണ്ട്. ബാക്കി വരും ദിവസങ്ങളില്‍ വിതരണത്തിന് സജ്ജമാവും. ഇതിനു ശേഷം 204868 വെള്ളക്കാര്‍ഡുകള്‍ക്കും 222511 നീല  കാര്‍ഡുകള്‍ക്കുമുള്ള കിറ്റുകള്‍ വിതരണം ചെയ്യും. ഓണത്തിന് മുമ്പായി എല്ലാ കാര്‍ഡുടമകള്‍ക്കും കിറ്റുകള്‍ വിതരണം ചെയ്യും.  

ജില്ലയില്‍ ആശങ്ക ഉളവാക്കുന്ന തരത്തില്‍ കൊവിഡ് രോഗികളുടെ എണ്ണം ദിനംപ്രതി വര്‍ധിച്ചു വരുന്ന സാഹചര്യത്തില്‍ പൊതുജനങ്ങള്‍ അതീവ ജാഗ്രത പുലര്‍ത്തണമെന്ന്  ജില്ലാ മെഡിക്കല്‍ ഓഫീസര്‍ ഡോ.  കെ നാരായണ നായ്ക് അറിയിച്ചു.
പ്രതിദിനം നൂറിലധികം രോഗികള്‍ റിപ്പോര്‍ട്ട് ചെയ്യപ്പെടുന്നരീതിയില്‍  രോഗവ്യാപനത്തിന്റെ തോത് ഉയര്‍ന്നു വരുന്നു എന്നത് ഗൗരവത്തോടെ കാണേണ്ട കാര്യമാണ്. ഒപ്പം  ഇതുവരെയായി റിപ്പോര്‍ട്ട് ചെയ്യപ്പെട്ട ആകെ രോഗികളുടെ എണ്ണം 2000 കടന്നതും ഏറെ ഗൗരവമുള്ളതാണ്.

സംസ്ഥാനത്തെ ആരോഗ്യമേഖലയിലെ ജനകീയ ഇടപെടല്‍ മാതൃകാപരമാണെന്നും ഇത് കൂടുതല്‍ പ്രോത്സാഹിപ്പിക്കപ്പെടേണ്ടതുണ്ടെന്നും ആരോഗ്യ വ കുപ്പ് മന്ത്രി കെ കെ ശൈലജ ടീച്ചര്‍. ചൊക്ലി ഗ്രാമപഞ്ചായത്ത് ആയുഷ് പ്രാഥമിക ആരോഗ്യകേന്ദ്രത്തിന്റെ ഉദ്ഘാടനം ഓണ്‍ലൈനായി നിര്‍വ്വഹിച്ചു സംസാരിക്കുകയായിരുന്നു മന്ത്രി. കഴിഞ്ഞ നാലു വര്‍ഷമായി കേരളത്തിലെ ആരോഗ്യ മേഖല മികവിന്റെ പാതയിലാണ്. സര്‍ക്കാര്‍ ആരോഗ്യകേന്ദ്രങ്ങളെക്കുറിച്ചുള്ള  ജനങ്ങളുടെ കാഴ്ചപ്പാടുകളില്‍ വലിയ മാറ്റങ്ങള്‍ വന്നു കൊണ്ടിരിക്കുകയാണ്. അത് സര്‍ക്കാറിന്റെ മാത്രം ഇടപെടല്‍ കൊണ്ടല്ല.

ജില്ലയില്‍ സമ്പര്‍ക്കത്തിലൂടെ കൊവിഡ് ബാധിക്കുന്നവരുടെ എണ്ണം വര്‍ധിക്കുന്ന സാഹചര്യത്തില്‍ റിവേഴ്‌സ് ക്വാറന്റൈന്‍ ശക്തിപ്പെടുത്തണമെന്ന് ജില്ലാ മെഡിക്കല്‍ ഓഫീസ ര്‍ ഡോ. കെ നാരായണ നായ്ക് അറിയിച്ചു. 60 വയസിന് മുകളിലും 10 വയസിന് താഴെയും പ്രായമുള്ളവര്‍, ഗര്‍ഭിണികള്‍, ശ്വാസകോശ രോഗമുള്ളവര്‍, വൃക്കരോഗികള്‍, പ്രമേഹരോഗികള്‍, ഹൃദ്രോഗികള്‍ തുടങ്ങി റിവേഴ്‌സ് ക്വാറന്റൈനില്‍ കഴിയേണ്ടവര്‍ മറ്റുള്ളവരുമായി സമ്പര്‍ക്കത്തില്‍ വരാനുളള സാധ്യതകള്‍ പൂര്‍ണമായും ഒഴിവാക്കണം. ഇവര്‍ സ്വന്തം വീടുകളില്‍ തന്നെ കഴിയുന്നുണ്ടെന്ന് മറ്റുള്ളവര്‍ ഉറപ്പുവരുത്തണമെന്നും ഡിഎംഒ അറിയിച്ചു.