നഗരസഭയില്‍ 34 വാര്‍ഡുകളിലായി 868 പേര്‍ അംഗങ്ങളുള്ള ജൈവ പച്ചക്കറി ക്ലബ്  നിത്യോപയോഗത്തിന് ആവശ്യമായ പച്ചക്കറികള്‍ സ്വന്തം പുരയിടത്തില്‍ തന്നെ വിളയിക്കാനായി  വേനല്‍ക്കാല കൃഷിക്കൊരുങ്ങുന്നു. നഗരസഭയുടെ ജീവനം പദ്ധതി - ദ്വൈമാസ ശുചിത്വ ബോധവല്‍ക്കരണ പരിപാടിയുടെ ഭാഗമായാണ് കൃഷി നടത്തുന്നത്.

ജില്ലയില്‍ ഹരിതകേരളം മിഷന്റെ ഭാഗമായി ജലസംരക്ഷണവുമായി ബന്ധപ്പെട്ട് തദ്ദേശസ്വയംഭരണ സ്ഥാപനങ്ങള്‍ നടത്തിയ മികച്ച പ്രവര്‍ത്തനങ്ങള്‍ പരിചയപ്പെടുത്തുന്നതിനുള്ള ഏകദിന ശില്പശാല   ജനുവരി 30 നു രാവിലെ 10 മുതല്‍ നാല് വരെ ജില്ലാ പഞ്ചായത്ത് ഹാളില്‍ നടത്തും. മാലിന്യസംസ്‌കരണം, കൃഷി എന്നീ മേഖലകളെ കൂടി സംയോജിപ്പിച്ചുകൊണ്ട് നടത്തിയ സമഗ്ര ജലസംരക്ഷണ പ്രവര്‍ത്തനങ്ങള്‍ ആണ് അവതരിപ്പിക്കുന്നത്. ഇതില്‍ നിന്നും തെരഞ്ഞെടുക്കുന്ന മികച്ച പ്രവര്‍ത്തനങ്ങള്‍ സംസ്ഥാനതല ജലസംഗമത്തില്‍ ഉള്‍പ്പെടുത്തും.

    ജില്ലയില്‍ വിദ്യാഭ്യാസ വകുപ്പില്‍ പാര്‍ട് ടൈം ജൂനിയര്‍ ലാംഗ്വേജ് ടീച്ചര്‍ (അറബിക്) എല്‍.പി.എസ് തസ്തികയിലേക്ക് (കാറ്റഗറി 230/16) പ്രസിദ്ധീകരിച്ച ചുരുക്കപ്പട്ടികയില്‍ ഉള്‍പ്പെട്ടവരുടെ കൂടിക്കാഴ്ച ജനുവരി 23, 24 തീയതികളില്‍ പി.എസ്.സിയുടെ കോഴിക്കോട് ജില്ലാ ഓഫീസില്‍ നടത്തും.

സംസ്ഥാന പട്ടികജാതി പട്ടികവര്‍ഗ്ഗ വികസന കോര്‍പ്പറേഷന്‍ ദേശീയ പട്ടിക വര്‍ഗ്ഗ ധനകാര്യ വികസന കോര്‍പ്പറേഷന്റെ സഹായത്തോടെ നടപ്പിലാക്കുന്ന 50,000 രൂപ പദ്ധതി തുകയുള്ള 'ആദിവാസി മഹിളാ സശാക്തീകരണ്‍ യോജന'ക്കു കീഴില്‍ വായ്പ അനുവദിയ്ക്കുന്നതിനായി ജില്ലയിലെ പട്ടിക വര്‍ഗ്ഗത്തില്‍പ്പെട്ട തൊഴില്‍ രഹിതരായ യുവതികളില്‍ നിന്നും   അപേക്ഷകള്‍ ക്ഷണിച്ചു.

സംസ്ഥാന പട്ടികജാതി പട്ടികവര്‍ഗ്ഗ വികസന കോര്‍പ്പറേഷന്‍ ദേശീയ പട്ടിക വര്‍ഗ്ഗ ധനകാര്യ വികസന കോര്‍പ്പറേഷന്റെ സഹായത്തോടെ നടപ്പിലാക്കുന്ന പരമാവധി 2.30 ലക്ഷം രൂപ പദ്ധതി തുകയ്ക്കുള്ള 'ഡീസല്‍ ഓട്ടോറിക്ഷ' പദ്ധതിക്കു കീഴില്‍ വായ്പ അനുവദിക്കുന്നതിന് പട്ടിക വര്‍ഗ്ഗത്തില്‍പ്പെട്ട തൊഴില്‍ രഹിതരായ യുവതീ യുവാക്കളില്‍ നിന്ന്  അപേക്ഷകള്‍ ക്ഷണിച്ചു.

കേരള മോട്ടോര്‍ തൊഴിലാളി ക്ഷേമനിധി ബോര്‍ഡില്‍ അംഗങ്ങളായ ഉടമകള്‍ക്കും തൊഴിലാളികള്‍ക്കും  അംശദായം അടയ്ക്കുന്നതിനായി ഓണ്‍ലൈന്‍ പേയ്‌മെന്റ്  സംവിധാനം  ഏര്‍പ്പെടുത്തി.  കേരള സ്റ്റേറ്റ് ഐ.റ്റി മിഷന്റെ  കീഴിലുള്ള  ഇ-ഡിസ്ട്രിക്ട് പദ്ധതി വഴി കേരളത്തിലെ 2800 അക്ഷയ കേന്ദ്രങ്ങള്‍  വഴി സര്‍ക്കാര്‍ നിശ്ചയിച്ചിട്ടുളള ഫീസ് നല്‍കിയും, ജില്ലാ ആസ്ഥാനങ്ങളിലുളള 14 ഫ്രണ്ട്‌സ് ജനസേവന കേന്ദ്രങ്ങള്‍ വഴി സൗജന്യമായും ക്ഷേമനിധി അംശദായം അടയ്ക്കുവാന്‍ സൗകര്യം ലഭിക്കും. കൂടാതെ ഇ  ഡിസ്ട്രിക്ട് പബ്ലിക്  പോര്‍ട്ടല്‍ https://edistrict.kerala.gov.in വഴിയും വിഹിതം അടക്കാം.

സംസ്ഥാന മനുഷ്യാവകാശ കമ്മീഷന്‍ കെ. മോഹന്‍കുമാര്‍ ഫെബ്രുവരി 14ന് തിരൂര്‍ റസ്റ്റ് ഹൗസില്‍ ക്യാമ്പ് സിറ്റിങ് നടത്തും.

ഫിഷറീസ് ദേശീയ സമ്പാദ്യ ആശ്വാസ പദ്ധതി 2018-19 രണ്ടാം ഗഡു ഗുണഭോക്തൃ വിഹിത സമാഹരണം ജനുവരി 24, 25, 31,  ഫെബ്രുവരി ഒന്ന് എന്നീ തിയ്യതികളിലും ഉള്‍നാടന്‍ ജനുവരി 29 നും നടക്കും.  എല്ലാ ഗുണഭോക്താക്കളും ആദ്യഗഡു വിഹിതമടച്ച കാര്‍ഡ് സഹിതം കളക്ഷന്‍ സെന്ററില്‍ എത്തണം. 2017-18 ലെ  ഗഡുക്കള്‍ ലഭ്യമാക്കാത്തവര്‍ അതത് മത്സ്യഭവനുമായി ബന്ധപ്പെടണമെന്ന് പൊന്നാനി ഫിഷറീസ് ഡെപ്യൂട്ടി ഡയറക്ടര്‍ അറിയിച്ചു.

കേരള സ്റ്റേറ്റ് സ്‌പോര്‍ട്‌സ് കൗണ്‍സിലിന്റെ നേതൃത്വത്തില്‍ ഗവണ്‍മെന്റ് സ്‌കൂളുകളില്‍ യോഗ പരിശീലനത്തിന് ഇന്‍സ്ട്രക്ടര്‍മാരെ തെരെഞ്ഞെടുക്കുന്നു. യോഗ അസോസിയേഷന്‍ ഓഫ് കേരള നടത്തിയ യോഗ ഡിപ്ലോമ / അംഗീകൃത സര്‍വ്വകലാശാലയില്‍ നിന്ന് യോഗയില്‍ ഡിപ്ലോമ, 10-ാം ക്ലാസ്സ് ജയം,  ഒരു വര്‍ഷം പ്രവൃത്തി പരിചയം എന്നിവയാണ് യോഗ്യത. താല്‍പര്യമുള്ളവര്‍ ഒറിജിനല്‍ സര്‍ട്ടിഫിക്കറ്റ് സഹിതം  ജനുവരി 22 ന് രാവിലെ എട്ടിന് കേരള സ്റ്റേറ്റ് സ്‌പോര്‍ട്‌സ് കൗണ്‍സിലില്‍ കൂടിക്കാഴ്ചക്ക് എത്തണം. ഫോണ്‍ 0483 2734701