സുല്‍ത്താന്‍ ബത്തേരി താലൂക്ക് പരിധിയിലെ എല്ലാ വില്ലേജുകളിലെയും പൊതുജനങ്ങളുടെ പരാതി പരിഹരിക്കുന്നതിന് മുഖ്യമന്ത്രിയുടെ പരാതി പരിഹാര അദാലത്ത് ആഗസ്റ്റ് 27ന് ജില്ലാ കളക്ടര്‍ ഓണ്‍ലൈന്‍ വഴി നടത്തുന്നു. അദാലത്തില്‍ മുഖ്യമന്ത്രിയുടെ ചികിത്സാ ധനസഹായം, ഭൂമി സംബന്ധമായ വിഷയങ്ങള്‍, റേഷന്‍ കാര്‍ഡ് സംബന്ധിച്ച പരാതി എന്നിവ ഒഴിച്ചുള്ള അപേക്ഷകളാണ് പരിഗണിക്കുന്നത്. തൊട്ടടുത്തുള്ള അക്ഷയ കേന്ദ്രങ്ങളില്‍ ആഗസ്റ്റ് 24ന് 5 മണിവരെ അപേക്ഷ നല്‍കാം.

മാറ്റിവെച്ച മാനന്തവാടി താലൂക്ക് തല പരാതി പരിഹാര അദാലത്ത് ജില്ലാ കലക്ടറുടെ നേതൃത്വത്തില്‍ ആഗസ്റ്റ് 21 ന് ഓണ്‍ലൈനായി നടക്കും. ആഗസ്റ്റ് ഒന്നിന് നടത്താനായിരുന്നു നേരത്തെ നിശ്ചയിച്ചിരുന്നത്.

പൊതുമരാമത്ത് വകുപ്പ് നിരത്തുകള്‍ വിഭാഗം അമ്പലവയല്‍ സെക്ഷന്റെ ഉടമസ്ഥതയിലുള്ള കാലി ടാര്‍ ബാരല്‍ ഇന്ന് (ആഗസ്റ്റ് 19) രാവിലെ 11 ന് അസിസ്റ്റന്റ് എഞ്ചിനീയറുടെ കാര്യാലയത്തില്‍ ലേലം ചെയ്യും. ഏതെങ്കിലും കാരണത്താല്‍ ലേലം നടക്കാതിരുന്നാല്‍ തൊട്ടടുത്ത പ്രവൃത്തി ദിവസം ലേലം നടത്തുമെന്ന് അസി. എഞ്ചിനീയര്‍ അറിയിച്ചു. ഫോണ്‍.04936 261707

കുടുംബശ്രീ ജില്ലാ മിഷനില്‍ എസ്.ടി കുട്ടികള്‍ക്കു വേണ്ടി ഓണ്‍ലൈനായി പി.എസ്.സി കോച്ചിംഗ് സംഘടിപ്പിക്കുന്നതിന് അംഗീകൃത സെന്ററുകള്‍/ഏജന്‍സികളില്‍ നിന്ന് മത്സര സ്വഭാവമുള്ള സീല്‍ഡ് ടെണ്ടറുകള്‍ ക്ഷണിച്ചു. കുടുംബശ്രീ ജില്ലാമിഷന്‍ ഓഫീസിലാണ് ടെണ്ടര്‍ സമര്‍പ്പിക്കേണ്ടത്. അവസാന തിയതി സെപ്തംബര്‍ 4. കൂടുതല്‍ വിവരങ്ങള്‍ക്ക് ജില്ലാ മിഷന്‍  ഓഫീസുമായോ 04936 206589 എന്ന നമ്പറിലോ ബന്ധപ്പെടാം്.

കോവിഡ് പ്രതിരോധ പ്രവര്‍ത്തനത്തിന്റെ ഭാഗമായി ജില്ലയില്‍ 'ഡീപ്പ് ക്ലീന്‍ വയനാട്' എന്ന പേരില്‍ മഹാശുചീകരണ യജ്ഞത്തിനൊരുങ്ങുകയാണ് കുടുംബശ്രീ ജില്ലാ മിഷന്‍. ജില്ലയിലെ ഒന്നര ലക്ഷം അയല്‍ക്കൂട്ടങ്ങളും കുടുംബാംഗങ്ങളും ചേര്‍ന്ന് വീടും പരിസരവും വൃത്തിയാക്കി അണു നശീകരണ പ്രക്രിയയുടെ ഭാഗമാവും. ആഗസ്റ്റ് 23 ന് ഞായറാഴ്ചയാണ് ജില്ലയിലുടനീളം ശുചീകരണ പ്രവര്‍ത്തനം നടപ്പിലാക്കുന്നത്. ജില്ലയില്‍ കോവിഡ് വ്യാപനം തടയുന്നതിന് ജില്ലാ ഭരണ കൂടം നടത്തുന്ന പ്രതിരോധ പ്രവര്‍ത്തനത്തില്‍ സഹായിക്കുകയാണ് കുടുംബശ്രീ ഡീപ് ക്ലീന്‍ വയനാടിന്റെ ലക്ഷ്യം. 

മോട്ടോര്‍ മേഖലയില്‍ ജോലി ചെയ്യുന്നതും നിലവില്‍ ക്ഷേമനിധിയില്‍ അംഗമല്ലാത്തതുമായ സ്‌കാറ്റേര്‍ഡ് വര്‍ക്കേഴ്‌സ്, ആട്ടോമൊബൈല്‍ തൊഴിലാളികള്‍, പാസഞ്ചര്‍ ഗൈഡുകള്‍, ഡ്രൈവിംഗ് സ്‌കൂള്‍ ജീവനക്കാര്‍ എന്നിവര്‍ക്ക് കേരള മോട്ടോര്‍ തൊഴിലാളി ക്ഷേമനിധിയില്‍ അംഗമാവാം. ഇതിനായി ഒരു പോര്‍ട്ടലിലൂടെ അംഗത്വത്തിനുള്ള അപേക്ഷ രജിസ്റ്റേര്‍ഡ് ട്രേഡ് യൂണിയനുകള്‍, ഉടമ/തൊഴിലാളി സംഘടനകള്‍ എന്നിവ ലെറ്റര്‍ ഹെഡിലുള്ള ശുപാര്‍ശ സഹിതം അതത് ജില്ലാ ഓഫീസുകളില്‍ നല്‍കാം. രജിസ്‌ട്രേഷന്‍ ഫീസ്(25 രൂപ), ഉടമ/തൊഴിലാളി അംശദായം(120 രൂപ) എന്നിവ ഉള്‍പ്പടെ 145 രൂപ ഒടുക്കി അംഗത്വം അനുവദിക്കും.

കാടുവെട്ട് യന്ത്രം മുതല്‍ കൊയ്ത് മെതി യന്ത്രം വരെയുള്ള ചെറുതും വലുതുമായ കാര്‍ഷിക യന്ത്രങ്ങളും ഉപകരണങ്ങളും ഭക്ഷ്യസംസ്‌കരണ യന്ത്രങ്ങളും വീട്ടിലിരുന്ന് വാങ്ങാം. കേന്ദ്ര-സംസ്ഥാന സര്‍ക്കാരുകള്‍ സംയുക്തമായി നടപ്പിലാക്കുന്ന കാര്‍ഷിക യന്ത്രവത്കരണ ഉപ പദ്ധതിയിലൂടെയാണിത്. 40 മുതല്‍ 80 ശതമാനം വരെ സബ്‌സിഡി ലഭിക്കും. കര്‍ഷക ഗ്രൂപ്പുകള്‍ക്കും സംരംഭകര്‍ക്കും കര്‍ഷകര്‍ക്കും അപേക്ഷിക്കാം. വിശദാംശങ്ങള്‍  https://www.agrimachinery.nic.in  വെബ്‌സൈറ്റില്‍ ലഭിക്കും.

ഖരമാലിന്യ സംസ്‌കരണത്തില്‍ ഹരിതകേരളം മിഷന്റെ ശുചിത്വ മാലിന്യ സംസ്‌കരണ ഉപമിഷന്‍ പ്രവര്‍ത്തന ഫലമായി ജില്ലയിലെ  വിവിധ ഗ്രാമപഞ്ചായത്തുകളും നഗരസഭകളും ശുചിത്വ പദവിയിലേക്ക്. ജില്ലാ കലക്ടര്‍ ബി അബ്ദുല്‍ നാസറിന്റെ അധ്യക്ഷതയില്‍ നടന്ന വീഡിയോ കോണ്‍ഫറന്‍സ് ഇതു സംബന്ധിച്ച വിലയിരുത്തല്‍ നടത്തി.